ସିବିଆଇକୁ ଆନ୍ଧ୍ର ଦ୍ୱାର ବନ୍ଦ କଲେ ନାଇଡୁ ସରକାର

ହାଇଦ୍ରାବାଦ: ସିବିଆଇ ତାର ପବିତ୍ରତା ଓ ବିଶ୍ୱସନୀୟତା ହରାଇ ଦେଇଛି । ମୋଦି ସରକାରଙ୍କର ଏହା କଣ୍ଢେଇ ସାଜିଛି । ଏଭଳି ଏକ ଅପବିତ୍ର ତଦନ୍ତକାରୀ ସଂସ୍ଥାର ମୁହଁ ଚାହିଁବାକୁ ମନା କରିଦେଇଛନ୍ତି ଆନ୍ଧ୍ରପ୍ରଦେଶର ଚନ୍ଦ୍ରବାବୁ ନାଇଡୁ ସରକାର । ସିବିଆଇ ପାଇଁ ଆନ୍ଧ୍ର ଦ୍ୱାର ଦ୍ୱାର ବନ୍ଦ କରିଦେଇଛନ୍ତି । ସିବିଆଇର ରାଜ୍ୟ ପ୍ରବେଶ ଅନୁମତିକୁ ଆଜି ଏକ ସ୍ୱତନ୍ତ୍ର ନିର୍ଦ୍ଦେଶନାମା ବଳରେ ଆନ୍ଧ୍ର ସରକାର ପ୍ରତ୍ୟାହାର କରିନେଇଛନ୍ତି । ରାଜ୍ୟ ସରକାରଙ୍କ ବିନା ଅନୁମତିରେ ସିବିଆଇ ଆନ୍ଧ୍ରପ୍ରଦେଶକୁ ପଶିପାରିବ ନାହିଁ । ରାଜ୍ୟ ସରକାରଙ୍କ ତଦନ୍ତକାରୀ ସଂସ୍ଥା(ଏସିବି) ସିବିଆଇର ସମସ୍ତ ଦାୟିତ୍ୱଭାର ସମ୍ଭାଳିବ । ସିବିଆଇ ସହ ନାଇଡୁ ସରକାରଙ୍କର ଏଭଳି କଠୋର ମୁକାବିଲା ସମଗ୍ର ଦେଶରେ ହଇଚଇ ସୃଷ୍ଟି କରିଛି ।

ଆଜି  ଆନ୍ଧ୍ର ସରକାରଙ୍କ ପକ୍ଷରୁ ଗୃହ ବିଭାଗର ପ୍ରମୁଖ ସଚିବ ଏ.ଆର.ଅନୁରାଧାଙ୍କ ଦସ୍ତଖତରେ ଏକ ସରକାରୀ ଗେଜେଟ୍ ପ୍ରକାଶ ପାଇଛି । ଦିଲ୍ଲୀ ପୁଲିସ ଏଷ୍ଟାବ୍ଲିସମେଣ୍ଟ ଆକ୍ଟ୍ ର ଧାରା ୬ କୁ ପ୍ରତ୍ୟାହାର କରାଗଲା ବୋଲି ସେଥିରେ ନିର୍ଦ୍ଦେଶନାମା ରହିଛି । ଏହି ଧାରା ପ୍ରତ୍ୟାହାର ଅର୍ଥ ସିବିଆଇକୁ ଆନ୍ଧ୍ର ପ୍ରଦେଶରେ ପ୍ରବେଶ ଅନୁମତି ପ୍ରତ୍ୟାହାର କରାଯାଇଛି । ସିବିଆଇ ଆନ୍ଧ୍ରପ୍ରଦେଶ ଯାଇ କାହାରି ଉପରେ ଚଢ଼ଉ କରିପାରିବନି କି କୌଣସି ମାମଲାର ଅନୁସନ୍ଧାନ କରିପାରିବ ନାହିଁ ।

ସୂଚନାଯୋଗ୍ୟ, ଦିଲ୍ଲୀ ସ୍ପେଶାଲ୍ ପୁଲିସ ଏଷ୍ଟାବ୍ଲିସମେଣ୍ଟ ଆକ୍ଟ ୧୯୪୬ ବଳରେ ସିବିଆଇ ସଂସ୍ଥା ଗଠନ ହୋଇଛି । କେନ୍ଦ୍ରୀୟ ସଂସ୍ଥାଗୁଡ଼ିକ ବିରୋଧରେ ଦୁର୍ନୀତିର ତଦନ୍ତ ପାଇଁ ଏହା ଉଦିଷ୍ଟ । ଏହି ଆଇନରେ ଦିଲ୍ଲୀ ଉପରେ ସିବିଆଇର ସମ୍ପୂର୍ଣ୍ଣ କବଜା ଥିବା ବେଳେ ଅନ୍ୟ ରାଜ୍ୟଗୁଡ଼ିକରେ ପ୍ରବେଶ ପାଇଁ ଅନୁମତିର ବ୍ୟବସ୍ଥା ଅଛି । ପ୍ରତିବର୍ଷ ଏକ ବିଜ୍ଞପ୍ତି ଜରିଆରେ ପ୍ରାୟ ସବୁ ରାଜ୍ୟ ସିବିଆଇକୁ ପ୍ରବେଶର ଅନୁମତି ଦେଇଦିଅନ୍ତି । ରାଜ୍ୟର କ୍ଷମତା ଅଛି, ଉକ୍ତ ଆକ୍ଟର ଧାରା ୬ କୁ ପ୍ରତ୍ୟାହାର କରିବାକୁ । ଯାହା ଆଜି ଆନ୍ଧ୍ର କରି ଦେଖାଇଛି ।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସହ ମୁଖ୍ୟମନ୍ତ୍ରୀ ଚନ୍ଦ୍ରବାବୁ ନାଇଡୁଙ୍କ ତିକ୍ତ ସମ୍ପର୍କ ସମସ୍ତେ ଜାଣନ୍ତି । ସିବିଆଇ ଭଳି ଏକ ସଂସ୍ଥାକୁ ମୋଦି ସରକାର କବଜାରେ ରଖି ନିଜ ସ୍ୱାର୍ଥ ପାଇଁ ବ୍ୟବହାର କରୁଥିବା ସେ ବାରମ୍ବାର ଅଭିଯୋଗ କରି ଆସୁଛନ୍ତି । ମୋଦିଙ୍କ ହସ୍ତକ୍ଷେପ ସିବିଆଇକୁ କଳୁଷିତ କରିଛି ଏବଂ ସିବିଆଇ ତାହର ବିଶ୍ୱନୀୟତା ହରାଇ ବସିଛି ବୋଲି ତାଙ୍କର ଅଭିଯୋଗ ରହିଆସିଛି । ଶେଷରେ ନାଇଡୁ ତାହାର ବଦଲା ନେଇଛନ୍ତି । ସିବିଆଇକୁ ରାଜ୍ୟ ପ୍ରବେଶ ରୋକିବାକୁ ନାଇଡୁ ସରକାରଙ୍କ କ୍ଷମତା ପ୍ରୟୋଗ ସାରା ଦେଶରେ ଚର୍ଚ୍ଚାର ବିଷୟ ପାଲଟିଛି । ସିବିଆଇକୁ ଏହା ଖାଲି ବଡ଼ ଧକ୍କା ଦେଇନି ବରଂ ପୁଣି ଏକ ଝଡ଼ ଭିତରକୁ ଠେଲି ଦେଇଛି । ମୋଦି ସରକାରଙ୍କୁ ମଧ୍ୟ ଏହା ବିବାଦୀୟ ସ୍ଥିତିକୁ ଟାଣିନେଇଛି ।