ଭୁବନେଶ୍ୱର: ରାଜ୍ୟର ତୃତୀୟ କରୋନା ଆକ୍ରାନ୍ତ ବ୍ୟକ୍ତିଙ୍କ ସଂସ୍ପର୍ଶରେ ସମୁଦାୟ ୧୧୨ ଜଣ ଆସିଛନ୍ତି । ଏମାନଙ୍କ ମଧ୍ୟରୁ ୯୭ ଜଣ ଚିହ୍ନଟ ହୋଇ ସାରିଥିଲେ ମଧ୍ୟ ୧୫ ଜଣ ଚିହ୍ନଟ ହୋଇପାରିନାହାନ୍ତି । ଚିହ୍ନଟଙ୍କ ମଧ୍ୟରୁ ଆଜି ୧୧ ଜଣଙ୍କ ନମୁନା ପରୀକ୍ଷା ପାଇଁ ପଠାଯାଇଥିଲା । ଜଣଙ୍କର ରିପୋର୍ଟ ନେଗେଟିଭ୍ ଆସିଥିବା ବେଳେ ଅନ୍ୟ ୧୦ ଜଣଙ୍କର ରିପୋର୍ଟକୁ ଅପେକ୍ଷା କରାଯାଇଛି ।
ରାଜ୍ୟ ସରକାରଙ୍କ କୋଭିଡ୍ ମୁକାବିଲା କମିଟି ମୁଖ୍ୟ ମୁଖପାତ୍ର ସୁବ୍ରତ ବାଗଚୀ ସାମ୍ବାଦିକ ସମ୍ମିଳନୀରେ ଏହି ତଥ୍ୟ ଦେଇଛନ୍ତି ।
ଶ୍ରା ବାଗଚୀଙ୍କ ସୂଚନା ଅନୁଯାୟୀ, ତୃତୀୟ କରୋନା ଆକ୍ରାନ୍ତ, ତାଙ୍କ ପତ୍ନୀ, ଝିଅ, ଡ୍ରାଇଭର ଏବଂ ସହାୟିକାଙ୍କ ସଂସ୍ପର୍ଶରେ ଆସିଥିବା ୧୧୨ ଜଣଙ୍କ ମଧ୍ୟରେ ଅଛନ୍ତି ଆକ୍ରାନ୍ତ କାମ କରୁଥିବା ବ୍ୟାଙ୍କର ୪୪ କର୍ମଚାରୀ, ବିଧାନସଭାର ୭, କ୍ଲିନିକ୍ ର ୨୧ ଓ ନମୁନା ସଂଗ୍ରହକାରୀ ୩ ଜଣ ବ୍ୟକ୍ତି । ଦିଲ୍ଲୀରୁ ଆସିଥିବା ଇଣ୍ଡିଗୋ ବିମାନର ୩୨ ଜଣ ଯାତ୍ରୀ ମଧ୍ୟ ତାଙ୍କ ସଂସ୍ପର୍ଶରେ ଆସିଥିଲେ ।
ଆଜି ମଧ୍ୟାହ୍ନ ସୁଦ୍ଧା ରାଜ୍ୟରେ ସମୁଦାୟ ୨୫୬ଟି ନମୁନା କୋଭିଡ୍-୧୯ ପରୀକ୍ଷା ପାଇଁ ପଠାଯାଇଥିଲା ବେଳେ ୨୨୬ ନମୁନାର ରିପୋର୍ଟ ଆସିଛି । କରୋନା ଆକ୍ରାନ୍ତଙ୍କ ସଂଖ୍ୟା ବଢ଼ିନି, ସେହି ୩ରେ ସୀମିତ ରହିଛି । ଚିକିତ୍ସିତ ହେଉଥିବା ଦୁଇ ଆକ୍ରାନ୍ତଙ୍କ ସ୍ୱାସ୍ଥ୍ୟାବସ୍ଥା ସ୍ଥିର ଏବଂ ଲକ୍ଷଣମୁକ୍ତ ଅଛନ୍ତି । ତୃତୀୟ ବ୍ୟକ୍ତିଙ୍କ ଅବସ୍ଥାରେ ଆଜି ଉନ୍ନତି ହୋଇଛି । ସମସ୍ତେ ହସ୍ପିଟାଲ୍ ରେ ସାଧାରଣ ଖାଦ୍ୟ ଖାଉଛନ୍ତି । ଅନ୍ୟପକ୍ଷରେ ୫୬ ଜଣ କରୋନା ସନ୍ଦିଗ୍ଧ ବିଭିନ୍ନ ହସ୍ପିଟାଲ୍ ରେ ଆଇସୋଲେସନ୍ ରେ ଅଛନ୍ତି ।
ଆଜି ପର୍ଯ୍ୟନ୍ତ ମୋଟ ୭୦୮୦ ଜଣ ଅନଲାଇନ୍ ଏବଂ ୧୦୪ ମାଧ୍ୟମରେ ପଞ୍ଜିକରଣ କରାଇଛନ୍ତି । ସେମାନଙ୍କ ମଧ୍ୟରୁ ୪୨୮୬ ବିଦେଶରୁ ଓ ୨୭୯୪ ଜଣ ଅନ୍ୟ ରାଜ୍ୟରୁ ଫେରିଛନ୍ତି ।
ବିିଶ୍ୱ ଓ ଦେଶର କରୋନା ସ୍ଥିତି ସମ୍ପର୍କରେ ସୂଚନା ଦେଇ ଶ୍ରା ବାଗଚୀ କହିଛନ୍ତି, କାଲି ସୁଦ୍ଧା ବିଶ୍ୱରେ ଆକ୍ରାନ୍ତଙ୍କ ସଂଖ୍ୟା ଥିଲା ୫ ଲକ୍ଷ ୩୭ ହଜାର ୧୭୫ । ଆଜି ଏହି ସଂଖ୍ୟା ୬ ଲକ୍ଷ ୧ ହଜାର ୫୨୦ ରେ ପହଞ୍ଚିଛି । ସେହିଭଳି କାଲି ସୁଦ୍ଧା ବିଶ୍ୱରେ ମୃତକଙ୍କ ସଂଖ୍ୟା ଥିଲା ୨୪,୧୨୬ । ଆଜି ଏହି ସଂଖ୍ୟା ୨୭,୪୪୧ ରେ ପହଞ୍ଚିଛି । କାଲି ସୁଦ୍ଧା ଭାରତରେ ଆକ୍ରାନ୍ତଙ୍କ ସଂଖ୍ୟା ଥିଲା ୭୫୩ । ଆଜି ଦେଶରେ ଆକ୍ରାନ୍ତଙ୍କ ସଂଖ୍ୟା ୯୦୮ ରେ ପହଞ୍ଚିଛି । କାଲି ସୁଦ୍ଧା ଦେଶରେ ମୃତ୍ୟୁ ସଂଖ୍ୟା ୨୦ ଥିଲା । ଆଜି ସେହି ୨୦ରେ ସ୍ଥିର ଅଛି ।
