ଭୁବନେଶ୍ୱର: ଧାମନଗରରେ ଏସଏସଜି ମହିଳାଙ୍କ ଦ୍ୱାରା ଭୋଟରଙ୍କୁ ଟଙ୍କା ବଣ୍ଟାଯାଉଥିବାର ଅଭିଯୋଗ ଏବଂ ପ୍ରତ୍ୟେକ ପଞ୍ଚାୟତ ପାଇଁ ୧ କୋଟି ଟଙ୍କାର ପ୍ରଲୋଭନକୁ ନେଇ ବିଜେଡି-ବିଜେପି ମୁହାଁମୁହିଁ ହୋଇଛନ୍ତି । ବିଜେପି ଏହି ପ୍ରସଙ୍ଗରେ ମୁଖ୍ୟ ନିର୍ବାଚନ ଅଧିକାରୀ(ସିଇଓ)ଙ୍କୁୁ ଏଠି ଘେରିଥିବା ବେଳେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଦିଲ୍ଲୀରେ ଭାରତୀୟ ନିର୍ବାଚନ କମିସନଙ୍କ ପାଖରେ ବିଜେଡି, ସିଇଓ ଓ ପ୍ରଶାସନ ବିରୋଧରେ ଫେରାଦ ହୋଇଛନ୍ତି । ଅନ୍ୟପକ୍ଷରେ ଏସଏଚଜି ମା’ ମାନଙ୍କୁ ବିଜେପି ଅପମାନିତ କରୁଛି ବୋଲି ବିଜେଡି ପାଲଟା ଅଭିଯୋଗ ଆଣିଛି । ଏହା ବିରୋଧରେ କାର୍ଯ୍ୟାନୁଷ୍ଠାନ ପାଇଁ ସିଇଓଙ୍କ ପାଖରେ ଦଳ ଫେରାଦ ହୋଇଛି ।
ଧାମନଗର ଉପନିର୍ବାଚନରେ ଭୋଟରଙ୍କୁ ପ୍ରଭାବିତ କରିବା ପାଇଁ ବିଜେଡି ଖୋଲାଖୋଲି ଭାବେ ଆଦର୍ଶ ଆଚରଣବିଧି ଉଲ୍ଲଂଘନ କରି ଚାଲିଛି ବୋଲି ଗତକାଲି ବିଜେପି ମୁଖ୍ୟ ନିର୍ବାଚନ ଅଧିକାରୀଙ୍କୁ ଘେରିଥିଲା । ମୁଖ୍ୟ ନିର୍ବାଚନ ଅଧିକାରୀ ବିଭିନ୍ନ ବେଆଇନ କାର୍ଯ୍ୟରେ ଶାସକ ଦଳକୁ ଘଣ୍ଟ ଘୋଡ଼ାଇବା ସହ ନିଜେ ଆଚରଣ ବିଧି ଉଲ୍ଲଂଘନ କରୁଛନ୍ତି ବୋଲି ଦଳ ପକ୍ଷରୁ ଅଭିଯୋଗ ହୋଇଥିଲା ।
ତେବେ ଏହି ମାମଲାକୁ ଦିଲ୍ଲୀ ଦରବାରକୁ ନେଇଛନ୍ତି ଧର୍ମେନ୍ଦ୍ର ପ୍ରଧାନ । ସମ୍ବିତ ପାତ୍ରଙ୍କୁ ଧରି ଆଜି ସେ ଭାରତୀୟ ନିର୍ବାଚନ କମିସନଙ୍କଠାରେ ଫେରାଦ ହୋଇଥିଲେ । ସେଠାରୁ ଫେରିବା ପରେ ଗଣମାଧ୍ୟମକୁ ପ୍ରତିକ୍ରିୟାରେ କହିଥିଲେ ଯେ ଧାମନଗରରେ ସରକାରୀ ଦଳର ଦୂରୁପଯୋଗ ଚାଲିଛି । ଜିଲ୍ଲାପାଳଙ୍କ ନେତୃତ୍ୱରେ ପ୍ରଶାସନ ଶାସକ ଦଳର ହାତବାରିସି ସାଜିଛି । ସିଇଓ ନିଜେ ରାଜ୍ୟର ପଞ୍ଚାୟତିରାଜ ସଚିବ ଅଛନ୍ତି । ଏହା କନଫ୍ଲିଟ୍ ଅଫ୍ ଇଣ୍ଟ୍ରେଷ୍ଟ ବୋଲି ନିର୍ବାଚନ କମିସନଙ୍କୁ ଜଣାଇଥିବା ଧର୍ମେନ୍ଦ୍ର କହିଛନ୍ତି ।
ଏପଟେ ଭୁବନେଶ୍ୱରରେ ବିଜେଡି ପକ୍ଷରୁ ଏକ ସାମ୍ବାଦିକ ସମ୍ମିଳନୀରେ ବିଜେପି ଅଭିଯୋଗର କଡ଼ା ଜବାବ ଦିଆଯାଇଛି । ଭଦ୍ରକ ଜିଲ୍ଲା ପର୍ଯ୍ୟବେକ୍ଷକ ତଥା ବିଧାୟକ ପ୍ରଣବ ବଳବନ୍ତରାୟ କହିଛନ୍ତି, ବିଜେପି ଉଦ୍ଦେଶ୍ୟ ପ୍ରଣୋଦିତ ଭାବେ ଜଣେ ମହିଳାଙ୍କ ମୁହଁ ଘୋଡ଼ାଇ ଟଙ୍କା ବାଣ୍ଟିଥିବାର ଅଭିଯୋଗ ଆମ ଦୃଷ୍ଟିକୁ ଆସିଛି । ଏଭଳି ଷଡ଼ଯନ୍ତ୍ର କରି ବିଜେପି ସ୍ୱାଭିମାନୀ ଧାମନଗର ମାଟିର ଏସଏଚଜି ମହିଳାମାନଙ୍କୁ ବଦନାମ ଓ ଅପମାନିତ କରିବାକୁ ଚେଷ୍ଟା କରୁଛି । ବିଜେପିର ଏହା ହୀନ ରାଜନୀତି ବୋଲି ସେ କହିଥିଲେ ।
ରାଜ୍ୟସଭା ସାଂସଦ ତଥା ଦଳର ସାଧାରଣ ସମ୍ପାଦକ(ଗଣମାଧ୍ୟମ) ମାନସ ମଙ୍ଗରାଜ କହିଥିଲେ ଯେ ଧାମନଗରବାସୀ ମାନ୍ୟବର ମୁଖ୍ୟମନ୍ତ୍ରୀଙ୍କ ସେବା ଓ ବିକାଶଧାରା ସହ ଯୋଡି ହୋଇ ରହିଛନ୍ତି । ତେଣୁ ସବୁ ନିର୍ବାଚନମଣ୍ଡଳୀ ଭଳି ଏଠି ମଧ୍ୟ ବିକାଶ ସପକ୍ଷରେ ଭୋଟ ପଡ଼ିବ । ବିଜେଡି ପ୍ରାର୍ଥୀ ବହୁ ଭୋଟ ବ୍ୟବଧାନରେ ବିଜୟୀ ହେବେ ବୋଲି ସେ ଦୃଢ଼ୋକ୍ତି ପ୍ରକାଶ କରିଛନ୍ତି ।
