ଭୁବନେଶ୍ୱର: ଧର୍ମେନ୍ଦ୍ର ପ୍ରଧାନଙ୍କ ବିଜେପି ଟିମ୍ ର ଫୋକସ୍ ରାଜ୍ୟ କଂଗ୍ରେସ ଉପରେ କେନ୍ଦ୍ରୀଭୂତ ହୋଇଛି । କଂଗ୍ରେସକୁ ନିଶ୍ଚିନ୍ନ କରିଦେବାକୁ ସେମାନେ ଯୋଜନା କରିଛନ୍ତି । ବିଜେଡ଼ି ସହ ୱାନ୍ ଟୁ ୱାନ୍ ଫାଇଟ୍ କରି ୧୨୦ ପ୍ଲସ୍ ଆସନ ହାତେଇବାକୁ ସେମାନଙ୍କର ଯୋଜନା । ଏହି ସୋଲ୍ ଯୋଜନାର ଶୁଭାରମ୍ଭ ହେଉଛି ୧୪ ତାରିଖରେ । ସେଦିନ ସ୍ୱର୍ଗତ ଲୁଲୁ ମହାପାତ୍ରଙ୍କ ପରିବାର ସମେତ କଂଗ୍ରେସର ଥାକେ ପୂର୍ବତନ ବିଧାୟକ ଓ ଜିଲ୍ଲାୱାରି ପ୍ରଭାବଶାଳୀ ନେତା ବିଜେପିରେ ମିଶିବେ । ଏହି ମିଶ୍ରଣ ପର୍ବ ନିରନ୍ତର କରିବାକୁ ଧର୍ମେନ୍ଦ୍ରଙ୍କ ଟିମ୍ ୨୪ ଘଣ୍ଟିଆ ଅପରେସନ୍ ଆରମ୍ଭ କରିଛନ୍ତି ।
ବିଶ୍ୱସ୍ତ ସୂତ୍ରର ଖବର ଅନୁଯାୟୀ, ବଡ଼ ସିଷ୍ଟମେଟିକ୍ ଢ଼ଙ୍ଗରେ ବିଜେପି ଏହି କାର୍ଯ୍ୟକ୍ରମ ହାତକୁ ନେଇଛି । ୧୪୭ ଟି ଯାକ ନିର୍ବାଚନମଣ୍ଡଳୀର ବଛା ବଛା କଂଗ୍ରେସ ନେତାଙ୍କ ତାଲିକା ବନାଯାଇଛି । ଧର୍ମେନ୍ଦ୍ରଙ୍କ କୋର୍ ଟିମ୍ ସଦସ୍ୟମାନେ ସେମାନଙ୍କ ସହ ଯୋଗସୂତ୍ର କରୁଛନ୍ତି । ସ୍ଥାନୀୟ ବିଜେପି ନେତାଙ୍କ ମାଧ୍ୟମରେ ପ୍ରାରମ୍ଭିକ ଆଲୋଚନା ପରେ ସଂପୃକ୍ତ କଂଗ୍ରେସ ନେତାଙ୍କୁ ସିଧା ଯାଇ ଭେଟୁଛନ୍ତି ଧର୍ମେନ୍ଦ୍ରଙ୍କ କୋର୍ ଟିମ୍ ସଭ୍ୟ । ସେହି କଂଗ୍ରେସ ନେତାଙ୍କୁ ଧର୍ମେନ୍ଦ୍ରଙ୍କ ସହ ଟେଲିଫୋନ୍ ରେ ସିଧାସଳଖ କଥାବାର୍ତ୍ତା କରାଇ ଦିଆଯାଉଛି । ‘ଆମ ଦଳକୁ ଆସନ୍ତୁ । ଆପଣଙ୍କୁ ସବୁ ପ୍ରକାର ସାହାଯ୍ୟ ସହଯୋଗ ଯୋଗାଇ ଦିଆଯିବ । କୌଣସିଥିରେ ଅସୁବିଧା କରାଯିବନି । କ’ଣ ଚାହୁଁଛନ୍ତି ସିଧାସଳଖ କୁହନ୍ତୁ’ । ନିଜେ ଧର୍ମେନ୍ଦ୍ର ଏଭଳି କଥା ହେଉଛନ୍ତି । ଆଉ ତାହାକୁ ଫଲୋ ଅପ୍ କରୁଛନ୍ତି କୋର୍ ଟିମ୍ । ଖୋଦ୍ ଧର୍ମେନ୍ଦ୍ରଙ୍କଠାରୁ ଲୋଭନୀୟ ପ୍ରତିଶ୍ରୁତି ପାଇଲା ପରେ ଅଲୋଡା ଓ ଅଣନିଶ୍ୱାସୀ କଂଗ୍ରେସ ନେତାଙ୍କ ମନ ବିଜେପି ଆଡକୁ ଢ଼ଳୁଥିବା ବିଭିନ୍ନ ଜିଲ୍ଲାରୁ ଖବର ମିଳିଛି ।
କଂଗ୍ରେସ ଭଙ୍ଗୁଆର ଥିଓରି ଧରି ବିଜେପି ଚତୁର ଖେଳ ଖେଳୁଛି । କଂଗ୍ରେସ ଦୁର୍ବଳ ହେଲେ ବିଜେପିର ଫାଇଦା । ଅଣ ବିଜେଡ଼ି ଭୋଟ ସିଧାସଳଖ ବିଜେପି ପାଖକୁ ଯିବ । କଂଗ୍ରେସ ଶକ୍ତିଶାଳୀ ହେଲେ ବିଜେଡ଼ି ବିରୋଧୀ ଭୋଟ କଂଗ୍ରେସ ଓ ବିଜେପି ମଧ୍ୟରେ ବାଣ୍ଟି ହୋଇଯିବ । ରାଜ୍ୟରେ କଂଗ୍ରେସର ସ୍ଥିତି ଯାହା ତାକୁ ଧୂଳିସାତ୍ କରିବାରେ ବେଶୀ କସରତ୍ ପଡ଼ିବ ନାହିଁ ବୋଲି ବିଜେପି ହିସାବ କରିଛି । ତେଣୁ ବିଜେଡ଼ି ଘର ଭାଙ୍ଗିବାରେ ଶକ୍ତି ନ ଖଟାଇ କଂଗ୍ରେସ ପଛରେ ସେତିକି ଶକ୍ତି ଖଟାଇଲେ ବିଜେପିକୁ ଜବରଦସ୍ତ ଫାଇଦା ଆସିବ ବୋଲି ଶାହା-ଧର୍ମେନ୍ଦ୍ର ଯୋଡି ବୁଦ୍ଧି ଖଟାଇଛନ୍ତି । ଅପ୍ରତିଦ୍ୱନ୍ଦୀ ନବୀନଙ୍କୁ ହଟାଇ ୧୨୦ ପ୍ଲସ୍ ହାସଲର ଏହା ହିଁ ଅସଲ ଚାବିକାଠି ବୋଲି ସେମାନେ ହୃଦୟଙ୍ଗମ କରିଛନ୍ତି । ଆଉ ସେହି ଅନୁଯାୟୀ କାର୍ଯ୍ୟକ୍ରମ ଆରମ୍ଭ ହୋଇଥିବା ବିଜେପିର ଜଣେ ତୁଙ୍ଗ ନେତା ସ୍ୱୀକାର କରିଛନ୍ତି ।
ପ୍ରାରମ୍ଭିକ ପର୍ଯ୍ୟାୟରେ ଅବିଭକ୍ତ ପୁରୀ,କଟକ,ଗଂଜାମ, କୋରାପୁଟ, କଳାହାଣ୍ଡିର ବହୁ ପ୍ରଭାବଶାଳୀ କଂଗ୍ରେସ ନେତା ବିଜେପି ଚକରରେ ପଡ଼ିସାରିଥିବା ଜଣାପଡ଼ିଛି । ପୂର୍ବତନ କଂଗ୍ରେସ ବିଧାୟକ ନିମାଇଁ ସରକାର, ଦୁଷ୍ମନ୍ତ ନାୟକ ସେମାନଙ୍କ ସମର୍ଥକଙ୍କ ସହ ଆସନ୍ତା ୧୪ ତାରିଖରେ ବିଜେପିରେ ମିଶୁଥିବା ଅସମର୍ଥିତ ସୂତ୍ରରୁ ଜଣାପଡ଼ିଛି । ୧୪ ତାରିଖରେ ସମ୍ଭବ ନ ହେଲେ ମଧ୍ୟ ଖୁବ୍ ଶୀଘ୍ର ସେମାନେ ବିଜେପିରେ ମିଶିବେ ବୋଲି ଖୋଦ୍ କଂଗ୍ରେସ ମହଲରୁ ଜଣାପଡ଼ିଛି ।