ଭୁବନେଶ୍ୱର:ପଞ୍ଚାୟତ ଭୋଟ ଗଣତି ପ୍ରଥମ ଦିନର ଫଳାଫଳ ସମ୍ପୂର୍ଣ୍ଣ ପ୍ରକାଶ ପାଇ ନାହିଁ । ରାତି ୯ଟା ସୁଦ୍ଧା ମିଳିଥିବା ଟ୍ରେଣ୍ଡ ଅନୁଯାୟୀ, ୩୧୫ ଜିଲ୍ଲା ପରିଷଦ ଆସନରୁ ବିଜେଡ଼ି ୨୭୯ ଆସନରେ ଆଗୁଆ ରହିଛି । ବିଜେପି ୧୭ ଆସନରେ ଆଗୁଆ ଥିବା ବେଳେ କଂଗ୍ରେସ ୧୪ ଏବଂ ଅନ୍ୟାନ୍ୟ ଦଳ ୫ ଟି ଆସନରେ ଆଗୁଆ ଅଛନ୍ତି । ଏହି ପର୍ଯ୍ୟାୟରେ ବିଜେଡ଼ି ୩୦ଟି ଯାକ ଜିଲ୍ଲାରେ ନିଜର ସ୍ଥିତି ସୁଦୃଢ଼ କରିଥିଲା ବେଳେ ବିଜେପି ଅଧା ଜିଲ୍ଲାରେ ଖାତା ଖୋଲିପାରିନାହିଁ । ୨୦୧୭ ପଞ୍ଚାୟତ ନିର୍ବାଚନରେ ବିଜେପି ବରଗଡ଼, ବଲାଙ୍ଗୀର, ଦେବଗଡ଼, ସମ୍ବଲପୁର, ସୋନପୁର ଏବଂ ଗଜପତି ଜିଲ୍ଲାରେ ନିଜର ଦବଦବା ଦେଖାଇଥିଲା । ମାତ୍ର ଏଥର ସେହି ସବୁ ଜିଲ୍ଲାରେ ମାଟି କାମୁଡିବା ଅବସ୍ଥାକୁ ଆସିଛି । ବିଜେଡ଼ି ଅକ୍ତିଆରକୁ ଆସିଛି ଏହିସବୁ ଜିଲ୍ଲା । ଉପକୂଳ ଜିଲ୍ଲାଗୁଡ଼ିକରେ ବିଜେଡ଼ି ନିଜର ପୂର୍ବସ୍ଥିତି ଆହୁରି ସୁଦୃଢ଼ କରିଛି । କଂଗ୍ରେସର ସ୍ଥିତି ଯଥା ପୂର୍ବଂ ତଥା ପରଂ । ମାତ୍ର ୭ଟି ଜିଲ୍ଲାରେ କଂଗ୍ରେସ ସ୍ଥିତି ଜାହିର କରିଛି ।
ପଞ୍ଚମ ଥର ପାଇଁ ରାଜ୍ୟରେ ଶାସନ କରୁଛି ବିଜେଡ଼ି । ଆଉ ଦୁଇବର୍ଷ ପରେ ସାଧାରଣ ନିର୍ବାଚନ । ଏତିକିବେଳେ ରାଜ୍ୟର ଗ୍ରାମାଞ୍ଚଳ ଭୋଟରଙ୍କ ମୁଡ଼୍ ନିଶ୍ଚିତ ଭାବେ ପ୍ରଣିଧାନଯୋଗ୍ୟ । ଗୁରୁତ୍ୱପୂର୍ଣ୍ଣ କଥା ହେଲା, ବିଜେଡ଼ି ଉପରୁ ଏହି ଗ୍ରାମାଞ୍ଚଳ ଭୋଟରଙ୍କ ସମର୍ଥନ ଜମାରୁ ହ୍ରାସ୍ ପାଇନାହିଁ, ଯାହା କି ପଞ୍ଚାୟତ ନିର୍ବାଚନ ପ୍ରାରମ୍ଭିକ ଫଳାଫଳରୁ ସ୍ପଷ୍ଟ ହେଉଛି । ବରଂ ଗତଥର ଅପେକ୍ଷା ଦଳ ବହୁ ଅଧିକ ଜିଲ୍ଲା ପରିଷଦ ଆସନ ଜିତିବାର ଲକ୍ଷଣ କହୁଛି । ଅନ୍ୟପକ୍ଷରେ, ମୁଖ୍ୟ ବିରୋଧୀ ଦଳ ବିଜେପି କ୍ଷେତ୍ରରେ କିନ୍ତୁ ବିଲକ୍ଷଣ ଦେଖିବାକୁ ମିଳୁଛି । ଅଧିକ ସିଟ୍ ପାଇବ କ’ଣ ଓଲଟି ଦଳର ସ୍ଥିତି ହଜିଯିବା ଭଳି ହୋଇଛି । ଦ୍ୱିତୀୟ ନମ୍ବର ପାଇଁ କଂଗ୍ରେସ ସହ ବରାବରିରେ ରହିଛି ।
ସାଧାରଣତଃ କ୍ଷମତାସୀନ ଦଳ ପାଇଁ ଭୋଟ ବେଳେ ଆଣ୍ଟି ଇନକମ୍ବେନ୍ସିଂ ଫ୍ୟାକ୍ଟର କାମ କରିଥାଏ । ମାତ୍ର ଓଡ଼ିଶାରେ ବିଜେଡ଼ି ଏବଂ ନବୀନ ପଟ୍ଟନାୟକଙ୍କ ସରକାରରେ ଏହି ତତ୍ତ୍ୱ ଲଗାତର ଭୁଲ୍ ପ୍ରମାଣିତ ହୋଇଆସୁଛି । ବିଜେଡ଼ିର ଲୋକପ୍ରିୟତା କମିବା ପରିବର୍ତ୍ତ ବରଂ ବେଳକୁ ବେଳ ଅଧିକ ହେଉଛି । ୨୦୧୭ ପଞ୍ଚାୟତ ନିର୍ବାଚନ ଫଳାଫଳ ଅବଶ୍ୟ ଏହି ଧାରାରେ ସାମୟିକ ବ୍ରେକ୍ ଲଗାଇଥିଲା । ସେତେବେଳେ ବିଜେପି ଅଶାନୁରୂପକ ଭଲ ପ୍ରଦର୍ଶନ କରିଥିଲା । ପରବର୍ତ୍ତୀ ସମୟରେ ସାଧାରଣ ନିର୍ବାଚନ ପର୍ଯ୍ୟନ୍ତ ବିଜେପି ଏହି ହାୱାକୁ ବଜାୟ ରଖିବାରେ ସମର୍ଥ ହୋଇଥିଲେ ମଧ୍ୟ ବିଜେଡ଼ିର ପାଖ ମାଡ଼ି ପାରି ନ ଥିଲା । ଯାହା ବି ହେଉ, ଏହି ପ୍ରାରମ୍ଭିକ ଫଳାଫଳକୁ ଦେଖିଲେ ଶକ୍ତିଶାଳୀ ନବୀନ ପଟ୍ଟନାୟକଙ୍କୁ ପରାସ୍ତ କରି ଶାସନଗାଦି ଅକ୍ତିଆର କରିବା ବିଜେପି ପାଇଁ ଦିବାସ୍ୱପ୍ନ ହୋଇଯାଇଛି ।
ଓଡ଼ିଶାବାସୀ ବିଜେପିକୁ ଶାସନଗାଦିରେ ବସାଇବା ଦୂରେ ଥାଉ, ମୁଖ୍ୟ ବିରୋଧୀ ଦଳରେ ବସାଇବାକୁ ବି ନାକ ଟେକୁଥିବା ପଞ୍ଚାୟତ ନିର୍ବାଚନ ଫଳାଫଳ ସଙ୍କେତ ଦେଉଛି । କାରଣ ଗତ ପଞ୍ଚାୟତ ନିର୍ବାଚନରେ ବିଜେପି ଆଖିଦୃଶିଆ ୨୯୭ ଜିଲ୍ଲା ପରିଷଦ ଆସନ ପାଇଥିଲା ବେଳେ ଏଥର ୧୦୦ ଛୁଇଁବା ସମ୍ଭବ ହୋଇ ନ ପାରେ । ଭୋଟରମାନେ ବିରୋଧୀ ଦଳ ବିଜେପିଠାରୁ ମୁହଁ ଫେରାଇ ଆଣୁଥିବା ଏଥିରୁ ସ୍ପଷ୍ଟ ପ୍ରତୀୟମାନ ।
ମୋଟାମୋଟି କହିଲେ, ମୁଖ୍ୟ ବିରୋଧୀ ଦଳ ଆସନରେ ବସିବାକୁ ବି ବିଜେପି ନିଜକୁ ଅଯୋଗ୍ୟ କରିବାକୁ ବସିଲାଣି । ସୁତରାଂ ବିଜେପି ଏକ ନମ୍ବରକୁ ଆସିବା ପାଇଁ ବିଜେଡ଼ି ସାଥୀରେ ଲଢ଼େଇ କରିବାର ବେଳ ଆସିନାହିଁ । ବରଂ ଦୁଇ ନମ୍ବରର ସ୍ଥିତି ରକ୍ଷା ପାଇଁ କଂଗ୍ରେସ ସହିତ ଲଢ଼େଇ ଜାରି ରଖୁ ବୋଲି ରାଜନୈତିକ ପର୍ଯ୍ୟବେକ୍ଷକ ମହଲ ପରାମର୍ଶ ଦେଇଛନ୍ତି ।
ଏ ପର୍ଯ୍ୟନ୍ତ ସମ୍ଭବତଃ ହାୱାରେ ବିଶ୍ୱାସ କରୁଥିବା ଓଡ଼ିଶାର ବିଜେପି ନେତାମାନଙ୍କ ପାଇଁ ଚଳିତ ନିର୍ବାଚନ ଗୁରୁତ୍ୱ ବହନ କରିବା କଥା । କେବଳ ଟିଭିରେ ମୁହଁ ଦେଖାଇବା ବାହାନାରେ ରାଜନୈତିକ ସମାଲୋଚନା କି ଆତ୍ମସମୀକ୍ଷାର ଫମ୍ପା ବକ୍ତବ୍ୟରେ ନିଜକୁ ସୀମିତ ରଖିବା ଶୁଭଙ୍କରୀ ହେବନାହିଁ । ଲୋକଙ୍କ ମାନସିକତା ଓ ରାଜନୈତିକ ବାସ୍ତବତା ସେମାନଙ୍କୁ ହୃଦୟଙ୍ଗମ କରିବାକୁ ପଡ଼ିବ ।
ଶୂନ୍ୟ ଆକାଶକୁ ଚାହିଁ ବିଜେଡ଼ି ଓ ନବୀନ ପଟ୍ଟନାୟକଙ୍କ ବିକଳ୍ପ ଭାବେ ବିଜେପି ନେତାମାନେ ନିଜକୁ ଭାବି ତୁଚ୍ଛା ଅହଂକାରୀ ହୋଇଗଲେ ହେବ ନାହିଁ । ସେଥିପାଇଁ ସାଂଗଠନିକ ପରିଚାଳନା, ଯୋଜନାବଦ୍ଧ କାର୍ଯ୍ୟକ୍ରମ, କଠିନ ପରିଶ୍ରମ ଏବଂ ସର୍ବୋପରି ଲୋକଙ୍କ ପାଖରେ ଗ୍ରହଣୀୟତା ବଢ଼ାଇବାକୁ ପଡ଼ିବ ।
ତାହା ନ କରି ଭୁବନେଶ୍ୱର ପାର୍ଟି ଅଫିସରେ ବସି ବିଜେଡ଼ି ବିରୋଧରେ ଖାଲି ପ୍ରେସମିଟ୍ କରିଦେଲେ କି ନିଜର ସୈନ୍ୟବାହିନୀ ଜରିଆରେ ସୋସିଆଲ୍ ମିଡ଼ିଆରେ ବିପକ୍ଷଙ୍କୁ ଟ୍ରୋଲ୍ କରିଦେଲେ ଲୋକଙ୍କ ଭୋଟ ଆସିଯିବନି ।
ବୁଦ୍ଧିଜୀବୀମହଲର କହିବା କଥା, ନବୀନ ପଟ୍ଟନାୟକଙ୍କ ବିକଳ୍ପ ଭାବେ ବିଜେପି ଆଗ ଜଣଙ୍କୁ ଓଡ଼ିଶାବାସୀଙ୍କ ଆଗରେ ଉପସ୍ଥାପିତ କରୁ । ଗାଁ ଗାଁରେ ବୁଲି ସଂଗଠନ ସୁଦୃଢ଼ କରନ୍ତୁ । ସରକାର ବିରୋଧୀ ଆନେ୍ଦାଳନ ଯୋଜନାବଦ୍ଧ ଭାବେ ଆଗକୁ ନିଅନ୍ତୁ । ସର୍ବୋପରି ଦଳୀୟ ନେତାମାନେ ନିଜର ଆଚାର ବ୍ୟବହାରରେ ସଂଯମତା ରକ୍ଷା କରନ୍ତୁ ।
ଯଦି ପାରୁନାହାନ୍ତି, ନବୀନ ପଟ୍ଟନାୟକ ଓ ତାଙ୍କ ବିଜେଡ଼ିକୁ ଆଦର୍ଶ ଭାବେ ମାନିନେଇ ଏହିସବୁ କଳା ଓ ସାମର୍ଥ ହାସଲ କରିବାକୁ ଚେଷ୍ଟା କରନ୍ତୁ । ତାହାହେଲେ ଯାଇ ଓଡ଼ିଶାରେ ଆଗାମୀ ଦିନରେ ବିଜେପି ଲୋକଙ୍କ ବିଶ୍ୱାସ ଭାଜନ ହୋଇପାରିବ ବୋଲି ସେମାନଙ୍କ ଆଶା ।
