ଭୁବନେଶ୍ୱର: ବାଲେଶ୍ୱର ଫକୀର ମୋହନ କଲେଜ ଛାତ୍ରୀ ସୌମ୍ୟାଶ୍ରୀ ବିଶିଙ୍କୁ ଆତ୍ମାହୁତି ପାଇଁ ଉସକାଇଥିଲେ ତାଙ୍କ ସହଯୋଗୀ ଏବିଭିପି ଛାତ୍ରନେତା । କ୍ରାଇମବ୍ରାଞ୍ଚ ର ଖୋଳତାଡ଼ ବେଳେ ଏହି ଗୁମର ପଦାକୁ ଆସିଛି । ହତ୍ୟା ଷଡ଼ଯନ୍ତ୍ର ଅଭିଯୋଗରେ ଦୁଇ ଛାତ୍ରନେତା ଶୁଭ୍ର ସମ୍ବିତ ନାୟକ ଏବଂ ଜ୍ୟୋତିପ୍ରକାଶ ବିଶ୍ୱାଳଙ୍କୁ ଗତକାଲି ବିଳମ୍ବିତ ରାତିରେ କ୍ରାଇମବ୍ରାଞ୍ଚ ଗିରଫ କରିବା ପରେ ଏହି ମାମଲାର ରହସ୍ୟ ଉପରୁ ପରଦା ହଟିଛି । ଜଣେ ଅଧିକାରୀଙ୍କ ସୂଚନା ଅନୁଯାୟୀ, ସୌମ୍ୟାଶ୍ରୀଙ୍କୁ ଆତ୍ମାହୁତି ପାଇଁ ଏମାନେ ଖାଲି ଉସକାଇ ନ ଥିଲେ, ସହଯୋଗ ବି କରିଥିଲେ । ଶୁଭ୍ର ସମ୍ବିତ ତାଙ୍କୁ ଦିଆସିଲି ଧରାଇ ଦେଇଥିବା ବେଳେ ଜ୍ୟୋତି ପ୍ରକାଶ ନିଜ ମୋବାଇଲରେ ନିଆଁ ଲାଗିବା ଦୃଶ୍ୟ ରେକର୍ଡ କରୁଥିଲେ ।
ଯୁକ୍ତ ତିନି ପଢ଼ୁଥିବା ଜ୍ୟୋତି ପ୍ରକାଶ ଗତକାଲି ଯାଏଁ ଜନମାନସରେ ହୀରୋ ଥିଲେ । ସୌମ୍ୟାଶ୍ରୀଙ୍କ ଦେହରେ ନିଆଁ ଲାଗିଥିବା ବେଳେ ସେ ତାଙ୍କୁ ବଞ୍ଚାଇବାକୁ ଚେଷ୍ଟା କରିଥିଲେ ଏବଂ ନିଆଁରେ ଜଳି ନିଜେ ଆହତ ହୋଇଥିଲେ । କଟକ ଏସସିବିରେ ଚିକିତ୍ସିତ ହେଲା ପରେ ସୁସ୍ଥ ହୋଇ ଗତ ୨୮ ତାରିଖରେ ଘରକୁ ଫେରିଥିଲେ । ହେଲେ ସେ ଏହି ଜଘନ୍ୟ କାଣ୍ଡର ଅନ୍ୟତମ ଖଳନାୟକ ଭାବେ ଗିରଫ ହୋଇଛନ୍ତି ।
ଅନ୍ୟତମ ଗିରଫ ଛାତ୍ରନେତା ଶୁଭ୍ର ସମ୍ବିତ ନାୟକ ଏବିଭିପି ରାଜ୍ୟ ଯୁଗ୍ମ ସମ୍ପାଦକ ଦାୟିତ୍ୱରେ ଅଛନ୍ତି । ଜୁନ୍ ୩୦ ତାରିଖରେ କଲେଜ ଅଧ୍ୟକ୍ଷଙ୍କ ପାଖରେ ସେ ସୌମ୍ୟାଶ୍ରୀଙ୍କ ପାଇଁ ଓକିଲାତି କରୁଥିବାର ଭିଡିଓ ସମସ୍ତେ ଦେଖିଥିଲେ । ହୁଏତ ଅଧ୍ୟକ୍ଷଙ୍କୁ ଡରାଇବା ପାଇଁ ସେ ସୌମ୍ୟାଙ୍କୁ ନିଆଁରେ ଜଳାଇବାର ପ୍ଲଟ୍ ରଚନା କରିଥାଇପାରନ୍ତି ।
ଘଟଣାର ୨୩ ଦିନ ପରେ କ୍ରାଇମବ୍ରାଞ୍ଚର ଏହି ବଡ଼ କାର୍ଯ୍ୟାନୁଷ୍ଠାନ ଗ୍ରହଣ କରିଛି । ଇତିମଧ୍ୟରେ ଘଟଣାଦିନ ସୌମ୍ୟାଶ୍ରୀଙ୍କର ଆଉ ଏକ ସିସିଟିଭି ଫୁଟେଜ୍ ତଦନ୍ତକାରୀ ଟିମ୍ ର ହସ୍ତଗତ ହୋଇଛି । ସକାଳ ୧୦. ୪୪ ମିନିଟ୍ ରେ କଏଦ ହୋଇଥିବା ଏକ ସିସିଟିଭିରେ ସୌମ୍ୟାଶ୍ରୀ ପେଟ୍ରୋଲ୍ ପମ୍ପ ଦିଗରେ ସାଇକେଲରେ ଯାଉଥିବା ଦେଖିବାକୁ ମିଳୁଛି । ପେଟ୍ରୋଲ ପମ୍ପରୁ ସେ ନିଜେ ପେଟ୍ରୋଲ୍ ଆଣିଥାଇପାରନ୍ତି ବୋଲି ସନେ୍ଦହ କରାଯାଉଛି । ତେବେ କ୍ରାଇମବ୍ରାଞ୍ଚ ପୁଲିସ ଘଟଣାର ସବୁ ଦିଗକୁ ତଦନ୍ତ କରୁଛି ଏବଂ କୌଣସି ଅପରାଧୀଙ୍କୁ ଛଡ଼ାଯିବ ନାହିଁ ବୋଲି ଜଣେ ବରିଷ୍ଠ ଅଧିକାରୀ ସୂଚନା ଦେଇଛନ୍ତି ।
ଅନ୍ୟପକ୍ଷରେ ସୌମ୍ୟାଶ୍ରୀ ହତ୍ୟା ଷଡ଼ଯନ୍ତ୍ରରେ ଦୁଇ ଏବିଭି ଛାତ୍ରନେତା ଗିରଫ ହେବା ଘଟଣା ରାଜ୍ୟ ରାଜନୀତିରେ ନିଆଁ ଲଗାଇ ଦେଇଛି । ଏହି ଘଟଣାରେ ବିଜେଡି ଏବଂ କଂଗ୍ରେସର ଛାତ୍ର ସଂଗଠନ ସଂପୃକ୍ତ କହି ରାଜ୍ୟ ଏବିଭିପି ସଂଗଠନର ଛାତ୍ରନେତାମାନେ ରାଜରାସ୍ତା ଫଟାଉଥିଲେ । ଭୁବନେଶ୍ୱର ଏମସ୍ ରେ ଜଣେ ନେତ୍ରୀଙ୍କର ରୋବାବ୍ ଦେଖିବାକୁ ମିଳିଥିଲା । ସେଠାକୁ ଆସୁଥିବା ବିରୋଧୀ ଦଳ ନେତାମାନଙ୍କ ବାଟ ଓଗାଳିବାକୁ ଚେଷ୍ଟା କରୁଥିଲେ । ବିଜେପିର ଛାମୁଆ ନେତାମାନେ ଏବିଭିପି ସମର୍ଥନରେ ବାହାରି ଟିଭି ଷ୍ଟୁଡିଓ ଫଟଉଥିଲେ ।
ଅପରପକ୍ଷେ, ଏହି ମାମଲାରେ ଏବିଭିପିର ସଂପୃକ୍ତି ଅଭିଯୋଗ ଆଣି ଜୋରଦାର ଆନେ୍ଦାଳନ କରିଥିଲା ଛାତ୍ର କଂଗ୍ରେସ । ନେତୃତ୍ୱ ନେଉଥିଲେ ସଭାପତି ଉଦିତ୍ ପ୍ରଧାନ । ମାତ୍ର ରାଜନୀତିର ଚକ୍ରବ୍ୟୁହରେ ସେ ଛେଦି ହୋଇଗଲେ । ଏକ ଯୁବତୀ ଅସଦାଚରଣ ମାମଲାରେ ତାଙ୍କୁ ଜେଲ୍ ରେ ବନ୍ଦୀ ଜୀବନ କାଟିବାକୁ ପଡୁଛି । ଚର୍ଚ୍ଚା ହେଲା, ଛାତ୍ର କଂଗ୍ରେସ ସଭାପତିଙ୍କୁ ଫସାଇ ଦିଆଗଲା । କୋର୍ଟରେ ଏହାର ବିଚାର ହେବାକୁ ଥିବା ବେଳେ ସୌମ୍ୟାଶ୍ରୀ ହତ୍ୟା ଷଡ଼ଯନ୍ତ୍ରରେ ଦୁଇ ଏବିଭିପି ଛାତ୍ରନେତାଙ୍କ ଗିରଫ ରାଜନୀତି ମଇଦାନକୁ କିନ୍ତୁ ସରଗରମ କରିଛି ।
ବିଜେପିର ରକ୍ଷକ ଭାବେ ଏବିଭିପି ବିଛାଇଥିବା ଜାଲରେ ସେ ନିଜେ ପଡ଼ିଗଲା କହି ବିରୋଧୀ ପକ୍ଷ ସମାଲୋଚନା କରିଛନ୍ତି । ଅନ୍ୟପକ୍ଷରେ ଏହା ରାଜନୀତିକ ଷଡ଼ଯନ୍ତ୍ର ବୋଲି ଏବିଭିପି ରାଜ୍ୟ ସଂଗଠନ ପକ୍ଷରୁ ସଫେଇ ଦିଆଯାଇଛି ।
