ଭୁବନେଶ୍ୱର: ନିର୍ବାଚନ ପରାଜୟରୁ ବିଜେଡି କିଛି ବି ଶିକ୍ଷାଲାଭ କଲାନି । ଓଡ଼ିଶାବାସୀଙ୍କୁ ଭକୁଆ ବନାଇବା ଉଦ୍ୟମରୁ ଦଳ ନିଜକୁ ନିବୃତ୍ତ କରିପାରିଲାନି । ବିଜେପି ସହ ଗୋପନ ପ୍ରେମ ଶାଶ୍ୱତ ଓ ଚିରନ୍ତନ ବୋଲି ପୁଣି ଥରେ ପ୍ରମାଣିତ କରିଛନ୍ତି ଦଳର ମୁଖିଆ ନବୀନ ପଟ୍ଟନାୟକ । ୱକଫ୍ ସଂଶୋଧନ ବିଲ୍ କୁ ନେଇ ବିଜେଡି ତାହାର ଆଭିମୁଖ୍ୟ ବଦଳେଇବା ପରେ ଏହା ପୁଣି ଥରେ ସ୍ପଷ୍ଟ ହୋଇଛି । ଏହି ବିଲ୍ କୁ ବିରୋଧ କରିବାକୁ ବିଜେଡି ପ୍ରଥମରୁ ଘୋଷଣା କରିଥିଲା ବେଳେ ଶେଷ ମୁହୂର୍ତ୍ତରେ ୟୁ ଟର୍ଣ୍ଣ ମାରିବା ଲକ୍ଷ ଲକ୍ଷ ବିଜେଡି ନେତା ଓ କର୍ମୀଙ୍କୁ ଲଜ୍ଜିତ ଏବଂ ଅପମାନିତ କରିଛି ।
ୱକଫ୍ ସଂଶୋଧନ ବିଲ୍ ବୁଧବାର ଦିନ ଲୋକସଭାରେ ଆଗତ ହେବା ପୂର୍ବରୁ ବିଜେଡି ନିଜର ଆଭିମୁଖ୍ୟ ସ୍ପଷ୍ଟ କରିଥିଲା । ଏହି ବିଲ୍ କୁ ବିରୋଧ କରିବ ବୋଲି ଘୋଷଣା କରିଥିଲା । ଯେହେତୁ ଲୋକସଭାରେ ଦଳର ଜଣେ ବି ସଦସ୍ୟ ନାହାନ୍ତି ତେଣୁ ସମର୍ଥନ କି ବିରୋଧକୁ ନେଇ କୌଣସି ଫରକ୍ ପଡ଼ିବାର ନ ଥିଲା । ମାତ୍ର ଆଜି ରାଜ୍ୟସଭାରେ ୱକଫ୍ ସଂଶୋଧନ ବିଲ୍ ଉପରେ ଆଲୋଚନା ହେଉଥିବାରୁ ବିଜେଡିର ଭୂମିକା ଆସିବ । କାରଣ ରାଜ୍ୟସଭାରେ ବିଜେଡିର ୭ ଜଣ ସଦସ୍ୟ ଅଛନ୍ତି । ଭୋଟ୍ ଫଳାଫଳ ଉପରେ ଏହି ସଂଖ୍ୟା ଫରକ୍ ପକାଇବାର କ୍ଷମତା ରଖୁଛି ।
ଗୁରୁବାର ଆଲୋଚନାରେ ଭାଗ ନେଲା ବେଳେ ବିଜେଡି ସାଂସଦ ମୁନ୍ନା ଖାଁ ୱକଫ୍ ବିଲ୍ କୁ ବିରୋଧ କରିଥିଲେ । ତେଣୁ ଦଳର ଆଭିମୁଖ୍ୟକୁ ନେଇ କାହାରି ମନରେ ଶଙ୍କା ନ ଥିଲା । ମାତ୍ର ସଂଧ୍ୟା ୫ଟା ୫୯ ମିନିଟ୍ ରେ ବିଜେଡିର ରାଜ୍ୟସଭା ନେତା ଡ. ସସ୍ମିତ୍ ପାତ୍ରଙ୍କର ଏକ ଟୁଇଟ୍(ଏକ୍ସ) ଆସିଥିଲା । ସେଥିରେ ସେ ସୂଚନା ଦେଇଥିଲେ ଯେ ୱକଫ୍ ସଂଶୋଧନ ବିଲ୍ ଉପରେ ବିଚାର ସାଂସଦଙ୍କ ବିବେକ ଉପରେ ଛାଡ଼ି ଦିଆଯାଇଛି । ଯଦି ବିଲ୍ ଭୋଟିଂ ପାଇଁ ଆସେ ତେବେ ଦଳ ନିଜର ସଦସ୍ୟମାନଙ୍କୁ ନ୍ୟାୟ, ସଦଭାବ ଏବଂ ସମସ୍ତ ସମ୍ପ୍ରଦାୟର ଅଧିକାର ପାଇଁ ସେମାନଙ୍କ ବିବେକ ପ୍ରୟୋଗ କରିବାକୁ ଦାୟିତ୍ୱ ଦେଉଛି । ଏ ନେଇ ଦଳ ପକ୍ଷରୁ ହୁଇପ୍ ଜାରି କରାଯାଇନାହିଁ ବୋଲି ସେ ସ୍ପଷ୍ଟ କରିଥିଲେ ।
ସୁତରାଂ ୱକଫ୍ ସଂଶୋଧନ ବିଲ୍ କୁ ବିଜେଡି ବିରୋଧ କରିବ ନାହିଁ ବୋଲି ଦଳର ପରିବର୍ତ୍ତିତ ନିଷ୍ପତ୍ତିକୁ ସସ୍ମିତ୍ ବୁଲେଇ ବଙ୍କେଇ ଜଣାଇ ଦେଇଥିଲେ । ଏହି ନିଦେ୍ର୍ଦଶ ଯେ, ଦଳର ସଭାପତି ନବୀନ ପଟ୍ଟନାୟକଙ୍କର ତାହା ଖୋଲି ଜଣାଇବାର ଆବଶ୍ୟକତା ବୋଧହୁଏ ସେ ଅନୁଭବ କରିନାହାନ୍ତି । ତେବେ ବିଜେଡିର ୟୁ ଟର୍ଣ୍ଣକୁ ସାଂସଦ ମୁନ୍ନା ଖାଁ କିନ୍ତୁ ଫାଙ୍କିବାକୁ ଉଦ୍ୟମ କରିଛନ୍ତି । ଦଳର ସାଂସଦମାନେ ବିଲ୍ କୁ ବିରୋଧ କରିବେ ବୋଲି ସେ ସେ ଉପରଠାଉରିଆ ମନ୍ତବ୍ୟ ଦେଇଛନ୍ତି । ଏହା ତାଙ୍କର ଅସନ୍ତୋଷ ବୋଲି ମଧ୍ୟ ବୁଝାପଡୁଛି ।
ଶେଷ ମୁହୂର୍ତ୍ତରେ ବିଜେଡି ଆଭିମୁଖ୍ୟ ବଦଳାଇବାକୁ ନେଇ ରାଜ୍ୟରେ ଯେତିକି ନୁହେଁ, ଜାତୀୟ ଗଣମାଧ୍ୟମରେ ତାହାଠାରୁ ଅଧିକ ଚର୍ଚ୍ଚା । ବିଜେଡି ଏହି ବିଲ୍ କୁ ସମର୍ଥନ କରିବ ବୋଲି ଏକ ପ୍ରମୁଖ ଜାତୀୟ ଗଣମାଧ୍ୟମ ଖବର ମଧ୍ୟ କରୁଛି । ନବୀନ ବାବୁ ଅଦୃଶ୍ୟ ଚାପରେ ଚେପା ହୋଇଗଲେ ବୋଲି ସୋସିଆଲ୍ ମିଡିଆରେ ପ୍ରବଳ କଟାକ୍ଷ ହେଉଛି । ନବୀନ ପଟ୍ଟନାୟକ ନିଜକୁ ଛୋଟ କରିବା ସହ ଦଳକୁ ଆହୁରି ବିପଦକୁ ଠେଲିଦେଲେ ବୋଲି ଅନେକ ସମାଲୋଚନା କରିଛନ୍ତି ।
ଖୋଦ୍ ବିଜେଡି ଭିତରେ ଏହାକୁ ନେଇ ତୀବ୍ର ପ୍ରତିକ୍ରିୟା ସୃଷ୍ଟି ହୋଇଛି । ଦଳର ଏହି ନିଷ୍ପତ୍ତିକୁ ଜଣେ ବି ବରିଷ୍ଠ ନେତା ସମର୍ଥନ କରିନାହାନ୍ତି । ଏହା ଜନମାନସରେ ସେମାନଙ୍କୁ ଅଧିକ ଲଜ୍ଜିତ କରିବ ଏବଂ ଦଳକୁ ଆହୁରି ବିପଦଗାମୀ କରିବ ବୋଲି ସେମାନେ କହିଛନ୍ତି । ବିଜେଡି ପାଇଁ ଏହା ଶେଷ ସତର୍କ ଘଣ୍ଟି ବୋଲି ସେମାନେ ଚେତାଇ ଦେଇଛନ୍ତି ।
