ଆଇପିଏସ୍ ଆଶିଷ ସିଂହଙ୍କୁ ଛାଟ

ଭୁୁବନେଶ୍ୱର: ପୂର୍ବ ସରକାରରେ ପରାକ୍ରମୀ ଆଇପିଏସ୍ ଅଫିସର ଆଶିଷ କୁମାର ସିଂହ ନୂଆ ସରକାରରେ ସମ୍ପୂର୍ଣ୍ଣ ଦୁର୍ବଳ ଓ ଅସହାୟ ହୋଇଯାଇଛନ୍ତି । ରାଜ୍ୟ ସରକାର ତାଙ୍କର ଆଜି ଗୋଟିକିଆ ବଦଳି ନିର୍ଦ୍ଦେଶ ବାହାର କରିଛନ୍ତି । ଗୃହ ବିଭାଗରେ ଓଏସଡି ଭାବେ ତାଙ୍କୁ ନିଯୁକ୍ତି ଦିଆଯାଇଛି । ସାଧାରଣତଃ ଗୃହ ବିଭାଗର ଏହି ଓଏସଡି ପଦକୁ ଏକ ପନିସମେଣ୍ଟ୍ ପୋଷ୍ଟିଂ ଭାବେ ବିବେଚନା କରାଯାଏ । ଏଥିରେ ନିଜର କ୍ଷମତା ପ୍ରୟୋଗ କି କାଟତି ଦେଖାଇବାର କୌଣସି ଅବକାଶ ନାହିଁ । ଏଠି ବିନା କାମରେ ହାତବାନ୍ଧି ବସିବା କଥା ।

ଗତ ବିଜେଡି ସରକାର ଅମଳରେ ଅତି ପ୍ରଭାବଶାଳୀ ଅଧିକାରୀଙ୍କ ତାଲିକାରେ ଥିଲେ ଆଇଜି ଆଶିଷ ସିଂହ । ମୁଖ୍ୟମନ୍ତ୍ରୀଙ୍କ ସୁରକ୍ଷା ଦାୟିତ୍ୱ ତାଙ୍କ ହାତରେ ଥିଲା । ଖାଲି ସରକାରରେ ନୁହେଁ, ଦଳୀୟ କାମ କରୁଥିବା ନେଇ ତାଙ୍କ ବିରୋଧରେ ମାଳ ମାଳ ଅଭିଯୋଗ ରହିଥିଲା । ଗତ ସାଧାରଣ ନିର୍ବାଚନ ପୂର୍ବରୁ ସେ ମାସେ ପାଇଁ ଅଚାନକ ଛୁଟି ନେବା ଘଟଣା ତାଙ୍କୁ ବହୁତ ବିବାଦୀୟ କରିଦେଇଥିଲା । ସ୍ୱାସ୍ଥ୍ୟଗତ କାରଣ ଦର୍ଶାଇ ସେ ୪.୫.୨୦୦୪ ରୁ ଛୁଟି ନେଇଥିଲେ ମଧ୍ୟ ସେ ଛୁଟିରେ ରହି ବିଜେଡି ପାଇଁ ନିର୍ବାଚନ ପରିଚାଳନା କରୁଥିବା ଅଭିଯୋଗ ନିର୍ବାଚନ କମିସନଙ୍କ ଦୃଷ୍ଟିକୁ ଆଣିଥିଲା ବିଜେପି । ନିର୍ବାଚନ କମିସନ ଏହି ଅଭିଯୋଗ ଉପରେ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରି ଆଶିଷ ସିଂହଙ୍କ ସ୍ୱାସ୍ଥ୍ୟାବସ୍ଥା ଯାଞ୍ଚ କରାଇଥିଲେ ।

ଇତିମଧ୍ୟରେ ମାସେ ଛୁଟି ସରିଲା ପରେ ଶ୍ରୀ ସିଂହ କାର୍ଯ୍ୟରେ ଯୋଗଦେଇଥିଲେ ମଧ୍ୟ ଆଶ୍ଚର୍ଯ୍ୟଜନକ ଭାବେ ରାଜ୍ୟ ସରକାରଙ୍କ ଗୃହ ବିଭାଗ ପାଖରେ ଖବର ନ ଥିଲା । ଏମିତିକି ଗୃହ ବିଭାଗ ପକ୍ଷରୁ ଏକ ବିଜ୍ଞପ୍ତି ଜାରି କରାଯାଇ ପୁଲିସ ଡିଜିଙ୍କଠାରୁ ଏହାର ଉତ୍ତର ଲୋଡ଼ାଯାଇଥିଲା । ରାଜ୍ୟ ସରକାରଙ୍କ ଗୃହ ବିଭାଗ ଜଣେ କାର୍ଯ୍ୟରତ ଆଇପିଏସ୍ ଅଫିସରଙ୍କ ଖୋଜଖବର ନେବା ଘଟଣା ବେଶ୍ ଚର୍ଚ୍ଚାର ବିଷୟ ହୋଇଥିଲା ।