ମହାନଦୀ ସ୍ରୋତ ମୁହଁରୁ ବଞ୍ଚିପାରିଲେନି ଅରିନ୍ଦମ

ଭୁବନେଶ୍ୱର: ସାମ୍ବାଦିକତା ପାଇଁ ଦୁଃସାହାସୀ ହେବାର ଦୁଃଖଦ ଓ ଭୟଙ୍କର ପରିଣତି । ମହାନଦୀର ଅକାତ କାତ ପାଣି ଓ ପ୍ରଖର ସ୍ରୋତରେ ଚାଲିଗଲା ଓଟିଭିର ମୁଖ୍ୟ ରିପୋର୍ଟର ଅରିନ୍ଦମ ଦାସଙ୍କ ଜୀବନ । ମୁଣ୍ଡୁଳି ବ୍ୟାରେଜ୍ ନିକଟ ମହାନଦୀରେ ଫସିଥିବା ଦନ୍ତାହାତୀର ଉଦ୍ଧାର କାର୍ଯ୍ୟର ଲାଇଭ୍ ରିପୋର୍ଟିଂ କରିବାକୁ ଓଡ୍ରାଫ୍ ବୋଟ୍ ରେ ମହାନଦୀକୁ ଯାଇଥିବା ଅରିନ୍ଦମ ଦୁନିଆରୁ ସବୁଦିନ ପାଇଁ ଚାଲିଗଲେ ।

ସହଯୋଗୀ କ୍ୟାମେରାମ୍ୟାନ୍ ପ୍ରଭାତ ସିହ୍ନା ଗୁରୁତର ଅବସ୍ଥାରେ କଟକ ବଡ଼ ଡାକ୍ତରଖାନାରେ ଚିକିତ୍ସିତ ହେଉଛନ୍ତି । ଗୁରୁତର ଅବସ୍ଥାରେ ଓଡ୍ରାଫ୍ ର ୪ ଜଣ ଯବାନଙ୍କୁ ଉଦ୍ଧାର କରାଯାଇଥିଲା ବେଳେ ଜଣେ ନିଖୋଜ ଅଛନ୍ତି । ଏଭଳି ହୃଦୟ ବିତାରକ ଅଘଟଣକୁ ସହଜରେ ହଜମ କରିହେଉନି । ଅରିନ୍ଦମଙ୍କ ଅକାଳ ବିୟୋଗ ସମସ୍ତଙ୍କ ଆଖିରେ ଲୁହ ଭରି ଦେଇଛି ।

ଚନ୍ଦକା ଜଙ୍ଗଲରୁ ଗଡି ମହାନଦୀ ପାର୍ ହେଉଥିବା ୧୭ ଜଣିଆ ହାତୀପଲରୁ ଗୋଟିଏ ଦନ୍ତାହାତୀ ମୁଣ୍ଡୁଳି ବ୍ୟାରେଜ୍ ମହାନଦୀରେ ଆଜି ବଡ଼ି ସକାଳୁ ଫସି ରହିଛି । ଦନ୍ତାହାତୀ ଫସି ରହିଥିବାର ଦୃଶ୍ୟର ରିପୋର୍ଟିଂ ପାଇଁ ସକାଳୁ ସେଠାରେ ପହଞ୍ଚିଥିଲେ ଅରିନ୍ଦମ । ସାଙ୍ଗରେ ଥିଲେ କ୍ୟାମେରାମ୍ୟାନ୍ ପ୍ରଭାତ । ଦୀର୍ଘ ସମୟ ଧରି ଲାଇଭ୍ ରିପୋର୍ଟିଂ କରିଥିଲେ । ଏହି ସମୟରେ ଓଡ୍ରାଫ୍ ର ଏକ ୫ ଜଣିଆ ଟିମ୍ ହାତୀ ଉଦ୍ଧାର ପାଇଁ ମହାନଦୀକୁ ବୋଟ୍ ନେଇ ପଶିଥିଲେ । ଆଉ ମହାନଦୀ ଭିତରୁ ରିପୋର୍ଟିଂ ପାଇଁ ଅରିନ୍ଦମ ସହଯୋଗୀ ପ୍ରଭାତଙ୍କୁ ଧରି ସେମାନଙ୍କ ସାଙ୍ଗରେ ଯାଇଥିଲେ । ତେବେ ହାତୀକୁ ଘଉଡ଼ାଉ ଥିବା ବେଳେ ସ୍ରୋତ ମୁହଁରେ ପିଟି ହୋଇ ଓଲଟିଗଲା ରବର ବୋଟ୍ ।

ଅରିନ୍ଦମ ଓ ପ୍ରଭାତଙ୍କ ସମେତ ୫ ଜଣ ଓଡ୍ରାଫ୍ ଟିମ୍ ବୁଡ଼ିଗଲେ । ତେବେ ଜଣଙ୍କ ବ୍ୟତୀତ ଅନ୍ୟମାନଙ୍କୁ ଉଦ୍ଧାର କରାଯାଇଥିଲା । ଅରିନ୍ଦମ ଓ ପ୍ରଭାତଙ୍କ ସମେତ ସମସ୍ତ ଗୁରୁତର ମାନଙ୍କୁ ଏସସିବି ମେଡ଼ିକାଲ୍ ରେ ଭର୍ତ୍ତି କରାଯାଇଥିଲା । ମାତ୍ର କିଛି ସମୟ ପରେ ଅରିନ୍ଦମଙ୍କୁ ମୃତ ବୋଲି ଘୋଷଣା କରିଥିଲେ ଅଧୀକ୍ଷକ ଡାକ୍ତର ଭୁବନାନନ୍ଦ ମହାରଣା । ପ୍ରଭାତଙ୍କ ଅବସ୍ଥା ମଧ୍ୟ ଗୁରୁତର ଅଛି । ତାଙ୍କୁ ଆଇସିୟୁରେ ଚିକିତ୍ସା କରାଯାଉଛି ।

ଓଡ଼ିଶା ମିଡ଼ିଆ ଜଗତରେ ଅରିନ୍ଦମ ଜଣେ ଜଣାଶୁଣା ସାମ୍ବାଦିକ । କ୍ରାଇମ୍ ଓ ପ୍ରାକୃତିକ ଦୁର୍ବିପାକ ଘଟଣା ରିପୋର୍ଟିଂରେ ରୁଚି ରଖୁଥିବା ଅରିନ୍ଦମ ୨୦୦୪ ମସିହାରେ ଧରିତ୍ରୀରୁ ସାମ୍ବାଦିକତା କ୍ୟାରିୟର୍ ଆରମ୍ଭ କରିଥିଲେ । ୨୦୦୯ ମସିହାରେ ସେ ଓଟିଭିରେ ଯୋଗଦେଇଥିଲେ । ସେବେଠାରୁ ସେ ଓଟିଭିରେ କାର୍ଯ୍ୟ କରୁଥିଲେ । ଜଣେ ନିର୍ଭିକ ଓ ସାହାସୀ ସାମ୍ବାଦିକ ଭାବେ ସେ ଜଣାଶୁଣା ଥିଲେ । ସର୍ବୋପରି ଜଣେ ବିନ୍ଦାସ, ପରୋପକାରୀ ଓ ଉତ୍ତମ ସ୍ୱଭାବର ମଣିଷ ଥିଲେ ଅରିନ୍ଦମ । ବଡ଼ମାନଙ୍କୁ ସମ୍ମାନ ଓ ସାନମାନଙ୍କୁ ସ୍ନେହ ଓ ଶ୍ରଦ୍ଧା କରିବା ତାଙ୍କ ଯୁବ ବ୍ୟକ୍ତିତ୍ୱର ଅନ୍ୟତମ ଆକର୍ଷଣ ଥିଲା ।

ଅରିନ୍ଦମଙ୍କୁ ହରାଇ ସାମ୍ବାଦିକ ଜଗତ ସ୍ତବ୍ଧ ହୋଇଯାଇଛି । ତାଙ୍କର ମାଆ, ପତ୍ନୀ ଓ ଏକମାତ୍ର ସନ୍ତାନ ଅଛନ୍ତି । କିଛିବର୍ଷ ତଳେ ତାଙ୍କ ବାପା ଏକ ସଡ଼କ ଦୁର୍ଘଟଣାରେ ପ୍ରାଣ ହରାଇଥିଲେ ।