ଭୁବନେଶ୍ୱର: ରାଜ୍ୟରୁ ହଟିଛି ୫-ଟି ଏବଂ ମୋ ସରକାର ବ୍ୟବସ୍ଥା । ପଞ୍ଚମ ପାଳିର ବିଜେଡି ସରକାରଙ୍କ ଏହି ବହୁଳ ପ୍ରଚାରିତ ବ୍ୟବସ୍ଥାକୁ ରାଜ୍ୟର ବିଜେପି ସରକାର ହଟାଇ ଦେଇଛନ୍ତି । ରାଜ୍ୟର ସବୁ ସରକାରୀ କାର୍ଯ୍ୟାଳୟରେ ଲାଗିଥିବା ଏହାର ବୋର୍ଡ ହଟାଇ ଦେବାକୁ ନବଗଠିତ ସରକାର ଆଜି ନିର୍ଦ୍ଦେଶଶ ଦେଇଛନ୍ତି । ମୁଖ୍ୟମନ୍ତ୍ରୀ ମୋହନ ମାଝୀ ତାଙ୍କ ଏକ୍ସ ହାଣ୍ଡଲରେ ଏହି ସୂଚନା ଦେଇଛନ୍ତି ।
ସୂଚନାଯୋଗ୍ୟ, ନବୀନ ପଟ୍ଟନାୟକଙ୍କ ପଞ୍ଚମ ପାଳିର ସରକାର ଆସିଲା ପରେ ରାଜ୍ୟରେ ଟ୍ରାନସଫରମେସନ୍ ଆଣ୍ଡ ଇନିସିଏଟିଭ୍(୫-ଟି) ବ୍ୟବସ୍ଥା ଆରମ୍ଭ କରାଗଲା । ୫-ଟିର ଅର୍ଥ ଟିମ୍ ୱାର୍କ, ଟେକନୋଲୋଜି, ଟ୍ରାନସପରେନ୍ସି, ଟ୍ରାନସଫରମେସନ୍ ଆଣ୍ଡ ଟାଇମ୍ ଲିମିଟ୍ । ୫-ଟି ମନ୍ତ୍ର ଜରିଆରେ ଲୋକଙ୍କୁ ଉତ୍ତମ ପ୍ରଶାସନ ଦେବା ସରକାରଙ୍କ ଲକ୍ଷ୍ୟ ଥିବା କୁହାଗଲା ।
୨୦୧୯ ଜୁଲାଇ ୨୯ ତାରିଖରେ ମୁଖ୍ୟମନ୍ତ୍ରୀ ଏହାକୁ ଏକ ବିଭାଗର ମାନ୍ୟତା ଦେଇ ତାଙ୍କର ବ୍ୟକ୍ତିଗତ ସଚିବ ଭି.କେ. ପାଣ୍ଡିଆନଙ୍କୁ ଏହାର ସଚିବ ଭାବେ ନିଯୁକ୍ତି ଦେଇଥିଲେ । ଶ୍ରୀ ପାଣ୍ଡିଆନ୍ ମୁଖ୍ୟମନ୍ତ୍ରୀଙ୍କ ସଚିବ ଭାବେ ଦାୟିତ୍ୱ ତୁଲାଇବା ସହ ସହ ୫-ଟି ସଚିବ ଭାବେ ଅତିରିକ୍ତ ଦାୟିତ୍ୱରେ ରହିଲେ । ପରବର୍ତ୍ତୀ ସମୟରେ ଏହି ବ୍ୟବସ୍ଥାରେ ଯୋଡାଗଲା ‘ମୋ ସରକାର’ । ସ୍କୁଲ, ମନ୍ଦିର ରୂପାନ୍ତରଠାରୁ ଆରମ୍ଭ କରି ବିଭିନ୍ନସ୍ତରରେ ୫-ଟି ବ୍ୟବସ୍ଥା ଅନୁସୃତ କରାଯିବା ସହ ସବୁ ସରକାରୀ ଦପ୍ତରରେ ଏହାର ବୋର୍ଡ ଲାଗିଲା ।
୨୦୨୩ ଅକ୍ଟୋବର ମାସରେ ଶ୍ରୀ ପାଣ୍ଡିଆନ୍ ସରକାରୀ ଚାକିରିରୁ ସ୍ୱେଚ୍ଛାକୃତ ଅବସର ନେଇ ବିଜେଡିରେ ଯୋଗଦେବା ପରେ ତାଙ୍କୁ ୫-ଟି ର ଅଧ୍ୟକ୍ଷ ଭାବେ ନିଯୁକ୍ତି ଦିଆଗଲା । ପାଣ୍ଡିଆନଙ୍କ ତତ୍ତ୍ୱାବଧାନରେ ୫-ଟି ବ୍ୟବସ୍ଥା ଜାରି ରହିଲା । ତେବେ ଏହାର ପ୍ରାସଙ୍ଗିକତା ଓ କାର୍ଯ୍ୟକାରିତାକୁ ନେଇ ବିରୋଧୀ ଦଳ ବାରମ୍ବାର ଆପତ୍ତି ଉଠାଇଥିଲେ । ଏବେ ବିଜେପି ସରକାର ଆସିଲା ପରେ ବ୍ୟବସ୍ଥାରେ ପୂର୍ଣ୍ଣଚ୍ଛେଦ ଟାଣିଛନ୍ତି ।
