ଭୁବନେଶ୍ୱର: ନବୀନ ପଟ୍ଟନାୟକଙ୍କ ନେତୃତ୍ୱାଧୀନ ବିଜେଡି ଶାସନ ଏବଂ ମୁଖ୍ୟମନ୍ତ୍ରୀଙ୍କ ସହଯୋଗୀ କାର୍ତ୍ତିକ ପାଣ୍ଡିଆନଙ୍କ ଉପରେ ଆଜି ଧୂମ୍ ବର୍ଷିଛନ୍ତି ଓଡ଼ିଶା ବିଜେପିର ୫ ମଙ୍ଗୁଆଳ । ଗୋଟିଏ ମଞ୍ଚରୁ ଜଣଙ୍କ ପରେ ଜଣେ ଭିନ୍ନ ଭିନ୍ନ ପ୍ରସଙ୍ଗରେ ଟାର୍ଗେଟ୍ କରିଛନ୍ତି । ଏହି ୫ ମଙ୍ଗୁଆଳ ହେଲେ ପ୍ରତାପ ଷଡ଼ଙ୍ଗୀ, ଅପରାଜିତା ଷଡ଼ଙ୍ଗୀ, ବୈଜୟନ୍ତ ପଣ୍ଡା, ଧର୍ମେନ୍ଦ୍ର ପ୍ରଧାନ ଏବଂ ମନମୋହନ ସାମଲ । ପ୍ରଥମ ପର୍ଯ୍ୟାୟ ନିର୍ବାଚନ ଚାଲିଥିବା ବେଳେ ଗୋଷ୍ଠୀଭୁକ୍ତ ବିଜେପିର ଏହି ମଙ୍ଗୁଆଳମାନେ ନ୍ୟୁ ମାରିଅନ୍ ରେ ମିଳିତ ସାମ୍ବାଦିକ ସମ୍ମିଳନୀ କରିଥିଲେ । ସ୍ୱାମୀ ଲକ୍ଷ୍ମଣାନନ୍ଦ ସରସ୍ୱତୀ ହତ୍ୟାଠାରୁ ଆରମ୍ଭ କରି ସରକାରରେ ପାଣ୍ଡିଆନଙ୍କ ଭୂମିକା ପର୍ଯ୍ୟନ୍ତ ବିଭିନ୍ନ ପ୍ରସଙ୍ଗରେ ବିଜେଡି ଉପରେ ମନଭରି ବର୍ଷିଥିଲେ ।
୧୬ ବର୍ଷ ତଳର ସ୍ୱାମୀ ଲକ୍ଷ୍ମଣାନନ୍ଦ ସରସ୍ୱତୀ ହତ୍ୟା ପ୍ରସଙ୍ଗ ଉଠାଇ ଆରମ୍ଭରୁ ବିଜେଡି ସରକାରଙ୍କୁ ଟାର୍ଗେଟ୍ କରିଥିଲେ ପ୍ରତାପ ଷଡ଼ଙ୍ଗୀ । କହିଥିଲେ, ଜାଣିଶୁଣି ସ୍ୱାମୀଜୀଙ୍କର ସୁରକ୍ଷା ବ୍ୟବସ୍ଥାକୁ ଢ଼ିଲା କରାଯାଇଥିଲା । ଏହି ହତ୍ୟାକାଣ୍ଡ ପଛରେ ଷଡ଼ଯନ୍ତ୍ର ଥିଲା । ସାଂସଦ ସସ୍ମିତ୍ ପାତ୍ରଙ୍କ ବାପାଙ୍କ ଭୂମିକା ସନେ୍ଦହଘେରରେ ଥିଲା । ସ୍ୱାମୀଜୀଙ୍କ ସୁରକ୍ଷାକର୍ମୀଙ୍କୁ କାହିଁକି ଅପସାରଣ କରାଯାଇଥିଲା ମୁଖ୍ୟମନ୍ତ୍ରୀ ତାହାର ଜବାବ ଦିଅନ୍ତୁ । ତଦନ୍ତ ପାଇଁ ୩ଟି କମିସନ ବସିଲା, ମାତ୍ର କାହାର ରିପୋର୍ଟ ସାର୍ବଜନୀନ କରାଗଲା ନାହିଁ । କାହିଁକି? ଏପରି ସରକାରକୁ ଫୋପାଡ଼ି ଦେବା ଦରକାର ବୋଲି ଶ୍ରୀ ଷଡ଼ଙ୍ଗୀ କହିଥିଲେ ।
ତାଙ୍କ ପରେ ଅପରାଜିତା ଷଡ଼ଙ୍ଗୀଙ୍କ ପାଳି ପଡ଼ିଥିଲା । ସେ ଶ୍ରୀମନ୍ଦିର ପରିକ୍ରମା ପ୍ରସଙ୍ଗ ଉଠାଇ ବର୍ଷିଥିଲେ । ରାଜ୍ୟ ସରକାରଙ୍କ ୪,୨୦୦ କୋଟି ଟଙ୍କାର ପ୍ରକଳ୍ପ କାର୍ଯ୍ୟ ଭକ୍ଷିଣ ଭାରତୀୟ ଅନଭିଜ୍ଞ ଆର୍କିଟେକଚରାଲ୍ ଫାର୍ମ ‘ଭୂମିପୁତ୍ର’ କୁ ଦେବାରେ କାହାର ସ୍ୱାର୍ଥ ଥିଲା ବୋଲି ପଚାରିଥିଲେ । ପ୍ରକଳ୍ପର ଡିପିଆର କାହିଁକି ଭୁଲ୍ ହେଲା ଓ ପରେ ବଦଳାଗଲା? ଯେଉଁ ପ୍ରାଚୀନ ମଠ ସବୁ ଭଙ୍ଗାଗଲା କେବେ ତିଆରି ହେବ ବୋଲି ପ୍ରଶ୍ନ କରିଥିଲେ ଅପରାଜିତା ।
ବୈଜୟନ୍ତ ପଣ୍ଡା କହିଥିଲେ, ରାଜ୍ୟରେ ସରକାର ଆଉଟ୍ ସୋର୍ସ ହୋଇଛି । ଆଜି ମୁଖ୍ୟମନ୍ତ୍ରୀ ଆଉ କାହା ସହ ଦେଖାଯାଉନାହାନ୍ତି । କେବଳ ଜଣଙ୍କୁ ତାଙ୍କ ସହ ଦେଖିବାକୁ ମିଳୁଛି । ତାଙ୍କୁ ଏକ ପ୍ରକାର ବନ୍ଦୀ କରାଯାଇଛି । ତାଙ୍କ ମୁହଁରେ ମାଇକ୍ରୋଫୋନ୍ ଲଗେଇ କୁହାଯାଉଛି । ଜଣେ ୨୦୧୮ ମସିହା ପର୍ଯ୍ୟନ୍ତ ନବୀନ ବାବୁ ଏପରି ନ ଥିଲେ । ସେ କ୍ୟାପଚର୍ ହେବା ଯୋଗୁଁ ଓଡ଼ିଆ ଅସ୍ମିତା ବିପଦରେ । ନବୀନ ବାବୁଙ୍କ ଯେଉଁ ଭିଡିଓ ଆସୁଛି ତାହା ତାଙ୍କର ନୁହେଁ । ତାହା ତାଙ୍କର ଡିପ୍ ଫେକ୍ ବୋଲି ବୈଜୟନ୍ତ ଅଭିଯୋଗ କରିଥିଲେ ।
ଧର୍ମେନ୍ଦ୍ର ପ୍ରଧାନ କହିଥିଲେ, ରାଜ୍ୟରେ ଅଦ୍ଭୂତପୂର୍ବ ପରିବର୍ତ୍ତନ ହେବାକୁ ଯାଉଛି । ଓଡ଼ିଶାକୁ ଏକ ନମ୍ବର ରାଜ୍ୟ କରିବା ପ୍ରଧାନମନ୍ତ୍ରୀ ଲକ୍ଷ୍ୟ । ୨୫ ବର୍ଷ ଶାସନ କାଳରେ ଓଡ଼ିଶା ଆଜି ପଛରେ ପଡ଼ିଛି । ଏଠାରେ ପାଣି, ଶିକ୍ଷା ଓ ସ୍ୱାସ୍ଥ୍ୟ ଅବସ୍ଥା ବିପର୍ଯ୍ୟସ୍ତ । ନାରୀ ସୁରକ୍ଷା ଚିନ୍ତାଜନକ । ଓଡ଼ିଶା ଶିଶୁ ମୃତୁ୍ୟହାରରେ ଦେଶରେ ତୃତୀୟ ସ୍ଥାନରେ ରହିଛି । ଜାତୀୟସ୍ତରର ମୁଣ୍ଡ ପିଛା ଆୟରେ ବି ପଛରେ ପଡ଼ିଛି । ରାଜ୍ୟରେ ୫୦% ପିଲା ମାଟ୍ରିକ ପରୀକ୍ଷା ଦେବାକୁ ଯାଉନାହାନ୍ତି । ଓଡ଼ିଶାରେ ବିଜେଡି ଶାସନକୁ ମାଙ୍କଡ଼ ହାତରେ ଶାଳଗ୍ରାମ ବୋଲି ଧର୍ମେନ୍ଦ୍ର କଟାକ୍ଷ କରିଥିଲେ ।
ଶେଷରେ, ମନମୋହନ ସାମଲ ରାଜ୍ୟ ସରକାରଙ୍କୁ କଠୋର ସମାଲୋଚନା କରିଥିଲେ । ଦେଶରେ ତୃତୀୟ ଥର ପାଇଁ ମୋଦୀ ସରକାର ଏବଂ ଓଡ଼ିଶାରେ ପ୍ରଥମ ଥର ପାଇଁ ବିଜେପି ସରକାର ପାଇଁ ଲୋକେ ମନସ୍ଥ କରିସାରିଲେଣି ବୋଲି ସେ କହିଥିଲେ ।
