ସିବିଆଇ ପଞ୍ଝାରେ ଅରୁଣ, ଅତନୁ !

ଭୁବନେଶ୍ୱର: ପୁଣି ବୁଲିଲା ସିବିଆଇ ଚିଟଫଣ୍ଡ ଖଣ୍ଡା । ଚିଟଫଣ୍ଡ ମାମଲା ଉପରେ ଦୀର୍ଘ ଦିନ ଧରି ହାତବାନ୍ଧି ବସିଥିବା ସିବିଆଇ ସାଧାରଣ ନିର୍ବାଚନ ଅବ୍ୟବହିତ ପୂର୍ବରୁ ଚେଇଁ ଯାଇଛି । ଏଥର ଆଖିରେ ପଡ଼ିଛନ୍ତି ବିଜୁ ଜନତା ଦଳ ଦୁଇଜଣ ହସ୍ତୀ । ସେମାନେ ହେଉଛନ୍ତି ଅରୁଣ କୁମାର ସାହୁ ଏବଂ ଅତନୁ ସବ୍ୟସାଚୀ ନାୟକ । ଏହି ଦୁଇ ବିଧାୟକ ତଥା ପୂର୍ବତନ ମନ୍ତ୍ରୀ ଏବେ ଦଳର ସାଧାରଣ ସମ୍ପାଦକ ପଦବୀରେ ଗୁରୁତ୍ୱପୂର୍ଣ୍ଣ ଦାୟିତ୍ୱ ତୁଲାଉଛନ୍ତି । ଚିଟଫଣ୍ଡ ମାମଲାରେ ଉଭୟଙ୍କୁ ସିବିଆଇ ନୋଟିସ୍ ଜାରି ହୋଇଥିବା ଜାତୀୟ ସମ୍ବାଦ ସରବରାହ ସଂସ୍ଥା ଏଏନଆଇ ସୂତ୍ରରୁ ସୂଚନା ମିଳିଛି । ଗଣମାଧ୍ୟମରେ ଏହି ଖବର ଆସିବା ପରେ ରାଜ୍ୟ ରାଜନୀତିରେ ହଟଚମଟ ସୃଷ୍ଟି ହୋଇଛି ।

ଅରୁଣ ଓ ଅତନୁଙ୍କୁ ନୋଟିସ୍ ବାବଦରେ ସିବିଆଇ ପକ୍ଷରୁ ସିଧାସଳଖ ସୂଚନା ମିଳିନାହିଁ । ଖବର ଦେଇଥିବା ଏଏନଆଇ ସଂସ୍ଥା ମଧ୍ୟ ନିର୍ଦ୍ଦିଷ୍ଟ ଭାବରେ କେଉଁ ସଂସ୍ଥା ସହ ଉଭୟ ନେତାଙ୍କ ସଂପୃକ୍ତି ଅଛି ସେହି ସୂଚନା ଦେଇନାହିଁ । ତେବେ ସି-ସୋର ସଂସ୍ଥା ସହ ସେମାନଙ୍କ ସମ୍ପର୍କକୁ ନେଇ ସିବିଆଇ ନୋଟିସ୍ ହୋଇଥିବା ଚର୍ଚ୍ଚା ହେଉଛି । ଏଥିସହ ଚିଟଫଣ୍ଡ ମାମଲାରେ ପୁଳା ପୁଳା ବିଜେଡ଼ି ନେତାଙ୍କ ସଂପୃକ୍ତି ଅଭିଯୋଗକୁ ଏହା ଦାନା ଧରେଇଛି । ନିର୍ବାଚନ ଅସ୍ତ୍ର ପାଇଁ ବିରୋଧୀ ଶିବିରକୁ ଏହା ଭଲ ଖୋରାକି ହୋଇଥିବା ବେଳେ ବିଜେଡ଼ି ଶିବିରକୁ ଛନକା କରିଛି । ଚିଟଫଣ୍ଡ ମାମଲାରେ ପୂର୍ବରୁ ବିଜେଡ଼ିର ଅନେକ ନେତା ସିବିଆଇ ଜାଲରେ ପଡ଼ିସାରିଛନ୍ତି ।

ଅନ୍ୟପକ୍ଷରେ ଅରୁଣ ଓ ଅତନୁ ଏ ପର୍ଯ୍ୟନ୍ତ ସିବିଆଇ ନୋଟିସ୍ ପାଇନାହାନ୍ତି ବୋଲି ବିଜେଡ଼ି ପକ୍ଷରୁ ସଫେଇ ଦିଆଯାଇଛି । ଦଳର ମୁଖପାତ୍ର ଡ. ସସ୍ମିତ୍ ପାତ୍ର ଏକ ସାମ୍ବାଦିକ ସମ୍ମିଳନୀ କରି ଏହି ଖବରର ସତ୍ୟାସତ୍ୟ ସନ୍ଦେହ ଭିତରକୁ ନେଇଛନ୍ତି । ସଂପୃକ୍ତ ବ୍ୟକ୍ତି ଏ ପର୍ଯ୍ୟନ୍ତ ସିବିଆଇ ନୋଟିସ୍ ପାଇ ନ ଥିଲା ବେଳେ ଗଣମାଧ୍ୟମରେ ଖବର କିଭଳି ଆସିଲା ବୋଲି ପ୍ରଶ୍ନ କରିଛନ୍ତି । ସିବିଆଇକୁ ଟାର୍ଗେଟ୍ କରି ବିଜେଡ଼ି ମୁଖପାତ୍ର କହିଛନ୍ତି, ଏହି ସଂସ୍ଥାର ବିଶ୍ୱାସନୀୟତା କେଉଁଠି ପହଞ୍ଚିଛି ତାହା ସମସ୍ତେ ଜାଣିଛନ୍ତି । ନିର୍ବାଚନ ବିଜ୍ଞପ୍ତି ପାଇଁ ଆଉ ୩/୪ ମାସ ଥିଲା ବେଳେ ସିବିଆଇର ରାଜନୀତିକରଣ ପ୍ରକ୍ରିୟା ଆରମ୍ଭ ହୋଇଥିବା ସେ ଅଭିଯୋଗ କରିଛନ୍ତି ।