କଳିଙ୍ଗ ଷ୍ଟାଡିୟମ୍ ରେ ଜୁନିୟର୍ ବିଶ୍ୱକପ୍ ହକି

ଭୁବନେଶ୍ୱର: ଓଡ଼ିଶାକୁ ପୁଣି ଫେରିଲା ହକି ଫିଭର୍ । ଭୁବନେଶ୍ୱରର କଳିଙ୍ଗ ଷ୍ଟାଡିୟମ୍ ରେ ଅନୁଷ୍ଠିତ ହେବ ପୁରୁଷ ଜୁନିୟର୍ ବିଶ୍ୱକପ୍ କହି । ଆସନ୍ତା ନଭେମ୍ବର ୨୪ ରୁ ଡିସେମ୍ବର ୫ ପର୍ଯ୍ୟନ୍ତ ଅନୁଷ୍ଠିତ ହେବାକୁ ଯାଉଥିବା ଏହି ବିଶ୍ୱ ପ୍ରତିଯୋଗିତାର ଆୟୋଜନ କରୁଛି ଓଡ଼ିଶା । ଅର୍ଥାତ୍ ମାତ୍ର ଦୁଇ ମାସରେ ଆୟୋଜନ ପ୍ରସ୍ତୁତିର ବଡ଼ ଚାଲେଞ୍ଜକୁ ଗ୍ରହଣ କରିଛନ୍ତି ରାଜ୍ୟ ସରକାର । ଆଜି ଲୋକସେବା ଭବନରେ ଆୟୋଜିତ ଏକ ସ୍ୱତନ୍ତ୍ର କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି ବଡ଼ ଘୋଷଣା କରିବା ସହ ଜୁନିୟର୍ ବିଶ୍ୱକପ୍ ହକିର ଲୋଗୋ ଓ ଟ୍ରଫି ଉନ୍ମୋଚିତ କରିଛନ୍ତି ।

ମୁଖ୍ୟମନ୍ତ୍ରୀ କହିଥିଲେ, ‘ହକି ଇଣ୍ଡିଆ ରାଜ୍ୟ ସରକାରଙ୍କୁ ସହାୟତା ପାଇଁ ଅନୁରୋଧ କରିଥିଲେ । କରୋନା ମହାମାରୀ ସତ୍ତ୍ୱେ ଦେଶର ସମ୍ମାନ ଦୃଷ୍ଟିରୁ ଏତେ କମ୍ ସମୟରେ ଆମେ ଏହିି ପୁରୁଷ ଜୁନିୟର ବିଶ୍ୱକପ୍ ହକି-୨୦୨୧ ଆୟୋଜନ ପାଇଁ ତୁରନ୍ତ ରାଜି ହୋଇଯାଇଥିଲୁ ।’

ଅନ୍ତର୍ଜାତୀୟ ହକି ଫେଡେରେସନ୍ ର ସଭାପତି ନରିନ୍ଦର ବାତ୍ରା, ହକି ଇଣ୍ଡିଆର ସାଧାରଣ ସମ୍ପାଦକ ରାଜିନ୍ଦର ସିଂହ ଓଡ଼ିଶା ସରକାରଙ୍କ ହକି ପ୍ରୋତ୍ସାହନର ଉଚ୍ଚ ପ୍ରଶଂସା କରିବା ସହ କଳିଙ୍ଗ ଷ୍ଟାଡିୟମ୍ କୁ ହକି ପ୍ରତିଯୋଗିତାର ଶ୍ରେଷ୍ଠ ସ୍ଥାନ ବୋଲି କହିଥିଲେ । ଭୁବନେଶ୍ୱରକୁ କ୍ରୀଡ଼ା କ୍ୟାପିଟାଲ୍ ବୋଲି ସେମାନେ ଅଭିହିତ କରିଥିଲେ ।

ଏହି କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ କ୍ରୀଡ଼ାମନ୍ତ୍ରୀ ତୁଷାରକାନ୍ତି ବେହେରା, ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ର, କ୍ରୀଡ଼ା ସଚିବ ଆର.ଭିନୀଲ କ୍ରିଷ୍ଣା, ହକି ଷ୍ଟାର୍ ଦିଲ୍ଲୀପ ତିର୍କୀ ପ୍ରମୁଖ ଯୋଗଦେଇଥିଲେ । ରାଜ୍ୟର ସବୁ ହକି ଖେଳାଳୀ ଉପସ୍ଥିତ ଥିଲେ ।

ସୂଚନାଥାଉକି, ପୁରୁଷ ଜୁନିୟର ହକି ବିଶ୍ୱକପ୍-୨୦୨୧ ରେ ମୋଟ ୧୬ ଟି ଦେଶ ଭାଗନେବେ ।