ଭୁବନେଶ୍ୱର: ବିଜେଡି ସୁପ୍ରିମୋ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ଦଳର ନବମ ତଥା ଶେଷ ପର୍ଯ୍ୟାୟ ବିଧାନସଭା ପ୍ରାର୍ଥୀ ତାଲିକା ଘୋଷଣା କରିଛନ୍ତି । ଏହି ପର୍ଯ୍ୟାୟରେ ଥିବା ତିନୋଟି ଯାକ ଆସନ ଉପରେ ସମସ୍ତଙ୍କ ନଜର ଥିଲା । ତେବେ ଶେଷରେ ଏହା ଉପରୁ ପରଦା ହଟିଛି । ଖଣ୍ଡପଡ଼ାରୁ ଶ୍ରୀମତୀ ସାବିତ୍ରୀ ପ୍ରଧାନ, ନୀଳଗିରିରୁ ସୁକାନ୍ତ କୁମାର ନାୟକ ଏବଂ କୋରେଇରୁ ଶ୍ରୀମତୀ ସଂଧ୍ୟାରାଣୀ ଦାସ ହୋଇଛନ୍ତି ପ୍ରାର୍ଥୀ । ଏଥିସହ ପୂର୍ବରୁ ଘୋଷିତ ଦେବଗଡ଼ ବିଧାନସଭା ଆସନରେ ପ୍ରାର୍ଥୀ ପରିବର୍ତ୍ତନ କରାଯାଇଛି । ସେଠାରେ ଦେବଗଡ଼ ରାଣୀ ଅରୁନ୍ଧତୀ ଦେବୀଙ୍କ ଜାଗାରେ ରୋମାଞ୍ଚ ରଂଜନ ବିଶ୍ୱାଳ ପ୍ରାର୍ଥୀ ହୋଇଛନ୍ତି ।
କୋରେଇରେ ଶ୍ରୀମତୀ ସଂଧ୍ୟାରାଣୀ ଦାସଙ୍କୁ ପ୍ରାର୍ଥୀ କରି ନବୀନ ସମସ୍ତଙ୍କୁ ଚକିତ କରିଛନ୍ତି । ଶ୍ରୀମତୀ ଦାସ ହେଉଛନ୍ତି ବରିଷ୍ଠ ରାଜନେତା ସ୍ୱର୍ଗତ ଅଶୋକ ଦାସଙ୍କ ପତ୍ନୀ ତଥା ବିଜେଡି ସାଂଗଠନିକ ସମ୍ପାଦକ୍ ପ୍ରଣବ ପ୍ରକାଶ ଦାସ(ବବି)ଙ୍କ ମା । ସେହିଭଳି ଖଣ୍ଡପଡ଼ା ଆସନରୁ ପ୍ରାର୍ଥୀ ହୋଇଛନ୍ତି ଶ୍ରୀମତୀ ସାବିତ୍ରୀ ପ୍ରଧାନ । ଭାପୁର ଅଞ୍ଚଳର ଟାଣୁଆ ଯୁବନେତା ବେଣୁଧର ପ୍ରଧାନଙ୍କର ସେ ହେଉଛନ୍ତି ପତ୍ନୀ । ଗତ ପଞ୍ଚାୟତ ନିର୍ବାଚନରେ ବେଣୁଧର ଓ ତାଙ୍କ ପତ୍ନୀ ସାବିତ୍ରୀଙ୍କୁ ସକ୍ରିୟ ରାଜନୀତିରେ ଦେଖିବାକୁ ମିଳିଥିଲା । ତାଙ୍କର ଦଳୀୟ ପ୍ରତିଦ୍ୱନ୍ଦୀ ଗୟାଧର ପରିଡ଼ା ଓ ତାଙ୍କ ଗୋଷ୍ଠୀଙ୍କୁ ମାଟି କାମୁଡ଼େଇ ଭାପୁର ବ୍ଲକ୍ ଦଖଲ କରିଥିଲେ । ମହିଳାଙ୍କ ପାଇଁ ସଂରକ୍ଷିତ ଭାପୁର ବ୍ଲକ୍ ର ଅଧ୍ୟକ୍ଷ ଭାବେ ସାବିତ୍ରୀ ନିର୍ବାଚିତ ହୋଇଥିବା ବେଳେ ସ୍ୱାମୀ ବେଣୁଧର ଉପାଧ୍ୟକ୍ଷ ହୋଇଥିଲେ ।
ପରବର୍ତ୍ତୀ ସମୟରେ ଖଣ୍ଡପଡ଼ାରେ ବିଧାୟକ ସୌମ୍ୟରଂଜନ ପଟ୍ଟନାୟକଙ୍କ ସମ୍ପୂର୍ଣ୍ଣ ଅନୁପସ୍ଥିତିର ସୁଯୋଗ ନେଇ ଦଳୀୟ ସଂଗଠନର ଦାୟିତ୍ୱ ଦେଇ ଦକ୍ଷତାର ସହ ତୁଲାଇଥିଲେ । ଏଥିସହ ଫତେଗଡ଼ରେ ନିଜସ୍ୱ ଉଦ୍ୟମରେ ରାମମନ୍ଦିର ନିର୍ମାଣଠାରୁ ଆରମ୍ଭ କରି ବିଭିନ୍ନ ସାମାଜିକ ଓ ସେବାମୂଳକ କାର୍ଯ୍ୟକ୍ରମ ଜରିଆରେ ସେ ବିଜେଡି ହାଇକମାଣ୍ଡଙ୍କ ଶୁଭ ନଜରକୁ ଆସିଥିଲେ । ଉଭୟ ସାଂଗଠନିକ ଓ ସାମାଜିକ କାର୍ଯ୍ୟକ୍ରମରେ ପୂର୍ବତନ ବିଧାୟକ ଅନୁଭବ ପଟ୍ଟନାୟ ତାଙ୍କ ପାସଙ୍ଗରେ ପଡ଼ି ନ ଥିଲେ । ଅବଶ୍ୟ ବେଣୁଧରଙ୍କୁ ସିଧାସଳଖ ଟିକେଟ୍ ମିଳିବାରେ ବାଧକ ଥିଲା ଏକାଧିକ ଅପରାଧିକ ମାମଲା । କିଛି ମାମଲାରେ ସେ ଛନ୍ଦି ହୋଇଥିବାରୁ ହାଇକମାଣ୍ଡ ତାଙ୍କ ପତ୍ନୀଙ୍କୁ ଟିକେଟ୍ ଦେଇଥିବା କୁହାଯାଉଛି । ଖଣ୍ଡପଡ଼ାରେ ସାବିତ୍ରୀ ପ୍ରଧାନଙ୍କ ଲଢ଼େଇ ବିଜେପିର ଦୁଷ୍ମନ୍ତ ସ୍ୱାଇଁଙ୍କ ସହ ହେବ ।
ସେହିଭଳି ନୀଳଗିରିରୁ ବିଜେଡି ଟିକେଟ୍ ପାଇଥିବା ବିଧାୟକ ସୁକାନ୍ତ କୁମାର ନାୟକ ଜଣେ ଭାଗ୍ୟବାନ୍ ନେତା । ସରକାରୀ ଚାକିରି ଛାଡ଼ି ବିଜେଡିରେ ମିଶିଲା ପରେ ୨୦୧୪ ମସିହାରେ ଟିକେଟ୍ ପାଇ ଜିତିଥିଲେ । ୨୦୧୯ରେ ସେ ବିଜେପିକୁ ପଳାଇ ଯାଇ ଟିକେଟ୍ ହାସଲ କରିଥିଲେ ଏବଂ ଜିତିଥିଲେ । ଏଥର ନିର୍ବାଚନର କିଛି ଦିନ ପୂର୍ବରୁ ସେ ବିଜେପି ହାତ ଛାଡ଼ି ପୁଣି ବିଜେଡକୁ ଫେରିବା ପରେ ପୁଣି ତାଙ୍କ ଭାଗ୍ୟ ଜଳିଛି । ଏଥର ଜିତିଲେ, ହାଟ୍ରିକ୍ ମାରିବେ ।
ପୂର୍ବ ଘୋଷିତ ଦେବଗଡ଼ ପ୍ରାର୍ଥୀ ଶ୍ରୀମତୀ ଅରୁନ୍ଧତୀ ଦେବୀଙ୍କୁ ନେଇ ଦଳରେ ପ୍ରବଳ ଅସନ୍ତୋଷ ଦେଖିବାକୁ ମିଳିଥିଲା । ଲୋକଙ୍କ ସହ ସମ୍ପର୍କ ନ ଥିବା ରାଣୀଙ୍କ ପ୍ରାର୍ଥୀତ୍ୱକୁ ନେଇ ବିଦ୍ରୋହ ସୃଷ୍ଟି ହୋଇଥିଲା । ଦଳର ଶୀର୍ଷ ନେତୃତ୍ୱ ଏହାକୁ ବିଚାର କରି ପ୍ରାର୍ଥୀ ବଦଳାଇଛନ୍ତି । ଅରୁନ୍ଧତୀଙ୍କ ଜାଗାରେ ଯୁବନେତା ରୋମାଞ୍ଚ ରଂଜନ ବିଶ୍ୱାଳଙ୍କୁ ପ୍ରାର୍ଥୀ କରାଯାଇଛି ।
ବିଜେଡ଼ି ଛାଡ଼ିଲେ ଅନୁଭବ ପଟ୍ଟନାୟକ: ଖଣ୍ଡପଡ଼ାର ପୂର୍ବତନ ବିଧାୟକ ଅନୁଭବ ପଟ୍ଟନାୟକ ଆଜି ବିଜେଡିରୁ ଇସ୍ତଫା ଦେଇଛନ୍ତି । ଟିକେଟ୍ ନ ମିଳିବାରୁ ସେ ଏଭଳି ଚରମ ନିଷ୍ପତ୍ତି ନେଇଛନ୍ତି । ତେବେ ଆଗାମୀ ପଦକ୍ଷେପ ସମ୍ପର୍କରେ ସେ କିଛି କହିନାହାନ୍ତି । ୨୦୧୪ ରୁ ୨୦୧୯ ପର୍ଯ୍ୟନ୍ତ ସେ ବିଧାୟକ ଥିଲେ ।
