ଭୁୁବନେଶ୍ୱର: ଶେଷରେ ଗିରଫ ହେଲେ ବିଜେପି ନେତା ଜଗା ଓରଫ୍ ଜଗନ୍ନାଥ ପ୍ରଧାନ । ଅତି ନାଟକୀୟ ଢ଼ଙ୍ଗରେ ଆଜି ରାତିରେ ସେ ନିଜର ସମର୍ଥକଙ୍କ ଗହଣରେ ଡିସିପି ଅଫିସ୍ ଆସି ଆତ୍ମସମର୍ପଣ କରିଥିଲେ । ଏହାପରେ ତାଙ୍କୁ ଗିରଫ ଦର୍ଶାଯାଇଥିଲା । କ୍ୟାପିଟାଲ୍ ହସ୍ପିଟାଲରେ ସ୍ୱାସ୍ଥ୍ୟ ପରୀକ୍ଷା ପରେ ତାଙ୍କୁ କୋର୍ଟ ଚାଲାଣ କରାଯାଇଥିଲା । କୋର୍ଟ ତାଙ୍କ ଜାମିନ୍ ଆବେଦନକୁ ନାମଂଜୁର କରିବା ପରେ ୧୪ ଦିନ ପାଇଁ ଝାରପଡ଼ା ଜେଲ୍ ହାଜତକୁ ଯାଇଛନ୍ତି ।
ପ୍ରାଥମିକ ପ୍ରମାଣ ଆଧାରରେ ତାଙ୍କୁ ଗିରଫ କରାଯାଇଛି ବୋଲି ଡିସିପି ଜଗମୋହନ ମୀନା ସୂଚନା ଦେଇଛନ୍ତି । ବିଏମସି ଅତିରିକ୍ତ କମିସନର ରତ୍ନାକର ସାହୁଙ୍କୁ ଅମାନୁଷିକ ଆକ୍ରମଣ ଘଟଣାରେ ତାଙ୍କୁ ମୁଖ୍ୟ ଅଭିଯୁକ୍ତ ବା ମାଷ୍ଟର ମାଇଣ୍ଡ କୁହାଯାଉଥିଲା । ଏହି ମାମଲାରେ ପୂର୍ବରୁ ୫ ଜଣଙ୍କୁ ପୁଲିସ ଗିରଫ କରିଥିଲା । ସେହି ସମାନ ଦଫାରେ ଜଗାଙ୍କୁ ଗିରଫ କରାଯାଇଛି ।
ଏଥିସହ ଜଗା ପ୍ରଧାନଙ୍କ ଗିରଫ ଦାବିରେ ସମୂହ ଛୁଟିରେ ରହିଥିବା ଓଏଏସ୍ ସଂଘ ଆନ୍ଦୋଳନ ପ୍ରତ୍ୟାହୃତ କରିଛନ୍ତି । ସଂଘର ସଭାପତି ଜ୍ୟୋତିରଞ୍ଜନ ମିଶ୍ର ଗଣମାଧ୍ୟମକୁ ଏହି ସୂଚନା ଦେଇଛନ୍ତି ।
ଆଜି ରାତି ପ୍ରାୟ ସାଢ଼େ ୯ଟାରେ ଜଗା ପ୍ରଧାନ ତାଙ୍କ ସମର୍ଥକମାନଙ୍କ ଗହଣରେ ଡିସିପି ଅଫିସରେ ପହଞ୍ଚିଥିଲେ । ଭିତରକୁ ଯିବା ପୂର୍ବରୁ ଗଣମାଧ୍ୟମକୁ ଏକ ଚିଠା ପଢ଼ି କହିଥିଲେ ଯେ ବିଏମସି ଅଧିକାରୀଙ୍କୁ ମାଡ଼ ଘଟଣାରେ ତାଙ୍କର ଗିରଫ ଦାବିରେ ଓଏଏସ୍ ସଂଘ ଆନ୍ଦୋଳନ କରିଛନ୍ତି । ଏହି ମାମଲାରେ ତାଙ୍କର କିନ୍ତୁ କୌଣସି ସଂପୃକ୍ତି ନାହିଁ । ସରକାରଙ୍କ ସମ୍ମାନ ଓ ଜନତାଙ୍କ ବୃହତ୍ତର ସ୍ୱାର୍ଥ ଦୃଷ୍ଟିରୁ ଆଇନକୁ ସହଯୋଗ କରିବାକୁ ଆସିଛି ବୋଲି କହିଥିଲେ ।
ଜଗନ୍ନାଥ ଡିସିପିଙ୍କ ପାଖକୁ ଯାଇଥିବା ବେଳେ ବାହାରେ ତାଙ୍କର ସମର୍ଥକମାନେ ବାଣୀବିହାର ଛକରେ ରାସ୍ତା ଅବରୋଧ କରିଥିଲେ । ଜଗା ପ୍ରଧାନଙ୍କ ଗିରଫକୁ ସେମାନେ ବିରୋଧ କରି ନାରାବାଜି କରିଥିଲେ । ତେବେ ରାସ୍ତା ଅବରୋଧରୁ ହଟିଯିବା ପାଇଁ କିଛି ଦଳୀୟ ନେତା ସେମାନଙ୍କୁ ବୁଝାସୁଝା କରୁଥିବା ଦେଖାଯାଇଥିଲା । ପରେ ପୁଲିସର ହସ୍ତକ୍ଷେପ ପରେ ରାସ୍ତା ଅବରୋଧ ହଟିଥିଲା ।
ସୂଚନାଥାଉକି, ଗତକାଲି ସଂଧ୍ୟାରେ ବିଜେପି ଅଫିସରେ ହାଇଡ୍ରାମା ହୋଇଥିଲା । ରାଜ୍ୟ ସଭାପତି ମନମୋହନ ସାମଲଙ୍କ ଡାକରାରେ ସେଠାରେ ପହଞ୍ଚିଥିଲେ ଜଗା ପ୍ରଧାନ । ସେଠାରୁ ସେ ଖାରବେଳନଗର ଥାନା ଯାଇ ଆତ୍ମସମର୍ପଣ କରିବେ ବୋଲି ସୂଚନା ଥିଲା । ମାତ୍ର ସେଭଳି କିିଛି ହେଲା ନାହିଁ । ଉଭୟଙ୍କ ମଧ୍ୟରେ ପ୍ରାୟ ଦୁଇ ଘଣ୍ଟା ଆଲୋଚନା ପରେ ଘରକୁ ଫେରି ଯାଇଥିଲେ ଜଗା ।
ଚର୍ଚ୍ଚା ହେଉଛି, ଜଗା ପ୍ରଧାନ ବିଜେପିରୁ ଇସ୍ତଫା ଦେବାକୁ ମନମୋହନ ସାମଲ ପ୍ରବର୍ତ୍ତାଇଥିଲେ । ମାତ୍ର ଜଗା ଏଥିରେ ରାଜି ହୋଇ ନ ଥିଲେ । ଯଦି କାର୍ଯ୍ୟାନୁଷ୍ଠାନ ନେବା କଥା ଆପଣ ନିଅନ୍ତୁ ବୋଲି କୁଆଡ଼େ କହିଥିଲେ । ସୁତରାଂ ଏହି ମାମଲାରେ ଦଳୀୟ କାର୍ଯ୍ୟାନୁଷ୍ଠାନ ପାଇଁ ମନମୋହନଙ୍କ ଅସହାୟତା ଥିଲା ।
ଅନ୍ୟପକ୍ଷରେ ମୁଖ୍ୟମନ୍ତ୍ରୀ ମୋହନ ମାଝୀ ମଧ୍ୟ ଏହି ମାମଲାକୁ ନେଇ ଚିନ୍ତାରେ ପଡ଼ିଥିଲେ । କୌଣସି କାରଣରୁ ସେ କାର୍ଯ୍ୟାନୁଷ୍ଠାନ ନେବାରେ ବିଳମ୍ବ କରିଥିଲେ । ତେବେ ଓଏଏସ୍ ସଂଘର ଆନ୍ଦୋଳନ ଯୋଗୁଁ ସରକାରୀ କାର୍ଯ୍ୟ ଠପ୍ ହୋଇଯିବା ପରେ ମୁଖ୍ୟମନ୍ତ୍ରୀଙ୍କ ଉପରେ ଚାପ ବଢ଼ିଥିଲା । ବିଜେପିର କେନ୍ଦ୍ରୀୟ ନେତୃତ୍ୱ ମଧ୍ୟ ଏହି ମାମଲାକୁ ଅତି ଗୁରୁତ୍ୱର ସହ ବିଚାର କରିଥିଲେ ।
ସୁତରାଂ ଆଉ ବିଳମ୍ବ ନ କରି ଜଗା ପ୍ରଧାନଙ୍କୁ ଆଜି ଡିସିପି ଅଫିସ୍ ଯାଇ ଆତ୍ମସମର୍ପଣ କରିବାକୁ ନିର୍ଦ୍ଦେଶ ଦିଆଯାଇଥିବା ଜଣାପଡ଼ିଛି ।
