ଭୁବନେଶ୍ୱର: ରାଜ୍ୟସଭାର ୪ ଟି ଆସନ ଲାଗି ପ୍ରାର୍ଥୀ ଘୋଷଣା କରିଛନ୍ତି ବିଜେଡି ସୁପ୍ରିମୋ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ସେମାନେ ହେଲେ ଶ୍ରୀମତୀ ସୁଲତା ଦେଓ, ମାନସ ରଞ୍ଜନ ମଙ୍ଗରାଜ, ଡକ୍ଟର ସସ୍ମିତ୍ ପାତ୍ର ଏବଂ ନିରଞ୍ଜନ ବିଶି । ସସ୍ମିତ୍ ଙ୍କୁ ବିଜେଡି ଦ୍ୱିତୀୟ ଥର ପାଇଁ ରାଜ୍ୟସଭାକୁ ପଠାଉଥିବା ବେଳେ ପଶ୍ଚିମ ଓଡ଼ିଶାର ଆଦିବାସୀ ସଂଗଠକ ନିରଞ୍ଜନ ବିଶିଙ୍କୁ ପ୍ରାର୍ଥୀ କରି ନବୀନ ସରପ୍ରାଇଜ୍ କାର୍ଡ ଖେଳିଛନ୍ତି ।
ରାଜ୍ୟ ସରକାରଙ୍କ ଗଣମାଧ୍ୟମ ପରାମର୍ଶଦାତା ତଥା ବିଜେଡିର ସାଧାରଣ ସମ୍ପାଦକ ମାନସ ମଙ୍ଗରାଜ ଏବଂ ବିଜେଡି ମୁଖପାତ୍ର ସୁଲତା ଦେଓଙ୍କ ନାଁ ପ୍ରଥମରୁ ଚର୍ଚ୍ଚାରେ ଥିଲା । ସୁଲତାଙ୍କୁ ପ୍ରାର୍ଥୀ କରି ନବୀନ ମହିଳା ପ୍ରତିନିଧିତ୍ୱକୁ ଗୁରୁତ୍ୱ ଦେଇଛନ୍ତି ।
ସଫଳ ସାମ୍ବାଦିକରୁ ସଫଳ ରାଜନେତା ହୋଇଥିବା ମାନସ ଉଭୟ ସରକାରୀ ଓ ଦଳୀୟ କାର୍ଯ୍ୟରେ ତାଙ୍କର ଦକ୍ଷତା ପ୍ରତିପାଦନ କରି ସାରିଛନ୍ତି । ସରକାରଙ୍କ ଗଣମାଧ୍ୟମ ପରାମର୍ଶଦାତା ଭାବେ ସେ ତାଙ୍କର ଦାୟିତ୍ୱ ସୁଚାରୂ ରୂପେ ତୁଲାଇଥିଲେ । ସରକାରୀସ୍ତରରେ ସାମ୍ବାଦିକଙ୍କ ପାଇଁ ବିଭିନ୍ନ କଲ୍ୟାଣକାରୀ ଯୋଜନା ଆପଣାଇବାରେ ତାଙ୍କର ଉଦ୍ୟମ ବେଶ୍ ପ୍ରଶଂସନୀୟ । ଦିଲ୍ଲୀରେ ଓଡ଼ିଶାର ସ୍ୱରକୁ ଆହୁରି ଶାଣିତ କରିବା ସହ ଦଳୀୟ କାର୍ଯ୍ୟକ୍ରମକୁ ଅଧିକ ମଜବୁତ କରିବା ପାଇଁ ମାନସଙ୍କୁ ଗୁରୁ ଦାୟିତ୍ୱ ମିଳିଛି ।
ଡ. ସସ୍ମିତ୍ ପାତ୍ର ଦ୍ୱିତୀୟ ଥର ରାଜ୍ୟସଭାକୁ ଯିବେ । ଗତଥର ସେ ଅଧା ସମୟ ପାଇଁ ରାଜ୍ୟସଭା ଯାଇଥିଲେ ମଧ୍ୟ ତାଙ୍କର କାର୍ଯ୍ୟ ବେଶ୍ ପ୍ରଶଂସନୀୟ ଥିଲା । ରାଜ୍ୟସଭାରେ ତାଙ୍କର ଦକ୍ଷତାକୁ ଭୁରି ଭୁରି ପ୍ରଶଂସା ମିଳିଥିଲା । ସସ୍ମିତ୍ ତୃତୀୟ ବ୍ୟକ୍ତି ଯେ କି ବିଜେଡିରୁ ରାଜ୍ୟସଭାକୁ ଦ୍ୱିତୀୟ ଥର ପାଇଁ ଯିବେ । ପୂର୍ବରୁ ପ୍ୟାରୀମୋହନ ମହାପାତ୍ର ଏବଂ ବୈଜୟନ୍ତ ପଣ୍ଡାଙ୍କୁ ଦ୍ୱିତୀୟ ଥର ଲାଗି ରାଜ୍ୟସଭାକୁ ପଠାଇଥିଲେ ନବୀନ ।
ନିରଞ୍ଜନ ବିଶି ପଶ୍ଚିମ ଓଡ଼ିଶାର ଜଣେ ଆଦିବାସୀ ସଂଗଠକ । ବର୍ଷ ବର୍ଷ ଧରି ବିଜେଡି ବିରୋଧରେ ଆଦିବାସୀଙ୍କୁ ଏକାଠି କରି ଆନ୍ଦୋଳନ କରୁଥିଲେ । ଅଳ୍ପ ଦିନ ତଳେ ବିଜେଡି ହାତ ଧରିଥିବା ନିରଞ୍ଜନଙ୍କ ନାଁ ରାଜ୍ୟସଭା ପାଇଁ ଘୋଷଣା ହେବା ସମସ୍ତଙ୍କୁ ଚକିତ କରିଛି । ସୁବାସ ସିଂହଙ୍କ ଜାଗାରେ ସେ ରାଜ୍ୟସଭାକୁ ଯିବେ ।
ସଂଖ୍ୟା ଦୃଷ୍ଟିରୁ ବିଜେଡି ହାତରେ ୪ ଟି ଯାକ ଆସନ ରହିଛି । ତେଣୁ ପ୍ରାର୍ଥୀପତ୍ର ଦାଖଲ ସରିଲା ପରେ ବିଧିବଦ୍ଧ ଭାବେ ସମସ୍ତଙ୍କୁ ନିର୍ବାଚିତ ଘୋଷଣା କରାଯିବ ।
