ଭୁବନେଶ୍ୱର: ବିଜେଡ଼ିର ଦବଙ୍ଗ ବିଧାୟକ ଭାବେ ପ୍ରଶାନ୍ତ ଜଗଦ୍ଦେବଙ୍କ ନାଁ ଅଛି । ଗତଥର ବିଧାୟକ ଥିଲେ । ଏଥର ବି ବିଧାୟକ ହୋଇଛନ୍ତି । ତେବେ ତାଙ୍କର ଗୁରୁ ହେଲା ଭଳିଆ ଲୋକ ଏଥର ବିଧାନସଭା ଆସିଛନ୍ତି । ପାଟଣାଗଡରୁ ପ୍ରଥମ ଥର ପାଇଁ ବିଧାୟକ ହୋଇଥିବା ସରୋଜ ମେହେରଙ୍କ ଦବଙ୍ଗଗିରି ଏବେ ସବୁଆଡ଼େ ଚର୍ଚ୍ଚାର ବିଷୟ ହୋଇଛି । ବିଜେପି ହେଭିୱେଟ୍ ତଥା ୫ ଥରିଆ ବିଧାୟକ କନକ ବର୍ଦ୍ଧନ ସିଂହଦେଓଙ୍କୁ ହରାଇ ବିଧାନସଭା ଆସିଥିବା ବିଜେଡ଼ିର ଏହି ବିଧାୟକ କ୍ଷମତାକୁ ବୁଝିବା ପୂର୍ବରୁ କ୍ଷମତାର ଚାବୁକ୍ ଧରିଛନ୍ତି । ବିଚ୍ ରାସ୍ତାରେ ସର୍ବସାଧାରଣଙ୍କ ସାମନାରେ ଜଣେ ଜେଇଙ୍କୁ କାନ ଧରି ବସ ଉଠ୍ କରାଇଛନ୍ତି । ନିମ୍ନମାନର ରାସ୍ତା ତିଆରି କରିଥିବାରୁ ଜେଇଙ୍କୁ ଏଭଳି ଶାସ୍ତି ଦେଇଛନ୍ତି ବିଧାୟକ ।
ପାଟଣାଗଡ଼ ନିର୍ବାଚନମଣ୍ଡଳୀର ବେଲପଡ଼ା ବ୍ଲକ୍ ଗମ୍ଭାରୀ ଗାଁରେ ଏକ ପିଚୁ ରାସ୍ତା ନିର୍ମାଣ ହେଉଥିଲା । କାମ ଅତି ନିମ୍ନମାନର ହେଉଥିବା ଗ୍ରାମବାସୀ ଅଭିଯୋଗ କରି ଗତକାଲି ବିଧାୟକଙ୍କ ନିକଟରେ ଫେରାଦ ହୋଇଥିଲେ । ରାସ୍ତା ନିର୍ମାଣ ଦାୟିତ୍ୱରେ ଥିବା ଜେଇ ଜୟକାନ୍ତ ଶିବିରଙ୍କୁ ବିଧାୟକ ଜାଗା ଉପରକୁ ଡାକିଥିଲେ । ଗ୍ରାମବାସୀଙ୍କ ସାମନାରେ ଜେଇଙ୍କୁ ପ୍ରବଳ ଗାଳିମନ୍ଦ କରି ସିଧା ଆକ୍ସନ୍ ମୁଡ଼ କୁ ଚାଲି ଆସିଥିଲେ । ୫ ମିନିଟ୍ ରେ ୧୦୦ ଥର କାନ ଧରି ବସ ଉଠ୍ ହେବାକୁ ଆଦେଶ ଦେଇଥିଲେ ବିଧାୟକ । ବିଧାୟକଙ୍କ ନାଲିଆଖିରେ ଜେଇ ଅତର୍ଚ୍ଛିଆ ହୋଇ ବସ ଉଠ୍ ହୋଇଥିଲେ । ବିଧାୟକଙ୍କ ଦ୍ୱାରା ଜେଇ କାନ ଧରି ବସ ଉଠ୍ ହେବାର ଦୃଶ୍ୟ ସୋସିଆଲ୍ ମିଡ଼ିଆକୁ ଆସିବା ପରେ ଭାଇରାଲ୍ ହୋଇଗଲା ।
ସୋସିଆଲ୍ ମିଡ଼ିଆ ଓ ଗଣମାଧ୍ୟମରେ ବିଧାୟକଙ୍କ ଉତ୍ପାତ ଓ ଅଭଦ୍ରାମୀ ପ୍ରସାରିତ ହେବା ପରେ ଚାରିଆଡୁ ସମାଲୋଚନା ହେଲା । ତର ସହିଲାନି ବିଧାୟକଙ୍କୁ । ନିଜର ଏଭଳି କାର୍ଯ୍ୟ ପାଇଁ ଦୁଃଖିତ କହିଦେଇ ପୂର୍ଣ୍ଣଚ୍ଛେଦ ଟାଣିବାକୁ ଉଦ୍ୟମ କରିଛନ୍ତି । ନିମ୍ନମାନର ରାସ୍ତା ପାଇଁ ଲୋକେ ତାତିକି ଥିଲେ ଏବଂ ଜେଇଙ୍କ ବିରୋଧରେ ତ୍ୱରିତ୍ କାର୍ଯ୍ୟନୁଷ୍ଠାନ ପାଇଁ ଅଡ଼ି ବସିଲେ । ପରିସ୍ଥିତି ଏଭଳି ହେଲା ଯେ ସେ ଜେଇଙ୍କୁ ଶାସ୍ତି ଦେଇ ନ ଥିଲେ ଲୋକେ ତାଙ୍କୁ ଆକ୍ରମଣ କରିଥାନ୍ତେ । ଏହା ହେଉଛି ଏବେ ଏବେ ମାନ୍ୟବର ହୋଇଥିବା ସରୋଜ ମେହେରଙ୍କ ସଫେଇ ।
ତେବେ ବିଧାୟକ ଦୁଃଖ ପ୍ରକାଶ କରି ସଫେଇ ଦେବା ପରେ ବି ଅଡୁଆ କମିବା ପରିବର୍ତ୍ତେ ବଢ଼ିଯାଇଛି । ଜେଇଙ୍କ ପତ୍ନୀ ଆଜି ପାଟଣାଗଡ଼ ଥାନାରେ ବିଧାୟକଙ୍କ ବିରୋଧରେ ଏତଲା ଦେଇଛନ୍ତି । ତାଙ୍କ ସ୍ୱାମୀଙ୍କୁ ବିଧାୟକ ଘରୁ ଅପହରଣ କରିନେଇଥିବା ଏବଂ ସର୍ବସାଧାରଣରେ ଜାତିଆଣ ଆକ୍ଷେପ କରି ୧୦୦ ଥର କାନଧରି ବସ ଉଠ୍ କରାଇଥିବା ସେ ଅଭିଯୋଗ କରିଛନ୍ତି । ପାଟଣାଗଡ଼ ପୁଲିସ ଏତଲାକୁ ଗ୍ରହଣ କରିଛନ୍ତି । ବିଧାୟକଙ୍କୁ ତୁରନ୍ତ ଗିରଫ କରିବାକୁ ବିଭିନ୍ନ ମହଲରୁ ଦାବି ହେଲାଣି ।
