‘ଯଦି ପାରୁନ ଛାଡ଼ିଦିଅ’

ଭୁବନେଶ୍ୱର: ବିଏମସି ଅତିରିକ୍ତ କମିସନର ରତ୍ନାକର ସାହୁଙ୍କୁ ତାଙ୍କ ଚାମ୍ବରରୁ ଘୋଷାରି ଆଣି ତଳେ ପକାଇ ବିଧା ଗୋଇଠା ମାରିବାର ଭିଜୁଆଲ୍ ଖାଲି ଓଡ଼ିଶା ନୁହେଁ, ଦେଶ ଓ ବିଦେଶରେ ଯିଏ ଦେଖୁଛନ୍ତି ବିବ୍ରତ ହେଉଛନ୍ତି । ଜଣେ କାର୍ଯ୍ୟରତ ଅଫିସରଙ୍କୁ ଏଭଳି ଅମାନୁଷିକ ଭାବେ ମାଡ଼ ମରାଯାଉଥିବାର ଦୃଶ୍ୟ ଫିଲ୍ମ କାହାଣୀ ଭଳି ହୋଇଛି । ଆଉ ଏହି ଘଟଣାର ଯାହାଙ୍କୁ ଅଭିଯୁକ୍ତ ବୋଲି କୁହାଯାଉଛି, ତାଙ୍କ ବିରୋଧରେ ସରକାର ଏବଂ ଦଳ କାର୍ଯ୍ୟାନୁଷ୍ଠାନ ନ ନେବା ସମସ୍ତଙ୍କୁ ଅଧିକ ବିଚଳିତ କରୁଛି । ମାଡ଼ ଘଟଣାର ପ୍ରତିବାଦରେ ଓଏଏସ୍ ଅଫିସରଙ୍କ କାର୍ଯ୍ୟବନ୍ଦ ଆନ୍ଦୋଳନ ଯୋଗୁଁ ସରକାରୀ କାର୍ଯ୍ୟ ଠପ୍ ହୋଇଥିବା ବେଳେ ମୁଖ୍ୟମନ୍ତ୍ରୀ ମୋହନ ମାଝୀ ହାତ ବାନ୍ଧି ବସିଛନ୍ତି । ସେପଟେ ଦଳର ସଭାପତି ଏହି ମୁଖ୍ୟ ଅଭିଯୁକ୍ତ ମାର୍କା ନେତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ବଦଳରେ ତାଙ୍କୁ ପାର୍ଟି ଅଫିସ ଡାକି ଦରଦ ଢ଼ାଳିଛନ୍ତି । ସେହିଭଳି ବିଜେପି ଟ୍ରୋଲ୍ ବାହିନୀ, ଏହି ଘଟଣାରେ ଷଡ଼ଯନ୍ତ୍ର ଥିଓରି ପୂରାଇ ଓଏଏସ୍ ଅଫିସର ଏବଂ କେନ୍ଦ୍ରମନ୍ତ୍ରୀଙ୍କୁ ବଦନାମ କରିବାକୁ ଉଦ୍ୟମ ଚଳେଇଛନ୍ତି ।

ଗତକାଲି ସଂଧ୍ୟାରେ ରାଜ୍ୟ ବିଜେପି ଅଫିସରେ ଦେଖିବାକୁ ମିଳିଲା ଜଗା-ମନମୋହନ ଆଲୋଚନା ସୁଆଙ୍ଗ । ମୁଖ୍ୟ ଅଭିଯୁକ୍ତ କୁହାଯାଉଥିବା ଜଗା ଓରଫ୍ ଜଗନ୍ନାଥ ପ୍ରଧାନଙ୍କ ସହ ରୁଦ୍ଧଦ୍ୱାର ବୈଠକରେ ମିଳିତ ହେଲେ ରାଜ୍ୟ ସଭାପତି ମନମୋହନ ସାମଲ । ପ୍ରାୟ ଦୁଇଘଣ୍ଟା ଧରି ଉଭୟଙ୍କ ମଧ୍ୟରେ ନିବୃତ୍ତ ଆଲୋଚନା ଚାଲିଲା । ତା’ ପରେ ପାର୍ଟି ଅଫିସରୁ ବୀର ଦର୍ପରେ ବାହାରି ମିଡିଆକୁ ନାୟକ ଷ୍ଟାଇଲ୍ ରେ ବାଇଟ୍ ଦେଇ ସମର୍ଥକଙ୍କ ମେଳିରେ ନିଜ ଘରକୁ ଗଲେ ଜଗା ପ୍ରଧାନ । ପାର୍ଟି ଅଫିସକୁ ଆସିବା ପୂର୍ବରୁ ଜଗାଙ୍କ ସୋସିଆଲ ମିଡିଆ ପୋଷ୍ଟ ଏବଂ ଖାରବେଳନଗର ଥାନାରେ ପୁଲିସ ଛାଉଣୀ ଦେଖି ସମସ୍ତେ ଭାବିନେଲେ ସେ ଦଳରୁ ଇସ୍ତଫା ଦେଇ ଥାନାରେ ଆତ୍ମସମର୍ପଣ କରିବେ । ମାତ୍ର ପାର୍ଟି ଅଫିସରୁ ଘରକୁ ଫେରିଲା ବେଳେ ତାଙ୍କର ଠାଣି ସମସ୍ତଙ୍କ ଅନୁମାନକୁ ଭୁଲ୍ ପ୍ରମାଣିତ କଲା ।

ଜଗା ପ୍ରଧାନ ବିଜେପିର ଜଣେ ଅସାଧାରଣ, ଯଶସ୍ୱୀ ନେତା ନୁହଁନ୍ତି । ଭୁବନେଶ୍ୱର ମଧ୍ୟ ନିର୍ବାଚନମଣ୍ଡଳୀର ସେ ଜଣେ ପରାଜିତ ପ୍ରାର୍ଥୀ । ସରକାର ଏବଂ ଦଳ ପାଇଁ ଅପରିହାର୍ଯ୍ୟ ହେବା ଭଳି ନେତା ନୁହଁନ୍ତି । ମାତ୍ର ଅପଯଶ ପାଇଁ ତାଙ୍କ ନାଁ ଏବେ ସବୁଆଡ଼େ ଚର୍ଚ୍ଚା । ସେଇ ଗୋଟିଏ ଲୋକ ପାଇଁ ସାଢ଼େ ଚାରି କୋଟି ଲୋକଙ୍କ ରାଜ୍ୟରେ ସରକାରୀ କାର୍ଯ୍ୟ ଅଚଳ ହୋଇଯାଇଛି । ଲୋକଙ୍କର ଦୈନନ୍ଦିନ ଜୀବନ ବିପର୍ଯ୍ୟସ୍ତ ହୋଇପଡ଼ିଛି ।

ଜନମାନସକୁ ପ୍ରଭାବିତ କରୁଥିବା ଏକ ଲୋମଟାଙ୍କୁରା ଅପରାଧର ମୁଖ୍ୟ ଅଭିଯୁକ୍ତ ଭାବେ ସେ ସରକାର ଓ ପୁଲିସ ପାଇଁ ମୋଷ୍ଟ ୱାଣ୍ଟେଡ୍ ରହିବା କଥା । ମାତ୍ର ସରକାରୀ ଦଳର ରାଜ୍ୟ ସଭାପତି ତାଙ୍କ ବିରୋଧରେ ଦଳୀୟ କାର୍ଯ୍ୟାନୁଷ୍ଠାନ ନେବାକୁ ସାହାସ କରିପାରିନାହାନ୍ତି । ଏହା ପରିବର୍ତ୍ତେ ଜଗା ତାଙ୍କ ଆଡୁ ଦଳରୁ ଇସ୍ତଫା ଦେବା ପାଇଁ ମନମୋହନ ସାମଲ ତାଙ୍କୁ ପ୍ରବର୍ତ୍ତାଇ ଥିବା ଜଣାପଡ଼ିଛି ।

ବିଜେପିର କିଛି ବରିଷ୍ଠ ନେତା ଏହାକୁ ନେଇ ପ୍ରବଳ ଅସନ୍ତୋଷ ଜାହିର କରିଛନ୍ତି । ଜଣେ ଅପରାଧୀକୁ ପୁଲିସ ଖୋଜି ଖୋଜି ବାନ୍ଧିବ ନା ଅପରାଧୀ ଯାଇ ପୁଲିସକୁ ବାନ୍ଧିବାକୁ କହିବ ବୋଲି ସେମାନେ ପ୍ରଶ୍ନ ପଚାରିଛନ୍ତି । ବିଏମସି ଘଟଣାରେ ଦଳ ଭୀଷଣ ବଦନାମ ହୋଇଛି । ଗିରଫ ଅନ୍ୟ ୫ ଜଣ ଅଭିଯୁକ୍ତଙ୍କ ଭଳି ତାଙ୍କ ବିରୋଧରେ ଦଳୀୟ କାର୍ଯ୍ୟାନୁଷ୍ଠାନ ଗ୍ରହଣ କରିବାରେ କି ଅସୁବିଧା ରହିଛି ବୋଲି ସେମାନେ ନିଜର ନାଁ ଗୋପନ ରଖିବା ସର୍ତ୍ତରେ ଆମକୁ କହିଛନ୍ତି । ଜଗାଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବା ପାଇଁ କିଏ ଅଟକାଇଛି ବୋଲି ସେମାନଙ୍କର ପ୍ରଶ୍ନ ।

ସେହିଭଳି ମୁଖ୍ୟମନ୍ତ୍ରୀ ମୋହନ ମାଝୀଙ୍କ ଅସହାୟତାକୁ ନେଇ ଦଳୀୟ ନେତାଙ୍କ ମଧ୍ୟରେ ଗୁଞ୍ଜରଣ ଓ ହତାଶ ଭାବ ସୃଷ୍ଟି ହୋଇଛି । ରାଜ୍ୟରେ ପ୍ରଶାସନ ଠପ୍ ହୋଇଯାଇଥିବା ବେଳେ ଏହାର ସମାଧାନର ବାଟ ବାହାର କରିବାରେ ତାଙ୍କର ବିଫଳତାକୁ ଅନେକ ସମାଲୋଚନା କରିଛନ୍ତି । ଜଗା ପ୍ରଧାନଙ୍କ ବିରୋଧରେ ପୁଲିସ କାର୍ଯ୍ୟାନୁଷ୍ଠାନ କାହିଁକି ଅଟକାଯାଇଛି ବୋଲି ସେମାନେ ପ୍ରଶ୍ନ କରିଛନ୍ତି ।

ଦୁର୍ଭାଗ୍ୟ ଯେ ବିଜେପିର ସୋସିଆଲ୍ ମିଡିଆ ଟ୍ରଲ୍ ବାହିନୀ ଜଗାଙ୍କ ସୁରକ୍ଷାରେ ଲାଗିପଡ଼ିଛନ୍ତି । ଏବେ ଅଫିସରମାନଙ୍କ ବିରୋଧରେ ନ୍ୟାରେଟିଭ୍ ତିଆରି କରାଯାଉଛି । ଅଫିସରଙ୍କୁ ଖରାପ ଆଖ୍ୟା ଦେଇ ରତ୍ନାକର ସାହୁଙ୍କ ଉପରେ ଯାହା ହୋଇଛି ତାହାକୁ ଠିକ୍ ବୋଲି ଦର୍ଶାଇବାକୁ ଚେଷ୍ଟା ହେଉଛି । ସେହିଭଳି ରତ୍ନାକରଙ୍କୁ ମାଡ଼ମରା ଘଟଣାରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ଟାଣି ଓଟାରି ପୂରେଇବାକୁ ଉଦ୍ୟମ କରାଯାଇଛି । ଜଗାଙ୍କୁ ସୁରକ୍ଷା ଦେବାକୁ ଧର୍ମେନ୍ଦ୍ର ଚାପ ପକାଉଥିବା ପ୍ରଚାର ହେଉଛି ।

ଏହି ପ୍ରଚାର ଦ୍ୱାରା ମୋହନ ମାଝୀଙ୍କୁ ଜଣେ ଦୁର୍ବଳ, ଅସହାୟ ମୁଖ୍ୟମନ୍ତ୍ରୀ ବୋଲି ପ୍ରମାଣ କରାଯାଉଛି ବୋଲି ଦଳର କିଛି ବିଧାୟକ କ୍ଷୋଭୋକ୍ତି ପ୍ରକାଶ କରିଛନ୍ତି । ସେହିଭଳି, ଧର୍ମେନ୍ଦ୍ରଙ୍କ ଭଳି ଜଣେ ବିଚକ୍ଷଣ ରାଜନେତା ଏତେ ବଡ଼ ଘଟଣାର ତଥାକଥିତ ମୁଖ୍ୟ ଅଭିଯୁକ୍ତଙ୍କୁ ସୁରକ୍ଷା ଦେବାକୁ ଯେ ଚାହିଁବେ, ତାହା ସେମାନେ ବିଶ୍ୱାସ କରୁନାହାନ୍ତି । ତାଙ୍କର ଭାବମୂର୍ତ୍ତି କ୍ଷୂର୍ଣ୍ଣ ପାଇଁ ଏକ ନିର୍ଦ୍ଦିଷ୍ଟ ଗୋଷ୍ଠୀର ଏହା କାମ ବୋଲି କୁହାଯାଉଛି ।

ମୋଟାମୋଟି ଭାବେ, ରତ୍ନାକର ସାହୁଙ୍କୁ ଗୋଇଠା ମାଡ଼ ଘଟଣାରେ ରାଜ୍ୟ ସରକାର ଏବଂ ବିଜେପି ଏବେ ବ୍ୟାକଫୁଟ୍ ରେ । ମୁଖ୍ୟ ଅଭିଯୁକ୍ତ ଜଗାଙ୍କ ଗିରଫ ଦାବିରେ ସରକାରୀ କାର୍ଯ୍ୟ ଠପ୍ । ଜଗାଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ପାଇଁ ମୋହନ ମାଝୀଙ୍କ ସରକାର ହାତ ଟେକି ଦେଇଛନ୍ତି । ସେପଟେ ଦଳୀୟ କାର୍ଯ୍ୟାନୁଷ୍ଠାନ ନେଇପାରୁନାହାନ୍ତି ମନମୋହନ ସାମଲ । ଏହା ରାଜ୍ୟ ବିଜେପି ନେତୃତ୍ୱ ଏବଂ ମୋହନ ସରକାରଙ୍କ ଭାବମୂର୍ତ୍ତିକୁ କ୍ଷତାକ୍ତ କରୁଛି ।

ଅପରାଧରେ ସଂଶ୍ଲିଷ୍ଟ ଜଣେ ସାମାନ୍ୟ ନେତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ଉଭୟ ଯଦି ଏତେ ଅସହାୟ, ତେବେ ବରଂ ଗାଦି ଛାଡ଼ିଦେବା ଭଲ ହେବ ବୋଲି ବୁଦ୍ଧିଜୀବୀ ମହଲରେ ଆଲୋଚନା ହେଉଛି । ଘଟଣା ରାଜ୍ୟ ଡେଇଁ ଦେଶ ବିଦେଶରେ ଆଲୋଡ଼ନ ଖେଳାଇଥିବା ବେଳେ କେନ୍ଦ୍ରୀୟ ନେତୃତ୍ୱଙ୍କ ନିରବତା ମଧ୍ୟ ସମସ୍ତଙ୍କୁ ଆନେ୍ଦାଳିତ କରିଛି । ଘଟଣା ବହୁତ ବଡ଼ ହୋଇଥିବାରୁ କେନ୍ଦ୍ରର ହସ୍ତକ୍ଷେପ ନିହାତି ଜରୁରୀ ବୋଲି କୁହାଯାଉଛି ।