ଭୁବନେଶ୍ୱର: ରାଜ୍ୟରେ ବିଜେପି କ୍ଷମତାକୁ ଆସୁ ଆସୁ ବଟି ଅସୁଲର ଏକ ସାଂଘାତିକ ତଥ୍ୟ ସାମନାକୁ ଆସିଛି । ନିର୍ଦ୍ଦିଷ୍ଟ ଭାବେ ଗନ୍ଧମାର୍ଦ୍ଦନ ସୋସାଇଟି କର୍ତ୍ତୃପକ୍ଷଙ୍କଠାରୁ ଦୁଇଟି କିସ୍ତିରେ ୧ କୋଟି ୧୭ ଲକ୍ଷ ଟଙ୍କା ନିଆଯାଇଛି । ଏହି ଟଙ୍କା କାରବାର ପୁଣି ଆକାଉଣ୍ଟ୍ ଜରିଆରେ ହୋଇଛି । ମାରାତ୍ମକ ଅଭିଯୋଗଟି ହେଉଛି, ଖୋଦ୍ ରାଜ୍ୟ ବିଜେପି ମୁଖ୍ୟଙ୍କ ଆକାଉଣ୍ଟକୁ ଯାଇଛି ୧ କୋଟି ୩ ଲକ୍ଷ ଟଙ୍କା ।
ଗନ୍ଧମାର୍ଦ୍ଦନ ଲୋଡିଂ ଏଜେନ୍ସି ଆର୍ଥିକ ଅନିୟମିତତା ମାମଲାରେ ଇଓଡବ୍ଲୁ ଦ୍ୱାରା ଗିରଫ ବିଜେଡି ନେତା ରାଜା ଚକ୍ରଙ୍କ ଓକିଲ ସୀତାଂଶୁ ଦ୍ୱିବେଦୀ ଗଣମାଧ୍ୟମକୁ ଏହି ତଥ୍ୟ ଦେଇଛନ୍ତି । ଗତକାଲି ବାଲେଶ୍ୱର ଓପିଆଇଡି କୋର୍ଟରେ ରାଜାଙ୍କ ଜାମିନ୍ ଆବେଦନ ଶୁଣାଣି ହେବା ପରେ ଗଣମାଧ୍ୟମକୁ ଦେଇଥିବା ତାଙ୍କର ବୟାନ ରାଜ୍ୟ ରାଜନୀତିରେ କମ୍ପନ ସୃଷ୍ଟି କରିଛି ।
ଶ୍ରୀ ଦ୍ୱିବେଦୀ କହିଛନ୍ତି, ୨୦୨୪ ଜୁନ୍ ୧୨ ରେ ରାଜ୍ୟରେ ନୂଆ ସରକାରଙ୍କ ଶପଥ ଗ୍ରହଣ ଉତ୍ସବ ଥିଲା । ଏହି ଶପଥ ଗ୍ରହଣ ଉତ୍ସବ ପାଇଁ ଜୁନ୍ ୭ ରେ ଗନ୍ଧମାର୍ଦ୍ଦନ ସୋସାଇଟି କର୍ତ୍ତୃପକ୍ଷଙ୍କୁ ୧୪ ଲକ୍ଷ ଟଙ୍କା ମଗାଯାଇଥିଲା । ଟଙ୍କା ନ ଦେଲେ ଅଫିସ ବନ୍ଦ କରି ଦିଆଯିବ ବୋଲି ଧମକ ଦିଆଯାଇଥିଲା । ଏଥିରେ ଡ଼ରି ଯାଇ ସୋସାଇଟି କର୍ତ୍ତୃପକ୍ଷ ରିଜୋଲ୍ୟୁସନ୍ କରି ବ୍ୟାଙ୍କ ଟ୍ରାଞ୍ଜାକ୍ସନ୍ ମାଧ୍ୟମରେ ୧୪ ଲକ୍ଷ ଟଙ୍କା ଦେଇଥିଲେ ।
ତେବେ ସେତିକିରେ କଥା ସରିଲା ନାହିଁ । ଶପଥ ଗ୍ରହଣ ଉତ୍ସବ ପରେ କେନ୍ଦୁଝରର ଦୁଇ ବିଜେପି ନେତା ଅଞ୍ଜନ୍ ବେଜ ଓ ସୁଶାନ୍ତ ବାରିକ ଗନ୍ଧମାର୍ଦ୍ଦନ ସୋସାଇଟି କର୍ତ୍ତୃପକ୍ଷଙ୍କୁ ପୁଣି ଥରେ ଟଙ୍କା ମାଗିଥିଲେ । ରାଜ୍ୟ ବିଜେପି ମୁଖ୍ୟଙ୍କୁ ଏହି ଟଙ୍କା ଦେବାକୁ ଦାବି କରିଥିଲେ । ସେମାନଙ୍କର ଦାବି ମୁତାବକ, ସୋସାଇଟି କର୍ତ୍ତୃପକ୍ଷ ଜୁଲାଇ ୪ ରେ ଆଉ ଏକ ରିଜୋଲ୍ୟୁସନ୍ କରି ରାଜ୍ୟ ବିଜେପି ମୁଖ୍ୟଙ୍କ ନାମରେ ୧ କୋଟି ୩ ଲକ୍ଷ ଟଙ୍କା ଦେବାକୁ ନିଷ୍ପତ୍ତି ନେଇଥିଲେ ।
ସେହି ଅନୁଯାୟୀ, ବିଜେପି ରାଜ୍ୟ ମୁଖ୍ୟଙ୍କ ନାମରେ ଥିବା ବ୍ୟାଙ୍କ ଆକାଉଣ୍ଟରେ ୫୩ ଲକ୍ଷ ଟଙ୍କା ଦିଆଯାଇଥିବା ବେଳେ ୫୦ ଲକ୍ଷ ଟଙ୍କା ଆରଟିଜିଏସ୍ ମାଧ୍ୟମରେ ଓ ୧୫ ଲକ୍ଷ ଟଙ୍କା ସ୍ଥାନୀୟ ପ୍ରତିନିଧିଙ୍କୁ ଦିଆଯାଇଥିବା ରାଜାଙ୍କ ଓକିଲ ଶ୍ରୀ ଦ୍ୱିବେଦୀ କହିଛନ୍ତି ।
ଶ୍ରୀ ଦ୍ୱିବେଦୀଙ୍କର ଏହି ବୟାନ ସୋସିଆଲ୍ ମିଡିଆରେ ଭାଇରାଲ୍ ହୋଇଥିବା ବେଳେ ବିଭିନ୍ନ ମହଲରୁ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି । ତେବେ ଏ ସମ୍ପର୍କରେ ରାଜ୍ୟ ବିଜେପି ମୁଖ୍ୟଙ୍କର ପ୍ରତିକ୍ରିୟା ଏ ପର୍ଯ୍ୟନ୍ତ ଆସିନାହିଁ ।
