ନବ ଦାସଙ୍କୁ ଅଶ୍ରୁଳ ବିଦାୟ

ଝାରସୁଗୁଡ଼ା/ଭୁୁବନେଶ୍ୱର: ସ୍ୱାସ୍ଥ୍ୟମନ୍ତ୍ରୀ ନବ ଦାସଙ୍କ ପାର୍ଥିବ ଶରୀର ଆଜି ପଞ୍ଚଭୂତରେ ଲୀନ ହୋଇଛି । ହଜାର ହଜାର ସମର୍ଥକ ତାଙ୍କର ପ୍ରିୟ ନେତାଙ୍କୁ ଅଶ୍ରୁଳ ବିଦାୟ ଦେଇଛନ୍ତି । ପତ୍ନୀ ଏବଂ ଦୁଇ ସନ୍ତାନଙ୍କ ଆକୁଳ କ୍ରନ୍ଦନ ସମସ୍ତଙ୍କ ଆଖିରେ ଲୁହ ଭରି ଦେଇଥିଲା । ଦୀର୍ଘ ୩ ଘଣ୍ଟାର ଶେଷଯାତ୍ରା ପରେ ଖେରୁଆଲ୍ ଶ୍ମଶାନରେ ତାଙ୍କର ଅନ୍ତିମ ସଂସ୍କାର କରାଯାଇଥିଲା । ପୁଅ ବିଶାଳ ମୁଖାଗ୍ନି ଦେଇଥିଲେ ।

ଗତକାଲି ବିଳମ୍ବିତ ରାତିରେ କ୍ୟାପିଟାଲ୍ ହସ୍ପିଟାଲ୍ ରେ ଶବ ପୋଷ୍ଟମର୍ଟମ କରାଯିବା ପରେ ପାର୍ଥିବ ଶରୀରକୁ ବିଧାନସଭା ନିଆଯାଇଥିଲା । ସେଠାରେ ବାଚସ୍ପତି ଓ ବିଧାୟକମାନେ ସ୍ୱର୍ଗତ ଦାସଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ । ଏହାପରେ ପାର୍ଥିବ ଶରୀରକୁ ତାଙ୍କର ସରକାରୀ ବାସଭବନକୁ ନିଆଯାଇଥିଲା । ଆଜି ସକାଳେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଅନ୍ତିମ ଦର୍ଶନ ପାଇଁ ଯାଇଥିଲେ । ତାଙ୍କ ପରିବାରକୁ ଭେଟି ଶାନ୍ତ୍ୱନା ଦେବାକୁ ଯାଇଥିଲେ । ମୁଖ୍ୟମନ୍ତ୍ରୀଙ୍କୁ ଦେଖି ନବଙ୍କ ପତ୍ନୀ ଭୋ ଭୋ ହୋଇ କାନ୍ଦିବା ବେଳେ ମୁଖ୍ୟମନ୍ତ୍ରୀଙ୍କ ଆଖି ମଧ୍ୟ ଛଳ ଛଳ ହୋଇଯାଇଥିଲା । ମୁଖ୍ୟମନ୍ତ୍ରୀଙ୍କ ସେଠାରୁ ଆସିବା ପରେ ରାଜ୍ୟପାଳ ପ୍ରଫେସର ଗଣେଶୀ ଲାଲ ଅନ୍ତିମ ଦର୍ଶନ କରିଥିଲେ । ସବୁ ଦଳର ତୁଙ୍ଗ ନେତାମାନେ ଅନ୍ତିମ ଦର୍ଶନ କରିଥିଲେ ।

ଏହାପରେ ପାର୍ଥିବ ଶରୀରକୁ ବିଜେଡି ରାଜ୍ୟ କାର୍ଯ୍ୟାଳୟକୁ ଅଣାଯାଇଥିଲା । ସେଠାରେ ଦଳୀୟ ନେତାମାନେ ତାଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ । ସେଠାରୁ ପାର୍ଥିବ ଶରୀରକୁ ବିମାନବନ୍ଦର ନିଆଯାଇ ଏକ ସ୍ୱତନ୍ତ୍ର ବିମାନରେ ଝାରସୁଗୁଡ଼ା ନିଆଯାଇଥିଲା । ତାଙ୍କ ବାସଭବନରେ ଅନ୍ତିମ ଦର୍ଶନ ପାଇଁ ପ୍ରବଳ ଜନ ସମାଗମ ହୋଇଥିଲା । ଏହାପରେ ତାଙ୍କର ଅନ୍ତିମ ଯାତ୍ରା ଆରମ୍ଭ ହୋଇଥିଲା । ସେମାନଙ୍କ ପ୍ରିୟ ନେତାଙ୍କୁ ବିଦାୟ ଦେବା ପାଇଁ ସମଗ୍ର ଝାରସୁଗଡ଼ା ଲୋକାରଣ୍ୟ ହୋଇଯାଇଥିଲା । ହଜାର ହଜାର ଲୋକ ଏହି ଶେଷଯାତ୍ରାରେ ସାମିଲ ହୋଇଥିଲେ ।

ଅପରାହ୍ନ ପ୍ରାୟ ୪ଟାରେ ଖେରୁଆଲ ଶ୍ମଶାନରେ ଅନ୍ତିମ ଶୋଭାଯାତ୍ରା ପହଞ୍ଚିଥିଲା । ସେଠାରେ ତାଙ୍କୁ ଗାର୍ଡ ଅଫ ଅନର୍ ଦିଆଯାଇଥିଲା । ରାଜ୍ୟ ସରକାରଙ୍କ ପକ୍ଷରୁ ମନ୍ତ୍ରୀ ନିରଞ୍ଜନ ପୂଜାରୀ, ରଣେନ୍ଦ୍ର ପ୍ରତାପ ସ୍ୱାଇଁ ଏବଂ ଟୁକୁନି ସାହୁ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ । ବିଜେଡି ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସଙ୍କ ସମେତ ଅଧିକାଂଶ ମନ୍ତ୍ରୀ, ବିଧାୟକ ଏବଂ ଦଳୀୟ ନେତୃବର୍ଗ ଉପସ୍ଥିତ ଥିଲେ ।