ତ୍ରିପୁରା ହଟଚମଟ; ବଦଳିଲେ ମୁଖ୍ୟମନ୍ତ୍ରୀ

ନୂଆଦିଲ୍ଲୀ: ତ୍ରିପୁରା ମୁଖ୍ୟମନ୍ତ୍ରୀ ବିପ୍ଲବ ଦେବ ଇସ୍ତଫା ଦେଇଛନ୍ତି । ତାଙ୍କ ଜାଗାରେ ରାଜ୍ୟ ବିଜେପି ସଭାପତି ମାଣିକ ଶାହା ମୁଖ୍ୟମନ୍ତ୍ରୀ ପଦଭାର ସମ୍ଭାଳିଛନ୍ତି । ଆଜି ସଂଧ୍ୟାରେ ନାଟକୀୟ ଢ଼ଙ୍ଗରେ ଏହି ପଟ୍ଟ ପରିବର୍ତ୍ତନ ହୋଇଛି । ବିପ୍ଲବଙ୍କ ବିରୋଧରେ ସୃଷ୍ଟି ହୋଇଥିବା ଅସନ୍ତୋଷଙ୍କୁ ପ୍ରଶମିତ କରିବା ପାଇଁ ବିଧାନସଭା ନିର୍ବାଚନର ବର୍ଷକ ପୂର୍ବରୁ ବିଜେପି ହାଇକମାଣ୍ଡ ଏହି କଠୋର ପଦକ୍ଷେପ ନେଇଛନ୍ତି । ମୁଖ୍ୟମନ୍ତ୍ରୀ ବଦଳେଇ ଦଳର ଭୋଟବ୍ୟାଙ୍କକୁ ସୁରକ୍ଷା ଦେବାକୁ ଯୋଜନା କରିଛନ୍ତି ।

ତ୍ରିପୁରାରେ ଦୀର୍ଘ ଦୁଇ ଦଶନ୍ଧିର ସିପିଆଇ(ଏମ) ସରକାରକୁ ଗାଦିଚ୍ୟୁତ କରି ୨୦୧୮ ରେ କ୍ଷମତା ଦଖଲ କରିଥିଲା ବିଜେପି । ବିପ୍ଲବ ଦେବ ରାଜ୍ୟର ପ୍ରଥମ ବିଜେପି ମୁଖ୍ୟମନ୍ତ୍ରୀ ହୋଇଥିଲେ । ତେବେ ଉଭୟ ଦଳ ଓ ସରକାରରେ ସମନ୍ୱୟ ରଖିବା ଏବଂ ସମସ୍ତଙ୍କୁ ନେଇ ଆଗକୁ ଯିବାରେ ବିପ୍ଲବ ସମର୍ଥ ହୋଇ ନ ଥିଲେ । ତାଙ୍କର କାର୍ଯ୍ୟକୁ ଅଧିକାଂଶ ଦଳୀୟ ବିଧାୟକ ପସନ୍ଦ କରି ନ ଥିଲେ । ଏପରିକି ଦୁଇ ବିଧାୟକ ବିଜେପି ଛାଡ଼ି କଂଗ୍ରେସକୁ ପଳାଇଥିଲେ । ଖାଲି ସେତିକି ନୁହେଁ, ସରକାରରେ ଥିବା ବିଜେପିର ସହଯୋଗୀ ଦଳ ଆଇପିଏଫଟି ମଧ୍ୟ ବିପ୍ଲବଙ୍କ ଉପରୁ ଆସ୍ଥା ହରାଇଥିଲେ ।

ଆଗକୁ ନିର୍ବାଚନ ଥିବା ବେଳେ ଏଭଳି ପରିସ୍ଥିତି ଦଳୀୟ ହାଇକମାଣ୍ଡଙ୍କୁ ଚିନ୍ତାରେ ପକାଇଥିଲା । ଉତ୍ତରାଖଣ୍ଡ, କର୍ଣ୍ଣାଟକ ଏବଂ ଗୁଜୁରାଟ ଭଳି ତ୍ରିପୁରାରେ ମୁଖ୍ୟମନ୍ତ୍ରୀ ବଦଳିବେ ବୋଲି ଚର୍ଚ୍ଚା ହେଉଥିଲା । ଏଭଳି ସମୟରେ ବିପ୍ଲବ ଦିଲ୍ଲୀରୁ ଡକରା ପାଇଥିଲେ । ଗତ ୧୨ ତାରିଖରେ ରାଷ୍ଟ୍ରୀୟ ସଭାପତି ଜେ.ପି.ନଡ୍ଡା ଏବଂ ଗୃହମନ୍ତ୍ରୀ ଅମିତ୍ ଶାହାଙ୍କ ସହ ତାଙ୍କର ପୃଥକ୍ ଆଲୋଚନା ହୋଇଥିଲା । ଆଜି ଅପରାହ୍ନରେ ବିପ୍ଲବ୍ ଦିଲ୍ଲୀରୁ ଫେରି ଅଗରତାଲାରେ ପହଞ୍ଚିଥିଲେ ଏବଂ ସିଧା ରାଜଭବନ ଯାଇ ରାଜ୍ୟପାଳ ସତ୍ୟଦେବ ନାରାୟଣ ଆର୍ଯ୍ୟଙ୍କୁ ନିଜର ଇସ୍ତଫାପତ୍ର ପ୍ରଦାନ କରିଥିଲେ ।

ତତକ୍ଷଣାତ୍ ନୁଆ ନେତା ନିର୍ବାଚନ ପାଇଁ ପ୍ରକ୍ରିୟା ଆରମ୍ଭ ହୋଇଥିଲା । କେନ୍ଦ୍ରୀୟ ପର୍ଯ୍ୟବେକ୍ଷକ ଭାବେ କେନ୍ଦ୍ରମନ୍ତ୍ରୀ ଭୂପେନ୍ଦ୍ର ଯାଦବଙ୍କ ଉପସ୍ଥିତିରେ ବିଧାୟକ ଦଳ ବୈଠକ ବସିଥିଲା । ଔପଚାରିକ ଭାବେ ମାଣିକ ଶାହାଙ୍କୁ ନେତା ନିର୍ବାଚିତ କରାଯାଇଥିଲା ।

ବିଦାୟୀ ମୁଖ୍ୟମନ୍ତ୍ରୀ ବିପ୍ଲବ ଦେବ କହିଛନ୍ତି, ମୁଁ ମୋ ପାରୁପର୍ଯ୍ୟନ୍ତ ଲୋକଙ୍କ ସେବା କରିଛି । ଆଗକୁ ବିଧାନସଭା ନିର୍ବାଚନ ଥିବାରୁ ସଂଗଠନ ମଜବୁତ କରିବାର ଦାୟିତ୍ୱ ମତେ ମିଳିଛି । ସଂଗଠନ ସୁଦୃଢ଼ ରହିଲେ ଯାଇ ସରକାର ହେବ । ୨୦୨୩ ପାଇଁ ଆମକୁ ପ୍ରସ୍ତୁତ ହେବାକୁ ପଡ଼ିବ ବୋଲି ସେ ଟ୍ୱିଟ୍ କରିଛନ୍ତି ।