ଭୁବନେଶ୍ୱର: କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏବଂ ସାଂସଦ ଅପରାଜିତା ଷଡ଼ଙ୍ଗୀଙ୍କ ସମ୍ପର୍କ ରାଜ୍ୟ ବିଜେପି ମହଲରେ ସମସ୍ତଙ୍କୁ ଜଣା । ଧର୍ମେନ୍ଦ୍ରଙ୍କ କ୍ଷମତା ଓ ପ୍ରତିପତ୍ତିକୁ ଅପରାଜିତା ନାକ ଟେକୁଥିଲା ବେଳେ ଅପରାଜିତାଙ୍କ ଅହଂକାରକୁ ଧର୍ମେନ୍ଦ୍ର ଗ୍ରହଣ କରିବାକୁ ପ୍ରସ୍ତୁତ ନୁହଁନ୍ତି । ଓଡ଼ିଶାରେ ବିଜେପି ଉଧେଇ ନପାରିବାର ପ୍ରମୁଖ କାରଣ ମଧ୍ୟରୁ ଏହା ଅନ୍ୟତମ କାରଣ ବୋଲି ଚର୍ଚ୍ଚା ହୁଏ । ତେବେ ମନମୋହନ ସାମଲ ସଭାପତି ଦାୟିତ୍ୱ ପାଇଲା ପରେ ସମସ୍ତଙ୍କୁ ଏକାଠି ନେବାର ପଣ କରିଥିଲେ ମଧ୍ୟ ତାହା ଯେ ସମ୍ଭବ ନୁହେଁ ତାହା ଜଳ ଜଳ ଦିଶିଯାଉଛି । ଭୁବନେଶ୍ୱରର କପିଳେଶ୍ୱର ମନ୍ଦିରକୁ ଏଏସଆଇ ନେବା ପ୍ରସଙ୍ଗରେ ଧର୍ମେନ୍ଦ୍ରଙ୍କ ଚାଲକୁ ଅପରାଜିତା ଧରାପକାଇ ତାଙ୍କୁ ବେଜ୍ଜିତ୍ କରିବାକୁ ପଛାଇନାହାନ୍ତି । ଏହା ତାଙ୍କ ଯୋଗୁଁ ସମ୍ଭବ ହୋଇଥିବା ଜଣାଇ ସବୁ ଶ୍ରେୟ ନିଜେ ନେଇଛନ୍ତି ସାଂସଦ ଅପରାଜିତା ।
ପ୍ରସଙ୍ଗଟି ଏମିତି । କପିଳେଶ୍ୱର ମନ୍ଦିରର ସଂରକ୍ଷଣ ଓ ଉନ୍ନତି ଦାୟିତ୍ୱ ଏଏସଆଇକୁ ଦେବା ପାଇଁ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଗତକାଲି(ମଙ୍ଗଳବାର) ସକାଳେ ସଂସ୍କୃତି ଓ ପର୍ଯ୍ୟଟନ ମନ୍ତ୍ରୀ ଜି.କିଷାନ ରେଡ୍ଡୀଙ୍କୁ ଚିଠି ଲେଖି ଅନୁରୋଧ କରିଥିଲେ । ସପ୍ତମ ଶତାଦ୍ଦୀର ଏହି ପୁରାତନ ଶୈବପୀଠ ତା’ର ଐତିହ୍ୟ, କିର୍ତ୍ତିରାଜି ଏବଂ ଚିତ୍ରକଳା ପାଇଁ ପ୍ରସିଦ୍ଧ ହୋଇଥିଲେ ବି ସହରୀକରଣ ଏବଂ ପ୍ରଦୂଷଣ ସମସ୍ୟା ପାଇଁ ଆଜି ଅବହେଳିତ । ରକ୍ଷଣାବେକ୍ଷଣ ଏବଂ ସଂରକ୍ଷଣ ଅଭାବରୁ ମନ୍ଦିରର ଢ଼ାଞ୍ଚା ନଷ୍ଟ ହେବାର ଲାଗିଛି । ମନ୍ଦିର ସୁରକ୍ଷା ଓ ବିକାଶ ଯୋଜନାରେ କପିଳେଶ୍ୱର ମନ୍ଦିରକୁ ସାମିଲ୍ କରାଯାଉ ବୋଲି ଧର୍ମେନ୍ଦ୍ର ଲେଖିଥିଲେ ।
ତେବେ ଧର୍ମେନ୍ଦ୍ରଙ୍କ ଚିଠ ସଂକ୍ରାନ୍ତରେ ଗଣମାଧ୍ୟମରେ ଖବର ଆସିବା ପରେ ସଂଧ୍ୟାବେଳକୁ ସାଂସଦ ଅପରାଜିତା ଷଡ଼ଙ୍ଗୀଙ୍କ ଟୁଇଟ୍ ଆସିଥିଲା । ଯାହାର ବିଷୟବସ୍ତୁ ଧର୍ମେନ୍ଦ୍ରଙ୍କୁ ଚାପୁଡା ମାରିଲା ଭଳି ଥିଲା । ଅପରାଜିତା ଟୁଇଟ୍ ରେ ଦର୍ଶାଇଥିଲେ ଯେ କପିଳେଶ୍ୱର ମନ୍ଦିରକୁ ଏଏସଆଇ ଅଧୀନକୁ ଆଣିବା ସଂକ୍ରାନ୍ତ ଗେଜେଟ୍ ବିଜ୍ଞପ୍ତି କେନ୍ଦ୍ର ସଂସ୍କୃତି ମନ୍ତ୍ରଣାଳୟ ମେ’ ୫ ତାରିଖରେ ଜାରି କରିସାରିଛନ୍ତି । ତାଙ୍କ ଉଦ୍ୟମ ଯୋଗୁଁ ଏହା ସମ୍ଭବ ହୋଇଥିବା ଉଲ୍ଲେଖ କରିବାକୁ ସାଂସଦ ପଛାଇ ନ ଥିଲେ । ସେ ନିଜେ ମନ୍ଦିର ଯାଇ ଅବସ୍ଥା ଅନୁଧ୍ୟାନ କରିଥିଲେ । ମନ୍ଦିରକୁ ଏଏସଆଇ ଅଧୀନକୁ ନେବା ପାଇଁ କେନ୍ଦ୍ର ସଂସ୍କୃତି ଓ ପର୍ଯ୍ୟଟନ ମନ୍ତ୍ରୀ ଶ୍ରୀ ରେଡ୍ଡୀଙ୍କୁ ଚିଠି ଲେଖିଥିଲେ । ତାଙ୍କୁ ନିଜେ ଭେଟି କଥା ବି ହୋଇଥିଲେ ବୋଲି ଅପରାଜିତା ଦର୍ଶାଇବା ସହ ଏସବୁର ଫଟୋ ପୋଷ୍ଟ କରିଥିଲେ ।
ସାଂସଦଙ୍କର ଏହି ଟୁଇଟ୍ ଧର୍ମେନ୍ଦ୍ରଙ୍କ ଉପରେ ଥିବା ତାଙ୍କ ଆକ୍ରୋଶକୁ ପଦାରେ ପକାଇଛି । ଧର୍ମେନ୍ଦ୍ରଙ୍କ ବାହାବା ଉଦ୍ୟମକୁ ଅପରାଜିତା ପଦାରେ ପକାଇବା ଏବଂ ନିଜେ ବାହାବା ନେବା ବିଜେପିର ଆଭ୍ୟନ୍ତରୀଣ ରାଜନୀତିକୁ ସରଗରମ କରିଛି । ଏହାକୁ ନେଇ ବିଜେପି ଦୁଇଗୋଷ୍ଠୀଙ୍କ ମଧ୍ୟରେ ଛକାପଂଝା ଆରମ୍ଭ ହୋଇଛି ।
ରୋଚକ କଥା ହେଉଛି, ଭୁବନେଶ୍ୱରରେ ଧର୍ମେନ୍ଦ୍ରଙ୍କ ପାଖେ ପାଖେ ରହୁଥିବା ଭୁବନେଶ୍ୱର ଜିଲ୍ଲା ବିଜେପି ସଭାପତି ବାବୁ ସିଂହ ତାଙ୍କ ସୋସିଆଲ୍ ମିଡିଆରେ ଏହି ପ୍ରସଙ୍ଗକୁ ନେଇ ଧର୍ମେନ୍ଦ୍ରଙ୍କୁ ପର କରିଦେଇଛନ୍ତି । କପିଳେଶ୍ୱର ମନ୍ଦିରକୁ ଏଏସଆଇ ନେବା ପ୍ରସଙ୍ଗରେ ସାଂସଦ ଅପରାଜିତା ରଖିଥିବା ତଥ୍ୟ ଓ ଫଟୋକୁ ଶ୍ରୀ ସିଂହ ସେୟାର୍ କରିଛନ୍ତି । ଏହି ସଫଳତା ପାଇଁ ସାଂସଦ ଶ୍ରୀମତୀ ଷଡ଼ଙ୍ଗୀ ଏବଂ କେନ୍ଦ୍ର ସଂସ୍କୃତି ମନ୍ତ୍ରୀ ଶ୍ରୀ ରେଡ୍ଡୀଙ୍କୁ ଧନ୍ୟବାଦ ଓ କୃତଜ୍ଞତା ଜ୍ଞାପନ କରିଛନ୍ତି । ତେବେ କପିଳେଶ୍ୱର ମନ୍ଦିର ପାଇଁ ସଂସ୍କୃତି ମନ୍ତ୍ରୀଙ୍କୁ ଚିଠି ଲେଖିଥିବା ଧର୍ମେନ୍ଦ୍ର ପ୍ରଧାନଙ୍କ ନାଁ ନେଇନାହାନ୍ତି କି ତାଙ୍କୁ ଧନ୍ୟବାଦଟିଏ ମଧ୍ୟ ଦେଇନାହାନ୍ତି ।
