ଭୁବନେଶ୍ୱର: ନିର୍ବାଚନ ବେଳେ ଓଡ଼ିଶାବାସୀଙ୍କୁ ଦେଇଥିବା ବଡ଼ ପ୍ରତିଶ୍ରୁତିକୁ ରାଜ୍ୟର ନବଗଠିତ ବିଜେପି ସରକାର ପାଳନ କରିବାକୁ ଯାଉଛନ୍ତି । ଆସନ୍ତାକାଲି ସକାଳେ ଭକ୍ତମାନଙ୍କ ପାଇଁ ଖୋଲିବ ଶ୍ରୀମନ୍ଦିରର ଚାରିଦ୍ୱାର । ଆଜି ସଂଧ୍ୟାରେ ମୁଖ୍ୟମନ୍ତ୍ରୀ ମୋହନ ମାଝୀଙ୍କ ଅଧ୍ୟକ୍ଷତାରେ ପ୍ରଥମ କ୍ୟାବିନେଟ୍ ବୈଠକରେ ଏହି ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନିଆଯାଇଛି । ଏହାକୁ ମିଶାଇ ଆଜି କ୍ୟାବିନେଟ୍ ବୈଠକରେ ମୋଟ ଚାରିଟା ପ୍ରସ୍ତାବ ଉପରେ ମୋହର ଲାଗିଛି ।
କ୍ୟାବିନେଟ୍ ବୈଠକ ପରେ ମୁଖ୍ୟମନ୍ତ୍ରୀ ଶ୍ରୀ ମାଝୀ ଗଣମାଧ୍ୟମକୁ ଏହାର ନିଷ୍ପତ୍ତି ଜଣାଇଛନ୍ତି । ପ୍ରଥମ ବଡ଼ ନିଷ୍ପତ୍ତି ଅନୁଯାୟୀ, ଆସନ୍ତାକାଲି ସକାଳେ ମଙ୍ଗଳ ଆରତି ସମୟରେ ଶ୍ରୀମନ୍ଦିରର ଚାରିଦ୍ୱାର ଖୋଲିବ । ମନ୍ତ୍ରୀ ପରିଷଦର ସମସ୍ତ ସଦସ୍ୟଙ୍କ ଉପସ୍ଥିତିରେ ଏହା ଖୋଲାଯିବ । ସେଥିପାଇଁ ଆଜି ରାତିରେ ହିଁ ମନ୍ତ୍ରୀ ପରିଷଦର ସଦସ୍ୟମାନେ ପୁରୀ ଯାଇ ସେଠାରେ ରାତ୍ରିଯାପନ କରିବେ । ରାତି ପାହିଲେ ସେମାନଙ୍କ ଉପସ୍ଥିତିରେ ହିଁ ଶ୍ରୀମନ୍ଦିରର ଚାରିଦ୍ୱାର ଖୋଲିବ ।
ଦ୍ୱିତୀୟ ନିଷ୍ପତ୍ତିରେ, ଶ୍ରୀମନ୍ଦିର କର୍ପସ ଫଣ୍ଡ ପାଇଁ ୫୦୦ କୋଟି ଟଙ୍କା ମଞ୍ଜୁର ହେବ । ମନ୍ଦିର ପରିଚାଳନା, ମରାମତି ଓ ସୌନ୍ଦର୍ଯ୍ୟକରଣରେ ଏହି ଅର୍ଥ ଖର୍ଚ୍ଚ ହେବ ।
ତୃତୀୟ ନିଷ୍ପତ୍ତି ହେଉଛି, ସମୃଦ୍ଧ କୃଷକ ନୀତି ଯୋଜନା ଖୁବ୍ ଶୀଘ୍ର ଆସିବ । ଏହି ଯୋଜନାରେ ଧାନର ଏମଏସପି ୩୧୦୦ ଟଙ୍କାକୁ ବୃଦ୍ଧି ନେଇ କମିଟି ଗଠନ ହେବ ।
ଚତୁର୍ଥ ନିଷ୍ପତ୍ତ ଅନୁଯାୟୀ, ୧୦୦ ଦିନ ଭିତରେ ସୁଭଦ୍ରା ଯୋଜନା କାର୍ଯ୍ୟକାରୀ କରାଯିବ । ଏହି ଯୋଜନାରେ ମହିଳାଙ୍କୁ ୫୦ ହଜାର ଟଙ୍କାର ଭାଉଚର ମିଳିବ ।
ନବଗଠିତ ସରକାରଙ୍କ ଶପଥ ଗ୍ରହଣ ପରେ ପରେ ମୁଖ୍ୟମନ୍ତ୍ରୀ ଶ୍ରୀ ମାଝୀ ଆଉ ଏକ ବଡ଼ ପଦକ୍ଷେପ ନେଇଥିଲେ । ଦୀର୍ଘ ୪ ବର୍ଷ ଧରି ସାମ୍ବାଦିକମାନଙ୍କ ପାଇଁ ଲାଗିଥିବା ଲୋକସେବା ଭବନ ପ୍ରବେଶ କଟକଣାକୁ ହଟାଇ ଦେଇଥିଲେ । ମୁଖ୍ୟମନ୍ତ୍ରୀ ନିଜେ ସମସ୍ତ ସାମ୍ବାଦିକଙ୍କୁ ଡକାଇ ସେମାନଙ୍କ ଗହଣରେ ଲୋକସେବା ଭବନକୁ ପ୍ରବେଶ କରିଥିଲେ । ଏଣିକି ସାମ୍ବାଦିକମାନେ ଲୋକସେବା ଭବନକୁ ଯାଇପାରିବେ । ମୁଖ୍ୟମନ୍ତ୍ରୀଙ୍କ ଏହି ନିଷ୍ପତ୍ତି ସାମ୍ବାଦିକମହଲରେ ଖୁସି ଖେଳାଇ ଦେଇଛି ।
