ଭୁବନେଶ୍ୱର: ବହୁଚର୍ଚ୍ଚିତ ଲେଡି ବ୍ଲାକମେଲର ଅର୍ଚ୍ଚନା ନାଗଙ୍କୁ ଆଜି ଭୁବନେଶ୍ୱର ଏସଡିଜେଏମ୍ ଙ୍କ କୋର୍ଟରେ ହାଜର କରାଯାଇଥିଲା । ପ୍ରଯୋଜକ ଅକ୍ଷୟ ପରିଜାଙ୍କୁ ୩ କୋଟି ଟଙ୍କା ବ୍ଲାକମେଲିଂ ମାମଲାରେ ସେ ହାଜର ହୋଇଥିଲେ । କୋର୍ଟରେ ପହଞ୍ଚିଲା ବେଳେ ଗଣମାଧ୍ୟମ ସାମନାରେ ମୁହଁ ଲୁଚାଇ ନ ଥିଲେ ଅର୍ଚ୍ଚନା । କ’ଣ କହିବେ ବୋଲି ସାମ୍ବାଦିକମାନେ ତାଙ୍କୁ ପ୍ରଶ୍ନ କରିବାରୁ ବିନା କିଛି ତଥ୍ୟ ପ୍ରମାଣରେ ମିଛ ଖବର ପ୍ରସାରଣ କରନ୍ତୁ ନାହିଁ ବୋଲି ଅର୍ଚ୍ଚନା ଠୋ ଠା ଜବାବ ଦେଇଥିଲେ ।
ଆଜି କଡ଼ା ସୁରକ୍ଷା ବ୍ୟବସ୍ଥା ମଧ୍ୟରେ ଅର୍ଚ୍ଚନାଙ୍କୁ ଝାରପଡ଼ା ଜେଲ୍ ରୁ ଏକ ସ୍ୱତନ୍ତ୍ର ଭ୍ୟାନ୍ ରେ ଭୁବନେଶ୍ୱର କୋର୍ଟକୁ ଅଣାଯାଇଥିଲା । ସୁରକ୍ଷା ଦୃଷ୍ଟିରୁ ଭ୍ୟାନ୍ ଚାରିପଟକୁ ଘୋଢ଼ଣୀରେ ଢ଼ାଙ୍କି ଦିଆଯାଇଥିଲା । ଅପରାହ୍ନ ୨.୩୫ ରେ ଭ୍ୟାନ୍ ଝାରପଡା ଜେଲ୍ ଗେଟ୍ ରୁ ବାହାରି ପ୍ରାୟ ୨.୫୦ ମିନିଟ୍ ବେଳକୁ କୋର୍ଟ ସାମନାରେ ପହଞ୍ଚିଥିଲା । ଝାରପଡ଼ାଠାରୁ କୋର୍ଟ ପର୍ଯ୍ୟନ୍ତ ରାସ୍ତାରେ କଡ଼ା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଥିଲା । କୋର୍ଟ ବାହାରେ ପୁଲିସ ଛାଉଣୀ ହୋଇଯାଇଥିଲେ ।
ଅର୍ଚ୍ଚନାଙ୍କୁ ଧରି ଆସିଥିବା ଡର୍ଜନ ପାଖାପାଖି ମହିଳା ପୁଲିସ ଅଧିକାରୀ ଏବଂ ସୁରକ୍ଷାକର୍ମୀ ଭ୍ୟାନ୍ ରୁ ଆଗ ବାହାରିଲା ପରେ ପଛରେ ଦୁଇଜଣ ମହିଳା ଅଧିକାରୀଙ୍କ ହେପାଜତରେ ବାହାରିଥିଲେ ଅର୍ଚ୍ଚନା । ମୁହଁ ଶୁଖିଯାଇଥିଲେ ବି ମନରେ ସଙ୍କୋଚ ନ ଥିଲା । ବେକରେ ଓଢ଼ଣୀ ଥିଲେ ମଧ୍ୟ ସେଥିରେ ମୁହଁ ଲୁଚାଇବାକୁ ଚେଷ୍ଟା କରି ନ ଥିଲେ ।
ଲୋକଙ୍କ ପ୍ରବଳ ଭିଡ଼ରେ ପୁଲିସ ତାଙ୍କୁ କୋର୍ଟ ଭିତରକୁ ଟାଣି ଟାଣି ନେଲା ବେଳେ ଗଣମାଧ୍ୟମ ପ୍ରତିନିଧିମାନେ ପ୍ରଶ୍ନ ପରେ ପ୍ରଶ୍ନ ପଚାରିଥିଲେ । ଭିଡ଼ ଏବଂ ପୁଲିସ କବଜାରୁ ଅର୍ଚ୍ଚନା ଅତି ନିର୍ଭୟରେ ପ୍ରଶ୍ନଗୁଡ଼ିକର ଠୋ ଠା ଉତ୍ତର ଦେଇଥିଲେ । ସାମ୍ବାଦିକଙ୍କୁ ସେ କହିଥିଲେ, ମିଛ ଖବର ଦିଅନ୍ତୁନି । ବିନା ତଥ୍ୟ ପ୍ରମାଣରେ ଖବର ପ୍ରସାରଣ କରନ୍ତୁ ନାହିଁ । ସମୟ ଆସିଲେ ମୁଁ ସବୁ କହିବି । ନିଶ୍ଚୟ କହିବି ।
କୋର୍ଟରେ ଅର୍ଚ୍ଚନା ୪୫ ମିନିଟ୍ ଉପରେ ରହିଥିଲେ । ତା’ ଭିତରେ ନୟାପଲ୍ଲୀ ଥାନାରେ ପ୍ରଯୋଜକ ଅକ୍ଷୟ ପରିଜା କରିଥିବା ୩ କୋଟି ଟଙ୍କାର ବ୍ଲାକମେଲିଂ ମାମଲାରେ ସେ ଜାମିନ୍ ଆବେଦନ କରିଥିଲେ । ପ୍ରାୟ ୩.୪୫ ମିନିଟ୍ ବେଳକୁ ଅର୍ଚ୍ଚନାଙ୍କୁ ଜେଲ୍ ଫେରାଇବା ପାଇଁ କୋର୍ଟରୁ ବାହାରକୁ ଆଣିଥିଲା ପୁଲିସ । ସେତିକିବେଳେ ସାମ୍ବାଦିକମାନେ ତାଙ୍କୁ ପୁଣି ପ୍ରଶ୍ନ ପଚାରିଥିଲେ ।
ଅର୍ଚ୍ଚନା କହିଥିଲେ, ମତେ ଫସାଇବାର ଚକ୍ରାନ୍ତ କରାଯାଇଛି । ମୋ ବିରୋଧରେ କିଛି ପ୍ରମାଣ ନାହିଁ । ମୁଁ କିଛି କରିନି । କାହାରିକୁ ବ୍ଲାକମେଲିଂ କରିନି । ଏସବୁ ମିଛ ଅଭିଯୋଗ । କୋର୍ଟ ଉପରେ ମୋର ସମ୍ପୂର୍ଣ୍ଣ ଭରସା ଅଛି ।
ଏହାପରେ ପୁଲିସ ଅର୍ଚ୍ଚନାଙ୍କୁ ଯେମିତି ଆଣିଥିଲା, ଝାରପଡ଼ା ଜେଲ୍ କୁ ସେମିତି ଫେରାଇ ନେଇଥିଲା ।
ସୂଚନାଯୋଗ୍ୟ, ଖଣ୍ଡଗିରି ଥାନାରେ ଜଣେ ପୀଡ଼ିତାଙ୍କ ଅଭିଯୋଗକ୍ରମେ ପୁଲିସ ଅର୍ଚ୍ଚନାଙ୍କୁ ଗତ ଅକ୍ଟୋବର ୬ ତାରିଖରେ ଗିରଫ କରିଥିଲା । ଏହି ମାମଲାରେ ସେ କୋର୍ଟରେ କରିଥିବା ଜାମିନ୍ ଆବେଦନର ଶୁଣାଣି ବେଳେ ଜେଲ୍ ରୁ ଭିଡ଼ିଓ କନଫରେନ୍ସିଂରେ ଉପସ୍ଥିତ ରହିଥିଲେ । ନୟାପଲ୍ଲୀ ଥାନାରେ ହୋଇଥିବା ଅକ୍ଷୟ ପରିଜାଙ୍କ ବ୍ଲାକମେଲିଂ ମାମଲାରେ ସେ ବ୍ୟକ୍ତିଗତ ହାଜର ହେବାକୁ କୋର୍ଟ ନିର୍ଦ୍ଦେଶ ଦେଇଥିଲେ । ସେହି ଅନୁଯାୟୀ ସେ ଆଜି କୋର୍ଟରେ ହାଜର ହୋଇଥିଲେ । ଜାମିନ୍ ପାଇଁ ଆବେଦନ କରାଯାଇଥିବା ତାଙ୍କ ଓକିଲ ଦେବାଶିଷ ମହାପାତ୍ର କହିଛନ୍ତି ।
