ପ୍ରଦୀପ ପାଣିଗ୍ରାହୀଙ୍କ ୫.୫ କୋଟି ବେଆଇନ ସମ୍ପତ୍ତିର ଖିଅ ଖୋଜିଲା ଭିଜିଲାନସ୍

ଭୁୁବନେଶ୍ୱର: ଠକେଇ ଓ ଜାଲିଆତି ମାମଲାରେ ଝାରପଡ଼ା ଜେଲ୍ ଯାଇ ୭ ମାସ ପରେ ମୁକୁଳିଥିବା ଗୋପାଳପୁର ବିଧାୟକ ପ୍ରଦୀପ ପାଣିଗ୍ରାହୀଙ୍କ ପାଇଁ ଅଡୁଆ ପୁଣି ବଢ଼ିଛି । ଭିଜିଲାନସ୍ ନଜରକୁ ଆସିଥିବା ତାଙ୍କର ୫ କୋଟିରୁ ଅଧିକ ବେଆଇନ ସମ୍ପତ୍ତିର ଖୋଳତାଡ଼ ଆରମ୍ଭ ହୋଇଛି । ଆଜି ସକାଳୁ ଭିଜିଲାନସ୍ ର ପୃଥକ୍ ଟିମ୍ ବିଧାୟକ ଓ ତାଙ୍କର ଖାସ୍ ଲୋକଙ୍କ ଭୁବନେଶ୍ୱର, ଗୋପାଳପୁର ଏବଂ ବ୍ରହ୍ମପୁରରେ ଥିବା ୧୫ ଟି ଜାଗାରେ ଏକକାଳୀନ ଚଢ଼ଉ କରିଛନ୍ତି ।

ସକାଳ ୬ଟାରେ ଭିଜିଲାନସ୍ ଟିମ୍ ରେଡ୍ ଆରମ୍ଭ କରିଥିଲେ । ବିଧାୟକଙ୍କ ଭୁବନେଶ୍ୱରର ୟୁନିଟ୍-୬ସ୍ଥିତ ସରକାରୀ ବାସଭବନ, ବ୍ରହ୍ମପୁର ଓ ଗୋପାଳପୁରରେ ଥିବା ପ୍ରମୁଖ ସହଯୋଗୀ ସର୍ବେଶ୍ୱର ରାଓ, କମ୍ବୁ ପାଣିଗ୍ରାହୀ, ସୂର୍ଯ୍ୟ ସାହୁ, ତିନି ଡ୍ରାଇଭର ଏବଂ ତିନି ଜଣ ସମ୍ପର୍କୀୟଙ୍କ ଘରେ ଏକକାଳୀନ ଏହି ରେଡ୍ ହୋଇଥିଲା । ଏଥିରେ ସାମିଲ ଥିଲେ ଜଣେ ଏସପି, ଦୁଇଜଣ ଅତିରିକ୍ତ ଏସପି, ୧୭ ଡିଏସପି । ଦିନ ତମାମ ଚଢ଼ଉ ଚାଲିଥିଲା । ବିଧାୟକଙ୍କ ଘରୁ ମିଳିଥିବା ସୁନା ଓଜନ କରିବାକୁ ବଣିଆ ସହାୟତା ନିଆଯାଇଥିଲା ।

ଭିଜିଲାନସ୍ ସୂଚନା ଅନୁଯାୟୀ, ସଂଧ୍ୟା ସୁଦ୍ଧା ବିଧାୟକଙ୍କ ଘରୁ ଜମିବାଡ଼ି କିଣା ସମ୍ପର୍କିତ ଗୁରୁତ୍ୱପୂର୍ଣ୍ଣ ଦଲିଲ, ସୁନା ଅଳଙ୍କାର, ଏକାଧିକ ବ୍ୟାଙ୍କ ପାସବୁକ୍, କ୍ରେଡିଟ୍/ଡେବିଟ୍ କାର୍ଡ, ଲାପଟପ, ମୋବାଇଲ୍, ଗାଡ଼ି ଆଦି ଜବତ ହୋଇଛି । ବିଧାୟକଙ୍କ ଜଣେ ସହଯୋଗୀଙ୍କ ପାଖରୁ ନଗଦ ୨୦ ଲକ୍ଷ ଟଙ୍କା ମଧ୍ୟ ଜବତ କରାଯାଇଛି । ଚଢ଼ଉ ଜାରି ଥିବାରୁ ତାଙ୍କ ବେଆଇନ ସମ୍ପତ୍ତି ପରିମାଣ ପରେ ଜଣାପଡ଼ିବ ।

ବିଜେଡ଼ିରୁ ବହିଷ୍କୃତ ଗୋପାଳପୁର ବିଧାୟକ ତଥା ପୂର୍ବତନ ମନ୍ତ୍ରୀ ପ୍ରଦୀପ ପାଣିଗ୍ରାହୀଙ୍କ ଦେହରେ ପୂର୍ବରୁ କଳଙ୍କ ଲାଗିସାରିଛି । ଆଳୁ ଖୋଳୁ ଖୋଳୁ ମହାଦେବ ବାହାରିଲା ଭଳି ତାଙ୍କର ଗୋଟିଏ ପରେ ଗୋଟେ କଳା କାରନାମା ପଦାକୁ ଆସିଥିଲା । ଆଇଏଫଏସ୍ ଅଫିସର ଅଭୟକାନ୍ତ ପାଠକଙ୍କ ଘରେ ଭିଜିଲାନସ୍ ରେଡ୍ କରି ବିପୁଳ କଳା ସମ୍ପତ୍ତି ଠାବ କରିବା ଏବଂ ପୁଅ ଆକାଶ ପାଠକର କଳା ସାମ୍ରାଜ୍ୟ ସନ୍ଧାନ ବେଳେ ପ୍ରଦୀପ ପାଣିଗ୍ରାହୀଙ୍କ ଲିଙ୍କ୍ ଜଣାପଡ଼ିଥିଲା । ଆକାଶଙ୍କ ସହ ତାଙ୍କ ଝିଅର ନିର୍ବନ୍ଧ ସରିଥିଲା ଏବଂ ପାଠକ ପରିବାର ସହ ବହୁ ପୂର୍ବରୁ ସମ୍ପର୍କରେ ଯୋଡି ହୋଇସାରିଥିଲେ ବିଧାୟକ ।

ଆକାଶ ଟାଟା କମ୍ପାନୀର ଏମଡି ପରିଚୟ ଦେଇ ଲୋକଙ୍କୁ ଚିତା କାଟୁଥିଲେ ଏବଂ ଆକାଶଙ୍କ ଏହି କାରବାରର ପୁରୋଧା ସାଜିଥିଲେ ପ୍ରଦୀପ ପାଣିଗ୍ରାହୀ । ଗୋପାଳପୁର ନିର୍ବାଚନମଣ୍ଡଳୀର ବେକାର ଯୁବକମାନଙ୍କୁ ଟାଟାରେ ଚାକିରି କରାଇଦେବାର ପ୍ରଲୋଭନ ଦେଇ ଭାବୀ ଶ୍ୱଶୁର-ଜ୍ୱାଇଁ ଯୋଡି ଲକ୍ଷ ଲକ୍ଷ ଟଙ୍କା ଠକି ନେଇଥିବା ଅଭିଯୋଗ ହୋଇଥିଲା ।

ଏହି ଅଭିଯୋଗକ୍ରମେ ବିଧାୟକଙ୍କୁ କ୍ରାଇମବ୍ରାଞ୍ଚ ପୁଲିସ ଗତ ଡିସେମ୍ବର ମାସରେ ଗିରଫ କରିଥିଲା । ତାଙ୍କ ପୂର୍ବରୁ ପାଠକ ବାପ-ପୁଅଙ୍କୁ ଗିରଫ କରିଥିଲା ଭିଜିଲାନସ୍ । ଇତିମଧ୍ୟରେ ଅଭୟ ପାଠକ ଓ ପ୍ରଦୀପ ପାଣିଗ୍ରାହୀ ଜେଲ୍ ରୁ ଖଲାସ ହୋଇଥିଲା ବେଳେ ଆକାଶ ଜେଲ୍ ରେ ଅଛନ୍ତି ।

ବିଧାୟକଙ୍କ ଘରକୁ ଭିଜିଲାନସ୍ ଆସିଲା କେମିତି

ବିଧାୟକ ପ୍ରଦୀପ ପାଣିଗ୍ରାହୀଙ୍କ ପାଖରେ ବେଆଇନ ସମ୍ପତ୍ତି ଥିବାର ଅଭିଯୋଗ ପୂର୍ବରୁ ଭିଜିଲାନସ୍ ପାଖକୁ ଆସିଥିଲା । ଭିଜିଲାନସ୍ ପୁଲିସ ଏହାର ଗୋପନ ତଦନ୍ତ କରି କିଛି ତଥ୍ୟ ହାସଲ କଲା ପରେ ୯.୧୨.୨୦୨୦ ରେ ଲୋକାୟୁକ୍ତଙ୍କ ପାଖରେ ଅଭିଯୋଗ ଦାଖଲ କରିଥିଲା । ଲୋକାୟୁକ୍ତ ଏହାର ତଦନ୍ତ ପାଇଁ ଭିଜିଲାନସ୍ କୁ ନିର୍ଦ୍ଦେଶ ଦେଇଥିଲେ । ତଦନ୍ତରୁ ବିଧାୟକଙ୍କ ପାଖରୁ ୫ କୋଟି ୫ ଲକ୍ଷ ୫ ହଜାର ୬୫୬ ଟଙ୍କାର ବେଆଇନ ସମ୍ପତ୍ତି ଠାବ କରାଯାଇଥିଲା । ବିଧାୟକ ଥାଇ ୨୪.୫.୨୦୦୯ ରୁ ୩୦.୧୧.୨୦୨୦ ଭିତରେ ସେ ଅସଦ ଉପାୟରେ ଏହି ସମ୍ପତ୍ତି ଠୁଳ କରିଥିଲେ ।

୨୮.୫.୨୦୨୧ ରେ ଭିଜିଲାନସ୍ ଏହି ତଦନ୍ତ ରିପୋର୍ଟ ଲୋକାୟୁକ୍ତଙ୍କ ପାଖରେ ଦାଖଲ କରିଥିଲା । ଲୋକାୟୁକ୍ତଙ୍କ ନିର୍ଦ୍ଦେଶରେ ବିଧାୟକ ମଧ୍ୟ ଏହାର ଉତ୍ତର ଦେଇଥିଲେ । ଲୋକାୟୁକ୍ତ ଏହାର ଟିକନିକ୍ ଅନୁଧ୍ୟାନ କରିବା ବେଳେ ବିଧାୟକ ଶ୍ରୀ ପାଣିଗ୍ରାହୀଙ୍କ ବିରୋଧରେ ଦୁର୍ନୀତି ନିବାରଣ ଆଇନରେ ପୂର୍ବରୁ ଏକ ମାମଲା ଥିବା ଜାଣିବାକୁ ପାଇଥିଲେ । ଏହାର ତଦନ୍ତ ପାଇଁ ଲୋକାୟୁକ୍ତ ତୁରନ୍ତ ଭିଜିଲାନସ୍ କୁ ନିର୍ଦ୍ଦେଶ ଦେଇଥିଲେ । ୪.୧୦.୨୦୨୧ ରେ ଭିଜିଲାନସ୍ ଏଥିପାଇଁ ଏକ ମାମଲା( ଭିଜିଲାନସ୍ ସେଲ୍ ପିଏସ୍ କେସ୍ ନଂ ୬) ରୁଜୁ କରିଥିଲା । ବିଧାୟକଙ୍କ ଘରେ ରେଡ୍ ପାଇଁ ଲୋକାୟୁକ୍ତଙ୍କ ପାଖରୁ ଅନୁମତି ବି ଆଣିଥିଲା ଭିଜିଲାନସ୍ ପୁଲିସ ।