ଭୁବନେଶ୍ୱର: ଦୀପାବଳି ଏବଂ ସୂର୍ଯ୍ୟପରାଗ ପାଇଁ ଧାମନଗର ଉପନିର୍ବାଚନ ପ୍ରଚାର ସାମାନ୍ୟ ମାନ୍ଦା ପଡ଼ିଥିଲା । ମାତ୍ର ଆଜିଠାରୁ ପୁଣି ଏହା ଜୋର୍ ହୋଇଛି । ବିଜେପି ପ୍ରାର୍ଥୀଙ୍କ ପାଇଁ ୩ କେନ୍ଦ୍ରମନ୍ତ୍ରୀ ପ୍ରଚାର ମୈଦାନକୁ ଓହ୍ଲାଉଥିବା ବେଳେ ବିଜେଡି ସୁପ୍ରିମୋ ନବୀନ ପଟ୍ଟନାୟକ ଦଳୀୟ ପ୍ରାର୍ଥୀଙ୍କ ପାଇଁ ଭର୍ଚୁଆଲରେ ପ୍ରଚାର କରିବେ । ଆସନ୍ତା ୩୧ ତାରିଖରେ ମୁଖ୍ୟମନ୍ତ୍ରୀଙ୍କ ପ୍ରଚାର କାର୍ଯ୍ୟକ୍ରମ ରହିଛି । ତେବେ କଂଗ୍ରେସ ପ୍ରାର୍ଥୀଙ୍କ କ୍ଷେତ୍ରରେ ସେଭଳି ମାହୋଲ ପରିଲକ୍ଷିତ ହେଉନାହିଁ । ବରଂ ସ୍ୱାଧୀନ ପ୍ରାର୍ଥୀ ରାଜେନ୍ଦ୍ର ଦାସଙ୍କ ପ୍ରଚାର ଅଧିକ ପ୍ରାସଙ୍ଗିକ ହୋଇଛି । ନିଜର ସମର୍ଥକମାନଙ୍କ ସହ ଘରକୁ ଘର ବୁଲି ସେ ଭୋଟ ମାଗୁଛନ୍ତି ।
ଏହି ଉପନିର୍ବାଚନ ଫଳାଫଳ ସରକାର ଭାଙ୍ଗିଦେବନି କି ନୂଆ ସରକାର ଗଢ଼ିଦେବନି । ମାତ୍ର ରାଜନୈତିକ ଦୃଷ୍ଟିକୋଣରୁ ଉଭୟ ବିଜେପି ଓ ବିଜେଡି ପାଇଁ ଅତ୍ୟନ୍ତ ଗୁରୁତ୍ୱବହନ କରୁଛି । ଆଗାମୀ ସାଧାରଣ ନିର୍ବାଚନ ପୂର୍ବରୁ ଦୁଇ ଦଳ ପାଇଁ ଏହା ଏସିଡ୍ ଟେଷ୍ଟ ହେବ ।
ଏହି ଆସନଟି ବିଜେପି ହାତରେ ଥିଲା । ବିଜେପି ଏହାକୁ ବଜାୟ ନ ରଖିଲେ ଦଳର ସ୍ଥିତି ଦୋହଲିଯିବାଟା ଥୟ । ବାଲେଶ୍ୱର ଟେନସନ୍ କୌଣସି ପ୍ରକାରେ ମ୍ୟାନେଜ ହୋଇଥିଲା । ମାତ୍ର ସାଧାରଣ ନିର୍ବାଚନ ପାଇଁ ଅଳ୍ପ ସମୟ ଥିବାରୁ ଧାମନଗର ଟେନସନ୍(ଯଦି ଆସେ) ମ୍ୟାନେଜ କରିବା କଷ୍ଟକର ହୋଇଯିବ । ଫଳ ହେବ ଏୟା ଯେ ସାମଗ୍ରିକ ଭାବେ ଦଳ ଉପରୁ କର୍ମୀଙ୍କ ଆସ୍ଥା ଏବଂ ଭରସା ତୁଟିଯିବ ।
ସୁତରାଂ ବିଜେପି ପାଇଁ ଧାମନଗର ଉପନିର୍ବାଚନ କର ବା ମର ପରିସ୍ଥିତି ସୃଷ୍ଟି କରିଛି । ନିର୍ବାଚନ ପ୍ରଚାର ସପ୍ତାହ ବାକି ଥିବା ବେଳେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ନିଜ ଉପରକୁ ଦାୟିତ୍ୱ ଆଣିଥିବା ଜଣାପଡ଼ିଛି । ଆସନ୍ତା ୨୮ ଏବଂ ୨୯ ତାରିଖ ଦୁଇଦିନ ଧରି ସେ ପ୍ରଚାର କରିବେ । କେନ୍ଦ୍ରମନ୍ତ୍ରୀ ଅଶ୍ୱିନୀ ବୈଷ୍ଣବ ମଧ୍ୟ ପ୍ରଚାରରେ ସାମିଲ ହେବେ । ଏମିତିରେ ରାଜ୍ୟସ୍ତରୀୟ ନେତା ଓ ଛାମୁଆ ସଂଗଠନର କର୍ମକର୍ତ୍ତାମାନେ ସେଠାରେ ଡେରା ପକାଇଛନ୍ତି । ସ୍ୱର୍ଗତ ବିଷ୍ଣୁ ସେଠୀଙ୍କ ଲୋକପ୍ରିୟତା ଏବଂ ଅନୁକମ୍ପା ଭୋଟକୁ ଦଳ ଭରସା କରିଛି ।
ଏହି ଉପନିର୍ବାଚନ ବିଜେଡି ପାଇଁ ବି ଚାଲେଂଜ ଛିଡ଼ା କରାଇଛି । ଅବନ୍ତୀ ଦାସଙ୍କ ପ୍ରାର୍ଥୀତ୍ୱକୁ ଗ୍ରହଣ ନ କରି ସ୍ୱାଧୀନ ଭାବେ ଲଢ଼ୁଛନ୍ତି ରାଜେନ୍ଦ୍ର ଦାସ । କିଛି ଦିନ ଆଗରୁ ଧାମନଗରରେ ବିଜେଡି ଫେସ୍ ବୋଲି ଏହି ପୂର୍ବତନ ବିଧାୟକଙ୍କୁ ବୁଝାଯାଉଥିଲା । ନିର୍ବାଚନମଣ୍ଡଳୀରେ ବିଜେଡି ସଂଗଠନକୁ ସେ ହିଁ ସମ୍ଭାଳୁଥିଲେ । ମାତ୍ର ଦଳ ତାଙ୍କ ବଦଳରେ ନବାଗତ ଅବନ୍ତୀଙ୍କୁ ପ୍ରାର୍ଥୀ କରି ବଡ଼ ଚାଲେଂଜ ନେଇଛି । ଯଦି ତାଙ୍କୁ ନେଇ ଦଳର ପ୍ରଦର୍ଶନ ଭଲ ହେବ ନାହିଁ, ତେବେ ବିଜେଡିକୁ ଏହା ଶକ୍ତ ଚାପଡ଼ା ଭଳି ହେବ । ବିଜେଡି ରାଜନୀତିରେ ଏହା ଭିନ୍ନ ବାର୍ତ୍ତା ଦେଇପାରେ ।
ଏବେ ବିଜେଡି ଏହି ଆସନରୁ ଖାଲି ଜିତିବା କଥା କହୁନି ବରଂ ୩୦ ହଜାରରୁ ଅଧିକ ଭୋଟ ବ୍ୟବଧାନରେ ଜିତିବ ବୋଲି ନେତାମାନେ ଦୃଢ଼ୋକ୍ତି ପ୍ରକାଶ କରୁଛନ୍ତି । ଖାଲି ଭାଷଣରେ ସୀମିତ ନ ରହି ଲୋକଙ୍କ ମନ କିଣିବାକୁ ସେମାନେ ପ୍ରାଣମୂର୍ଚ୍ଛା ଉଦ୍ୟମ ଜାରି ରଖିଛନ୍ତି । କର୍ମୀମାନେ ଗାଁଗଣ୍ଡାରେ ଛାଇ ହୋଇଯାଇଛନ୍ତି । ରାତାରାତି ଅବନ୍ତୀ ଦାସ ହୋଇଯାଇଛନ୍ତି ଧାମନଗର ବିଜେଡି ଫେସ୍ ଏବଂ କର୍ମୀମାନେ ଶଙ୍ଖ ଚିହ୍ନ ଧରି ନବୀନ ପଟ୍ଟନାୟକ ଜିନ୍ଦାବାଦ ନାରାରେ ଗାଁ ଦାଣ୍ଡ ଫଟଉଛନ୍ତି ।
ବିଜେଡି ପ୍ରାର୍ଥୀଙ୍କ ପାଇଁ ସୁବିଧା ରହିଛି ସଶକ୍ତ ସଂଗଠନ ଓ ଉତ୍ତମ ନିର୍ବାଚନ ପରିଚାଳନା । ଗାଁଗଣ୍ଡାରେ ସଂଗଠନ ସୁବିସ୍ତାରିତ ହୋଇଛି । ମହିଳା ସ୍ୱଂୟ ସହାୟକ ଗୋଷ୍ଠୀ ସକ୍ରିୟ ରହିଛନ୍ତି । ଯୁବ, ଛାତ୍ର ସଂଗଠନ ମଧ୍ୟ ପ୍ରଚାର କାର୍ଯ୍ୟରେ ଜୋରସୋର ଲାଗିଛନ୍ତି । ସର୍ବୋପରି ବିଜେଡି ଲୋକେ ନବୀନ ପଟ୍ଟନାୟକ ଏବଂ ଶଙ୍ଖ ଚିହ୍ନକୁ ଚିହ୍ନିଛନ୍ତି । ତେଣୁ ଅନୁକମ୍ପା ହାୱା କିମ୍ବା ବିଦ୍ରୋହୀ ପ୍ରାର୍ଥୀଙ୍କ ଉପସ୍ଥିତି ବିଜେଡି ଫଳାଫଳକୁ ପ୍ରଭାବିତ କରିବା ସହଜ ହେବ ନାହିଁ ।
ସୂଚନାଯୋଗ୍ୟ, ଗତ ସାଧାରଣ ନିର୍ବାଚନରେ ବିଜେପି ପ୍ରାର୍ଥୀ ଶ୍ରୀ ସେଠୀ ମାତ୍ର ୪,୬୨୫ ଭୋଟରେ ବିଜୟୀ ହୋଇଥିଲେ । ତାହାପୁଣି ବିଜେଡି ଅନ୍ତଦ୍ୱର୍ନ୍ଦ କାରଣରୁ । ବିଜେପି ନିଜର ସ୍ଥିତି ବଜାୟ ରଖିବାର ଉଦ୍ୟମ ଖଟାଇଥିଲେ ମଧ୍ୟ ସାମଗ୍ରିକ ଭାବେ ବିଜେଡିକୁ ଟକ୍କର ଦେବା ଅବସ୍ଥାକୁ ଆସିଥିବା ଜଣାପଡୁନାହିଁ ।
