ମମିତା ମେହେରଙ୍କୁ ମାରି ପୋତି ଦିଆଯାଇଛି !

ଭୁବନେଶ୍ୱର/ଭବାନୀପାଟଣା: ମହାଲିଙ୍ଗ ସନସାଇନ୍ ପବ୍ଲିକ୍ ସ୍କୁଲ ଅଧ୍ୟକ୍ଷା ମମିତା ମେହେରଙ୍କୁ ସମ୍ଭବତଃ ହତ୍ୟା କରାଯାଇଛି । ସ୍କୁଲ ଠାରୁ ମାତ୍ର ଦେଢ଼ କିଲୋମିଟର ଦୂରରେ ଥିବା ମହାଲିଙ୍ଗ ନୋଡାଲ୍ ହାଇସ୍କୁଲ ପଡ଼ିଆ ନିର୍ମାଣାଧୀନ ମିନି ଷ୍ଟାଡିୟମ୍ ରେ ତାଙ୍କୁ ମାରି ପୋତି ଦିଆଯାଇଥିବା ସନ୍ଦେହ କରାଯାଉଛି । ମୁଖ୍ୟ ଅଭିଯୁକ୍ତ ସ୍କୁଲ ମାଲିକ ଗୋବିନ୍ଦ ସାହୁଙ୍କ ଜଣେ କର୍ମଚାରୀଙ୍କ ବୟାନ ଆଧାରରେ ପୁଲିସ ଆଜି ସକାଳୁ ସେହି ଜାଗାରେ ଜେସିବି ଲଗାଇ ଖୋଳାଖୋଳି ଆରମ୍ଭ କରିଛି । ଜଣେ ମାଜିଷ୍ଟ୍ରେଟ୍ ଙ୍କ ଉପସ୍ଥିତି ଏବଂ ଜଣେ ଅତିରିକ୍ତ ଏସପି, ଦୁଇଜଣ ଡିଏସପିଙ୍କ ନେତୃତ୍ୱରେ ଦୁଇ ପ୍ଲାଟୁନ୍ ପୁଲିସ ସମଗ୍ର ଅଞ୍ଚଳକୁ ଘେରି ରହିଛନ୍ତି ।

କଳାହାଣ୍ଡି ଜିଲ୍ଲା ମହାଲିଙ୍ଗ ସନସାଇନ୍ ପବ୍ଲିକ୍ ସ୍କୁଲ ଅଧ୍ୟକ୍ଷା ମମିତା ମେହେର ନିଖୋଜ ମାମଲା ସାରା ରାଜ୍ୟରେ ଆଲୋଡ଼ନ ସୃଷ୍ଟି କରିଛି । ସ୍କୁଲ ମାଲିକ ଗୋବିନ୍ଦ ସାହୁ ପୁଲିସ ବାରାକ୍ ରୁ ଚମ୍ପଟ ମାରିବା ଏବଂ ମନ୍ତ୍ରୀ ଦିବ୍ୟଶଙ୍କର ମିଶ୍ରଙ୍କ ଛତ୍ରଛାୟାରେ ଘଟଣା ଘଟିବାର ଅଭିଯୋଗ ମାମଲାକୁ ଜଟିଳ ମୋଡ଼ ଦେଇଛି । ଖାଲି ସେତିକି ନୁହେଁ, ସଂପୃକ୍ତ ସ୍କୁଲରେ ଯୌନ କେଳେଙ୍କାରୀ ଚାଲିଥିବା ଏବଂ ତାହା ଖୋଲିଦେବାର ଧମକ ଦେଇଥିବାରୁ ମମିତାଙ୍କୁ ଅପହରଣ କରାଯିବା ଅଭିଯୋଗ ମାମଲାକୁ ଅଧିକ ଗମ୍ଭୀର କରିଛି ।

ବଲାଙ୍ଗୀର ଜିଲ୍ଲା ତୁରେକଲା ଗ୍ରାମର ଝିଅ ହେଉଛନ୍ତି ମମିତା ମେହେର । କଳାହାଣ୍ଡି ଜିଲ୍ଲା ଗୋଲାମୁଣ୍ଡା ବ୍ଲକ୍ ର ମହାଲିଙ୍ଗ ଗ୍ରାମରେ ଥିବା ଗୋବିନ୍ଦ ସାହୁଙ୍କ ସନସାଇନ୍ ପବ୍ଲିକ୍ ସ୍କୁଲର ଅଧ୍ୟକ୍ଷା ଭାବେ ଚାକିରି କରିଥିଲେ । ଗତ ୮ ତାରିଖରେ ସ୍କୁଲ ମାଲିକ ଶ୍ରୀ ସାହୁ ମମିତାଙ୍କୁ ଫୋନ୍ କରି ସ୍କୁଲର କାଗଜପତ୍ର କାମ ଅଛି ବୋଲି ଆସିବାକୁ କହିଥିଲେ । ତେଣୁ ସେହିଦିନ ମମିତା କଣ୍ଟାବାଞ୍ଜିରୁ ବସ୍ ରେ ଯାଇ ଚାନେ୍ଦାତରାଠାରେ ଓହ୍ଲାଇଥିଲେ । ସେଠାରେ ଆଗରୁ ଅପେକ୍ଷା କରିଥିବା ଗୋବିନ୍ଦ ସାହୁ ତାଙ୍କ ମାରୁତି ୱାଗନର କାର୍( ଓଡ଼ି ୦୮ କେ ୧୦୦୨) ରେ ମମିତାଙ୍କୁ ଭବାନୀପାଟଣା ଆଣିଥିବା କୁହାଯାଉଛି ।

ତେବେ ତା’ ପରଠାରୁ ମମତାଙ୍କ ସହ ଘର ଲୋକଙ୍କ ଯୋଗାଯୋଗ ହୋଇପାରି ନ ଥିଲା ଏବଂ ମମତା ନିଖୋଜ ହୋଇଯାଇଥିବା ତାଙ୍କ ପରିବାର ଲୋକ ୧୨ ତାରିଖରେ ସିନେ୍ଧକେଲା ଥାନାରେ ଅଭିଯୋଗ କରିଥିଲେ ।

୧୩ ତାରିଖ ଦିନ ବଲାଙ୍ଗୀର ପୁଲିସ ସ୍କୁଲ ମାଲିକ ଗୋବିନ୍ଦ ସାହୁଙ୍କୁ ଉଠାଇ ଆଣିଥିଲା ଏବଂ ତାଙ୍କ ବିରୋଧରେ ଆଇପିସି ୩୬୬ ଧାରାରେ ମାମଲା ରୁଜୁ କରି ତଦନ୍ତ କରୁଥିଲା । ତେବେ ତାଙ୍କୁ କୋର୍ଟ ଚାଲାଣ ନ କରି ୪ ଦିନ ଧରି ଟିଟିଲାଗଡ଼ ଥାନା ପଛପଟେ ଥିବା ପୁଲିସ ବାରାକ୍ ରେ ଅଟକ ରଖି କୁଆଡ଼େ ଜେରା କରୁଥିଲା । ରବିବାର ରାତିରେ ବାରାକ୍ ରେ ହଠାତ୍ ଲାଇନ୍ କଟିଗଲା ଏବଂ ସେହି ସମୟରେ ଗୋବିନ୍ଦ ବାରାକ୍ ବାଡ଼ ଡ଼େଇଁ ଚମ୍ପଟ୍ ମାରିଥିବା କୁହାଯାଉଛି ।

ଗୋବିନ୍ଦ ସାହୁ ଫେରାର୍ ପଛରେ ଗୃହ ରାଷ୍ଟ୍ରମନ୍ତ୍ରୀ କ୍ୟାପେଟନ୍ ଦିବ୍ୟଶଙ୍କର ମିଶ୍ରଙ୍କର ହାତ ଥିବାର ଅଭିଯୋଗ ଆସିବା ପରେ ମାମଲା ସାଂଘାତିକ ମୋଡ଼ ନେଇଛି । ଦିବ୍ୟଶଙ୍କରଙ୍କ ସହ ଗୋବିନ୍ଦଙ୍କ ଘନିଷ୍ଠତାର ଗୋଟିଏ ପରେ ଗୋଟିଏ ପ୍ରମାଣ ଏବେ ପଦାକୁ ଆସିବାରେ ଲାଗିଛି । ସେମାନଙ୍କ ମଧ୍ୟରେ ଘନିଷ୍ଠତା ଏଭଳି ଥିଲା ଯେ ମନ୍ତ୍ରୀଙ୍କୁ ଯେତେବେଳେ ଚାହୁଁଥିଲେ ଗୋବିନ୍ଦ ତାଙ୍କ ସ୍କୁଲ/ କଲେଜକୁ ଡାକି ଆଣୁଥିଲେ । ଅଧିକାଂଶ ସମୟ ସେଠାରେ ଭୋଜିଭାତ ଆସରରେ ମନ୍ତ୍ରୀ ଯୋଗଦେଉଥିବା ଅଞ୍ଚଳବାସୀଙ୍କଠାରୁ ଜଣାପଡ଼ିଛି ।

ଦିବ୍ୟଶଙ୍କରଙ୍କ ସହ ଘନିଷ୍ଠ ସମ୍ପର୍କରୁ ଅନ୍ୟ ମନ୍ତ୍ରୀ ଓ ପ୍ରଭାବଶାଳୀ ବ୍ୟକ୍ତିମାନେ ମଧ୍ୟ ଗୋବିନ୍ଦଙ୍କ ଅନୁଷ୍ଠାନକୁ ମୁଣ୍ଡରେ ବସାଇଥିଲେ । ଦିବ୍ୟଶଙ୍କରଙ୍କ ଅନୁରୋଧରେ ମନ୍ତ୍ରୀ ପ୍ରତାପ ଜେନା ହେଲିକପ୍ଟରରେ ମହାଲିଙ୍ଗ କଲେଜ ଉତ୍ସବକୁ ଆସି ଗୋବିନ୍ଦ ସାହୁଙ୍କ ପ୍ରଶଂସାରେ ଗଦ୍ ଗଦ୍ ହୋଇଯାଇଥିଲେ । ମହାଲିଙ୍ଗ କଲେଜକୁ ରେଭେନସା କଲେଜ ସହ ତୁଳନା କରିବାକୁ ସାମାନ୍ୟତମ କୁଣ୍ଠାବୋଧ କରି ନ ଥିଲେ ମନ୍ତ୍ରୀ ଶ୍ରୀ ଜେନା ।

ତେବେ ମମିତା ନିଖୋଜ ମାମଲାର ସବୁଠାରୁ ଗମ୍ଭୀରତମ ଦିଗଟି ହେଉଛି ସ୍କୁଲ୍ ରେ ସେକ୍ସ ସ୍କାଣ୍ଡାଲ୍ । ମମିତା ନିଖୋଜର ଏହା ହିଁ ମୁଖ୍ୟ କାରଣ ବୋଲି ତାଙ୍କ ପରିବାର ଅଭିଯୋଗ କରିଛନ୍ତି । ସ୍କୁଲରେ ଚାଲିଥିବା ଯୌନ କେଳେଙ୍କାରୀର ଠୋସ୍ ପ୍ରମାଣ କୁଆଡ଼େ ମମିତାଙ୍କ ପାଖରେ ଥିଲା । କିଛି ଦିନ ତଳେ ଏହାକୁ ନେଇ ମମିତାଙ୍କ ସହ ଗୋବିନ୍ଦ ସାହୁଙ୍କର ଉଚ୍ଚବାଚ ହୋଇଥିଲା । ଗୋବିନ୍ଦଙ୍କ ସବୁ କାରବାର ଖୋଲିଦେବେ ବୋଲି ମମିତା ଧମକ ଦେଇଥିଲେ । ଏଥିପାଇଁ ସ୍କୁଲ ମିଟିଂ ବାହାନାରେ ତାଙ୍କୁ ଡାକିନେଇ ଅପହରଣ କରାଯାଇଥିବା ପରିବାରବର୍ଗ ଅଭିଯୋଗ କରିଛନ୍ତି ।

ଏବେ ପୁଲିସ ବାରାକ୍ ରୁ ଗୋବିନ୍ଦ ଯୋଜନାବଦ୍ଧ ଭାବେ ଫେରାର ହୋଇଛନ୍ତି ଏବଂ ଏଥିରେ ମନ୍ତ୍ରୀ ଦିବ୍ୟଶଙ୍କର ମିଶ୍ରଙ୍କ ଚାପ ଥିବା ତାଙ୍କ ପରିବାର ପକ୍ଷରୁ ଅଭିଯୋଗ ହୋଇଛି । ମନ୍ତ୍ରୀଙ୍କ ଚାପରେ ପୁଲିସ ଗୋବିନ୍ଦଙ୍କୁ ଫେରାର ହେବାର ସୁଯୋଗ ଦେଇଛି ବୋଲି ସେମାନେ ଅଭିଯୋଗ କରିଛନ୍ତି ।

ବିରୋଧୀ କଂଗ୍ରେସ ଓ ବିଜେପି ଏହି ପ୍ରସଙ୍ଗରେ ମନ୍ତ୍ରୀ ଦିବ୍ୟଶଙ୍କରଙ୍କ ବହିଷ୍କାର ଦାବି କରିଛନ୍ତି । ମମିତା ମେହେର ନିଖୋଜ ମାମଲାରେ ମନ୍ତ୍ରୀ ସିଧାସଳଖ ସଂପୃକ୍ତ ବୋଲି ସେମାନେ ଅଭିଯୋଗ କରିଛନ୍ତି । ଅନ୍ୟପଟେ ଏହାକୁ ଏକ ସମ୍ବେଦନଶୀଳ ପ୍ରସଙ୍ଗ ବୋଲି ବିଜେଡ଼ି ଦର୍ଶାଇ ବିରୋଧୀ ଦଳ ଶସ୍ତା ରାଜନୀତି କରିବାରୁ ଦୂରେଇ ରହିବାକୁ କହିଛନ୍ତି ।