ଭୁବନେଶ୍ୱର: ୧୦ ଦିନ ତଳେ ବରୀ ବ୍ଲକ୍ ଅଧ୍ୟକ୍ଷ ଅଶୋକ ଗେଡି ବିଜେଡି ଛାଡ଼ି ବିଜେପିକୁ ପଳାଇଥିଲେ । ତାଙ୍କ ସହ ୧୨ ସମିତି ସଭ୍ୟ ଏବଂ ୭ ବିଜେଡି ସରପଞ୍ଚ ମଧ୍ୟ ବିଜେପିକୁ ଯାଇଥିଲେ । ସେଦିନ ବିଜେପି ରାଜ୍ୟ କାର୍ଯ୍ୟାଳୟରେ ସେମାନଙ୍କୁ ଗେରୁଆ ଉତ୍ତରୀୟ ପକାଇ ସ୍ୱାଗତ କରିଥିଲେ ରାଜ୍ୟ ସଭାପତି ମନମୋହନ ସାମଲ । ମାତ୍ର ଆଜି ସେହି ବରୀ ବ୍ଲକ୍ ଅଧ୍ୟକ୍ଷ ଅଶୋକ ଗେଡି ଏବଂ ତାଙ୍କର ଟିମ୍ ବିଜେଡିକୁ ଫେରି ଆସି ଶଙ୍ଖଭବନରେ ସବୁଜ ଉତ୍ତରୀୟ ପିନ୍ଧିଛନ୍ତି । ବିଜେପି ତାଙ୍କୁ ପ୍ରଲୋଭନ ଦେଖାଇ ଏବଂ ଭୟଭୀତ କରି କରାୟତ୍ତ କରିବାକୁ ଚେଷ୍ଟା କରିଥିଲା ବୋଲି ବିଜେଡି ସଙ୍ଗୀନ ଅଭିଯୋଗ ଆଣିଛି ।
ବିଜେଡିକୁ ଫେରିଲା ପରେ ଶ୍ରୀ ଗେଡି ନିଜେ ଏହାର ଖୁଲାସା ନ କରି ନିଜର ଇଜ୍ଜତକୁ ଜଗିରଖି ପ୍ରତିକ୍ରିୟା ଦେଇଛନ୍ତି । କହିଛନ୍ତି, ବରୀ ବ୍ଲକ୍ ର ବିକାଶ ପାଇଁ ବିଜେପି ଯାଇଥିଲି । ଗତ ୧୧ ଦିନ ଭିତରେ ବିକାଶର କୌଣସି ବାସ୍ତବତା ଅନୁଭବ କରିପାରିଲିନି । ବିଜେପିରେ ଖାଲି ଭାଷଣବାଜି ଓ ମିଛ ପ୍ରତିଶ୍ରୁତି ଛଡ଼ା ଆଉ କିଛି ପାଇଲିନି । ତେଣୁ ମୁଁ ପୁଣିଥରେ ବିଜେଡିକୁ ଫେରି ଆସିଲି । ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କ ନୀତି ଆଦର୍ଶରେ ଅନୁପ୍ରାଣିତ ଥିଲି ଏବଂ ଆଗକୁ ରହିବି ବୋଲି ସେ କହିଛନ୍ତି ।
ଜିଲ୍ଲାର ବରିଷ୍ଠ ନେତା ପ୍ରଣବ ପ୍ରକାଶ(ବବି) ଦାସ କିନ୍ତୁ ବିଜେପି ଉପରେ ଗୁରୁତର ଆରୋପ ଲଗାଇଛନ୍ତି । କହିଛନ୍ତି, ବିଜେପି ଏବେ ସାରା ରାଜ୍ୟରେ କ୍ଷମତାର ଦୂରୁପଯୋଗ କରି ତଥା ବିଭିନ୍ନ ପ୍ରଲୋଭନ ଦେଖାଇ ବିଜେଡିର ନିର୍ବାଚିତ ପ୍ରତିନିଧିମାନଙ୍କୁ ନେବାକୁ ଚେଷ୍ଟା କରୁଛି । ମାତ୍ର ତାହା କରାଇ ଦିଆଯିବ ନାହିଁ ।
ଦଳର ମୁଖ୍ୟ ସଚେତକ ଶ୍ରୀମତୀ ପ୍ରମିଳା ମଲ୍ଲିକ ବରୀ ବ୍ଲକ୍ ଅଧ୍ୟକ୍ଷଙ୍କ ବିଜେପି ଯିବାର ରହସ୍ୟକୁ ପୂରା ଖୋଲିଦେଇଛନ୍ତି । କହିଛନ୍ତି, ବିଜେପି କ୍ଷମତାର ଦୂରୁପଯୋଗ କରି ବିଜେଡିକୁ ଭାଙ୍ଗିବାକୁ ଚେଷ୍ଟା କରୁଛି । ବରୀ ବ୍ଲକ୍ ଅଧ୍ୟକ୍ଷ ଅଶୋକ ଗେଡିଙ୍କୁ ବିଭିନ୍ନ ପ୍ରକାର ଚାପ ପ୍ରୟୋଗ କରି ପ୍ରଲୋଭନ ଦେଖାଇ ଓ ବିଭିନ୍ନ ପ୍ରକାର ଧମକ ଦେଇ ଦଳରେ ମିଶାଇ ବାହାବା ନେବାକୁ ଚେଷ୍ଟା କରିଥିଲା ବିଜେପି । ସେକଥା ଆଜି ଫସର ଫାଟିଯାଇଛି । ବରୀ ବ୍ଲକ୍ ବିକାଶ କଥା ଚିନ୍ତା ନ କରି ବିଜେପି କର୍ମୀ କିଭଳି ଫାଇଦା ପାଇବେ ସେ ନେଇ ଯୋଜନା କରିଥିଲା । ଅଶୋକ ଗେଡି ଏହା ଜାଣିଯିବା ପରେ ପୁଣି ବିଜେଡି ଏବଂ ନବୀନ ପଟ୍ଟନାୟକଙ୍କ ଉପରେ ଭରସା କରି ଦଳକୁ ଫେରି ଆସିଛନ୍ତି ।
ଶଙ୍ଖଭବନରେ ଆୟୋଜିତ ମିଶ୍ରଣ ପର୍ବରେ ପ୍ରମିଳା ମଲ୍ଲିକ, ବବି ଦାସଙ୍କ ସମେତ ଉପମୁଖ୍ୟ ସଚେତକ ପ୍ରତାପ ଦେବ, ଦଳର ବରିଷ୍ଠ ଗଣମାଧ୍ୟମ ସଂଯୋଜକ ପ୍ରତାପ ଜେନା, ବରୀ ବିଧାୟକ ବିଶ୍ୱରଞ୍ଜନ ମଲ୍ଲିକ ପ୍ରମୁଖ ଉପସ୍ଥିତ ଥିଲେ ।
ତେବେ ବିଜେଡିର ଅଭିଯୋଗ ଉପରେ ବିଜେପିର ପ୍ରତିକ୍ରିୟା ଆମର ହସ୍ତଗତ ହୋଇନାହିଁ ।
