ଅପରାଜିତାଙ୍କୁ ବ୍ରଜରାଜନଗର ଝଟକା !

ଭୁବନେଶ୍ୱର: ବ୍ରଜରାଜନଗର ଉପନିର୍ବାଚନରେ ବିଜେପି ପ୍ରାର୍ଥୀତ୍ୱକୁ ନେଇ ଦଳ ଭିତରେ ଚାଲିଥିବା ଛକାପଂଝାର ଅବସାନ ଘଟିଛି । ପୂର୍ବତନ ବିଧାୟିକା ରାଧାରାଣୀ ପଣ୍ଡାଙ୍କୁ ପ୍ରାର୍ଥୀ କରିଛି ଦଳ । କେନ୍ଦ୍ରୀୟ ନିର୍ବାଚନ କମିଟିର ଏହି ନିଷ୍ପତ୍ତି ଦଳର ଏକ ଗୋଷ୍ଠୀକୁ ନିରାଶ କରିଥିବା ବେଳେ ସବୁଠାରୁ ବେଶୀ ଝଟକା ପାଇଛନ୍ତି ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀ । ସୁଜିତ ସିଂହଙ୍କ ପାଇଁ ତାଙ୍କର ଗୋଟିଚାଳନା କାମ କରିନାହିଁ ।

ଝାରସୁଗୁଡ଼ା ଜିଲ୍ଲାରେ ଅଖିଳ ଭାରତୀୟ ବିଦ୍ୟାର୍ଥୀ ପରିଷଦର ଜଣେ ଟାଣୁଆ ସଂଗଠକ ହେଉଛନ୍ତି ସୁଜିତ୍ । ବିଜେପି ଯୁବମୋର୍ଚ୍ଚାର ରାଜ୍ୟ ସମ୍ପାଦକ ଏବଂ ରାଜ୍ୟ ସଂଯୋଜକ ଭାବେ ଦାୟିତ୍ୱ ନିର୍ବାହ କରିଛନ୍ତି । ତେବେ ଏବେ ତାଙ୍କର ସବୁ କାର୍ଯ୍ୟକ୍ରମ ଯୋଡି ହୋଇଛି ଅପରାଜିତାଙ୍କର ନିଜସ୍ୱ ଯୁବ ସଂଗଠନ ୟୁଥ୍ ଫର୍ ଆକ୍ସନ୍ ରେ । ସୁଜିତ୍ ହେଉଛନ୍ତି ଏହି ସଂଗଠନର ଜଣେ ପ୍ରମୁଖ କାର୍ଯ୍ୟକର୍ତ୍ତା ।

ତେଣୁ ବ୍ରଜରାଜନଗର ଉପନିର୍ବାଚନରେ ସୁଜିତ ସିଂହଙ୍କୁ ପ୍ରାର୍ଥୀ କରି ନିଜର ପତିଆରା ବଢ଼ାଇବା ପାଇଁ ଅପରାଜିତା ଚାହିଁଥିଲେ । ଏଥିପାଇଁ ନିଜର ପ୍ରଭାବ ଖଟାଇଥିବା ଆଲୋଚନା ହେଉଛି । ରାଧାରାଣୀ ପଣ୍ଡାଙ୍କୁ ଚେକ୍ ଦେବା ପାଇଁ ଅପରାଜିତା-ସୁଜିତ୍ ସମର୍ଥିତ ଗୋଷ୍ଠୀ କୁଆଡ଼େ ବିଭିନ୍ନ କୌଶଳ ଲଗାଇଥିଲେ । ରାଧାରାଣୀଙ୍କ ବିପକ୍ଷରେ ଜନମତ ରହିଥିବା ପ୍ରଚାର କରାଯାଇଥିଲା । ମୋଟାମୋଟି ଭାବେ ତାଙ୍କୁ ଖଳନାୟିକା ଭାବେ ବିପକ୍ଷ ଗୋଷ୍ଠୀ ଉପସ୍ଥାପିତ କରିଥିଲେ ।

ତେବେ ସୂଚନା ଅନୁଯାୟୀ, ବିଜେପି କେନ୍ଦ୍ରୀୟ ନିର୍ବାଚନ କମିଟି ସୁଜିତ୍ ସିଂହଙ୍କ ନାଁ ଆଦୌ ବିଚାରକୁ ନେଇନାହାନ୍ତି । ରାଜ୍ୟ ନେତୃତ୍ୱର ସୁପାରିଶକୁ ଗ୍ରହଣ କରି ଦଳର ବରିଷ୍ଠ ନେତ୍ରୀ ରାଧାରାଣୀ ପଣ୍ଡାଙ୍କ ଉପରେ ଆସ୍ଥା ପ୍ରକଟ କରିଛନ୍ତି । ଏହା ଅପରାଜିତାଙ୍କ ପାଇଁ ନିଶ୍ଚିତ ଝଟକା ବୋଲି କୁହାଯାଉଛି ।