୧୭,୯୨୦ ଭୋଟରେ ହାରିଲେ ବିଜୟ ମହାପାତ୍ର

ଭୁବନେଶ୍ୱର: ସାକାର ହୋଇପାରିଲାନି ବିଜୟ ମହାପାତ୍ରଙ୍କ ବିଧାନସଭା ରିଟର୍ଣ୍ଣ ସ୍ୱପ୍ନ । ପାଟକୁରାବାସୀ ତାଙ୍କୁ ପ୍ରତ୍ୟାଖ୍ୟାନ କରିଛନ୍ତି । ପାଟକୁରା ଆସନକୁ ପୁଣିଥରେ ଅକ୍ତିଆର କରିଛି ବିଜୁ ଜନତା ଦଳ । ୨୦ ତାରିଖରେ ଅନୁଷ୍ଠିତ ନିର୍ବାଚନ ଫଳାଫଳ ଆଜି ଆସିଛି । ବିଜେଡ଼ି ପ୍ରାର୍ଥୀ ସାବିତ୍ରୀ ଅଗ୍ରୱାଲ୍ ବିଜେପିରୁ ପ୍ରାର୍ଥୀ ଥିବା ବିଜୟ ମହାପାତ୍ରଙ୍କୁ ୧୭,୯୨୦ ଭୋଟରେ ପରାସ୍ତ କରିଛନ୍ତି । ନିଜ ଗଡ଼ ଗରଦପୁରରେ ମଧ୍ୟ ବିଜୟ ଭୋଟରଙ୍କ ଆସ୍ଥା ଜିଣିପାରିନାହାନ୍ତି । ବଡ଼କଥା ହେଉଛି, ନିକଟରେ ଅନୁଷ୍ଠିତ ସାଧାରଣ ନିର୍ବାଚନରେ ବିଜେପିର ଭୋଟ ହାରକୁ ବି ରକ୍ଷା କରିବାରେ ସମର୍ଥ ହୋଇନାହାନ୍ତି ବିଜୟ ମହାପାତ୍ର । କଂଗ୍ରେସର ଅବସ୍ଥା ନ କହିବା ଭଲ । ପ୍ରାର୍ଥୀ ଜୟନ୍ତ ମହାନ୍ତିଙ୍କର ଅମାନତ ଉଡ଼ିଯାଇଛି । ତାଙ୍କ ସପକ୍ଷରେ ପଡ଼ିଛି ମାତ୍ର ୨ ହଜାର ୧୦୪ ଭୋଟ ।

କିଏ କେତେ ଭୋଟ ପାଇଲେ

ସାବିତ୍ରୀ ଅଗ୍ରୱାଲ୍(ବିଜେଡ଼ି): ୯୬,୦୧୭
ବିଜୟ ମହାପାତ୍ର(ବିଜେପି): ୭୮,୦୯୭
ଜୟନ୍ତ ମହାନ୍ତି(କଂଗ୍ରେସ):୨,୧୦୪

ପାଟକୁରା ବିଧାନସଭା ନିର୍ବାଚନମଣ୍ଡଳୀରେ ଥିବା ତିନୋଟି ଯାକ ବ୍ଲକ୍ ଡେରାବିଶ, ଗରଦପୁର ଏବଂ ମାର୍ଶାଘାଇ ବ୍ଲକ୍ ରେ ବିଜେଡ଼ି ପ୍ରାର୍ଥୀ ସାବିତ୍ରୀ ଅଗ୍ରୱାଲ୍ ଅଧିକ ଭୋଟ ପାଇଛନ୍ତି । ନିଜ ଗଡ଼ ଗରଦପୁରରେ ବିଜୟ ମହାପାତ୍ର ପଛରେ ରହିଯାଇଛନ୍ତି । ଏପ୍ରିଲ୍ ୨୯ରେ ଅନୁଷ୍ଠିତ ନିର୍ବାଚନରେ ବିଜେପି ସାଂସଦ ପ୍ରାର୍ଥୀ ବୈଜୟନ୍ତ ପଣ୍ଡା ଏଠାରୁ ୧୮୦୦ରୁ ଅଧିକ ଭୋଟରେ ଆଗୁଆ ଥିଲେ । ମୋଟ ୧୯ ରାଉଣ୍ଡର ଭୋଟଗଣତି ମଧ୍ୟରୁ କେବଳ ୧୧ ଓ ୧୫ ତମ ରାଉଣ୍ଡରେ ବିଜୟ ମହାପାତ୍ର ସାମାନ୍ୟ ଅଗ୍ରଣୀ ଥିଲେ ମଧ୍ୟ ଅବଶିଷ୍ଟ ରାଉଣ୍ଡଗୁଡ଼ିକରେ ପଛରେ ରହିଯାଇଥିଲେ । ଗରଦପୁର ଭୋଟ ପଡ଼ିଥିବା ୧୧ତମ ରାଉଣ୍ଡରେ ବିଜୟ ମାତ୍ର ୨୩୧ ଭୋଟରେ ଆଗୁଆ ଥିଲେ । ସେହିଭଳି ମାର୍ଶାଘାଇ ଭୋଟ ପଡ଼ିଥିବା ୧୫ତମ ରାଉଣ୍ଡରେ ବିଜୟ ମାତ୍ର ୨୪୭ ଭୋଟରେ ଆଗୁଆ ଥିଲେ ।

ଏପ୍ରିଲ୍ ୨୯ ନିର୍ବାଚନରେ ଗରଦପୁରର ୧୮ ଟି ପଞ୍ଚାୟତ ଏବଂ ମାର୍ଶାଘାଇର ୭ଟି ପଞ୍ଚାୟତରୁ ବିଜେପି ସାଂସଦ ପ୍ରାର୍ଥୀ ପାଖାପାଖି ୩ ହଜାର ଅଧିକ ଭୋଟ ପାଇଥିଲା ବେଳେ ଡେରାବିଶ ବ୍ଲକ୍ ର ୨୬ ପଞ୍ଚାୟତରେ ବିଜେଡ଼ି ପାଇଥିଲା ପାଖାପାଖି ୯ ହଜାର ଅଧିକ ଭୋଟ । ମୋଟ ଉପରେ ଦେଖିଲେ, ବିଜେଡ଼ି-ବିଜେପି ଭୋଟ ବ୍ୟବଧାନ ରହିଥିଲା ୬ ହଜାର ୩୨୩ । ହେଲେ ମାସେ ପରେ ହୋଇଥିବା ବିଧାନସଭା ନିର୍ବାଚନରେ ବିଜେଡ଼ି ୩ ଗୁଣା ଭୋଟ ବ୍ୟବଧାନରେ ବିଜେପିକୁ ହରାଇଛି । ବିଜେପି କି ବିଜୟ ମହାପାତ୍ରଙ୍କୁ ଭୋଟର ଗ୍ରହଣ କରିନାହାନ୍ତି ।

ଉଲ୍ଲେଖଯୋଗ୍ୟ, ସାଧାରଣ ନିର୍ବାଚନ ପାଇଁ ପାଟକୁରା ବିଧାନସଭା ଆସନରୁ ବେଦପ୍ରକାଶ ଅଗ୍ରୱାଲ୍ ଙ୍କୁ ବିଜେଡ଼ି ପ୍ରାର୍ଥୀ କରିଥିଲା । ନିର୍ବାଚନର ୬ ମାସ ପୂର୍ବରୁ ବିଜେପିରୁ ଦୂରେଇ ଯାଇଥିବା ବିଜୟ ମହାପାତ୍ର ପୁଣି ଥରେ ବିଜେପିକୁ ଫେରିବା ପରେ ଏଠାରୁ ପ୍ରାର୍ଥୀ ହୋଇଥିଲେ । ତେବେ ବେଦପ୍ରକାଶଙ୍କ ମୃତ୍ୟୁ ଯୋଗୁଁ ସେଠାରେ ନିର୍ବାଚନ ସ୍ଥଗିତ ରହି ମେ ୧୯ ତାରିଖରେ ଧାର୍ଯ୍ୟ କରାଯାଇଥିଲା । ତେବେ ଫନି ବାତ୍ୟା ଯୋଗୁଁ ନିର୍ବାଚନ ପୁଣି ଘୁଞ୍ଚି ଥିଲା ଜୁଲାଇ ୨୦କୁ । ବେଦପ୍ରକାଶଙ୍କ ଜାଗାରେ ତାଙ୍କ ପତ୍ନୀ ସାବିତ୍ରୀଙ୍କୁ ପ୍ରାର୍ଥୀ କରି ବିଜେଡ଼ି ବିଜୟଙ୍କୁ ମୁକାବିଲା କରିଥିଲା ।

ବିଜୟ ମହାପାତ୍ରଙ୍କ ବିଧାନସଭା ପ୍ରବେଶକୁ ରୋକ୍ ଲଗାଇବାରେ ସମର୍ଥ ରହି ଆସିଥିବା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏଥର ବି ସମାନ ଗୋଟିଚାଳନା କରିଥିଲେ । ତାଙ୍କ ନିର୍ଦ୍ଦେଶରେ ୭ ଜଣ ମନ୍ତ୍ରୀ ଓ ଦୁଇଡର୍ଜନରୁ ଅଧିକ ବିଧାୟକ ନିର୍ବାଚନର ମାସକ ପୂର୍ବରୁ ପାଟକୁରାର ବିଭିନ୍ନ ପଞ୍ଚାୟତରେ ଡେରା ପକାଇ ଦଳୀୟ ପ୍ରାର୍ଥୀଙ୍କୁ ଜିତାଇବା ପାଇଁ ଅକ୍ଲାନ୍ତ ପରିଶ୍ରମ କରିଥିଲେ । ନିଜେ ମୁଖ୍ୟମନ୍ତ୍ରୀ ପ୍ରଚାର ପାଇଁ ଯାଇଥିଲେ ଏବଂ ପାଟକୁରା ଦାୟିତ୍ୱ ତାଙ୍କର ବୋଲି ଭୋଟରଙ୍କୁ ପ୍ରତିଶ୍ରୁତି ଦେଇ ଫେରିଥିଲେ ।

ଅନ୍ୟପକ୍ଷରେ ବିଜୟ ମହାପାତ୍ର ସ୍ୱାଭିମାନର ନାରା ଦେଇ ଲୋକଙ୍କ ଭୋଟ ପାଇବାକୁ ସଂଗ୍ରାମ ଚଳାଇଥିଲେ ମଧ୍ୟ ଦଳୀୟ ସମର୍ଥନ ସେଇଭଳି ପ୍ରଭାବୀ ନ ଥିଲା । ଧର୍ମେନ୍ଦ୍ର ପ୍ରଧାନ, ପ୍ରତାପ ଷଡ଼ଙ୍ଗୀ, ଅପରାଜିତା ଷଡ଼ଙ୍ଗୀ, ସମ୍ବିତ ପାତ୍ରଙ୍କ ଭଳି ନେତା ଷ୍ଟାର ପ୍ରଚାରକରେ ନିଜକୁ ସୀମିତ ରଖିଦେଇଥିଲେ । ତୃଣମୂଳସ୍ତରରେ ଭୋଟରଙ୍କୁ ସାଙ୍ଗରେ ରଖି ନିର୍ବାଚନ ଲଢ଼ିବାକୁ ବିଜେପି ନେତାଙ୍କ ମଧ୍ୟରେ ସେଭଳି ଉଦ୍ୟମ ଦେଖିବାକୁ ମିଳି ନ ଥିଲା । ନିଜେ ବିଜୟ ମହାପାତ୍ର ଭୋଟରଙ୍କ ସହାନୁଭୂତ ଆଶା କରି ନିର୍ବାଚନରେ ନିଶ୍ଚିତ ଜିତିବେ ବୋଲି ଆଶା ବାନ୍ଧି ଦେଇଥିଲେ । ମାତ୍ର ତାହା ବାସ୍ତବତାଠାରୁ ଯେ ବହୁଦୂରରେ ତାହା ଆଜି ପ୍ରମାଣିତ ହୋଇଛି । ନବୀନ ପଟ୍ଟନାୟକଙ୍କ କରିସ୍କା ତାଙ୍କର ଶେଷ ଆଶାକୁ ଧୂଳିସାତ୍ କରିଦେଇଛି ।