ଅତ୍ୟାଚାରୀ ରାଜାଙ୍କୁ ବଳିଗଲା ପୁଲିସ

ଭରତପୁର ଥାନା ଆଇଆଇସିଙ୍କ ସମେତ ୫ ନିଲମ୍ବିତ

ଭୁବନେଶ୍ୱର: ଅସାମାଜିକ ଯୁବକଙ୍କ କବଳରୁ ରକ୍ଷା ପାଇବା ପାଇଁ ସହାୟତା ମାଗୁଥିବା ସେନାବାହିନୀର ଜଣେ କ୍ୟାପଟେନ୍ ଓ ତାଙ୍କ ବାନ୍ଧବୀଙ୍କୁ ରାଜଧାନୀର ଭରତପୁର ଥାନା ପୁଲିସ ଅକଥନୀୟ ନିର୍ଯ୍ୟାତନା ଦେବା ଘଟଣା ହଟଚମଟ ସୃଷ୍ଟି କରିଛି । କମିଶନରେଟ୍ ପୁଲିସ ଅଧିକାରୀମାନେ ସଂପୃକ୍ତ ଥାନା ବାବୁମାନଙ୍କୁ କ୍ଲିନଚିଟ୍ ଦେଇ ନିଜର ଦୋଷ ଝାଡ଼ିବାକୁ ଉଦ୍ୟମ କରିଥିବା ବେଳେ ସେନାବାହିନୀର ହସ୍ତକ୍ଷେପ ଯୋଗୁଁ ଅକଲ ଗୁଡୁମ୍ ହୋଇଯାଇଛି । ପୁଲିସ ଡିଜି ୱା.ବି.ଖୁରାନିଆ ଆଜି ଭରତପୁର ଥାନା ଆଇଆଇସି ଦୀନକୃଷ୍ଣ ମିଶ୍ର, ଏସଆଇ ବୈଶାଳିନୀ ପଣ୍ଡା, ଏଏସଆଇ ସଲିଳାମୟୀ ସାହୁ, ଏଏସଆଇ ସାଗରିକା ରଥ ଏବଂ କନେଷ୍ଟବଳ ବଳରାମ ହାଁସଦାଙ୍କୁ ନିଲମ୍ବିତ କରିଛନ୍ତି ।

ତେବେ ପୁଲିସ ଡିଜିଙ୍କ ଏହି କାର୍ଯ୍ୟାନୁଷ୍ଠାନକୁ ଅବସରପ୍ରାପ୍ତ ସେନା ଅଧିକାରୀ ସଂଘ ଗ୍ରହଣ କରିନାହାନ୍ତି । ନିଲମ୍ବନ ଏକ ଦଣ୍ଡ ନୁହେଁ । ସଂପୃକ୍ତି ପୁଲିସ କର୍ମଚାରୀଙ୍କ ବିରୋଧରେ ଦୃଷ୍ଟାନ୍ତମୂଳକ ପଦକ୍ଷେପ ଗ୍ରହଣ ଦାବିରେ ସେମାନେ ରାଜରାସ୍ତାକୁ ଓହ୍ଲାଇଛନ୍ତି । ପୁଲିସ ସେବା ପ୍ରତିଷ୍ଠାନ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରି ନିଜର ଦାବି ଜଣାଇଛନ୍ତି । ଅନ୍ୟପକ୍ଷରେ, ସେନା କର୍ତ୍ତୃପକ୍ଷ ଏହି ମାମଲା ଉପରେ ସମ୍ପୂର୍ଣ୍ଣ ନଜର ରଖିଛନ୍ତି । କାର୍ଯ୍ୟରତ ସେନା ଅଧିକାରୀ ଓ ତାଙ୍କ ବାନ୍ଧବୀଙ୍କୁ ନିର୍ଯ୍ୟାତନା ଦେଇଥିବା ପୁଲିସ କର୍ମଚାରୀଙ୍କ ପ୍ରତି କୋହଳ ମନୋଭାବକୁ ବରଦାସ୍ତ କରାଯିବ ନାହିଁ ବୋଲି ଜଣାଇ ଦିଆଯାଇଛି ।

ଶନିବାର ରାତିରେ ଘଟଣା ଘଟିଥିଲା । କୋଲକତାର ୨୨ ଶିଖ୍ ରେଜିମେଣ୍ଟର କ୍ୟାପଟେନ୍ ଗୁରୁବନ୍ତ ସିଂ ତାଙ୍କର ବାନ୍ଧବୀ ଅଙ୍କିତା ପ୍ରଧାନଙ୍କ ସହ ରାତ୍ରିଭୋଜନ ସାରି ପଟିଆ ଅଞ୍ଚଳରୁ କଳିଙ୍ଗନଗର ଫେରୁଥିଲେ । ଭରତପୁର ଥାନା ନିକଟସ୍ଥ ରାସ୍ତାରେ ଏକ ଅଜଣା ଗାଡ଼ି ସହ ସାଇଡ୍ ମରାକୁ ନେଇ କିଛି ଯୁବକ ତାଙ୍କୁ ନିସ୍ତୁକ ପିଟିବା ସହ ତାଙ୍କ ବାନ୍ଧବୀଙ୍କୁ ଅଶ୍ଲୀଳ ଇଙ୍ଗିତ କରିଥିଲେ । ସେମାନଙ୍କ କବଳରୁ କୌଶଳକ୍ରମେ ଖସି ଗୁରୁବନ୍ତ ଓ ଅଙ୍କିତା ଥାନାକୁ ଅଭିଯୋଗ କରିବା ପାଇଁ ଯାଇଥିଲେ ।

ଅନୁସନ୍ଧାନରୁ ଜଣାପଡ଼ିଛି, ଗୁରୁବନ୍ତ ଓ ଅଙ୍କିତା ଥାନାରେ ପହଞ୍ଚି ଲା ପରେ ଡ୍ୟୁଟି ଅଫିସରଙ୍କୁ ଭେଟି ଘଟଣା ସମ୍ପର୍କରେ ଜଣାଇଥିଲେ ଏବଂ ଆତଙ୍କ ଚଳାଇଥିବା ସଂପୃକ୍ତ ଯୁବକମାନଙ୍କୁ ପିସିଆର ପଠାଇ ଧରିବା ପାଇଁ ଅନୁରୋଧ କରିଥିଲେ । ମାତ୍ର ଡ୍ୟୁଟି ଅଫିସରଙ୍କ ସମେତ ଉପସ୍ଥିତ ଅନ୍ୟ ପୁଲିସ କର୍ମଚାରୀମାନେ ସେମାନଙ୍କ ନେହୁରାକୁ କର୍ଣ୍ଣପାତ କରି ନ ଥିଲେ । ଲିଖିତ ଭାବେ ଜଣାଇଲା ପରେ ଯାଇ ଯାହା କାର୍ଯ୍ୟାନୁଷ୍ଠାନ ହେବ ବୋଲି ବେପରୁଆ ଢ଼ଙ୍ଗରେ କହିଥିଲେ । ମାତ୍ର ଲେଖା ସରିଲା ବେଳକୁ ସଂପୃକ୍ତ ଅସାମାଜିକ ଯୁବକମାନେ ରାସ୍ତାରୁ ପଳାଇଥିବେ ବୋଲି ଗୁରୁବନ୍ତ ଓ ଅଙ୍କିତା କହିବାରୁ ପୁଲିସ ବାବୁମାନେ ଚିହିଁକି ଉଠିଥିଲେ । ତମେ ଆମକୁ କ’ଣ ଜ୍ଞାନ ଦେଉଛ କହି ନାଲିଆଖି ଦେଖାଇଥିଲେ । ଏହାକୁ ନେଇ ଉଭୟ ପକ୍ଷ ମଧ୍ୟରେ ଯୁକ୍ତିତର୍କ ହୋଇଥିଲା ।

ଏହି ସମୟରେ ଗୁରୁବନ୍ତ ତାଙ୍କ ମୋବାଇଲ୍ ଫୋନ୍ ରେ ଏହାକୁ ରେକର୍ଡିଂ କରିବାକୁ ଉଦ୍ୟମ କଲାରୁ ଉପସ୍ଥିତ ପୁଲିସ କର୍ମଚାରୀମାନେ ତାଙ୍କୁ ଠେଲି ଠେଲି ଥାନା ହାଜତ ଭିତରେ ପୂରାଇ ବାହାରୁ ତାଲା ଠୁଙ୍କି ଦେଇଥିଲେ । ସେପଟେ ବାନ୍ଧବୀ ଅଙ୍କିତା ଏହାର ପ୍ରତିବାଦ କରିବାରୁ ତାଙ୍କୁ ମଧ୍ୟ ପୁଲିସ ଠେଲାପେଲା କରିଥିଲା । ଏଥିରେ ଏକ କମ୍ପ୍ୟୁଟର ତଳେ ପଡ଼ି ଭାଙ୍ଗି ଯାଇଥିଲା । ଏହାପରେ ପୁଲିସ ଅଧିକ ଉତକ୍ଷିପ୍ତ ହୋଇ ଅଙ୍କିତାଙ୍କୁ ମାଡ଼ ମାରିବା ସହ ତାଙ୍କର ଅନ୍ତବସ୍ତ୍ର ଟାଣି ଅଶାଳୀନ ବ୍ୟବହାର କରିଥିବା ଅଭିଯୋଗ ହୋଇଛି । ମୁଥ ମାରୁଥିବା ଜଣେ ମହିଳା କନେଷ୍ଟବଳଙ୍କୁ ପ୍ରତିରୋଧ କରିବାକୁ ଯାଇ ଅଙ୍କିତା ତାଙ୍କ ହାତକୁ କାମୁଡ଼ି ଦେଇଥିଲେ । ଏଥିରେ ପୁଲିସର ରାଗ ପଞ୍ଚମକୁ ଉଠିଗଲା । ଥାନାକୁ ଅଭିଯୋଗ କରିବାକୁ ଆସିଥିବା ଇଏ ଜଣେ ଯୁବତୀ ବୋଲି ପୁଲିସ ଭୁଲିଗଲା ।

ଥାନାରେ ଏତେସବୁ କାଣ୍ଡ ଘଟିବା ପରେ ପାହାନ୍ତା ବେଳକୁ ଆସି ପହଞ୍ଚିଥିଲେ ଆଇଆଇସି ଦୀନକୃଷ୍ଣ ମିଶ୍ର । ସେତେବେଳକୁ ସେନାର ୧୨୦ ବାଟାଲିଅନ୍ କର୍ତ୍ତୃପକ୍ଷଙ୍କ ଦୃଷ୍ଟିକୁ ଖବର ଯାଇସାରିଥିଲା । ଏହା ଜାଣିପାରି ଆଇଆଇସି ଥାନା ହାଜତ ଭିତରେ ୪ ଘଣ୍ଟା ଧରି ବନ୍ଦୀ ଥିବା କ୍ୟାପଟେନ୍ ଗୁରୁବନ୍ତ ସିଂଙ୍କୁ ନୋଟିସ୍ ଦେଇ ଛାଡ଼ିଦେଇଥିଲେ । ମାତ୍ର ତାଙ୍କ ବାନ୍ଧବୀ ଅଙ୍କିତାଙ୍କୁ ପୁଲିସକୁ ଆକ୍ରମଣ ଅଭିଯୋଗରେ ଗିରଫ କରି କୋର୍ଟ ଚାଲାଣ କରିଥିଲେ ।

ଅଙ୍କିତାଙ୍କ ବାପା ତଥା ଅବସରପ୍ରାପ୍ତ ସେନା ଅଧିକାରୀ ଅନ୍ତର୍ଯ୍ୟାମୀ ପ୍ରଧାନ ଏହି ମାମଲାକୁ ପୁଲିସ କର୍ତ୍ତୃପକ୍ଷଙ୍କ ଦୃଷ୍ଟିକୁ ଆଣିବା ପରେ ଅଧିକାରୀମାନେ ବିଭାଗୀୟ କର୍ମଚାରୀଙ୍କୁ ସୁରକ୍ଷା ଦେବାକୁ ଲାଗିପଡ଼ିଲେ । ଘଟଣାର ସିସିଟିଭି ଫୁଟେଜ୍ ନ ଥିବା ସୁଯୋଗରେ ଗୁରୁବନ୍ତ ଓ ଅଙ୍କିତାଙ୍କୁ ଦୋଷୀ ଦର୍ଶାଇ ଭରତପୁର ଥାନାର ପୁଲିସ କର୍ମଚାରୀମାନଙ୍କୁ କ୍ଲିନଚିଟ୍ ଦେଇଥିଲେ । ତେବେ ମାନବାଧିକାର କର୍ମୀ ଜୟନ୍ତ କୁମାର ଦାସ ଏହି ଘଟଣାକୁ ମାନବାଧିକାର କମିସନଙ୍କ ଦୃଷ୍ଟିକୁ ଆଣିଥିଲେ । ସୁପ୍ରିମକୋର୍ଟଙ୍କ ନିର୍ଦ୍ଦେଶ ଅନୁସାରେ ଥାନା ଓ ହାଜତରେ ସିସିଟିଭି କ୍ୟାମେରା ରହିବା ବାଧ୍ୟତାମୂଳକ ଥିଲା ବେଳେ ଭରତପୁର ଥାନାରେ କାହିଁକି ନାହିଁ ବୋଲି ପ୍ରଶ୍ନ କରିଥିଲେ ।

ସେପଟେ ଭାରତୀୟ ସେନା ଏହି ଘଟଣାକୁ ଅତି ଗମ୍ଭୀରତାର ସହ ଗ୍ରହଣ କରି ଟୁଇଟ୍ କରିବା ପରେ ଓଡ଼ିଶା ପୁଲିସରେ ଛନକା ପଶିଥିଲା । ଏହି ଘଟଣାକୁ ସମ୍ବେଦନଶୀଳ ବିଚାରକରି ପୁଲିସ ଡିଜି ଶ୍ରୀ ଖୁରାନିଆ କ୍ରାଇମବ୍ରାଞ୍ଚ ତଦନ୍ତ ପାଇଁ ନିର୍ଦ୍ଦେଶ ଦେଇଥିଲେ । ଡିଜିଙ୍କ ନିର୍ଦ୍ଦେଶ ପରେ କ୍ରାଇମବ୍ରାଞ୍ଚ ଡିଏସପି ନରେନ୍ଦ୍ର ବେହେରାଙ୍କ ନେତୃତ୍ୱରେ ଏକ ୫ ଜଣିଆ ଟିମ୍ ଗତକାଲି ଭରତପୁର ଥାନାରେ ପହଞ୍ଚି ଘଟଣାର ଛାନଭିନ୍ କରିଥିଲେ ।

ଏହି ଘଟଣାରେ ଆଇଆଇସିଙ୍କ ସମେତ ୫ ଜଣ ସେମାନଙ୍କ କାର୍ଯ୍ୟରେ ଗୁରୁତର ଅବହେଳା(gross misconduct) କରିଥିବା ଡିଜି ତାଙ୍କ ନିଲମ୍ବନ ଆଦେଶରେ ଲେଖିଛନ୍ତି । ଅର୍ଥାତ୍ ପୁଲିସ ଆଗରୁ ଦେଇଥିବା କ୍ଲିନଚିଟ୍ ମିଛ ବୋଲି ଧରାପଡ଼ିଛି । ସେହିଭଳି ହାଇକୋର୍ଟରେ ଦାଖଲ ହୋଇଥିବା ରିପୋର୍ଟରୁ ଅଙ୍କିତାଙ୍କ ଶରୀରରେ ଗୁରୁତର ଆଘାତ ଲାଗିଥିବା ଜଣାପଡ଼ିଛି । ସୁତରାଂ ପୁଲିସ ତାଙ୍କୁ ଥାନାରେ ମାଡ଼ମାରିଥିବା ସ୍ପଷ୍ଟ ହୋଇଯାଇଛି ।

ମୋଟାମୋଟି କହିଲେ, ସେଦିନ ରାତିରେ କ୍ୟାପଟେନ୍ ଓ ତାଙ୍କ ବାନ୍ଧବୀଙ୍କୁ ରାସ୍ତାରେ ମାଡ଼ ମାରିଥିବା ଯୁବକମାନଙ୍କୁ ପିସିଆର ପଠାଇ ଧରିବା ବଦଳରେ ଥାନାକୁ ଅଭିଯୋଗ କରିବାକୁ ଯାଇଥିବା ଦୁଇ ଅଭିଯୋଗକାରୀଙ୍କୁ ଅଭିଯୁକ୍ତ ସଜାଇଦେଇଥିଲା ଭରତପୁର ପୁଲିସ । ଅଭିଯୋଗକାରୀ ସେନାବାହିନୀର ଜଣେ ଅଧିକାରୀ ବୋଲି ଜାଣିଲା ପରେ ବି ପୁଲିସ ତାଙ୍କୁ ଥାନା ହାଜତରେ ୪ ଘଣ୍ଟା ଧରି ବନ୍ଦୀ କରିଥିବା ବେଳେ ତାଙ୍କ ବାନ୍ଧବୀଙ୍କୁ ଅଶାଳୀନ ବ୍ୟବହାର କରିବା ସହ ମାଡ଼ ମାରି ଜେଲ୍ ପଠାଇଥିଲା ।

ଲୋକଙ୍କ ପୁଲିସର ନାରା ଦେଉଥିବା କମିଶନରେଟ୍ ପୁଲିସର ଏହି ଆଚରଣ ଏବେ ରାଜ୍ୟ ଭିତରେ ସୀମିତ ନ ରହି ଜାତୀୟ ଗଣମାଧ୍ୟମରେ ଚର୍ଚ୍ଚାର ବିଷୟ ହୋଇଛି । ସମୁଦାୟ ବ୍ୟବସ୍ଥାକୁ ବଦନାମ କରି ଲୋକଙ୍କ ବିଶ୍ୱାସ ହରାଉଥିବା ଏଭଳି ଉଦ୍ଧତ ପୁଲିସ ଅଧିକାରୀମାନଙ୍କ ବିରୋଧରେ କଠୋର ଦଣ୍ଡବିଧାନ ପାଇଁ ସବୁଆଡୁ ଦାବି ହେଉଛି ।