ମାଟିତଳୁ ଉଦ୍ଧାର ଗଳିତ ଶବ ମମିତାଙ୍କର !

ଭୁବନେଶ୍ୱର/ଭବାନୀପାଟଣା: ସନ୍ଦେହ ସତ ହେଲା । ମହାଲିଙ୍ଗ ନୋଡାଲ୍ ହାଇସ୍କୁଲ ପଡ଼ିଆ ନିର୍ମାଣାଧୀନ ମିନି ଷ୍ଟାଡିୟମ୍ ମାଟିତଳୁ ମିଳିଥିବା ଗଳିତ ଶବ ସନସାଇନ୍ ପବ୍ଲିକ୍ ସ୍କୁଲ ଅଧ୍ୟକ୍ଷା ମମିତା ମେହେରଙ୍କର ବୋଲି କ୍ରମଶଃ ସ୍ପଷ୍ଟ ହେଉଛି । ଏହି ଅଧାପୋଡ଼ା ମୃତ ଶରୀର ୮ ମିଟର ମାଟି ତଳୁ ଉଦ୍ଧାର ହୋଇଛି । ଦେହରେ ରହିଥିବା ସୁନା ଚେନ୍ ଏବଂ ପାଉଁଜି ମମିତାଙ୍କର ବୋଲି ତାଙ୍କ ପରିବାର ଲୋକ ଚିହ୍ନଟ କରିଛନ୍ତି । ୧୨ ଦିନ ତଳୁ ନିଖୋଜ ଥିବା ମମିତାଙ୍କର କେବେ ମୃତ୍ୟୁ ହୋଇଛି ଜଣାପଡ଼ିନାହିଁ । ଶବ ଦଗ୍ଧ ଓ ଗଳିତ ଅବସ୍ଥାରେ ଥିବାରୁ ଚିହ୍ନଟ କରିବା ସମ୍ଭବ ନ ଥିଲା ।

ଗୋବିନ୍ଦ ସାହୁଙ୍କ କଲେଜର ଜଣେ କର୍ମଚାରୀଙ୍କ ବୟାନ ଆଧାରରେ ପୁଲିସ ଆଜି ସକାଳୁ ଉକ୍ତ ଜାଗାରେ ଜେସିବି ଲଗାଇଥିଲା । ଜଣେ ମାଜିଷ୍ଟ୍ରେଟ୍ ଙ୍କ ଉପସ୍ଥିତିରେ ଏବଂ ଜଣେ ଅତିରିକ୍ତ ଏସପି, ଦୁଇଜଣ ଡିଏସପିଙ୍କ ନେତୃତ୍ୱରେ ଦୁଇ ପ୍ଲାଟୁନ୍ ପୁଲିସ ସମଗ୍ର ଅଂଚଳକୁ ଘେରି ମାଟି ତଳୁ ମମିତାଙ୍କ ମୃତ ଶରୀର ଖୋଜା ଆରମ୍ଭ କରିଥିଲେ । ଦୀର୍ଘ ୫ ଘଣ୍ଟା ଧରି ଜେସିବି ଲାଗିବା ପରେ ୮ ମିଟର ତଳ ଏକ ଜାଗାରୁ ଶବ ଉଦ୍ଧାର କରାଯାଇଥିଲା ।

ମମିତାଙ୍କୁ ସ୍କୁଲ ମାଲିକ ଗୋବିନ୍ଦ ସାହୁ ହତ୍ୟା କରି ସେଠାରେ ପୋତି ଦେଇଥିବା ସନ୍ଦେହ କରାଯାଉଛି । ନିଖୋଜ ମମିତାଙ୍କ ପରିବାର ପକ୍ଷରୁ ଗତ୧୨ ତାରିଖରେ ସିନ୍ଧେକେଲା ଥାନାରେ ଏତଲା ହେବା ପରେ ଗୋବିନ୍ଦଙ୍କୁ ପୁଲିସ ଉଠାଇ ଆଣିଥିଲା । ଟିଟିଲାଗଡ଼ ପୁଲିସ ବାରାକ୍ ରେ ତାଙ୍କୁ ଅଟକ ରଖି ଜେରା କରାଯାଉଥିଲା । ମାତ୍ର ୪ ଦିନ ପରେ ଗତ ରବିବାର ରାତିରେ ସେ ବାରାକ୍ ରୁ ଆଶ୍ଚର୍ଯ୍ୟଜନକ ଭାବେ ଚମ୍ପଟ୍ ମାରିଥିଲେ । ସୁତରାଂ ଗୋବିନ୍ଦ ମୁଖ୍ୟ ଅଭିଯୁକ୍ତ ବୋଲି ସମସ୍ତଙ୍କ ସନ୍ଦେହ ଦୃଢ଼ୀଭୂତ ହୋଇଛି ।

ଫେରାର ଗୋବିନ୍ଦଙ୍କୁ ଧରିବା ପାଇଁ ଦୁଇଦିନ ହେଲା ବଲାଙ୍ଗୀର ଓ କଳାହାଣ୍ଡି ପୁଲିସର ସ୍ୱତନ୍ତ୍ର ଟିମ୍ ତନାଘନା କରୁଥିଲେ ମଧ୍ୟ ତାଙ୍କର ପତ୍ତା ମିଳୁନାହିଁ । ତାଙ୍କୁ ଧରାଇଦେଲେ ୧ ଲକ୍ଷ ଟଙ୍କା ପୁରସ୍କାର ମିଳିବ ବୋଲି ବଲାଙ୍ଗୀର ପୁଲିସ ପକ୍ଷରୁ ଘୋଷଣା କରାଯାଇଛି । ମୋଷ୍ଟ ୱାଣ୍ଟେଡ଼୍ ଭାବେ ସବୁ ଥାନାରେ ତାଙ୍କର ପୋଷ୍ଟର ମରାଯାଇଛି ।

ମମିତାଙ୍କୁ କାହିଁକି ହତ୍ୟା କରାଯାଇଛି ତାହା ସ୍ପଷ୍ଟ ହୋଇ ନ ଥିଲେ ମଧ୍ୟ ସ୍କୁଲ୍ ରେ ସେକ୍ସ ସ୍କାଣ୍ଡାଲ୍ ଚାଲୁଥିବା ନେଇ ତାଙ୍କ ପାଖରେ ଅନେକ ପ୍ରମାଣ ଥିବାରୁ ଏବଂ ତାହାକୁ ବିରୋଧ କରୁଥିବାରୁ ସ୍କୁଲ ମାଲିକ ଗୋବିନ୍ଦ ସାହୁ ତାଙ୍କୁ ରାସ୍ତାରୁ ହଟାଇଦେବାକୁ ଏଭଳି କାଣ୍ଡ କରିଥାଇପାରନ୍ତି ବୋଲି ସନ୍ଦେହ କରାଯାଉଛି ।

ଏହି ମାମଲାରେ ଗୃହ ରାଷ୍ଟ୍ରମନ୍ତ୍ରୀ ଦିବ୍ୟଶଙ୍କର ମିଶ୍ର ମଧ୍ୟ ବିବାଦ ଭିତରକୁ ଟାଣି ହୋଇଛନ୍ତି । ଫେରାର ସ୍କୁଲ ମାଲିକ ଗୋବିନ୍ଦଙ୍କ ସହ ତାଙ୍କର ଘନିଷ୍ଠତା ଥିଲା ଏବଂ ସ୍କୁଲକୁ ସେ ବାରମ୍ବାର ଯାଉଥିଲେ ବୋଲି ଅଭିଯୋଗ ହୋଇଛି । ବିରୋଧୀ ଦଳ ତାଙ୍କର ବହିଷ୍କାର ଦାବି କରି ଆନ୍ଦୋଳନ ଆରମ୍ଭ କରିଛନ୍ତି ।

କଂଗ୍ରେସ ବିଧାୟକ ସନ୍ତୋଷ ସିଂହ ସାଲୁଜା ଏକ ସାମ୍ବାଦିକ ସମ୍ମିଳନୀରେ ମନ୍ତ୍ରୀ ଦିବ୍ୟଶଙ୍କରଙ୍କୁ ଏହି ମାମଲା ଭିତରକୁ ଟାଣିଛନ୍ତି । ସେ କହିଛନ୍ତି, ସ୍ଥାନୀୟବାସିନ୍ଦାଙ୍କ କହିବା ଅନୁଯାୟୀ ମନ୍ତ୍ରୀ ମହାଲିଙ୍ଗ ସ୍କୁଲରେ ରାତି ବିତାଉଥିଲେ । ସେହି ସ୍କୁଲରେ ଛାତ୍ରୀମାନଙ୍କୁ ମାର୍କ ବଢ଼ାଇବା ନାଁରେ ଯୌନନ ଶୋଷଣ କରାଯାଉଥିଲା । ମାମଲାର ସିବିଆଇ ତଦନ୍ତ ପାଇଁ ସେ ଦାବି କରିଛନ୍ତି ।

ମନ୍ତ୍ରୀଙ୍କ ଭୁବନେଶ୍ୱରସ୍ଥିତ ସରକାରୀ ବାସଭବନକୁ ଆଜି ଛାତ୍ର କଂଗ୍ରେସ କର୍ମୀମାନେ ଘେରାଉ କରି ଘର ଉପରକୁ ଅଣ୍ଡା ଓ ଟେକାମାଡ଼ କରିଛନ୍ତି । ଏହାକୁ ନେଇ ପୁଲିସ ଓ ଛାତ୍ର କଂଗ୍ରେସ କର୍ମୀଙ୍କ ମଧ୍ୟରେ ଧସ୍ତାଧସ୍ତି ହୋଇଛି ।

ବିଜେପି ମହିଳା ମୋର୍ଚ୍ଚାର ଏକ ଟିମ୍ ଆସନ୍ତାକାଲି ସକାଳୁ ବଲାଙ୍ଗୀର ଓ ଭବାନୀପାଟଣା ଯାଉଛନ୍ତି । ସେମାନେ ମୃତ ମମିତାଙ୍କ ପରିବାରକୁ ଭେଟିବା ସହ ମହାଲିଙ୍ଗ ସନସାଇନ୍ ପବ୍ଲିକ୍ ସ୍କୁଲ ବୁଲିବେ ।
ଅନ୍ୟପକ୍ଷରେ ଆଇନ ତା ବାଟରେ ଯିବ ଏବଂ ଦୋଷୀ ଦଣ୍ଡ ପାଇବେ ବୋଲି ବିଜେଡ଼ି କହିଛି ।