ଭୁବନେଶ୍ୱର: ନିକଟରେ କଂଗ୍ରେସରେ ଯୋଗଦେଇଥିବା ପୂର୍ବତନ ମୁଖ୍ୟ ଶାସନ ସଚିବ ବିଜୟ ପଟ୍ଟନାୟକଙ୍କୁ ଦଳରେ ବଡ଼ ଦାୟିତ୍ୱ ମିଳିଛି । ଓଡ଼ିଶା କଂଗ୍ରେସ ପ୍ରଚାର କମିଟିର ଅଧ୍ୟକ୍ଷ ଭାବେ ତାଙ୍କୁ ନିଯୁକ୍ତି ମିଳିଛି । ଏଆଇସିସି ପକ୍ଷରୁ ଏହି ନିଯୁକ୍ତିନାମା ଆଜି ପ୍ରକାଶ ପାଇଛି ।
ଗତ ଫେବ୍ରୁଆରୀ ଦ୍ୱିତୀୟ ସପ୍ତାହରେ ଶ୍ରୀ ପଟ୍ଟନାୟକ କଂଗ୍ରେସରେ ଯୋଗଦେଇଥିଲେ । ଦଳକୁ ଆସୁ ଆସୁ ସେ ସକ୍ରିୟ ହୋଇଥିଲେ । ଦଳରେ ତାଙ୍କୁ ଏକ ଗୁରୁତ୍ୱପୂର୍ଣ୍ଣ ଦାୟିତ୍ୱ ମିଳିବ ବୋଲି ଆଭାସ ମିଳିଥିଲା । ପ୍ରଚାର କମିଟି ଅଧ୍ୟକ୍ଷ ଭାବେ ଆସନ୍ତା ନିର୍ବାଚନକୁ ସେ ସାମନା କରିବେ ।
ସୂଚନାଥାଉକି, ୧୯୭୬ ବ୍ୟାଚ୍ ର ଆଇଏଏସ୍ ବିଜୟ ପଟ୍ଟନାୟକ ୨୦୦୪ ରୁ ୨୦୧୦ ମସିହା ପର୍ଯ୍ୟନ୍ତ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କର ପ୍ରମୁଖ ସଚିବ ଭାବେ କାର୍ଯ୍ୟ କରିଥିଲେ । ୨୦୧୦ରୁ ୨୦୧୩ ପର୍ଯ୍ୟନ୍ତ ଓଡ଼ିଶାର ମୁଖ୍ୟ ଶାସନ ସଚିବ ପଦରେ ଥିଲେ । ଚାକିରିରୁ ଅବସର ନେବା ପରେ ସେ ରାଜ୍ୟ ଷ୍ଟାଫ୍ ସିଲେକ୍ସନ୍ କମିସନ ଅଧ୍ୟକ୍ଷ ପଦ ମଣ୍ଡନ କରିଥିଲେ । ବର୍ଷକ ପରେ ଇସ୍ତଫା ଦେଇ ପ୍ରସ୍ତାବିତ ବେଦାନ୍ତ ବିଶ୍ୱବିଦ୍ୟାଳୟ ପ୍ରକଳ୍ପ ମୁଖ୍ୟ ଭାବେ ଯୋଗଦେଇଥିଲେ ।
ନିକଟରେ ବେଦାନ୍ତ ପ୍ରକଳ୍ପକୁ ନେଇ ସୁପ୍ରିମକୋର୍ଟ ରାଜ୍ୟ ସରକାରଙ୍କୁ ଭର୍ତ୍ସନା କଲା ପରେ ଶ୍ରୀ ପଟ୍ଟନାୟକ ଅଡୁଆରେ ପଡ଼ିଛନ୍ତି । କଂଗ୍ରେସ ଦଳ ରାଜ୍ୟ ସରକାରଙ୍କୁ ଟାର୍ଗେଟ୍ କରିଥିବା ବେଳେ ସରକାରରେ ଶ୍ରୀ ପଟ୍ଟନାୟକଙ୍କ ଅତୀତ ଭୂମିକାକୁ ନେଇ ପ୍ରଶ୍ନ ଉଠିଛି । ବିଶ୍ୱବିଦ୍ୟାଳୟ ପାଇଁ ବୁଝାମଣା ଏବଂ ବେଆଇନ ଜମି ଅଧିଗ୍ରହଣରେ ତାଙ୍କର ପ୍ରମୁଖ ଭୂମିକା ଥିବା କୁହାଯାଉଛି । ଗଣମାଧ୍ୟମରେ ଏହାକୁ ନେଇ ଚର୍ଚ୍ଚା ହୋଇଥିଲେ ମଧ୍ୟ ସେ ମୁହଁ ଖୋଲିନାହାନ୍ତି ।
