ଭୁବନେଶ୍ୱର/କଟକ: କଂଗ୍ରେସ ପକ୍ଷରୁ ୧୨ ତାରିଖ ‘ଓଡ଼ିଶା ବନ୍ଦ’ ଡାକରା ଉପରେ ଓଡ଼ିଶା ହାଇକୋର୍ଟ ଅଙ୍କୁଶ ଲଗାଇଛନ୍ତି । ସୁପ୍ରିମକୋର୍ଟଙ୍କ ନିର୍ଦ୍ଦେଶ ଅନୁସାରେ ଜବରଦସ୍ତ ବନ୍ଦ ପାଳନ ହୋଇପାରିବନି କି ସାଧାରଣ ଜନଜୀବନକୁ ବ୍ୟାହତ କରାଯାଇପାରିବନି । କେହି ଗାଡ଼ି ମଟର ଅଟକାଇପାରିବେ ନାହିଁ କି ରେଳରୋକ, ରାସ୍ତାରୋକ ହୋଇପାରିବ ନାହିଁ । ବନ୍ଦ ନୁହେଁ, ରାଜନୈତିକ ଦଳ ଚାହିଁଲେ ହରତାଳ କରିପାରିବ ବୋଲି ହାଇକୋର୍ଟ ତାଙ୍କ ରାୟରେ ସ୍ପଷ୍ଟ କହିଛନ୍ତି ।
କଂଗ୍ରେସ ପକ୍ଷରୁ ଓଡ଼ିଶା ବନ୍ଦ ଡାକରାକୁ ବିରୋଧ କରି କଟକ ମଙ୍ଗଳାବାଳଗର ଜନୈକ ବ୍ୟବସାୟୀ ନରେଶ କୁମାର ମିଶ୍ର ଆଜି ସକାଳେ ହାଇକୋର୍ଟରେ ଏକ ଜନସ୍ୱାର୍ଥ ମାମଲା ରୁଜୁ କରିଥିଲେ । ମାମଲାର ଗୁରୁତ୍ୱ ଦୃଷ୍ଟିରୁ ଅପରାହ୍ନରେ ହାଇକୋର୍ଟ ଏହାର ଶୁଣାଣି କରିଥିଲେ ।
ହାଇକୋର୍ଟଙ୍କ ରାୟ ଆସିବା ପରେ କଂଗ୍ରେସ ପକ୍ଷରୁ ଏକ ସାମ୍ବାଦିକ ସମ୍ମିଳନୀରେ ମୁଖପାତ୍ର ସତ୍ୟପ୍ରକାଶ ନାୟକ ସ୍ପଷ୍ଟୀକରଣ ଦେଇଛନ୍ତି । ସେ କହିଛନ୍ତି ଯେ ଆସନ୍ତାକାଲି ଆମେ ୬ ଘଣ୍ଟିଆ ଶାନ୍ତିପୂର୍ଣ୍ଣ ବନ୍ଦ ଡାକରା ଦେଇଛୁ । ଜୋରଜବରଦସ୍ତ ଓଡ଼ିଶା ବନ୍ଦ କଥା ଆମେ କେବେ ବି କହିନାହୁଁ । ହାଇକୋର୍ଟକୁ ମଧ୍ୟ ଏହା ଜଣାଇ ଦିଆଯାଇଛି ।
ସୂଚନାଯୋଗ୍ୟ, ଆସନ୍ତାକାଲି ୬ ଘଣ୍ଟିଆ ଓଡ଼ିଶା ବନ୍ଦ ପାଳନ ପାଇଁ କଂଗ୍ରେସ ପକ୍ଷରୁ ବ୍ୟାପକ ଆୟୋଜନ ହୋଇଛି । ଆଜି ସକାଳେ କଂଗ୍ରେସ ପକ୍ଷରୁ ଅନୁଷ୍ଠିତ ଏକ ସାମ୍ବାଦିକ ସମ୍ମିଳନୀର ଓଡ଼ିଶା ବନ୍ଦରେ ସମସ୍ତେ ସାମିଲ ହେବାକୁ ଆହ୍ୱାନ ଦିଆଯାଇଥିଲା । ଜରୁରୀକାଳୀନ ସେବାକୁ ଛାଡ଼ିଦେଲେ ସମସ୍ତ ଦୋକାନ ବଜାର, ଗାଡ଼ି ମଟର ଚଳାଚଳ ବନ୍ଦ ରହିବ ବୋଲି କୁହାଯାଇଥିଲା । ବନ୍ଦ ପାଳନକୁ ସଫଳ କରିବା ପାଇଁ ପିସିସି ସଭାପତି ନିରଞ୍ଜନ ପଟ୍ଟନାୟକ ସମସ୍ତଙ୍କୁ ନିବେଦନ କରି ଏକ ଭିଡ଼ିଓ ମଧ୍ୟ ଜାରି କରିଥିଲେ ।
ଅନ୍ୟପକ୍ଷରେ ମୁଖ୍ୟ ବିରୋଧୀ ଦଳ ବିଜେପି, କଂଗ୍ରେସର ଓଡ଼ିଶା ବନ୍ଦ ଡାକରାକୁ ନିରବ ସମର୍ଥନ ଦେଇଛି । ମମିତାକୁ ନ୍ୟାୟ ଦେବା ପାଇଁ ବିଜେପି ଲଢ଼େଇ ଜାରି ରଖିଥିବା ଆଜି ଦଳ ପକ୍ଷରୁ କୁହାଯାଇଥିଲା । ଏଥିରେ ଓଡ଼ିଶା ବନ୍ଦକୁ ସମର୍ଥନର ଇସାରା ଥିଲା ।
ବିଜେପି ଇସାରାରେ ନାଚୁଛି କଂଗ୍ରେସ: ବିଜେଡ଼ି
