ୟୁକ୍ରେନ୍ ରୁ ଫେରିଲେ ୭୭ ଓଡ଼ିଆ ଛାତ୍ରଛାତ୍ରୀ

ଭୁବନେଶ୍ୱର: ଯୁଦ୍ଧ ବିଧ୍ୱସ୍ତ ୟୁକ୍ରେନ୍ ରୁ ଫେରି ଆସିଛନ୍ତି ୭୭ ଓଡ଼ିଆ ଛାତ୍ରଛାତ୍ରୀ । ରାଜ୍ୟ ସରକାରଙ୍କ ଦ୍ୱାରା ଯୋଗାଇ ଦିଆଯାଇଥିବା ସ୍ୱତନ୍ତ୍ର ବିମାନରେ ସେମାନେ ଆଜି ଭୁବନେଶ୍ୱରରେ ପହଞ୍ଚିଛନ୍ତି । ବିମାନବନ୍ଦରରେ ପହଞ୍ଚିଲା ପରେ ଏକ ଖୁସି ଓ ଆବେଗଭରା ପରିବେଶ ସୃଷ୍ଟି ହୋଇଥିଲା । ଛାତ୍ରଛାତ୍ରୀମାନଙ୍କ ପରିବାରର ଏହି ଆନନ୍ଦମୟ ମୁହୁର୍ତ୍ତରେ ସାମିଲ ହୋଇଥିଲେ ଖୋଦ୍ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।

ୟୁକ୍ରେନ୍ ର ଯୁଦ୍ଧଗ୍ରସ୍ତ ଖାର୍କିଭ୍ ଓ ପେସୋଚିନ୍ ରେ ଫସି ରହିଥିଲେ ଏହି ଓଡ଼ିଆ ଛାତ୍ରଛାତ୍ରୀ । ବଙ୍କର ଭିତରେ ଭୋକ ଓ ଆତଙ୍କରେ ଜୀବନ କାଟୁଥିଲେ । ତେବେ ଓଡ଼ିଶା ସରକାରଙ୍କ ପ୍ରଚେଷ୍ଟାରେ ଗତ ୪ ତାରିଖ ଦିନ ଦୁଇଟି ସ୍ୱତନ୍ତ୍ର ବସ୍ ରେ ନିରାପଦ ଭାବେ ସେମାନଙ୍କୁ ପଶ୍ଚିମ ୟୁକ୍ରେନ୍ ସୀମାନ୍ତକୁ ଅଣାଯାଇଥିଲା । ସେଠାରୁ ବିମାନ ଯୋଗେ ନୂଆଦିଲ୍ଲୀ ଅଣାଯାଇଥିଲା । ଆଜି ନୂଆଦିଲ୍ଲୀରୁ ସେମାନଙ୍କୁ ନେଇ ଆସିଥିବା ବିମାନ ସଂଧ୍ୟା ସାଢ଼େ ୫ଟାରେ ଭୁବନେଶ୍ୱର ବିମାନବନ୍ଦରରେ ପହଞ୍ଚିଥିଲା ।

ସେମାନଙ୍କୁ ପାଛୋଟି ଆଣିବା ପାଇଁ ବିମାନବନ୍ଦରରେ ଛାତ୍ରଛାତ୍ରୀମାନଙ୍କ ବାପା ମା’ ଓ ପରିବାର ଲୋକଙ୍କ ସହ ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ ମଧ୍ୟ ଉପସ୍ଥିତ ଥିଲେ । ଯୁଦ୍ଧ ଅଞ୍ଚଳରୁ ଫେରି ଆସିଥିବା ନିଜର ପିଲାଙ୍କୁ ପାଇଲା ବେଳେ ସେଠାରେ ଏକ ଭିନ୍ନ ପରିବେଶ ସୃଷ୍ଟି ହୋଇଥିଲା । ବାପା ମା’ଙ୍କ ଆଖିରୁ ଝରି ଆସିଥିଲା ଆନନ୍ଦର ଅଶ୍ରୁ । ସେମାନଙ୍କ ଏହି ଖୁସିରେ ମୁଖ୍ୟମନ୍ତ୍ରୀ ମଧ୍ୟ ସାମିଲ ହୋଇଥିଲେ । ପିଲାମାନେ ନିରାପଦରେ ୟୁକ୍ରେନ୍ ରୁ ଉଦ୍ଧାର ପାଇ ଜନ୍ମମାଟିକୁ ଫେରି ଆସିଥିବାରୁ ସମସ୍ତେ ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଜଣାଇଥିଲେ ।

ୟୁକ୍ରେନ୍ ଫେରନ୍ତା ଛାତ୍ରଛାତ୍ରୀଙ୍କଠାରୁ ଭଲମନ୍ଦ ପଚାରି ବୁଝିଥିଲେ ମୁଖ୍ୟମନ୍ତ୍ରୀ । ସେମାନେ ଆଗକୁ ଯେପରି ପାଠ ପଢ଼ିପାରିବେ, ସେଥିଲାଗି ସମସ୍ତ ଉଦ୍ୟମ କରାଯିବ ବୋଲି ମୁଖ୍ୟମନ୍ତ୍ରୀ ଆଶ୍ୱାସନା ଦେଇଥିଲେ । ମୁଖ୍ୟମନ୍ତ୍ରୀଙ୍କ ସଚିବ(୫-ଟି) ଭି.କେ.ପାଣ୍ଡିଆନ୍ ମଧ୍ୟ ସେଠାରେ ଉପସ୍ଥିତ ରହି ପିଲାମାନଙ୍କ ସହିତ ଆଲୋଚନା କରିଥିଲେ ।

ସୂଚନାଥାଉକି, ୟୁକ୍ରେନ୍ ରେ ମେଡ଼ିକାଲ୍ ପଢ଼ୁଥିବା ଭାରତୀୟ ଛାତ୍ରଛାତ୍ରୀଙ୍କ ପାଠପଢ଼ାରେ ଯେପରି ଅସୁବିଧା ନ ହୁଏ, ସେଥିପାଇଁ ପ୍ରଧାନମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରି ମୁଖ୍ୟମନ୍ତ୍ରୀ ଚିଠି ଲେଖିଛନ୍ତି । ଦେଶର ମେଡ଼ିକାଲ୍ କଲେଜରେ ସେମାନଙ୍କ ପାଠପଢ଼ା ପାଇଁ ବ୍ୟବସ୍ଥା କରିବାକୁ ମୁଖ୍ୟମନ୍ତ୍ରୀ ପ୍ରଧାନମନ୍ତ୍ରୀଙ୍କୁ ଅନୁରୋଧ କରିଛନ୍ତି । ଏ ଦିଗରେ ରାଜ୍ୟ ସରକାର ସମସ୍ତ ସହଯୋଗ ଯୋଗାଇ ଦେବା ପାଇଁ ମୁଖ୍ୟମନ୍ତ୍ରୀ ପ୍ରତିଶ୍ରୁତି ଦେଇଛନ୍ତି ।