– ରାତିଅଧରେ ଘୋଷଣା ହେଲା କଂଗ୍ରେସ ଦ୍ୱିତୀୟ ପର୍ଯ୍ୟାୟ ତାଲିକା
– ୨ ଲୋକସଭା, ୫୪ ବିଧାନସଭା ପ୍ରାର୍ଥୀ ଘୋଷଣା
– ନିରଞ୍ଜନ ଓ ଅନନ୍ତ ବାପପୁଅଙ୍କ ଟିକେଟ ଝୁଲିଲା
ଭୁୁବନେଶ୍ୱର: ପୂର୍ବତନ ମୁଖ୍ୟମନ୍ତ୍ରୀ ହେମାନନ୍ଦ ବିଶ୍ୱାଳଙ୍କ ସାନଝିଅ ଅମିତା ବିଶ୍ୱାଳ ସୁନ୍ଦରଗଡ଼ ବିଧାନସଭା ଆସନରୁ କଂଗ୍ରେସ ପ୍ରାର୍ଥୀ ଭାବେ ନିର୍ବାଚନ ଲଢ଼ିବେ । ସେହି ଲୋକସଭା ଆସନରେ ବିଜେଡ଼ି ପ୍ରାର୍ଥୀ ହୋଇଛନ୍ତି ତାଙ୍କ ବଡ଼ଭଉଣୀ ସୁନୀତା । ହେମାନନ୍ଦଙ୍କ ଟିକେଟ୍ ଘୋଷଣା ଅପେକ୍ଷାରେ ଅଛି । ବଲାଙ୍ଗୀର ଲୋକସଭା ଆସନରୁ ନରସିଂହ ମିଶ୍ରଙ୍କ ପୁଅ ସମରେନ୍ଦ୍ର ମିଶ୍ର ପ୍ରାର୍ଥୀ ହୋଇଛନ୍ତି । ଭବାନୀପାଟଣା ଆସନରୁ ଭକ୍ତଚରଣ ଦାସଙ୍କ ପୁଅ ସାଗର ପ୍ରତାପ ଦାସଙ୍କୁ ଟିକେଟ ମିଳିଛି । ଆଗକୁ ପିସିସି ସଭାପତି ନିରଂଜନ ପଟ୍ଟନାୟକ ଓ ତାଙ୍କର ବରିଷ୍ଠ ଅନୁଗାମୀ ଅନନ୍ତ ସେଠୀ ବାପପୁଅ ଯୋଡିଙ୍କ ଟିକେଟ ଦେଖିବାକୁ ମିଳିବ । କୌଣସି କାରଣରୁ ବୋଧହୁଏ ତାହା ଅଟକି ରହିଛି । ଜୟଦେବ ଜେନାଙ୍କ ପୁଅ ସଂଗ୍ରାମ ଜେନାଙ୍କୁ ବି ଟିକେଟ ଦିଆଯାଇପାରେ ।
ଚଳିତ ନିର୍ବାଚନ ଦୃଶ୍ୟପଟରେ କଂଗ୍ରେସର ଏହିଭଳି ବାପ-ପୁଅ-ଝିଅଙ୍କ ଯୋଡି ଦେଖିବାକୁ ମିଳୁଛି । ଗଲାକାଲି କଂଗ୍ରେସ ରାତି ଅଧରେ ଦ୍ୱିତୀୟ ପର୍ଯ୍ୟାୟର ପ୍ରାର୍ଥୀ ତାଲିକା ଘୋଷଣା କରିଛି । ଦୁଇଟି ଲୋକସଭା ଏବଂ ୫୪ ବିଧାନସଭା ଆସନ ପାଇଁ ପ୍ରାର୍ଥୀ ଘୋଷଣା କରାଯାଇଛି । ବଲାଙ୍ଗୀର ଲୋକସଭା ଆସନରୁ ନରସିଂହ ମିଶ୍ରଙ୍କ ପୁଅ ସମରେନ୍ଦ୍ର ମିଶ୍ର ପ୍ରାର୍ଥୀ ହୋଇଥିବା ବେଳେ କୋରାପୁଟରୁ ସ୍ୱର୍ଗତ ରାମଚନ୍ଦ୍ର ଉଲ୍ଲାକାଙ୍କ ପୁଅ ସପ୍ତଗିରି ଉଲ୍ଲାକା ପ୍ରାର୍ଥୀ ହୋଇଛନ୍ତି ।
ଘୋଷିତ ୫୪ ଜଣିଆ ବିଧାନସଭା ତାଲିକାରେ ୬ ଜଣ ମହିଳା ସ୍ଥାନ ପାଇଛନ୍ତି । ସେମାନେ ହେଲେ ସୁନ୍ଦରଗଡ଼ରୁ ଅମିତା ବିଶ୍ୱାଳ,ନୀଳଗିରିରୁ ମନୋଜ ମଞ୍ଜରୀ ଦେବୀ,କୋରେଇରୁ ବନ୍ଦିତା ପରିଡ଼ା, ଭୁବନେଶ୍ୱର ଏକାମ୍ରରୁ ରଶ୍ମିରେଖା ମହାପାତ୍ର, ରଣପୁରରୁ ଶୁଭଶ୍ରୀ(ମିଲି) ପଣ୍ଡା ଏବଂ ଛେଣ୍ଡିପଦାରୁ ପୂର୍ବତନ ମହିଳା କଂଗ୍ରେସ ସଭାପତି ସସ୍ମିତା ବେହେରା ।
ପ୍ରଥମ ପର୍ଯ୍ୟାୟ ତାଲିକାରେ ଦିଗପହଣ୍ଡି ଆସନରୁ ବିସ୍ମୟ ମହାପାତ୍ରଙ୍କ ନାଁ ଘୋଷଣା କରାଯାଇଥିଲା । ମାତ୍ର ତାଙ୍କ ନାଁ କୁ କାଟି ଦିଆଯାଇଛି । ସେହି ଜାଗାରେ ପ୍ରଫୁଲ୍ଲ ପଣ୍ଡାଙ୍କୁ ନୂଆ ପ୍ରାର୍ଥୀ ଘୋଷଣା କରାଯାଇଛି । ଦ୍ୱିତୀୟ ପର୍ଯ୍ୟାୟ ତାଲିକାରେ ପୂର୍ବତନ ପିସିସି ସଭାପତି ଜୟଦେବ ଜେନା ଏବଂ ପ୍ରସାଦ ହରିଚନ୍ଦନଙ୍କ ନାଁ ରହିଛି । ଜୟଦେବ ଆନନ୍ଦପୁରରୁ ଏବଂ ପ୍ରସାଦ ସତ୍ୟବାଦୀରୁ ଲଢ଼ିବେ । ପୂର୍ବତନ ମନ୍ତ୍ରୀ ସୁରେଶ ରାଉତରାୟ ଜଟଣୀରୁ ପୁନର୍ବାର ପ୍ରାର୍ଥୀ ହୋଇଛନ୍ତି ।
ବିଧାୟକ ଡାକ୍ତର ଡାକ୍ତର ପ୍ରଫୁଲ୍ଲ ମାଝୀ, ଚିରଞ୍ଜିବୀ ବିଶ୍ୱାଳ, ଦେବେନ୍ଦ୍ର ଶର୍ମା, ଅଂଶୁମାନ ମହାନ୍ତି, କୈଳାସ କୁଲେସିକା,ଚନ୍ଦ୍ରଶେଖର ମାଝୀ ଏବଂ କେ.ସୂର୍ଯ୍ୟ ରାଓଙ୍କୁ ଟିକେଟ୍ ମିଳିଛି । ପୂର୍ବତନ ମନ୍ତ୍ରୀ ରିପୁନାଥ ସେଠ୍ ବିଜେପୁରରୁ ଲଢ଼ିବେ ନବୀନ ପଟ୍ଟନାୟକଙ୍କ ସହ । ଦୁଇଦିନ ତଳେ କଂଗ୍ରେସରେ ମିଶିଥିବା ନବୀନ ନନ୍ଦ ଢ଼େଙ୍କାନାଳ ଆସନରୁ ପ୍ରାର୍ଥୀ ହୋଇଛନ୍ତି ।
