ଭୁବନେଶ୍ୱର: ବାଲେଶ୍ୱର ଜିଲ୍ଲା ଜଳସେଚନ ବିଭାଗର ଅଧୀକ୍ଷଣ ଯନ୍ତ୍ରୀ ପ୍ରଭାସ ଚନ୍ଦ୍ର ପ୍ରଧାନ ଶେଷରେ ବନ୍ଧା ହୋଇଛନ୍ତି । ଜଣେ ଯନ୍ତ୍ରୀଙ୍କର ଏଭଳି ଅଚଳାଅଚଳ ସମ୍ପତ୍ତି ସାରା ରାଜ୍ୟବାସୀଙ୍କୁ ତାଜୁବ୍ କରିଦେଇଛି । ଗତକାଲି ଭିଜିଲାନସ୍ ଚଢ଼ଉରୁ ତାଙ୍କର ଏକ ପାଞ୍ଚ ମହଲା କୋଠା, ମାର୍କେଟ୍ କମ୍ପ୍ଲେକ୍ସ, ୮୫ଟି ପ୍ଲଟ୍ ସମେତ ଅନ୍ୟାନ୍ୟ ସମ୍ପତ୍ତି ଠାବ ହୋଇଛି । ହେଲେ ତାଙ୍କର ଉଭା ଯେତିକି, ପୋତା ସେତିକି ସମ୍ପତ୍ତି । ଯାହାକୁ ଖୋଜି ବାହାର କରିବା ଭିଜିଲାନସ ପକ୍ଷରେ ସମ୍ଭବ ନୁହେଁ ବୋଲି କୁହାଯାଉଛି ।
ଏହି ବାବୁଙ୍କର ଚାକିରି ଜୀବନ ସମ୍ପର୍କରେ ଭିଜିଲାନସ୍ ଆଜି ଚମକପ୍ରଦ ତଥ୍ୟ ପ୍ରଦାନ କରିଛି । ବାଲେଶ୍ୱର ଜିଲ୍ଲା ଜଳେଶ୍ୱରରେ ତାଙ୍କ ଘର । ୧୯୯୪ ମସିହାରେ ଷ୍ଟାଇପେଣ୍ଡାରି ଇଞ୍ଜିନିୟର୍ ଭାବେ ଚାକିରି ଜୀବନ ଆରମ୍ଭ କରିଥିଲେ । ୧୯୯୬ ରୁ ୧୯୯୯ ମସିହା ସେ ମୟୁରଭଞ୍ଜ ଜିଲ୍ଲାରେ ଅବସ୍ଥାପିତ ଥିଲେ । ୧୯୯୯ ରୁ ୨୦୦୮ ଦୀର୍ଘ ୯ ବର୍ଷ ଧରି ସେ ଘରୋଇ ଜିଲ୍ଲା ବାଲେଶ୍ୱରରେ ଥିଲା ବେଳେ ଆସିଷ୍ଟାଣ୍ଟ ଇଞ୍ଜିନିୟର ଭାବେ ପଦୋନ୍ନତି ପାଇଥିଲେ । ଏହାପରେ ସେ ଭଦ୍ରକ ଏବଂ ମୟୁରଭଞ୍ଜରେ ବର୍ଷେ ଲେଖାଏଁ ଚାକିରି କରିଥିଲେ । ୨୦୧୦ରୁ ଦୀର୍ଘ ୧୦ ବର୍ଷ ଧରି ସେ କେନ୍ଦ୍ରାପଡ଼ା ଜିଲ୍ଲାର ଆଳି ଏମବ୍ୟାଙ୍କମେଣ୍ଟ ଡିଭିଜିନ୍ ରେ ଥାଇ ଏଇଇ ଏବଂ ଡିଇଇକୁ ପଦୋନ୍ନତି ପାଇଥିଲେ ।
୨୦୨୦ ଡିସେମ୍ବରରେ ସେ ଘରୋଇ ଜିଲ୍ଲା ବାଲେଶ୍ୱରକୁ ଏକଜ୍ୟୁଟିଭ୍ ଇଞ୍ଜିନିୟର(ଇଇ) ହୋଇ ଆସିଥିଲେ । ୨୦୨୧ ରେ ସୁପରିଟେଣ୍ଡେଣ୍ଟ ଇଞ୍ଜିନିୟର(ଏସଇ)କୁ ପଦୋନ୍ନତି ପାଇ ବାଲେଶ୍ୱର ଜଳସେଚନ ବିଭାଗରେ କାର୍ଯ୍ୟରତ ଥିଲେ । ତିନି ଦିନ ପୂର୍ବରୁ (ଜୁଲାଇ)ରେ ରାଜ୍ୟ ସରକାର ତାଙ୍କୁ କେନ୍ଦୁଝର ଶାଳପଡ଼ାସ୍ଥିତ ଆନନ୍ଦପୁର ବ୍ୟାରେଜ୍ ଡିଭିଜନର ମୁଖ୍ୟଯନ୍ତ୍ରୀ ଭାବେ ପଦୋନ୍ନତି ଦେଇଥିଲେ । ତେବେ କେନ୍ଦୁଝରରେ କାର୍ଯ୍ୟରେ ଯୋଗଦେବାକୁ ଯିବା ପୂର୍ବରୁ ଗତକାଲି ତାଙ୍କ ଉପରେ ଭିଜିଲାନସ୍ ଚଢ଼ାଉ କରିଥିଲା ।
ଚାକିରି ଜୀବନରେ ପ୍ରଭାସ ପ୍ରଧାନଙ୍କର ଏଭଳି ସୌଭାଗ୍ୟପ୍ରାପ୍ତି ଅନ୍ୟ କେଉଁ ଚାକିରିଆଙ୍କ ଜୀବନରେ କ୍ୱଚିତ ଦେଖିବାକୁ ମିଳେ । କେବଳ ପଦୋନ୍ନତି ପରେ ପଦୋନ୍ନତି ନୁହେଁ, ମୋଟା ରକମର ମାଲ୍ କମାଇବାରେ ଏ ବାବୁ ସିଦ୍ଧହସ୍ତ ବୋଲି ବିଭାଗରେ ସମସ୍ତେ ଜାଣିଥିଲେ । କିନ୍ତୁ କେହି ତାଙ୍କ ବିରୋଧରେ ପାଟି ଖୋଲୁ ନ ଥିଲେ । କାରଣ ଉପକୂଳ ଅଞ୍ଚଳର ଜଣେ ପ୍ରଭାବଶାଳୀ ନେତା ତଥା ପୂର୍ବତନ ମନ୍ତ୍ରୀଙ୍କ ଆଶୀର୍ବାଦରେ ସେ ଥିଲେ ବଳୀୟାନ୍ । ଏହି ନେତାଙ୍କ ଛତ୍ରଛାୟାରେ ରହି ସେ ଧରାକୁ ସରା ମନେ କରୁ ନ ଥିଲେ । ଅବଶ୍ୟ ସରକାରଙ୍କ ଗେହ୍ଲାପୁଅ ହୋଇ ରହିବାଟା ତାଙ୍କ ପାଇଁ ମାଗଣା ନ ଥିଲା । ସେଥିପାଇଁ ଗଡ଼ଫାଦରଙ୍କଠାରୁ ଆରମ୍ଭ କରି ଅନ୍ୟମାନଙ୍କ ମନଖୁସି କରିବାକୁ ପଡୁଥିଲା ବୋଲି ଚର୍ଚ୍ଚା ହେଉଛି ।
ଜଣେ ବରିଷ୍ଠ ନେତାଙ୍କ ସୂଚନା ଅନୁଯାୟୀ, ପ୍ରଭାସ ପ୍ରଧାନ କାହାର ଲୋକ ସେକଥା କେନ୍ଦ୍ରାପଡ଼ା ଓ ବାଲେଶ୍ୱର ଅଞ୍ଚଳରେ ସମସ୍ତେ ଜାଣିଛନ୍ତି । ବାଲେଶ୍ୱର ଉପନିର୍ବାଚନ ବେଳେ ସେ ବିଜେଡି ପ୍ରାର୍ଥୀଙ୍କ ପାଇଁ ମୋଟା ଅଙ୍କର ଚାନ୍ଦା ଦେଇଥିଲେ । ତାଙ୍କର ଗଡ଼ଫାଦରଙ୍କ ନିର୍ବାଚନ ଖର୍ଚ୍ଚଠାରୁ ଆରମ୍ଭ କରି ସବୁ ରାଜନୈତିକ କାର୍ଯ୍ୟକ୍ରମ ପାଇଁ ତାଙ୍କର ହାତ ଖୋଲା ଥିଲା । ଶାସକ ଦଳର ଛତ୍ରଛାୟାରେ ଏହି ବାବୁ ସରକାରୀ ରାଜକୋଷକୁ ଲୁଟି ଚାଲିଥିଲେ ବୋଲି ଏହି ବରିଷ୍ଠ ନେତା ତାଙ୍କ ପ୍ରତ୍ୟକ୍ଷ ଅନୁଭୂତିରୁ କହିଛନ୍ତି ।
ତେବେ କେବଳ ପ୍ରଭାସ ପ୍ରଧାନଙ୍କ କ୍ଷେତ୍ରରେ ନୁହେଁ, ଅସାଧୁ ଓ ଦୁର୍ନୀତିଗ୍ରସ୍ତ ସରକାରୀ ଅଧିକାରୀଙ୍କ ପଛରେ ପ୍ରଭାବଶାଳୀ ରାଜନେତାଙ୍କ ଆଶୀର୍ବାଦର ଆହୁରି ଅନେକ ଉଦାହରଣ ରହିଛି । ଅତୀତରେ କୋଟି କୋଟି ଟଙ୍କା ଲୁଟି ସରକାରୀ ଚାକିରିରୁ ତଡ଼ା ଖାଇଥିବା ଜନୈକ ଆସିଷ୍ଟାଣ୍ଟ ଇଞ୍ଜିନିୟରଙ୍କ ସହ ଜଣେ କ୍ୟାବିନେଟ୍ ମନ୍ତ୍ରୀଙ୍କ ଗହନ ସମ୍ପର୍କକୁ ନେଇ ଚର୍ଚ୍ଚା ହୋଇଥିଲା । ସେମାନଙ୍କ ମଧ୍ୟରେ ଏମିତି ଭାବ ଥିଲା ଯେ ଚାକିରିରୁ ତଡ଼ା ଖାଇଲା ପରେ ମଧ୍ୟ ସଂପୃକ୍ତ ଦୁର୍ନୀତିଗ୍ରସ୍ତ ବ୍ୟକ୍ତିଙ୍କ ପାଇଁ ମନ୍ତ୍ରୀଙ୍କ ଦ୍ୱାର ଖୋଲା ରହିଲା । ତତ୍କାଳୀନ ସେହି ମନ୍ତ୍ରୀଙ୍କ ପ୍ରୋତ୍ସାହନରେ ସେ ଉଦ୍ୟୋଗୀ ବନିଛନ୍ତି ।
