-ରାହୁଲ ଗାନ୍ଧୀ କଂଗ୍ରେସ ସଭାପତି ଘୋଷିତ
-୧୬ ତାରିଖରେ ନେବେ ଦାୟିତ୍ୱ
ନୂଆଦିଲ୍ଲୀ: ୧୯ ବର୍ଷ ପରେ ଜାତୀୟ କଂଗ୍ରେସ ନୂଆ ନେତୃତ୍ୱ ପାଇଛି । କଂଗ୍ରେସର ସଭାପତି ଭାବେ ରାହୁଲ ଗାନ୍ଧୀ ନିଦ୍ୱର୍ନ୍ଦରେ ନିର୍ବାଚିତ ହୋଇଛନ୍ତି । ମାଆ ସୋନିଆଙ୍କଠାରୁ ଦଳର ମୁଖିଆ ଦାୟିତ୍ୱ ସମ୍ଭାଳିବେ ୪୭ ବର୍ଷୀୟ ରାହୁଲ । ଆଜି ପ୍ରାର୍ଥୀପତ୍ର ପ୍ରତ୍ୟାହାର ଶେଷ ଦିନରେ ରାହୁଲଙ୍କ ନାଁ ଘୋଷଣା କରିଛନ୍ତି ଏଆଇସିସି ରିଟର୍ଣ୍ଣିଂ ଅଫିସର ଏମ.ରାମଚନ୍ଦ୍ରନ୍ । ଆସନ୍ତା ୧୬ ତାରିଖ ଦିନ ୧୧ଟା ବେଳେ ୨୪ ଆକବର ରୋଡସ୍ଥିତ ଦଳର ମୁଖ୍ୟ କାର୍ଯ୍ୟାଳୟରେ ଏକ ସମାରୋହରେ ରାହୁଲ ବିଧିବଦ୍ଧ ଭାବେ ଦାୟିତ୍ୱ ନେବେ । ଏଥିସହ କଂଗ୍ରେସରେ ଆରମ୍ଭ ହେବ ରାହୁଲ ଯୁଗ ।
କଂଗ୍ରେସର ୧୬ତମ ସଭାପତି ଭାବେ ରାହୁଲଙ୍କ ନାଁ ଘୋଷଣା ହେବା ପରେ ଦଳୀୟ ନେତା ଓ କର୍ମୀଙ୍କ ମଧ୍ୟରେ ବେଶ୍ ଉତ୍ସାହ ସୃଷ୍ଟି ହୋଇଛି । ବିଭିନ୍ନ ବର୍ଗର ନେତା ରାହୁଲଙ୍କୁ ଅଭିନନ୍ଦନ ଜଣାଇଛନ୍ତି । ତାଙ୍କ ନେତୃତ୍ୱରେ ଦଳ ଶକ୍ତିଶାଳୀ ହେବ ବୋଲି ଆଶା କରିଛନ୍ତି । କଂଗ୍ରେସ ମଙ୍ଗ ଧରିବା ପୂର୍ବରୁ ଗୁଜରାଟ ନିର୍ବାଚନରେ ରାହୁଲ ତାଙ୍କର କରିସ୍ମା ଦେଖାଇଛନ୍ତି । ଦେଶ ତାଙ୍କଠାରୁ ଅନେକ ଆଶା ରଖିଛି ବୋଲି ଦଳର ବରିଷ୍ଠ ନେତା ଗୁଲାମନବୀ ଆଜାଦ କହିଛନ୍ତି । ଗୁଜୁରାଟ ନିର୍ବାଚନ ଫଳାଫଳ ଘୋଷଣାର ଦୁଇଦିନ ପୂର୍ବରୁ ରାହୁଲ କଂଗ୍ରେସର ମୁଖିଆ ଦାୟିତ୍ୱ ନେଉଥିବାରୁ ସମସ୍ତଙ୍କ ନଜର ଏବେ ତାଙ୍କ ଉପରେ କେନ୍ଦ୍ରୀଭୂତ ହୋଇଛି । ଗତ ୨୦୧୪ ସାଧାରଣ ନିର୍ବାଚନରେ ରାହୁଲ ନିଜ ମାଆଙ୍କ ନେତୃତ୍ୱରେ କଂଗ୍ରେସ ପାଇଁ ମୈଦାନକୁ ଓହ୍ଲାଇଥିଲେ ମଧ୍ୟ ନରେନ୍ଦ୍ର ମୋଦିଙ୍କ ନେତୃତ୍ୱକୁ ସାମନା କରିପାରି ନ ଥିଲେ । ଦେଶର ଭାବୀ ପ୍ରଧାନମନ୍ତ୍ରୀ ଭାବେ କଂଗ୍ରେସ ତାଙ୍କୁ ଉପସ୍ଥାପିତ କରି ବିଫଳତାର ସ୍ୱାଦ ଚାଖିଥିଲା । ରାଜନୀତିରେ ଓ ଦେଶର ନେତୃତ୍ୱ ପାଇଁ ସେ ଅପରିପକ୍ୱ ବୋଲି ବିରୋଧୀମାନେ ସମାଲୋଚନା କରିଥିଲେ ।
ତେବେ ଏଇ କିଛିମାସ ହେଲା ରାହୁଲଙ୍କ ବ୍ୟକ୍ତିତ୍ୱ ଓ ନେତୃତ୍ୱରେ ବିରାଟ ପରିବର୍ତ୍ତନ ଦେଖିବାକୁ ମିଳିଛି । ନରେନ୍ଦ୍ର ମୋଦିଙ୍କୁ ସାମନା କରିବାର କୌଶଳ ହାତେଇ ପାରିଛନ୍ତି । ଗୁଜୁରାଟ ନିର୍ବାଚନ ପ୍ରଚାରରେ ରାହୁଲ ଏହାର ଝଲକ ଦେଖାଇଛନ୍ତି । ମୋଦି ଓ ତାଙ୍କ ବିଜେପିକୁ ସେ ବେଶ୍ ଚତୁର ଓ ଶାଣିତ ଢ଼ଙ୍ଗରେ ଆକ୍ରମଣ ଜାରି ରଖିଛନ୍ତି । ପୂର୍ବରୁ ସେ ଯେଉଁ ଭୁଲ୍ କରୁଥିଲେ ତାହାକୁ ଯଥେଷ୍ଟ ସୁଧାରି ନେଇଥିବା ତାଙ୍କ କାର୍ଯ୍ୟଶୈଳୀରୁ ଜଣାପଡୁଛି । ସାରା ଦେଶରେ ନିଜର କ୍ରେଜ୍ ବଢ଼ାଇବାରେ ରାହୁଲ ସକ୍ଷମ ହୋଇଛନ୍ତି ।
ଗୁଜୁରାଟ ନିର୍ବାଚନ ଫଳାଫଳ ଉପରେ ରାହୁଲଙ୍କ ଭବିଷ୍ୟତ ଅନେକମାତ୍ରାରେ ନିର୍ଭର କରୁଥିବା ରାଜନୈତିକ ବିଶାରଦମାନେ ବିଚାର କରୁଛନ୍ତି । ଆଗକୁ ସାଧାରଣ ନିର୍ବାଚନ ଥିବାରୁ ଗୁଜୁରାଟ ଫଳାଫଳ ତାହାକୁ ନିର୍ଣ୍ଣାୟକ ମୋଡ ଦେବ ବୋଲି ସେମାନଙ୍କ ମତ । ତେବେ ଗାନ୍ଧୀ ପରିବାରର ଏହି ଜୁନିୟରଙ୍କ ସର୍ବୋଚ୍ଚ ପଦକୁ ଉତଥାନ ବଂଶାନୁକ୍ରମ ରାଜନୀତି ବୋଲି ଖୋଦ୍ ଦଳ ଭିତରେ କିଛି ନେତା ସମାଲୋଚନା କରିଛନ୍ତି । ଦଳରେ ଗଣତନ୍ତ୍ର ନାହିଁ ବୋଲି ସେମାନେ ଆକ୍ଷେପ କରିଛନ୍ତି । ତେବେ କଂଗ୍ରେସ ରାଜନୀତିରେ ଏହା ଗ୍ରହଣୀୟ ହୋଇପାରିନାହିଁ । ବରଂ ରାହୁଲଙ୍କ ଯୁବ ନେତୃତ୍ୱ ଉପରେ ଦଳର ବରିଷ୍ଠ ନେତାମାନେ ଅଧିକ ଆଶାବାଦୀ ହୋଇଛନ୍ତି । ଗୁଜୁରାଟ୍ ରେ ମୋଦିଙ୍କୁ ରାହୁଲ କଡା ଟକ୍କର ଦେଉଥିବାରୁ ଦେଶର ରାଜନୈତିକ ଦୃଶ୍ୟପଟକୁ ଏବେ ସମସ୍ତଙ୍କ ଅପେକ୍ଷା ।
