ଭୁୁବନେଶ୍ୱର: ଯାହା ଅନୁମାନ କରାଯାଉଥିଲା ତାହା ହିଁ ସତ୍ୟ । ଏକ ମେମୋରି ଚିପ୍ ପାଇଁ ମାନସ ସ୍ୱାଇଁଙ୍କୁ ଅପହରଣ ପରେ ହତ୍ୟା କରାଯାଇଛି । ଅପହରଣର ଜଣେ ପ୍ରତ୍ୟକ୍ଷଦର୍ଶୀଙ୍କ ବୟାନ ଏହି ରହସ୍ୟ ଉପରୁ ପର୍ଦ୍ଦା ହଟାଇଛି । ଏହି ପ୍ରତ୍ୟକ୍ଷଦର୍ଶୀ ହେଉଛନ୍ତି ଚାନ୍ଦବାଲି ଅଞ୍ଚଳର ଜଣେ ୱେବ୍ ପୋର୍ଟାଲ୍ ସାମ୍ବାଦିକ ଶରତ ଚନ୍ଦ୍ର ପଣ୍ଡା । ଗତକାଲି ପୁଲିସ ତାଙ୍କର ବୟାନ ରେକର୍ଡ କରିଥିବା ବେଳେ ଆଜି ଗଣମାଧ୍ୟମରେ ସେ ଏହାର ଖୁଲାସା କରିଛନ୍ତି ।
ଶରତଙ୍କ ଆଖି ସାମନାରେ ମାନସଙ୍କୁ ଅପହରଣ କରାଯାଇଥିଲା । ନିଜର ଦଳବଳ ସହ “ସମ୍ପୂର୍ଣ୍ଣା’ ୱେବ୍ ଚାନେଲ ମାଲିକାଣୀ ଶର୍ମିଷ୍ଠା ରାଉତ ତାଙ୍କୁ ଚାନ୍ଦବାଲିରୁ ଅପହରଣ କରି ଆଣିଥିଲେ । ଶରତଙ୍କ କହିବାନୁଯାୟୀ, ଫେବ୍ରୁଆରୀ ୬ ତାରିଖ ରାତି ପ୍ରାୟ ୧୦ଟା ବେଳେ ପ୍ରେସ୍ ଲେଖାଥିବା ଏକ ଗାଡ଼ି ତାଙ୍କ ପାଖକୁ ଆସିଥିଲା । ସେଥିରେ ଦୁଇ ମହିଳା ଏବଂ ୩ ପୁରୁଷ ଥିଲେ । ସମ୍ପୂର୍ଣ୍ଣା ଚାନେଲ୍ ର ଓନର୍ ଭାବେ ଜନୈକା ଶର୍ମିଷ୍ଠା ରାଉତ ନିଜର ପରିଚୟ ଦେଇ ତାଙ୍କ ସହ କଥା ହୋଇଥିଲେ । ପଳାଶପୁର ଗାଁ କେଉଁଠି ବୋଲି ପଚାରି ବୁଝିଥିଲେ ।
ଆଉ ପରଦିନ ସକାଳେ ଶର୍ମିଷ୍ଠା ଓ ଗ୍ୟାଙ୍ଗ୍ ପଳାଶପୁର ଛକରେ ଛକି ରହିଥିଲେ । ଗାଁରେ ଏକ ବାହାଘର ସୁଟିଂ ସାରି ସହଯୋଗୀ କ୍ୟାମେରାମ୍ୟାନ୍ ଦେବାଶିଷ ଜେନାଙ୍କ ସହ ଫେରୁଥିବା ମାନସଙ୍କୁ ସେମାନେ ଅଟକାଇଥିଲେ । ମାନସଙ୍କୁ ଦେଖିଲା ମାତ୍ରେ ଶର୍ମିଷ୍ଠା ଉତକ୍ଷିପ୍ତ ହୋଇ ଉଠିଥିଲେ । ମେମୋରି ଚିପ୍ କାଇଁ ବୋଲି ପଚାରି ଦୁଇ ଚାପଡ଼ା ମାରିଥିଲେ । ମେମୋରି ଚିପ୍ ଏବେ ପାଖରେ ନାହିଁ, ଭୁବନେଶ୍ୱରରେ ଅଛି ବୋଲି ମାନସ କହିବା ପରେ ଶର୍ମିଷ୍ଠା ମାନସଙ୍କୁ ଗାଡ଼ିରେ ନେଇଯାଇଥିଲେ ବୋଲି ଶରତ କହିଛନ୍ତି ।
ସୂଚନାଥାଉକି, ଚାନ୍ଦବାଲି ନିକଟସ୍ଥ ପଳାଶପୁର ଗାଁକୁ ଏକ ବାହାଘର ସୁଟିଂ ପାଇଁ ମାନସ ଯାଇଥିବାର ସୂଚନା ପାଇଲା ପରେ ଶର୍ମିଷ୍ଠା ତାଙ୍କର ପିଛା କରିଥିଲେ । ସେହି ଅଞ୍ଚଳ ସମ୍ପର୍କରେ ଅଜ୍ଞ ଥିବାରୁ ସେଠାକାର ସାମ୍ବାଦିକ ଶରତ ପଣ୍ଡାଙ୍କର ଠିକଣା କେଉଁଠୁ ସେ ସଂଗ୍ରହ କରିଥିଲେ । ପଳାଶପୁର ଗାଁ ସମ୍ପର୍କରେ ପଚାରି ସୁନିଶ୍ଚିତ ହେବା ଥିଲା ତାଙ୍କୁ ଭେଟିବାର ଉଦ୍ଦେଶ୍ୟ ।
ସେପଟେ ଭୁବନେଶ୍ୱରରେ ଥିବା ଶର୍ମିଷ୍ଠାଙ୍କ ପରିଚାଳିତ ଦୟାଲ୍ ବୃଦ୍ଧାଶ୍ରମର ପଡୋଶୀଙ୍କ ସିସିଟିଭି କ୍ୟାମେରାକୁ ଆଜି ପୁଲିସ ଯାଞ୍ଚ କରି ହାର୍ଡଡିସ୍କ ଜବତ କରିଛି । ଫେବ୍ରୁଆରୀ ୭ ତାରିଖରେ ମାନସଙ୍କୁ ସେଠାକୁ ଅଣାଯାଇଥିବା ଏବଂ ହତ୍ୟା ପରେ ତାଙ୍କୁ ସେଠାରୁ ନିଆଯାଇଥିବାର ଦୃଶ୍ୟ ସିସିଟିଭିରେ କଏଦ ହୋଇଥିବା ଏକ ସୂତ୍ରରୁ ଜଣାପଡ଼ିଛି । ହାର୍ଡଡିସ୍କକୁ ନଷ୍ଟ କରିଦେବା ପାଇଁ ସଂପୃକ୍ତ ଘର ମାଲିକଙ୍କୁ ଶର୍ମିଷ୍ଠା ଧମକ ଦେଇଥିବା ତଦନ୍ତ ବେଳେ ପୁଲିସ ମଧ୍ୟ ଜାଣିବାକୁ ପାଇଛି ।
