ଖୋର୍ଦ୍ଧା: ସାରୁଅ ମୌଜାରେ ଓଟିଭି ସଂସ୍ଥାର ଜମି କେଳେଙ୍କାରୀ ମାମଲା ଜଟିଳ ମୋଡ଼ ନେବାରେ ଲାଗିଛି । ଓଟିଭି ଏମଡି ଜାଗୀମଙ୍ଗତ ପଣ୍ଡା, ତାଙ୍କ ବାପା ଓ ଭାଇଙ୍କ ବିରୋଧରେ ବାଘମାରୀ ଥାନାରେ ଦ୍ୱିତୀୟ କେସ୍ ହୋଇଛି । ସାରୁଅ ଓ ଲୋକନାଥପୁର ଦଳିତ ବର୍ଗର ଗ୍ରାମବାସୀଙ୍କ ପକ୍ଷରୁ ଆଜି ଏହି ଏତଲା କରାଯାଇଛି । ପୋଖରୀ ପାଚେରୀକୁ ବିରୋଧ କରିବାରୁ ଜାଗୀଙ୍କ ବାପା, ଭାଇ ଓ ପ୍ରୋଜେକ୍ଟ ଇନଚାର୍ଜ ଧମକାଉଥିବା ଦର୍ଶାଇଛନ୍ତି । କାର୍ଯ୍ୟାନୁଷ୍ଠାନ ଦାବି ସହ ଗାଁ ପୋଖରୀକୁ ଜବରଦଖଲମୁକ୍ତ କରିବାକୁ ସେମାନେ ପୁଲିସର ହସ୍ତକ୍ଷେପ ଲୋଡ଼ିଛନ୍ତି ।
ପୁଲିସ ଏହି ଏତଲାକୁ ଗ୍ରହଣ କରି ଜାଗୀ ପଣ୍ଡା, ତାଙ୍କ ବପା, ଭାଇ ଓ ପ୍ରୋଜେକ୍ଟ ଇନଚାର୍ଜଙ୍କ ବିରୋଧରେ ଏସସି/ଏସଟି ଆଇନର ଧାରା ୩(୧) ଓ ଧାରା ୨(ଭିଏ) ସମେତ ଆଇପିସି ଧାରା ୪୪୭, ୫୦୬ ଓ ୩୪ରେ ମାମଲା ରୁଜୁ କରିଛି ।
୫ ଦିନ ତଳେ ସାରୁଅ ମୌଜାର କିଛି ଦଳିତ ଲୋକ ଜାଗୀ, ତାଙ୍କ ବାପା ଓ ଭାଇଙ୍କ ବିରୋଧରେ ଏତଲା ଦେଇଥିଲେ । ସେମାନଙ୍କର ଅଭିଯୋଗ ଥିଲା, ଚାଷଜମି ଚାରିପଟେ ପାଚେରୀ ବୁଲା ଯାଇ ଜମି ଅବରୋଧ କରାଯାଇଛି । ଯେଉଁଥିପାଇଁ ନିଜ ଜମିରେ ଚାଷ କରିବାକୁ ଯାଇପାରୁନାହାନ୍ତି । ଆପତ୍ତି କଲାରୁ ଜାଗୀ ପଣ୍ଡା, ତାଙ୍କ ବାପା, ଭାଇଧମକ ଦେଉଛନ୍ତି । ବାଘମାରୀ ଥାନା ପୁଲିସ ଏତଲାକୁ ଗ୍ରହଣ କରିବା ସହ ଓଟିଭି ଏମଡି, ତାଙ୍କ ବାପା ଓ ଭାଇଙ୍କ ବିରୋଧରେ ଏସସି/ଏସଟି ଅତ୍ୟାଚାର ନିରୋଧ ଆଇନ ଏବଂ ଆଇପିସିର ଧାରା ୪୪୭, ୫୦୬ ଏବଂ ୩୪ ଦଫାରେ ମାମଲା ରୁଜୁ କରିଥିଲେ ।
ଇତିମଧ୍ୟରେ ଜିଲ୍ଲା ପ୍ରଶାସନ ପକ୍ଷରୁ ଆଜି ଚତୁର୍ଥ ଥର ପାଇଁ ସଂପୃକ୍ତ ଅଞ୍ଚଳରେ ମାପଚୁପ କରାଯାଇଛି । ଓଟିଭିକୁ ଜମି ଦେବା ପାଇଁ ମଧ୍ୟସ୍ଥି ସାଜିଥିବା ବେଗୁନିଆ ତହସିଲଦାରଙ୍କୁ ଏଥିରେ ସାମିଲ କରାଯାଇନାହିଁ । ସଂପୃକ୍ତ ତହସିଲଦାରଙ୍କ ବିରୋଧରେ ପୂର୍ବରୁ ମାଳ ମାଳ ଅଭିଯୋଗ ଥିଲେ ମଧ୍ୟ ଜିଲ୍ଲାପାଳ ଆଖି ବୁଜିଦେଇଥିଲେ । ମାତ୍ର ଏବେକୁ ଚେତା ପଶିଛି ।
ସେପଟେ ଜମି କେଳେଙ୍କାରୀରେ ମୁଖିଆ କେସ୍ ଖାଇଥିବାରୁ ଓଟିଭି ପ୍ରତିହିଂସାପରାୟଣ ହୋଇ ବିଭ୍ରାନ୍ତିକର ଖବର ପ୍ରକାଶ କରୁଥିବା ସାରୁଅ ଗ୍ରାମବାସୀଙ୍କ ପକ୍ଷରୁ ଅଭିଯୋଗ ହେଉଛି । ଓଟିଭି କୌଣସି ଜମିକୁ ଜବରଦଖଲ କରି ନ ଥିବାର ଖବର ସମ୍ପୂର୍ଣ୍ଣ ମିଛ ଓ ମନଗଢ଼ା ବୋଲି ସେମାନେ କହିଛନ୍ତି ।
ସୂଚନାଥାଉକି, ଓଟିଭି ତରଙ୍ଗ ଷ୍ଟୁଡ଼ିଓ ମୁଖ୍ୟ ଗେଟ୍ ରାସ୍ତା ଗୋଚର ଜମି ଉପରେ ନିର୍ମାଣ ହୋଇଥିବାରୁ ପ୍ରଶାସନ ସେଠି ନାଲି ପତାକା ମାରିଛି ।
