ଭୁବନେଶ୍ୱର: ଖଣ୍ଡପଡ଼ା ବିଧାୟକ ସୌମ୍ୟରଂଜନ ପଟ୍ଟନାୟକଙ୍କ ବିରୋଧରେ ଆଜି ମୁହଁ ଖୋଲିଛନ୍ତି ଜିଲ୍ଲାର ବରିଷ୍ଠ ନେତା ତଥା ନୟାଗଡ଼ ବିଧାୟକ ଅରୁଣ ସାହୁ । ସୌମ୍ୟଙ୍କୁ ସେ ଜଣେ ବ୍ଲାକମେଲର୍ ଭାବେ ଅଭିହିତ କରିବା ସହ ତାଙ୍କର ମାଟିକୁ ସମ୍ମାନ ନାରା ଏକ ଭେଳିକି ବୋଲି କହିଛନ୍ତି । ବିଧାୟକ ଭାବେ ୪ ବର୍ଷ ୪ ମାସ ସମୟ ଭିତରେ ସେ ମାଟିର କଥା କେତେ ବୁଝିଛନ୍ତି ତାହା ଖଣ୍ଡପଡ଼ାବାସୀଙ୍କଠାରୁ ଉତ୍ତର ମାଗନ୍ତୁ ବୋଲି ଅରୁଣ ଆହ୍ୱାନ ଦେଇଛନ୍ତି ।
ଅରୁଣ କହିଛନ୍ତି, ମାନନୀୟ ବିଧାୟକ ସୌମ୍ୟରଂଜନ ପଟ୍ଟନାୟକ ଏବ କିଛି ଦିନ ହେଲା ବଡ଼ ବିଚଳିତ ଅଛନ୍ତି ଏବଂ ଉଦ୍ଭଟ କଥା କହୁଛନ୍ତି । ଉଦ୍ଭଟ ଭାବନାରେ ମୁଖ୍ୟମନ୍ତ୍ରୀଙ୍କ ଅଫିସକୁ ଟାର୍ଗେଟ୍ କରି ନିଜକୁ ମହାନ ସମାଜସେବୀ ବୋଲି ଉପସ୍ଥାପିତ କରୁଛନ୍ତି । ତେବେ ଏଥିରେ ଆଶ୍ଚର୍ଯ୍ୟ ହେବାର କିଛି ନାହିଁ । ଏସବୁ ହେଉଛି ତାଙ୍କ ଅସ୍ଥିରତାର ଲକ୍ଷଣ । ଖଣ୍ଡପଡ଼ାରୁ ବିଜେଡି ଟିକେଟରେ ବିଧାୟକ ହେବା ପଛରେ ମନ୍ତ୍ରୀ ହେବା ତାଙ୍କର ଏକମାତ୍ର ଉଦ୍ଦେଶ୍ୟ ଥିଲା । ମାତ୍ର ସେହି ସ୍ୱପ୍ନ ଚୂରମାର ହେଲା ପରେ ସେ ହତାଶ ହୋଇ ବିଜେଡି ଏବଂ ସରକାରଙ୍କ ବିରୋଧରେ କହୁଛନ୍ତି ।
ତାଙ୍କର ମାଟିକୁ ସମ୍ମାନ ନାରାକୁ କଟାକ୍ଷ କରି ଅରୁଣ କହିଛନ୍ତି ଯେ ସେ ରାଜ୍ୟସଭାର ସଦସ୍ୟ ଭାବେ ନିର୍ବାଚିତ ହୋଇଥିଲେ । ଚାହିଁଥିଲେ ସାରା ଓଡ଼ିଶାର ସେବା କରିପାରିଥାନ୍ତେ । କିନ୍ତୁ ବୋଧେ ଖଣ୍ଡପଡ଼ାରୁ ହାରି ହାରି ଥିବାରୁ ସେଇ ଖଣ୍ଡପଡ଼ା ମାଟିର ସେବା କରିବା ପାଇଁ ପ୍ରତିଜ୍ଞା କରିଥିଲେ । ବିଜେଡିରୁ ପ୍ରାର୍ଥୀ ହୋଇ ବିଧାୟକ ହେଲେ । ତେବେ ୪ ବର୍ଷ ୪ ମାସ ଭିତରେ ଖଣ୍ଡପଡ଼ା ମାଟିର ସେବା କେତେ କଲେ ସେ ସମ୍ପର୍କରେ ନିର୍ବାଚନମଣ୍ଡଳୀ ଲୋକଙ୍କୁ ପଚାରିଲେ କହିବେ । ମାଟିର ସେବା ଦୂରେ ଥାଉ, ତାଙ୍କର ସମାଜସେବା ଏକ ପ୍ରଚାର ଭେଳିକି ବୋଲି ଅରୁଣ କହିଛନ୍ତି ।
ସୌମ୍ୟଙ୍କ ଗୁଣ ବଖାଣି ଅରୁଣ କହିଛନ୍ତି ଯେ ଏହି ବ୍ୟକ୍ତି ମାଟିର ନୁହଁନ୍ତି କି ପାର୍ଟିର ନୁହଁନ୍ତି । ନିଜ ସ୍ୱାର୍ଥ ଚିନ୍ତାରେ ସବୁବେଳେ ଥାନ୍ତି । ଯେତେବେଳେ ବ୍ୟକ୍ତିଗତ ସ୍ୱାର୍ଥ ହାସଲ ନ ହୁଏ, ସେ ବ୍ଲାକମେଲର୍ ପନ୍ଥା ଆପଣାନ୍ତି । ଆଉ ବ୍ଲାକମେଲିଂ ସଫଳ ନହେଲେ ଉଗ୍ର ହୋଇପଡ଼ନ୍ତି । କ୍ଷମତାର ଲାଳସା ମଣିଷକୁ ପଥଭ୍ରଷ୍ଟ କରେ ବୋଲି ଅରୁଣ କଡ଼ା ଟିପଣୀ ରଖିଛନ୍ତି ।
ଅରୁଣଙ୍କ ମନ୍ତବ୍ୟ ଉପରେ ଗଣମାଧ୍ୟମକୁ ପ୍ରତିକ୍ରିୟା ଦେଇଛନ୍ତି ସୌମ୍ୟ । ସେ କହିଛନ୍ତି, ଅରୁଣ ବାବୁଙ୍କ କଥାରୁ ସେ ନିଜେ କେତେ ଅସହାୟ ଜଣାପଡୁଛି । ତାଙ୍କ ସମ୍ପର୍କରେ ଆଲୋଚନା କରି ମୁଁ ତାଙ୍କୁ ଗୁରୁତ୍ୱ ଦେବାକୁ ଚାହୁଁନି । ଯାହା ସେ କହୁଛନ୍ତି ତାହା ତାଙ୍କର ନିଜସ୍ୱ ମତ ବୋଲି ମୋତେ ବିଶ୍ୱାସ ହେଉନି ବୋଲି କଟାକ୍ଷ କରିଛନ୍ତି ସୌମ୍ୟ ।
