ବିଜେଡିର ଐତିହାସିକ ବିଜୟ, ବିଜେପିର ଅମାନତ ରହିଲାନି

ଭୁବନେଶ୍ୱର: ବ୍ରଜରାଜନଗର ଉପନିର୍ବାଚନ ଫଳ ପ୍ରକାଶ ପାଇଛି । ବିଜେଡି ପ୍ରାର୍ଥୀ ଅଳକା ମହାନ୍ତି ୬୬ ହଜାରରୁ ଅଧିକ ଭୋଟ ବ୍ୟବଧାନରେ ବିଜୟ ଲାଭ କରିଛନ୍ତି । କଂଗ୍ରେସ ପ୍ରାର୍ଥୀ କିଶୋର ପଟେଲ ଦ୍ୱିତୀୟ ସ୍ଥାନରେ ଥିବା ବେଳେ ବିଜେପି ପ୍ରାର୍ଥୀ ରାଧାରାଣୀ ପଣ୍ଡା ତୃତୀୟ ସ୍ଥାନକୁ ଖସି ଆସିଛନ୍ତି । ତାଙ୍କର ଅମାନତ ଛଡ଼ିଯାଇଛି । ଶାସକ ଦଳର ଲୋକପ୍ରିୟତା ଓ ରଣକୌଶଳ ଆଗରେ ବିରୋଧୀ ଦଳ ଯେ ଫିକା, ତାହା ଏହି ଉପନିର୍ବାଚନ ଫଳ ପୁଣି ଥରେ ପ୍ରମାଣିତ କରିଛି ।

ଗତ ୩୧ ତାରିଖରେ ଅନୁଷ୍ଠିତ ବ୍ରଜରାଜନଗର ଭୋଟର ଆଜି ଗଣତି ହୋଇଥିଲା । ପ୍ରଥମ ରାଉଣ୍ଡରୁ ହିଁ ବିଜେଡି ପ୍ରାର୍ଥୀ ଅଳକା ମହାନ୍ତି ବିଜେପି ଓ କଂଗ୍ରେସ ପ୍ରତିଦ୍ୱନ୍ଦୀଙ୍କୁ ବହୁ ପଛରେ ପକାଇ ଦେଇଥିଲେ । ଚତୁର୍ଥ ରାଉଣ୍ଡ ଭୋଟଗଣତି ଶେଷବେଳକୁ ବିଜେଡି ପ୍ରାର୍ଥୀଙ୍କ ଭୋଟ ବ୍ୟବଧାନ ୧୫ ହଜାର ଟପିଯାଇଥିଲା । ସମୁଦାୟ ୧୯ ରାଉଣ୍ଡ ଭୋଟଗଣତି ଶେଷକୁ ଏହି ବ୍ୟବଧାନ ୬୬ ହଜାରକୁ ଟପିଥିଲା ।

ସୂଚନା ଅନୁଯାୟୀ, ବିଜେଡି ପ୍ରାର୍ଥୀ ୯୩, ୭୯୦ ଭୋଟ ପାଇଥିବା ବେଳେ ତାଙ୍କର ନିକଟତମ ପ୍ରତିଦ୍ୱନ୍ଦୀ କଂଗ୍ରେସ ପ୍ରାର୍ଥୀ କିଶୋର ପଟେଲଙ୍କୁ ମିଳିଛି ୨୭, ୫୬୫ ଭୋଟ । ବିଜେପି ପ୍ରାର୍ଥୀ ରାଧାରାଣୀ ପଣ୍ଡାଙ୍କୁ ମିଳିଛି ୨୨, ୫୬୦ ଖଣ୍ଡ ଭୋଟ । ସମୁଦାୟ ଭୋଟ ୧, ୫୩, ୦୯୬ ର ଏକ ଷଷ୍ଠାଶଂରୁ ଏହା କମ୍ ହୋଇଥିବାରୁ ଅମାନତ ରହିନି ।

ସୂଚନାଯୋଗ୍ୟ, ଗତ ୨୦୧୯ ସାଧାରଣ ନିର୍ବାଚନରେ ବିଜେଡିର ଦିବଙ୍ଗତ ନେତା କିଶୋର ମହାନ୍ତି ବିଜେପିର ରାଧାରାଣୀ ପଣ୍ଡାଙ୍କୁ ୧୧,୯୯୯ ଭୋଟରେ ପରାସ୍ତ କରିଥିଲେ । ୨୦୧୪ ନିର୍ବାଚନରେ ବିଜେପି ପ୍ରାର୍ଥୀ ରାଧାରାଣୀ ପଣ୍ଡା ବିଜେଡି ପ୍ରାର୍ଥୀ ଅନୁପ ସାଏଙ୍କୁ ୬, ୭୯୦ ଭୋଟରେ ପରାସ୍ତ କରି ବିଧାନସଭାକୁ ନିର୍ବାଚିତ ହୋଇଥିଲେ । କଂଗ୍ରେସ ପ୍ରାର୍ଥୀ କିଶୋର ପଟେଲଙ୍କୁ ମିଳିଥିଲା ୩୮, ୧୭୫ ଭୋଟ ।