ପାଷ୍ଟ୍ କୁ ଫାଷ୍ଟ୍ ଭୁଲନ୍ତି ସୌମ୍ୟ !

ଭୁୁବନେଶ୍ୱର: ପ୍ରଜାତନ୍ତ୍ରର ୭୫ତମ ପ୍ରତିଷ୍ଠା ଦିବସରେ ସୌମ୍ୟରଂଜନ ପଟ୍ଟନାୟକଙ୍କ ବକ୍ତବ୍ୟକୁ ନେଇ ଚର୍ଚ୍ଚା । ବବି ଓ ପାଣ୍ଡିଆନ୍ ନବୀନଙ୍କର ଦୁଇ ଆଖି ଏବଂ ଏ ଦୁଇଟି ଆଖିରେ ମୁଖ୍ୟମନ୍ତ୍ରୀ ଯାହା ଦେଖିବେ, ତାହା ତାଙ୍କ ଦୁନିଆ ବୋଲି ସୌମ୍ୟ କହିଛନ୍ତି । କିଛି ଦିନ ତଳେ ଆମ ଘରର ହାଲଚାଲ ସ୍ତମ୍ଭରେ ମଧ୍ୟ ସୌମ୍ୟ ଏହି ପ୍ରସଙ୍ଗ ଉଖୁରେଇଥିଲେ । ତେବେ ଏହି ଥରେ କି ଦି ଥର ନୁହେଁ, ଗଲା ଦି ବର୍ଷ ଭିତରେ ଏଭଳି ଢ଼ଙ୍ଗରେ ସେ ବାରମ୍ବାର ନବୀନଙ୍କୁ ଟାର୍ଗେଟ୍ କରି ଆସୁଛନ୍ତି ।

କୌତୁହଳର କଥା ଯେ ସୌମ୍ୟ ବିଜେଡ଼ିରେ ମିଶିଲା ବେଳେ ଯେଉଁମାନେ ତାଙ୍କୁ ନୀତିଭ୍ରଷ୍ଟ, ମତିଭ୍ରମ, କଞ୍ଚା ବେପାରୀ କହି ଛିଛାକର କରିଥିଲେ ସେମାନେ ଏବେ ସୌମ୍ୟଙ୍କ କଥାରେ ତାଳି ମାରୁଛନ୍ତି । ପଛକଥା ଭୁଲି ସୌମ୍ୟଙ୍କ ଗୁଣାଗାନ କରୁଛନ୍ତି । ଅର୍ଥାତ୍ ଯାହାକୁ ଯେଉଁ କଥା ଯେତେବେଳେ ସୁହାଇଲା ।

ପ୍ରଜାତନ୍ତ୍ର ଉତ୍ସବରେ ସୌମ୍ୟ ବାବୁ ଯେଉଁ କଥାଟି କହିଛନ୍ତି ତାହାର ପ୍ରାସଙ୍ଗିକତା ସମ୍ପର୍କରେ ତାଙ୍କଠାରୁ ଅଧିକ କେହି ଜାଣି ନ ଥିବେ । ସେ କେତେବେଳେ କ’ଣ କହନ୍ତି ତାହା ଆକଳନ କରିବା କଷ୍ଟକର । ଗତ ୧୫ ବର୍ଷ ଧରି ସେଇ ନବୀନ ପଟ୍ଟନାୟକଙ୍କୁ ସେ ନିର୍ଧୂମ ଗାଳି କରୁଥିଲେ । ଚାଷୀ ବିରୋଧୀ, ଓଡ଼ିଆ ଭାଷା ବିରୋଧୀ କହି ତାଙ୍କର ଚଉଦ ପୁରୁଷ ଉଦ୍ଧାର କରୁଥିଲେ । ସରକାରଙ୍କ ବିରୋଧରେ ଚାଷୀ ଆନ୍ଦୋଳନର ନେତୃତ୍ୱ ନେଇ ବିଜେଡ଼ି ସରକାରଙ୍କ ଆତ୍ମାର ସଦଗତି କାମନା କରୁଥିଲେ ।

ହେଲେ ଗତ ସାଧାରଣ ନିର୍ବାଚନର ଅବ୍ୟବହିତ ପୂର୍ବରୁ ଅଚାନକ ନବୀନ ନିବାସକୁ ରାତି ଅଧିଆ ବିଜେ କରିଥିଲେ । କିଛି ଦିନ ପରେ ନବୀନଙ୍କ ହାତ ଧରିଲେ ଏବଂ ବିଜେଡ଼ିରେ ବିଧିବଦ୍ଧ ଯୋଗଦେବାର ୪ ଘଣ୍ଟା ଭିତରେ ରାଜ୍ୟସଭା ଟିକେଟ ହାତେଇ ନେଲେ । ସାଂସଦ ଭାବେ ପ୍ରାୟ ବର୍ଷେ ରହିଲା ପରେ ବିଧାୟକ ହେବାକୁ ମନ ବଳାଇଲେ ଏବଂ ନବୀନ ନିବାସରେ ଅଧିଆ ପଡ଼ି ଖଣ୍ଡପଡ଼ା ଟିକେଟ ନେଇଗଲେ । ବିଜେଡ଼ି ଦୁର୍ଗ ଖଣ୍ଡପଡ଼ାରୁ ସର୍ବାଧିକ ଭୋଟ ବ୍ୟବଧାନରେ ବିଜୟୀ ହେବାରେ ତାଙ୍କର ନାଁ ବି ରେକର୍ଡ ହେଲା । ବିଜେଡ଼ିର ବରିଷ୍ଠ ପର୍ଯ୍ୟବେକ୍ଷକ ଭାବେ ଏବେ ତାଙ୍କ ଦାୟିତ୍ୱରେ ରହିଛି ୭ଟି ଜିଲ୍ଲା ।

ସୌମ୍ୟ ବାବୁଙ୍କର ଏହି ସଫଳ ବିଜେଡ଼ି ଯାତ୍ରା କାହା ଯୋଗୁଁ ସମ୍ଭବ ହୋଇଛି ତାହା ରାଜନୈତିକ ମହଲରେ କାହାରିକୁ ଅଛପା ନାହିଁ । ତାଙ୍କ କହିବାନୁସାରେ ପାଣ୍ଡିଆନ୍ ଓ ବବିଙ୍କ ଆଖିରେ ନବୀନ ବାବୁ ତାଙ୍କ ଦୁନିଆଁ ଦେଖନ୍ତି । ଏହା ଯଦି ସତ, ତାହାହେଲେ ବିଜେଡ଼ିରେ ତାଙ୍କର ପହଞ୍ଚ ଏହି ଦୁଇଜଣଙ୍କ ବିନା ସହଯୋଗ ଓ ସମର୍ଥନରେ କଦାପି ସମ୍ଭବ ହୋଇ ନ ଥିବ । ସେତେବେଳେ ସୌମ୍ୟ ବାବୁଙ୍କୁ ଏହା କେମିତି ପସନ୍ଦ ହୋଇଥିଲା? ତାଙ୍କର ସ୍ୱାଭିମାନ ସେତେବେଳେ କେଉଁଠି ଥିଲା? ତୃତୀୟ ନୟନ କରୁଥିଲା କ’ଣ? ରକ୍ଷକ ହେବା ପରିବର୍ତ୍ତେ ଭକ୍ଷକ ହୋଇଗଲା କି?

ଶୁଣାଯାଏ, ମନ୍ତ୍ରୀ ପଦ ସକାଶେ ମୁଖ୍ୟମନ୍ତ୍ରୀଙ୍କୁ ମନାଇବା ପାଇଁ ସୌମ୍ୟବାବୁ ଏହି ଦୁଇଜଣଙ୍କୁ ବହୁତ ନେହୁରା ହୋଇଥିଲେ । ନିଜର ଖବରକାଗଜକୁ ବି ଆୟୁଧ କରିଥିଲେ । ସମ୍ଭବତଃ ସେଥିରେ ବିଫଳ ହେଲା ପରେ ସୌମ୍ୟ ବାବୁ ଉତକ୍ଷିପ୍ତ ହୋଇପଡ଼ିଛନ୍ତି । ବରିଷ୍ଠ କଂଗ୍ରେସ ନେତା ସୁର ରାଉତରାୟଙ୍କ ଭାଷାରେ, ସୌମ୍ୟଙ୍କୁ ଭଗବାନ ଆସିଲେ ବି ସନ୍ତୁଷ୍ଟ କରିପାରିବେନି ।

ପ୍ରଜାତନ୍ତ୍ର ସଭାରେ ସୌମ୍ୟ ବାବୁ ଆହୁରି କହିଛନ୍ତି ଯେ ନବୀନଙ୍କ ଦୁଇ ଆଖି ଯେ ସବୁବେଳେ ସତ କହିବେ, ସେଥିରେ ଗ୍ୟାରେଣ୍ଟି ନାହିଁ । ସେମାନଙ୍କ କଥା ମାନି ମଣିମା ଯଦି କାଉକୁ ଧଳା କହିବାକୁ ଚେଷ୍ଟା କରନ୍ତି ତ କଥା ସରିଲା । ସେତେବେଳେ ଶାସନରେ ନିଶ୍ଚିତ ବିଭ୍ରାଟ ସୃଷ୍ଟି ହେବ ।

ସୌମ୍ୟ ବାବୁଙ୍କ ଏହି ଦୁଇପଦ କଥା ତାଙ୍କ ନିଜ ପାଇଁ ପ୍ରଯୁଜ୍ୟ ବୋଲି ବିଜେଡ଼ି ଶିବିରରେ ଆଲୋଚନା ହେଉଛି । ସୌମ୍ୟ ବାବୁଙ୍କୁ ବିଜେଡ଼ିକୁ ଆଣି ଏମପି ଓ ଏମଏଲଏ ଟିକେଟ କରାଇବା ପଛରେ ପ୍ରଣବ ପ୍ରକାଶ(ବବି) ଦାସଙ୍କ ଗୁରୁତ୍ୱପୂର୍ଣ୍ଣ ଭୂମିକା ଥିଲା । ବବିଙ୍କ ଉଦ୍ୟମରେ ତାଙ୍କର ବିଜେଡ଼ି ଯୋଗଦାନ ଓ ପରବର୍ତ୍ତୀ ଅବସ୍ଥାରେ ଦଳରେ ତାଙ୍କର ବିଭୀଷଣ ଭୂମିକା ଶାସନରେ ବିଭ୍ରାଟ ସୃଷ୍ଟି କରୁଛି ବୋଲି ଦଳର ଜଣେ ବରିଷ୍ଠ ନେତା କ୍ଷୋଭ ପ୍ରକାଶ କରିଛନ୍ତି ।

ବାକି ରହିଲା ସୌମ୍ୟଙ୍କ ତୃତୀୟ ନୟନ ନାରା । ସାମ୍ବାଦିକମାନେ ଶାସକଙ୍କ ତୃତୀୟ ନୟନ ଭଳି କାର୍ଯ୍ୟ କରିବାକୁ ସେ ପରାମର୍ଶ ଦେଇଛନ୍ତି । ସାମ୍ବାଦିକମାନେ ଶିବଙ୍କ ଭଳି ଅଳ୍ପକେ ସନ୍ତୁଷ୍ଟ ରହି ରହି ସର୍ବଦା ସତର୍କ ରହିଲେ, ଅବକ୍ଷୟ ଆକ୍ରାନ୍ତ ଗଣତନ୍ତ୍ରକୁ ସୁଦୃଢ଼ କରିବାରେ ସହାୟକ ହୋଇପାରିବ ବୋଲି ତାଙ୍କର ମତ ।

ସୌମ୍ୟ ବାବୁ ଜଣେ ଜ୍ଞାନୀ, ବିଦ୍ୱାନ ମଣିଷ । ସାମ୍ବାଦିକତାର ପରିଭାଷା ତାଙ୍କଠାରୁ ଅଧିକ କାହାରିକୁ ଜଣା ନ ଥିବ । ଆଧୁନିକ ଓଡ଼ିଶାରେ ସାମ୍ବାଦିକତା ଗୁରୁ ଭାବେ ତାଙ୍କର ଯଥେଷ୍ଟ ସମ୍ମାନ ଅଛି । ସାମ୍ବାଦିକମାନଙ୍କୁ ତାଙ୍କର ପରାମର୍ଶ ଅତ୍ୟନ୍ତ ସ୍ୱାଗତଯୋଗ୍ୟ । ତେବେ ସେ ଯାହା ପରାମର୍ଶ ଦେଉଛନ୍ତି ନିଜେ ପାଳନ କରୁଛନ୍ତି ତ? ଗଣମାଧ୍ୟମକୁ ଆୟୁଧ କରି ଅର୍ଥ ଓ କ୍ଷମତାର ପ୍ରାଚୁର୍ଯ୍ୟ ଭୋଗ କରୁଥିବା ସୌମ୍ୟ ବାବୁ ପେଟପାଇଁ ସଂଘର୍ଷରତ ସାମ୍ବାଦିକକୁ ଏହି ନୀତିବାଣୀ ଶୁଣାଇବା ହାସ୍ୟାସ୍ପଦ ନୁହେଁ କି?

ଶେଷରେ, ପ୍ରଜାତନ୍ତ୍ର ପ୍ରତିଷ୍ଠା ଦିବସରେ ସମ୍ମାନିତ ଅତିଥି ଭାବେ ସୌମ୍ୟ ବାବୁଙ୍କ ଯୋଗଦାନକୁ ରାଜନୈତିକ ମହଲ ଭିନ୍ନ ଦୃଷ୍ଟିରେ ଦେଖିଛନ୍ତି । ପ୍ରଜାତନ୍ତ୍ର ସମ୍ପାଦକ ଭର୍ତ୍ତୃହରି ମହତାବ ହେଉଛନ୍ତି ବିଜେଡ଼ିର ଅସନ୍ତୁଷ୍ଟ ସାଂସଦ । ଲୋକସଭାରେ ବିଜେଡ଼ି ସଂସଦୀୟ ଦଳ ନେତା ପଦରୁ ତଡ଼ା ଖାଇଲା ପରେ ନବୀନ ପଟ୍ଟନାୟକ ତାଙ୍କୁ ଭଲ ଲାଗୁନାହାନ୍ତି । ନବୀନଙ୍କ ବିରୋଧରେ ଛାୟା ଯୁଦ୍ଧ କରି ବିଜେପି ଆଶ୍ରା ଲୋଡୁଥିବା କୁହାଯାଉଛି । କଟକ ଆସନରୁ ୬ ଥର ଲୋକସଭାକୁ ନିର୍ବାଚିତ ହୋଇଥିବା ଭର୍ତ୍ତୃହରି ନିର୍ବାଚନ ସମୟ ଛଡ଼ା ତାଙ୍କ ନିର୍ବାଚନମଣ୍ଡଳୀକୁ ଯାଆନ୍ତି ନାହିଁ । ନବୀନ ଓ ଶଙ୍ଖ ହେଉଛି ତାଙ୍କ ସମ୍ବଳ । ଗତଥର ତାଙ୍କ ଟିକେଟ କଟିବାକୁ ବସିଥିଲା । ମାତ୍ର ମୁଖ୍ୟମନ୍ତ୍ରୀଙ୍କୁ ନେହୁରା ହୋଇ ପୁଣି ଟିକେଟ ନେଇଥିଲେ ।

ମନ୍ତ୍ରୀ ପଦ ନ ପାଇ ହତାଶାରେ ଥିବା ସୌମ୍ୟଙ୍କୁ ନିଜ ଖବରକାଗଜ ଉତ୍ସବକୁ ଡକାଇ ତାଙ୍କ ମୁହଁରେ ମୁଖ୍ୟମନ୍ତ୍ରୀଙ୍କ କୁତ୍ସାରଟନା କରିବାର ଯୋଜନା ଭର୍ତ୍ତୃହରି ରଚିଥିଲେ ବୋଲି କୁହାଯାଉଛି । ସୌମ୍ୟ ବି ଏଭଳି ସୁଯୋଗ ହାତଛଡ଼ା କରିବାକୁ ଚାହିଁ ନ ଥିଲେ ।

ତେବେ ପୂର୍ବରୁ ସମାନ ଘଟଣାରେ ପ୍ରଫୁଲ୍ଲ ଘଡ଼ାଇଙ୍କୁ ଦଳରୁ ବହିଷ୍କାର କରାଯାଇଥିଲା ବେଳେ ସୌମ୍ୟ କିମ୍ବା ଭର୍ତ୍ତୃହରିଙ୍କ କ୍ଷେତ୍ରରେ କାର୍ଯ୍ୟାନୁଷ୍ଠାନ ହେଉ ନ ଥିବାରୁ ଦଳୀୟ ମହଲରେ କ୍ଷୋଭ ପ୍ରକାଶ ପାଇଛି । ଏହାଦ୍ୱାରା ଦଳ ଭିତରେ ବିଶୃଙ୍ଖଳତାକୁ ପ୍ରଶୟ ଦିଆଯାଉଥିବା କର୍ମୀଙ୍କ ମଧ୍ୟରେ ଧାରଣା ତିଆରି ହେଲାଣି । ବିଜେଡ଼ିରେ ସୁବିଧାବାଦୀ ରାଜନୀତିର କାୟା ବଢ଼ୁଥିବା ବେଳେ ବ୍ଲାକ୍ ମେଲର୍ ଙ୍କ ଆଦର ବଢ଼ିଗଲାଣି ବୋଲି ଅନେକ ବରିଷ୍ଠ ନେତା କହିଛନ୍ତି ।