ପାଣିଗ୍ରାହୀଙ୍କ ଘରୁ ଦେଢ଼ କିଲୋ ସୁନା, ୨୪ ଲକ୍ଷିଆ ନେକଲେସ୍ ଜବତ

ଭୁୁବନେଶ୍ୱର: ଗୋପାଳପୁର ବିଧାୟକ ପ୍ରଦୀପ ପାଣିଗ୍ରାହୀଙ୍କ ଘରୁ ବିପୁଳ ସମ୍ପତ୍ତି ଠାବ କରିଛି ଭିଜିଲାନସ୍ । ତା’ ଭିତରେ ରହିଛି ପ୍ରାୟ ଦେଢ଼ କିଲୋ(୧୪୪୦ ଗ୍ରାମ୍) ସୁନା ଏବଂ ୨୪.୨୫ ଲକ୍ଷ ଦାମ୍ ର ନେକଲେସ୍ । ଏହି ନେକଲେସ୍ ଟି ସବ୍ୟସାଚୀ ବ୍ରାଣ୍ଡ ଡିଜାଇନର । ଭିଜିଲାନସ୍ ଅଧିକାରୀମାନେ ଏହାକୁ ଜବତ କରିଛନ୍ତି । ବେଆଇନ୍ ସମ୍ପତ୍ତି ଏବଂ ଉକ୍ତ ସୁନାଗହଣା ଆଟାଚ୍ କରିବା ପାଇଁ ପଦକ୍ଷେପ ନିଆଯାଉଛି । ବିଧାୟକ ଓ ତାଙ୍କ ପରିବାରର ସବୁ ବ୍ୟାଙ୍କ ଆକାଉଣ୍ଟକୁ ଅଚଳ କରିବା ପାଇଁ ମଧ୍ୟ ପଦକ୍ଷେପ ନିଆଯାଉଥିବା ଭିଜିଲାନସ୍ ପକ୍ଷରୁ କୁହାଯାଇଛି ।

ବିଧାୟକ ଓ ତାଙ୍କ ସହଯୋଗୀଙ୍କର ଭୁବନେଶ୍ୱର, ବ୍ରହ୍ମପୁରର ୧୫ ଟି ଜାଗାରେ ଭିଜିଲାନସ୍ ପକ୍ଷରୁ ଚାଲିଥିବା ମାରାଥନ୍ ରେଡ୍ ଶେଷ ହୋଇଛି । ଗତକାଲି ସକାଳ ୬ଟାରୁ ରେଡ୍ ଆରମ୍ଭ ହୋଇଥିଲା । ଭୁବନେଶ୍ୱରର ୟୁନିଟ୍-୬ ରେ ଥିବା ବିଧାୟକଙ୍କ ସରକାରୀ ବାସଭବନରୁ ଭିଜିଲାନସ୍ ଟିମ୍ ଆଜି ସକାଳ ୬ଟାରେ ଯାଇ ବାହାରିଥିଲେ । ବିଧାୟକଙ୍କ ପାଖରେ ୫ କୋଟି ୫ ଲକ୍ଷ ୫ ହଜାର ୬୫୬ ଟଙ୍କାର ବେଆଇନ ସମ୍ପତ୍ତି ଥିବା ଗୁପ୍ତ ଅନୁସନ୍ଧାନରୁ ଜଣାପଡ଼ିବା ପରେ ଲୋକାୟୁକ୍ତଙ୍କ ନିର୍ଦ୍ଦେଶରେ ଏହି ରେଡ୍ ହୋଇଥିଲା ।

ଚଢ଼ଉ ବେଳେ ଅନେକ ଗୁରୁତ୍ୱପୂର୍ଣ୍ଣ କାଗଜପତ୍ର ଜବତ ହୋଇଛି । ସେଥିରେ ଅଛି ଜମି କିଣା ଓ ବ୍ୟାଙ୍କ ଦସ୍ତାବିଜ୍ । ଭିଜିଲାନସ୍ ବିଭାଗର ଅର୍ଥନୈତିକ ଉଇଙ୍ଗ୍, ପ୍ରଫେସନାଲ୍ ଚାଟାର୍ଡ ଆକାଉଣ୍ଟାଣ୍ଟ ଏବଂ ବ୍ୟାଙ୍କି କନସଲଟାଣ୍ଟଙ୍କ ଦ୍ୱାରା ଏହାର ପରୀକ୍ଷା ନିରୀକ୍ଷା ପାଇଁ ପଠାଯାଉଛି । ସେହିଭଳି ଜବତ ଅନ୍ୟାନ୍ୟ କାଗଜପତ୍ର, କ୍ରେଡିଟ୍/ଡେବିଟ୍ କାର୍ଡ, ଲାପଟପ, ମୋବାଇଲ୍ ସବୁକୁ ଭିଜିଲାନସ ସାଇବର ସେଲ୍ ଦ୍ୱାରା ପରୀକ୍ଷା କରାଯିବ ।

ମାମଲାରେ ସଂପୃକ୍ତ ଆଉ କିଛି ସାକ୍ଷୀ, ଅଭିଯୁକ୍ତଙ୍କୁ ପର୍ଯ୍ୟାୟକ୍ରମେ ତଦନ୍ତ ପରିସରଭୁକ୍ତ କରିବାକୁ ଯୋଜନା କରାଯାଇଛି । ତଦନ୍ତ ଜାରି ରହିଥିବାରୁ ବିଧାୟକଙ୍କ ବେଆଇନ ସମ୍ପତ୍ତିର ଟିକନିକ୍ ହିସାବ ଦିଆଯାଇ ନ ଥିବା ଜଣେ ତଦନ୍ତକାରୀ ଅଧିକାରୀ କହିଛନ୍ତି ।