ଭୁବନେଶ୍ୱର: ପ୍ରଧାନମନ୍ତ୍ରୀ ଗରିବ କଲ୍ୟାଣ ଅନ୍ନ ଯୋଜନା(ପିଏମଜିକେୱାଇ)କୁ କେନ୍ଦ୍ର ସରକାର ବନ୍ଦ କରିଦେଇଥିବାରୁ ବିଜୁ ଜନତା ଦଳ ଆପତ୍ତି ଉଠାଇଛି । ଏଥିଯୋଗୁଁ ୫ କେଜି ମାଗଣା ଚାଉଳ ପାଇବାରୁ ଗରିବଙ୍କୁ ବଞ୍ଚିତ କରାଯାଇଛି । ଗରିବ ଲୋକଙ୍କ ଖାଦ୍ୟ ନିରାପତ୍ତାକୁ କେନ୍ଦ୍ର କାହିଁକି ଉଚ୍ଛେଦ କରୁଛି ବୋଲି ଦଳ ପ୍ରଶ୍ନ କରିବା ସହ ଏହାର ପୁନଃ ପ୍ରଚଳନ ପାଇଁ ଦାବି କରିଛି ।
ବିଜେଡି ରାଷ୍ଟ୍ରୀୟ ମୁଖପାତ୍ର ଡକ୍ଟର ସସ୍ମିତ୍ ପାତ୍ର ଆଜି ଏକ ସାମ୍ବାଦିକ ସମ୍ମିଳନୀରେ ଏହି ଗୁରୁତ୍ୱପୂର୍ଣ୍ଣ ପ୍ରସଙ୍ଗ ଉଠାଇଛନ୍ତି । ସେ କହିଛନ୍ତି, ଓଡ଼ିଶାର ୩.୨୫ କୋଟି ଲୋକଙ୍କୁ ପ୍ରତି ମାସରେ ମୁଣ୍ଡ ପିଛା ୧୦ କେଜି ଚାଉଳ ମିଳୁଥିଲା । ଏଥିମଧ୍ୟରେ ଜାତୀୟ ଖାଦ୍ୟ ସୁରକ୍ଷା ଆଇନରେ ୫ କେଜି ଏବଂ ପ୍ରଧାନମନ୍ତ୍ରୀ ଗରିବ କଲ୍ୟାଣ ଅନ୍ନ ଯୋଜନାରେ ୫ କେଜି ମିଳୁଥିଲା । ତେବେ କେନ୍ଦ୍ର ବର୍ତ୍ତମାନ ଏହି ଗରିବ କଲ୍ୟାଣ ଯୋଜନାକୁ ବନ୍ଦ କରିଦେଇଛି । ଏହି ଯୋଜନାରେ ମାସକୁ ମିଳୁଥିବା ୫ କେଜି ମାଗଣା ଚାଉଳ ବନ୍ଦ ହେବା ଯୋଗୁଁ ଏହା ଗରିବ ଓ ଚାଷୀଙ୍କୁ ପ୍ରଭାବିତ କରିବ । ଏହା ଲୋକଙ୍କ ଉପରେ ପ୍ରତିକୂଳ ପ୍ରଭାବ ପକାଇବ ।
ଡକ୍ଟର ପାତ୍ର ପୁଣି କହିଥିଲେ, କୋଭିଡ ମହାମାରୀରେ ଭାଙ୍ଗିପଡ଼ିଥିବା ଲୋକଙ୍କ ଆର୍ଥିକ ମେରୁଦଣ୍ଡ ଏଯାଏଁ ସଜଡ଼ା ହୋଇନି । ଏହା ବନ୍ଦ ହେବା ସେମାନଙ୍କ ପରିବାରକୁ ବହୁ ପରିମାଣରେ କ୍ଷତିଗ୍ରସ୍ତ କରିବ । ଏହା କେବଳ ଓଡ଼ିଶାରେ ନୁହେଁ ସମଗ୍ର ଦେଶର କୋଟି କୋଟି ଲୋକଙ୍କ ଖାଦ୍ୟ ସୁରକ୍ଷାକୁ ପ୍ରଭାବିତ କରିବାକୁ ଯାଉଛି ।
ସେହିଭଳି ପିଏମଜିକେୱାଇ ଯୋଗୁଁ ଚାଷୀମାନେ ମଧ୍ୟ ଉପକୃତ ହେଉଥିଲେ । ପ୍ରତି ବ୍ୟକ୍ତିଙ୍କ ପାଇଁ ଅତିରିକ୍ତ ୫ କେଜି ଚାଉଳ ଦେବା ଯୋଗୁଁ କେନ୍ଦ୍ର ଦ୍ୱାରା ସେହି ଚାଉଳ କ୍ରୟ ହେଉଥିଲା । ଏହାଦ୍ୱାରା କୃଷକମାନେ ସେମାନଙ୍କର ଅତିରିକ୍ତ ଚାଉଳ ବିକ୍ରୟ କରିପାରୁଥିଲେ ଏବଂ ସେମାନଙ୍କୁ ଦିଆଯାଇଥିବା ଏମଏସପିରୁ ଲାଭ ପାଉଥିଲେ । ପିଏମଜିକେୱାଇ ବନ୍ଦ ହୋଇଥିବାରୁ ଓଡ଼ିଶାର କୃଷକମାନେ ଏକ ବଡ଼ ସମ୍ମୁଖୀନର ସମ୍ମୁଖୀନ ହୋଇଛନ୍ତି । ଚାଉଳର ଅତିରିକ୍ତ କ୍ରୟ ହେବ ନାହିଁ । ଚାଷୀଙ୍କୁ ଆଉ ଅଧିକ ଏମଏସପି ମିଳିବ ନାହିଁ । ସେମାନେ ନିଜର ଚାଉଳ କେଉଁଠାରେ ବିକ୍ରୟ କରିବେ ବୋଲି ଡକ୍ଟର ପାତ୍ର ପ୍ରଶ୍ନ କରିଛନ୍ତି ।
ସେପଟେ, ବିଜେଡିର ଏହି ଆପତ୍ତିକୁ ବିଜେପି କଟାକ୍ଷ କରିଛି । ଦଳର ସାଧାରଣ ସମ୍ପାଦକ ଗୋଲକ ମହାପାତ୍ର ଏକ ସାମ୍ବାଦିକ ସମ୍ମିଳନୀରେ ରାଜ୍ୟ ସରକାରଙ୍କୁ ପାଲଟା ଆକ୍ରମଣ କରିଛନ୍ତି । ସେ କହିଛନ୍ତି, ହନୁ ମଲାବେଳେ ସତ କହେ । ଓଡ଼ିଶାକୁ ପ୍ରଧାନମନ୍ତ୍ରୀ ମୋଦୀ ଚାଉଳ ଦେଉଥିଲେ ବୋଲି ବିଜେଡି ସରକାର ଆଜି ମାନିଛନ୍ତି । ସେଥିପାଇଁ ଧନ୍ୟବାଦ । ଓଡ଼ିଶାକୁ ମୋଦି ସରକାର ସବୁବେଳେ ଗୁରୁତ୍ୱ ଦେଇ ଆସୁଛନ୍ତି ବୋଲି ସେ କହିବା ସହ ବିଜେଡି କୁମ୍ଭୀର କାନ୍ଦଣା ବନ୍ଦ କରିବାକୁ ପରାମର୍ଶ ଦେଇଥିଲେ । ତେବେ ମୂଳ ପ୍ରସଙ୍ଗ ପିଏମଜିକେୱାଇ ଯୋଜନା ବନ୍ଦ ଉପରେ କିଛି କହି ନ ଥିଲେ ।
