ଭୁବନେଶ୍ୱର: ସରକାରୀ ବ୍ୟବସ୍ଥାରୁ ମନଭରି ଲୁଟିଥିବା ପ୍ରତାପ ସାମଲ ଆଜି ଚାକିରିରୁ ସସପେଣ୍ଡ ହୋଇଛନ୍ତି । ଏହି କରିତକର୍ମା ବାବୁଜଣଙ୍କ ଓଡ଼ିଶା ପୁଲିସ ହାଉସିଂ କର୍ପୋରେସନ୍ ର ଡେପୁଟି ମ୍ୟାନେଜର ଭାବେ କାର୍ଯ୍ୟ କରୁଥିଲେ । ଆୟ ବହିର୍ଭୂତ ସମ୍ପତ୍ତି ରଖି ଗତକାଲି ଭିଜିଲାନସ୍ ଦ୍ୱାରା ଗିରଫ ହୋଇଥିଲେ । ଏବେ ସେ ଝାରପଡ଼ା ଜେଲ୍ ରେ ଅଛନ୍ତି ।
ଭିଜିଲାନସ୍ ରେଡ୍ ବେଳେ ପ୍ରତାପ ସାମଲଙ୍କର ୭ ଟି କୋଠା ଏବଂ ୨୫ ପ୍ଲଟ୍ ଠାବ ହୋଇଥିଲା । ଧରାପଡ଼ିଯିବା ଭୟରେ ଘରେ ରଖିଥିବା ନଗଦ ୩୮ ଲକ୍ଷ ଟଙ୍କାରୁ ୨୦ ଲକ୍ଷ ଟଙ୍କା ଏକ ପେଟିରେ ପୂରେଇ ପଡ଼ିଶା ଘର ଛାତକୁ ଫିଙ୍ଗିଥିଲେ । ତାଙ୍କର ପ୍ରାୟ ୧୫ କୋଟିର ଆୟ ବହିର୍ଭୂତ ସମ୍ପତ୍ତି ଥିବା ଭିଜିଲାନସ୍ ବିଭାଗ ଆକଳନ କରିଛି । ଯାହା ତାଙ୍କ ଦରମାର ୧୦୨୧% ଗୁଣା ଅଧିକ । କୋଠାବାଡ଼ି ନିଜ ନାଁରେ କମ ଏବଂ ପତ୍ନୀ ଓ ପୁଅଙ୍କ ନାଁରେ ଅଧିକ ରଖିଛନ୍ତି । ବ୍ୟାଙ୍କ ବାଲାନସ୍ ୧ କୋଟି ୬୧ ଲକ୍ଷ ୩୫ ହଜାର ଟଙ୍କା ଥିବା ବେଳେ ୫୭ ଲକ୍ଷ ୭୨ ହଜାର ଟଙ୍କାର ଇନସୁରାନ୍ସ ପ୍ରିମିୟମ୍ ଡିପୋଜିଟ୍ ଅଛି ।
ଓଡ଼ିଶା ପୁଲିସ ହାଉସିଂ କର୍ପୋରେସନ୍ ରେ ଏଷ୍ଟିମେଟର୍ ଚାକିରିରୁ ଡେପୁଟି ମ୍ୟାନେଜର ପଦକୁ ଆସିଥିବା ଶ୍ରୀ ସାମଲ ୩୩ ବର୍ଷ ଚାକିରି କାଳ ଭିତରେ ଏତେ ସମ୍ପତ୍ତି କମେଇଛନ୍ତି । କେମିତି କମେଇଲେ ସମସ୍ତଙ୍କୁ ଚକିତ କରୁଛି । ଏହାର ସୂତ୍ର ନିଶ୍ଚିତ ବାହାରିବା ଦରକାର । ବାବୁଙ୍କର ଆଜି ନୁହେଁ, ୨୦ ବର୍ଷ ତଳୁ କଳାଟଙ୍କା ହାଉଜାଉ ହେଉଛି । ପତ୍ନୀଙ୍କ ନାଁରେ ଏହି ଟଙ୍କାକୁ ଓଡ଼ିଆ ଫିଲ୍ମ ନିର୍ମାଣରେ ଖଟାଇଥିବା ଜଣାପଡ଼ିଲାଣି ।
୨୦୦୧ ମସିହାରେ ଓଡ଼ିଆ ଫିଲ୍ମ ‘ବାଜି’ ନିର୍ମାଣ କରିଥିଲେ ସେ । ୨୦୦୩ ମସିହାରେ ଦ୍ୱିତୀୟ ଫିଲ୍ମ ‘ନାରୀ ଆଖିରେ ନିଆଁ’ ନିର୍ମାଣ କରିଥିଲେ । ଏହି ଦୁଇଟି ଫିଲ୍ମରେ ପ୍ରଚୁର ଅର୍ଥ ବିନିଯୋଗ ହୋଇଥିଲା । ମୁମ୍ବାଇର ନାମୀଦାମୀ କଳାକାର ଏଥିରେ କଣ୍ଠଦାନ କରିଥିଲେ । ଦୁଇଟିଯାକ ଫିଲ୍ମ ବକ୍ସ ଅଫିସ୍ ରେ ହିଟ୍ ହୋଇଥିଲା । ଅଧିକ ଫିଲ୍ମ ପ୍ରଯୋଜନା କରିଛନ୍ତି ନା ନାହିଁ ତାହାର ତଦନ୍ତ ଚାଲିଥିବା ସୂଚନା ମିଳିଛି ।
