ଭୁବନେଶ୍ୱର: କାହା ଲୋଭରେ ପଡ଼ି ସେ ଏମିତି କହିଦେଇଥିବ । କିନ୍ତୁ ତାହା କଦାପି ହୋଇପାରିବନି । ମୁଁ ଅଛି ବୋଲେ ମୋ ପୁଅ ଅଲବତ କଂଗ୍ରେସରୁ ଛିଡ଼ା ହେବ ।
ବରିଷ୍ଠ କଂଗ୍ରେସ ନେତା ତଥା ଜଟଣୀ ବିଧାୟକ ସୁରେଶ କୁମାର ରାଉତରାୟ ଆଜି ଗଣମାଧ୍ୟମକୁ ଏହି ବୟାନ ଦେଇଛନ୍ତି । ଗତକାଲି ତାଙ୍କ ସାନ ପୁଅ ମନ୍ନଥ ରାଉତରାୟ ଅଚାନକ ଗଣମାଧ୍ୟମକୁ ଡାକି ନିଜର ରାଜନୈତିକ ଅଭିଳାଷ ସ୍ପଷ୍ଟ କରିଥିଲେ । ଜଟଣୀରୁ ଲଢ଼ିବେ, କିନ୍ତୁ କଂଗ୍ରେସ ଟିକେଟରେ ଲଢ଼ିବେ ନାହିଁ ବୋଲି ଘୋଷଣା କରିଥିଲେ ।
ମାତ୍ର ଆଜି ତାଙ୍କ ବାପା ସୁର ରାଉତରାୟ ପୁଅର ଏହି ନିଷ୍ପତ୍ତିକୁ ଖାଲି ବିରୋଧ କରିନାହାନ୍ତି ବରଂ ୨୦୨୪ ରେ ଜଟଣୀରୁ ସାନପୁଅ କଂଗ୍ରେସ ଟିକେଟ୍ ରେ ଅଲବତ ଲଢ଼ିବ ବୋଲି ଦମ୍ଭ ଦେଖାଇଛନ୍ତି ।
ସୁର କହିଛନ୍ତି, ‘ଦୀର୍ଘ ୬୦ ବର୍ଷ ଧରି ମୁଁ କଂଗ୍ରେସ ରାଜନୀତି ସହ ଓତଃପ୍ରୋତ ଭାବେ ଜଡ଼ିତ ଅଛି । ହରେକୃଷ୍ଣ ମହତାବଙ୍କଠାରୁ ରାଜନୀତି ଶିଖିଛି । ଆଜି ଯାହା ପରିଚୟ ପାଇଛି ସେଇ କଂଗ୍ରେସ ଦେଇଛି । ମୁଁ ପ୍ରତିଜ୍ଞା କରିଛି କଂଗ୍ରେସରେ ମୁଁ ମରିବି । ଏ ଜନ୍ମରେ କଂଗ୍ରେସକୁ ଛାଡ଼ିବିନି ।’
ପୁଅ ମନ୍ମଥଙ୍କ ସମ୍ପର୍କରେ ସୁର କହିଛନ୍ତି ଯେ ସେ ଟୋକା ଲୋକ । ଏୟାର ଇଣ୍ଡିଆରେ କ୍ୟାପଟେନ୍ ଚାକିରି କରିଛି । ମଝିରେ ମଝିରେ ଛୁଟିରେ ଆସି ମୋ ସାଙ୍ଗରେ ଜଟଣୀ ଅଞ୍ଚଳ ବୁଲିଥିଲେ ମଧ୍ୟ ରାଜନୀତିର ଧାର ଧରିନି । ବୋଧହୁଏ ବିଜେଡି କି ବିଜେପି ଦଳରୁ କିଏ ତାକୁ ଲୋଭ ଦେଖାଇ ଦେଇଛି । ହେଲେ ମୁଁ ତାହା କରାଇବାକୁ ଦେବିନି ।
କାଲି ସେ ଟିଭିକୁ କହିଲା ପରେ ମୁଁ ପଚାରିଥିଲି । ଚଗଲ ବଗଲ କଥା ନାହିଁ । ତତେ କଂଗ୍ରେସରୁ ହିଁ ଲଢ଼ିବାକୁ ପଡ଼ିବ ବୋଲି କହିଥିଲି । ମୁଁ ବୁଝେଇଲା ପରେ ସେ ବୁଝିଯାଇଛି । ତା’ର ଚାକିରି ଜାଗାକୁ ଆଜି ପଠାଇ ଦେଇଛି । ମୁଣ୍ଡ ଥଣ୍ଡା କଲା ପରେ ଆସିବୁ ବୋଲି କହିଛି । କିଛି ଅସୁବିଧା ନାହିଁ । ଜଟଣୀରୁ ସେ କଂଗ୍ରେସ ଟିକେଟ୍ ରେ ଲଢ଼ିବା ଫାଇନାଲ୍ ବୋଲି ସୁର ରାଉତରାୟ କହିଛନ୍ତି ।
ତେବେ ସୁର ରାଉତରାୟଙ୍କ ଏହି ପ୍ରତିକ୍ରିୟା ଅନେକଙ୍କ ମନରୁ ଦ୍ୱନ୍ଦ କରିପାରିନାହିଁ । ବାପ-ପୁଅଙ୍କ ଏଭଳି ରାଜନୀତି ବୟାନ ପଛରେ ଅଲଗା କିଛି ଚାଲ୍ ଥାଇପାରେ ବୋଲି ଅନେକ ସନ୍ଦେହ କରୁଛନ୍ତି । କାରଣ ବୟସାଧିକ୍ୟ କାରଣରୁ ସୁର ବାବୁ ଆଉ ନିର୍ବାଚନ ଲଢ଼ିବେ ନାହିଁ ବୋଲି ବହୁ ପୂର୍ବରୁ ଘୋଷଣା କରିଛନ୍ତି । ତାଙ୍କ ଜାଗାରେ ଜଟଣୀରୁ ସାନପୁଅ ମନ୍ମଥ କଂଗ୍ରେସ ପ୍ରାର୍ଥୀ ହେବେ ବୋଲି ମଧ୍ୟ ବାରମ୍ବାର କହି ଆସୁଥିଲେ । ମାତ୍ର ମନ୍ମଥ ଏ ସମ୍ପର୍କରେ ମୁହଁ ଖୋଲି ନ ଥିଲେ ।
ମାତ୍ର ମନ୍ମଥ କଂଗ୍ରେସରୁ ନ ଲଢ଼ିବା ପାଇଁ ଗତକାଲି ଗଣମାଧ୍ୟମକୁ କହିଥିଲେ । ବାପାଙ୍କ ସହିତ ଆଲୋଚନା ଏବଂ ତାଙ୍କ ନିର୍ବାଚନମଣ୍ଡଳୀ ଲୋକଙ୍କ ମତାମତ ଆଧାରରେ ଏହି ନିଷ୍ପତ୍ତି ନେଇଥିବା ସ୍ପଷ୍ଟ କରିଥିଲେ ।
ମନ୍ମଥଙ୍କ କଥାକୁ ବିଶ୍ୱାସ କଲେ ବାପା ତାଙ୍କୁ କଂଗ୍ରେସ ଟିକେଟ୍ ରେ ନ ଲଢ଼ି ଅନ୍ୟ ଦଳରୁ ପ୍ରାର୍ଥୀ ହେବା ପାଇଁ ପରାମର୍ଶ ଦେଇଛନ୍ତି । ଆଉ ଯଦି ଏବେ ସୁର ରାଉତରାୟଙ୍କ କଥାକୁ ବିଶ୍ୱାସ କରାଯାଏ ତେବେ ମନ୍ମଥ ଗତକାଲି ବାପାଙ୍କ ନାଁ ନେଇ ମିଛ କହିଛନ୍ତି ବୋଲି ବୁଝିବାକୁ ହେବ । ଏହି ଦ୍ୱନ୍ଦ ଭିତରେ ମନ୍ମଥଙ୍କ ଆଗାମୀ କାର୍ଯ୍ୟପନ୍ଥାକୁ ସମସ୍ତଙ୍କର ଅପେକ୍ଷା ରହିଛି ।
