ଭୁବନେଶ୍ୱର: ରାଜ୍ୟସଭାରେ ବିବେକାନୁମୋଦିତ ଭୋଟ୍ ର ଦ୍ୱାହି ଦେଇ ବିଜେଡିର ଇଜ୍ଜତ ସହ ଖେଳ ଖେଳିଛନ୍ତି ଦଳର ସୁପ୍ରିମୋ ନବୀନ ପଟ୍ଟନାୟକ । ଅଦୃଶ୍ୟ ଚାପ ଆଗରେ ଲକ୍ଷ ଲକ୍ଷ ନେତା ଓ କର୍ମୀଙ୍କୁ ତୁଚ୍ଛ କରିଦେଇଛନ୍ତି । ନିର୍ବାଚନ ପରାଜୟ ଭୁଲି ଉପରକୁ ଉଠିବାକୁ ଚେଷ୍ଟା କରୁଥିବା ଏମାନଙ୍କ ପଛରୁ ଗୋଇଠା ମାରିଛନ୍ତି । ୱକଫ୍ ସଂଶୋଧନ ବିଲ୍ ପ୍ରସଙ୍ଗରେ ନବୀନଙ୍କ ଦୋମୁହାଁ ନୀତି ବିଜେଡିକୁ ବରବାଦ କରିବାକୁ ବସିଛି । ବିଲ୍ କୁ ବିରୋଧ କରାଯିବ ବୋଲି ନବୀନ ବାବୁ ପ୍ରଥମରୁ ନିଷ୍ପତ୍ତି ନେଇଥିଲା ବେଳେ ଶେଷ ମୁହୂର୍ତ୍ତରେ ନିଷ୍ପତ୍ତି ବଦଳେଇବା ଦଳର ବରିଷ୍ଠ ନେତାମାନଙ୍କୁ ଆଚମ୍ବିତ କରିଛି । ସଭାପତିଙ୍କ ଏଭଳି ନିଷ୍ପତ୍ତିକୁ ନାପସନ୍ଦ କରି ସେମାନେ ଏକଜୁଟ୍ ହୋଇଛନ୍ତି । କ’ଣ ଖେଳ ହେଲା ବୋଲି ନବୀନଙ୍କ ଉଦ୍ଦେଶ୍ୟରେ ପ୍ରଶ୍ନ କରିଛନ୍ତି । ନବୀନ ନିବାସ ଯାଇ ନବୀନ ପଟ୍ଟନାୟକଙ୍କଠାରୁ ଏହାର କାରଣ ବୁଝିବେ ବୋଲି ଗଣମାଧ୍ୟମକୁ ପ୍ରତିକ୍ରିୟା ଦେଇଛନ୍ତି । ସେପଟେ ୱକଫ୍ ସଂଶୋଧନ ବିଲ୍ କୁ ନେଇ ବିଜେଡି ରାଜ୍ୟସଭା ଦଳ ଦୁଇଭାଗ ହୋଇଯାଇଛି । ଡ. ସସ୍ମିତ୍ ପାତ୍ର ବିଲ୍ ସମର୍ଥନରେ ଭୋଟ ଦେଇଥିବା ବେଳେ ମୁନ୍ନା ଖାଁ ବିଲ୍ ବିରୋଧରେ ଭୋଟ ଦେଇଛନ୍ତି । ଦେବାଶିଷ ସାମନ୍ତରାୟ ଭୋଟ ଦେଇନାହାନ୍ତି । ଅନ୍ୟ ୪ ଜଣଙ୍କ କଥା ସ୍ପଷ୍ଟ ହୋଇ ନ ଥିଲେ ମଧ୍ୟ ପାଣ୍ଡିଆନଙ୍କ ପାଖଲୋକ ହିସାବରେ ନବୀନଙ୍କ ନିଷ୍ପତ୍ତିକୁ ଶିରୋଧାର୍ଯ୍ୟ କରିଥିବା ସନ୍ଦେହ କରାଯାଉଛି ।
ୱକଫ୍ ସଂଶୋଧନ ବିଲ୍ ପ୍ରସଙ୍ଗରେ ବିଜେଡିର ଆଭିମୁଖ୍ୟ ତୁହାକୁ ତୁହା ବଦଳିବା ଭୟଙ୍କର ପରିସ୍ଥିତି ସୃଷ୍ଟି କରିଛି । ବିଲ୍ କୁ ବିରୋଧ କରାଯିବ ବୋଲି ସ୍ୱୟଂ ନବୀନ ପଟ୍ଟନାୟକ ସଂସଦୀୟ ଦଳ ବୈଠକରେ ନିଷ୍ପତ୍ତି ନେଇଥିଲେ । ଶଙ୍ଖ ଭବନରେ ଇଫତାର ପାର୍ଟିରେ ଯୋଗଦେବା ବେଳେ ସାଂସଦ ମୁନ୍ନା ଖାଁଙ୍କୁ ଡାକି ଏହା ମନେ ପକାଇ ଦେଇଥିଲେ । ଦଳୀୟ ନିଷ୍ପତ୍ତିକ୍ରମେ ଗୁରୁବାର ଦିନ ରାଜ୍ୟସଭା ଆଲୋଚନାରେ ଭାଗ ନେଇ ବିଲ୍ କୁ ତୀବ୍ର ବିରୋଧ କରିଥିଲେ ମୁନ୍ନା ଖାଁ । ତେବେ ସଂଧ୍ୟା ୫ଟା ୫୯ ମିନିଟ୍ ରେ ରାଜ୍ୟସଭା ନେତା ଡ. ସସ୍ମିତ୍ ପାତ୍ରଙ୍କର ଏକ ଟୁଇଟ୍ ଆସିଥିଲା । ସେଥିରେ ବିଜେଡିର ପୂର୍ବ ନିଷ୍ପତ୍ତି ବଦଳି ଯାଇଥିଲା । ବିବେକାନୁମୋଦିତ ଭୋଟ ଦେବା ପାଇଁ ସାଂସଦମାନଙ୍କୁ କୁହାଗଲା । ହୁଇପ୍ ଜାରି ହେଲା ନାହିଁ ।
ସସ୍ମିତଙ୍କର ଏହା ଯେ ନିଜସ୍ୱ ନିଷ୍ପତ୍ତି ଥିଲା ତାହା ନୁହେଁ । ନିଷ୍ପତ୍ତି ଥିଲା ନବୀନ ପଟ୍ଟନାୟକଙ୍କର । ସସ୍ମିତଙ୍କୁ କେବଳ ଟୁଇଟ୍ କରିବାକୁ କୁହାଗଲା । ମାତ୍ର ଏଭଳି ଏକ ଅତି ସମ୍ବେଦନଶୀଳ ଓ ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ ନବୀନ ବାବୁ କେମିତି ନିଷ୍ପତ୍ତି ବଦଳେଇ ପାରିଲେ ତାହା ସମସ୍ତଙ୍କୁ ଅବାକ୍ କରିଛି । ଅଦୃଶ୍ୟ ଚାପରେ ସେ ଚେପା ହୋଇଥିବା ସ୍ପଷ୍ଟ ହେଉଥିଲେ ମଧ୍ୟ ତାହା କ’ଣ ହୋଇପାରେ ତାକୁ ନେଇ ରାଜନୈତିକ ମହଲରେ ସରଗରମ ଚର୍ଚ୍ଚା ହେଉଛି । ତେବେ ଏହା ନବୀନ ପଟ୍ଟନାୟକଙ୍କ ବ୍ୟକ୍ତିତ୍ୱ ଏବଂ ସମ୍ମାନ ଉପରେ କଳା ଚିହ୍ନ ଲଗାଇବା ସହ ସାମଗ୍ରିକ ଭାବେ ବିଜେଡି ପାଇଁ ବହୁତ କ୍ଷତିକାରକ ହୋଇଛି ।
ନବୀନଙ୍କ ଏହି ନିଷ୍ପତ୍ତିକୁ ନାପସନ୍ଦ କରି ପ୍ରସନ୍ନ ଆଚାର୍ଯ୍ୟ, ବଦ୍ରି ପାତ୍ର, ଶଶୀଭୂଷଣ ବେହେରା, ଭୂପିନ୍ଦର ସିଂଙ୍କ ଭଳି ଦଳର ବରିଷ୍ଠ ନେତାମାନେ ଗଣମାଧ୍ୟମରେ ମୁହଁ ଖୋଲିଛନ୍ତି । ବିଲ୍ କୁ ବିରୋଧ କରିବାକୁ ନିଷ୍ପତ୍ତି ହୋଇଥିଲା ବେଳେ କେମିତି ତାହା ବଦଳିଲା ବୋଲି ପ୍ରଶ୍ନ କରିଛନ୍ତି ପ୍ରସନ୍ନ ଆଚାର୍ଯ୍ୟ । ବରିଷ୍ଠ ନେତା ବଦ୍ରି ପାତ୍ରଙ୍କ ସନ୍ଦେହ ଯେ ଭିତରେ କିଛି ଖେଳ ହୋଇଛି । ଆମେ ବରିଷ୍ଠ ନେତାମାନେ ସଭାପତିଙ୍କୁ ଭେଟିବୁ ବୋଲି ଭୂପିନ୍ଦର ସିଂ କହିଛନ୍ତି ।
ୱକଫ୍ ସଂଶୋଧନ ବିଲ୍ ଉପରେ ବିଜେଡିର ଦୋମୁହାଁ ନୀତିକୁ ସମାଲୋଚନା କରିଛି କଂଗ୍ରେସ । ପିସିସି ସଭାପତି ଭକ୍ତ ଦାସ କହିଛନ୍ତି ଯେ ବିଜେଡି-ବିଜେପି ମଧ୍ୟରେ ଡିଲ୍ ହୋଇଛି । ଦିଲ୍ଲୀରେ ନବୀନଙ୍କୁ ନେଇ ମାନସପୁତ୍ର ଡିଲ୍ କରିଛନ୍ତି । ବିଜେପି ନିକଟରେ ନବୀନଙ୍କୁ ମାନସପୁତ୍ର ବିକିଛନ୍ତି ବୋଲି ଭକ୍ତ କଟାକ୍ଷ କରିଛନ୍ତି ।
ତେବେ ୱକଫ୍ ସଂଶୋଧନ ବିଲ୍ କୁ ନେଇ ବିଜେଡିର ଦ୍ୱନ୍ଦକୁ ସମାଲୋଚନା କରିଛି ବିଜେପି । ବିଜେଡି ଏବେ ଦୁଇଫାଳ ହୋଇଯାଇଛି ବୋଲି ବିଧାୟକ ବାବୁ ସିଂ କହିଛନ୍ତି ।
ସର୍ବଶେଷ ଖବର ହେଉଛି ଯେ ବିଜେଡିକୁ ଏହା ଭୟଙ୍କର ବିପଦ ଆଡକୁ ଟାଣି ନେଇଛି । ନିର୍ବାଚନ ପରାଜୟ ତ୍ରୁଟିକୁ ସଜାଡୁ ନ ଥିବା ନବୀନଙ୍କର ଏହି ଦଳବୂଡ଼ା ଆଚରଣକୁ ଦଳର ବରିଷ୍ଠ ନେତାମାନେ ଆଉ ଯେ ସହ୍ୟ କରିବା ଅବସ୍ଥାରେ ନାହାନ୍ତି ତାହା ସ୍ପଷ୍ଟ ହୋଇଗଲାଣି । ଆଗାମୀ ଦିନରେ କିଛି ଗୋଟେ ବଡ଼ ଘଟଣା ଘଟିପାରେ ବୋଲି ଦଳର ଜଣେ ବରିଷ୍ଠ ନେତା ସୂଚନା ଦେଇଛନ୍ତି ।
