ଭୁବନେଶ୍ୱର: ବିଶିଷ୍ଟ ସାହିତ୍ୟିକ, ଜଗନ୍ନାଥ ସଂସ୍କୃତି ଗବେଷକ, ବାଗ୍ମୀ ପଦ୍ମଶ୍ରୀ ରଜତ କର ଆଉ ନାହାନ୍ତି । ଆଜି ସଂଧ୍ୟାରେ ହୃଦଘାତରେ ତାଙ୍କର ପରଲୋକ ହୋଇଯାଇଛି । ତାଙ୍କୁ ୮୮ ବର୍ଷ ବୟସ ହୋଇଥିଲା । ରଜତ କରଙ୍କ ବିୟୋଗ ବିଭିନ୍ନ ମହଲରେ ଶୋକର ଛାୟା ଖେଳାଇ ଦେଇଛି । ପ୍ରଧାନମନ୍ତ୍ରୀ, ରାଜ୍ୟପାଳ, ମୁଖ୍ୟମନ୍ତ୍ରୀ, କେନ୍ଦ୍ରମନ୍ତ୍ରୀ ପ୍ରମୁଖ ଗଭୀର ଦୁଃଖ ପ୍ରକାଶ କରିଛନ୍ତି ।ରାଷ୍ଟ୍ରୀୟ ମର୍ଯ୍ୟାଦାର ସହ ତାଙ୍କର ଶେଷକୃତ୍ୟ ସମ୍ପନ୍ନ ହେବ ବୋଲି ମୁଖ୍ୟମନ୍ତ୍ରୀ ଘୋଷଣା କରିଛନ୍ତି ।
୧୯୩୪ ମସିହା ଅକ୍ଟୋବର ୨ ତାରିଖରେ କଟକରେ ଜନ୍ମଗ୍ରହଣ କରିଥିବା ରଜତ କର ରାଜ୍ୟ ସରକାରଙ୍କ ଶିକ୍ଷା ବିଭାଗରେ କାମ କରି ଏସସିଇଆଇଟିର ନିର୍ଦ୍ଦେଶକ ଭାବେ ଅବସର ନେଇଥିଲେ । କେବଳ ଜଣେ ଶିକ୍ଷାବିତ୍ ନୁହେଁ, ବହୁମୁଖୀ ପ୍ରତିଭାର ସେ ଥିଲେ ଅଧିକାରୀ । ଉଭୟ ଓଡ଼ିଆ ଓ ଇଂରାଜୀ ଭାଷାରେ ଜଣେ ସୁବକ୍ତା ଭାବରେ ତାଙ୍କର ଖ୍ୟାତି ଥିଲା ।
ଜଗନ୍ନାଥ ସଂସ୍କୃତି ଉପରେ ତାଙ୍କର ପ୍ରଚଣ୍ଡ ଦଖଲ ଥିଲା । ରଥଯାତ୍ରା ଧାରା ବିବରଣୀ ପାଇଁ ସେ ଘରେ ଘରେ ପରିଚିତ ଥିଲେ । ଦୀର୍ଘ ୬ ଦଶନ୍ଧୀ ଧରି ସେ ରେଡିଓ ଓ ଟିଭିରେ ପୁରୀରୁ ମହାପ୍ରଭୁଙ୍କ ପ୍ରସିଦ୍ଧ ରଥଯାତ୍ରାର ଧାରା ବିବରଣୀ ପ୍ରଦାନ କରି ଆସୁଥିଲେ । ଜଗନ୍ନାଥ ଧର୍ମ ଓ ରୀତିନୀତିକୁ ନେଇ ସେ ୭ ଟି ପୁସ୍ତକ ରଚନା କରିଥିଲେ । ଓଡ଼ିଶାରେ ପାଲା ସଂସ୍କୃତିକୁ ଜୀବିତ ରଖିବାରେ ସେ ଥିଲେ ମୁଖ୍ୟ ପୁରୋଧା ।
ନାଟକ ରଚନାରେ ମଧ୍ୟ ତାଙ୍କର ରୁଚି ଥିଲା । ତାଙ୍କ ରଚିତ ଅନେକ ନାଟକ ଲୋକପ୍ରିୟତା ଅର୍ଜନ କରିଥିଲା । ନାଟକ ଲେଖିବା ସହ ଆକାଶବାଣୀର ବିଭିନ୍ନ କାର୍ଯ୍ୟକ୍ରମରେ ମଧ୍ୟ ଅଭିନୟ କରିଥିଲେ ।
