ଭୁବନେଶ୍ୱର: ଅସ୍ଥାୟୀ ପୁଲିସ ଡିଜି ଅରୁଣ ଷଡ଼ଙ୍ଗୀଙ୍କୁ ହଟାଇ ଜଣେ ସ୍ଥାୟୀ ଡିଜିପିଙ୍କୁ ନିଯୁକ୍ତି ପାଇଁ ନୂଆ ସରକାର ପ୍ରକ୍ରିୟା ଆଗକୁ ବଢ଼ାଇଛନ୍ତି । ଏହିକ୍ରମରେ ତିନିଜଣ ବରିଷ୍ଠ ଆଇପିଏସ୍ ଅଧିକାରୀଙ୍କଠାରୁ ବାୟୋଡାଟା ମଗାଯାଇଛି । ସେମାନେ ହେଲେ ୧୯୮୮ ବ୍ୟାଚ୍ ର ଅରୁଣ କୁମାର ରାୟ, ୧୯୮୯ ବ୍ୟାଚ୍ ର ଏସ.ଏମ.ନରବାଣେ ଏବଂ ୧୯୯୦ ବ୍ୟାଚ୍ ର ୱାଇ.ବି.ଖୁରାନିଆ । ସୁତରାଂ ଏହି ତିନିଜଣଙ୍କ ମଧ୍ୟରୁ ଜଣେ ଓଡ଼ିଶା ପୁଲିସର ସର୍ବୋଚ୍ଚ ପଦବୀରେ ନିଯୁକ୍ତି ପାଇବେ ।
ଓଡିଶା କ୍ୟାଡରର ଏହି ତିନି ଜଣ ବରିଷ୍ଠ ଆଇପିଏସ୍ ହେଉଛନ୍ତି ଅଣଓଡ଼ିଆ । ଅରୁଣ ରାୟଙ୍କ ଘର ପଶ୍ଚିମବଙ୍ଗ(କୋଲକତା) ହୋଇଥିବା ବେଳେ ନରବାଣେଙ୍କ ଘର ମହାରାଷ୍ଟ୍ର ଏବଂ ଖୁରାନିଆଙ୍କ ଘର ହରିଆନାରେ । ତେଣୁ ଏମାନଙ୍କ ମଧ୍ୟରେ ଯିଏ ବି ଡିଜି ହୁଅନ୍ତୁ ନା କାହିଁକି, ସେ ଓଡ଼ିଆ ନୁହଁନ୍ତି । ଅର୍ଥାତ୍, ଓଡ଼ିଆ ଅସ୍ମିତାକୁ ନିର୍ବାଚନୀ ପ୍ରସଙ୍ଗ କରି କ୍ଷମତାକୁ ଆସିଥିବା ବିଜେପି ସରକାରରେ ଅଣଓଡିଆ ମନୋଜ ଆହୁଜାଙ୍କୁ ମୁଖ୍ୟ ଶାସନ ସଚିବ କରାଯାଇଥିବା ବେଳେ ଆଉ ଜଣେ ଅଣଓଡ଼ିଆ ପୁଲିସ ଡିଜି ହେବାକୁ ଯାଉଛନ୍ତି ।
ସୂଚନାଥାଉକି, ୨୦୨୩ ଡିସେମ୍ବର ୩୧ ତାରିଖରେ ତତ୍କାଳୀନ ଡିଜି ସୁନୀଲ ବଂଶଲଙ୍କ ଅବସର ପୂର୍ବରୁ ରାଜ୍ୟ ସରକାର କେନ୍ଦ୍ର ସରକାରଙ୍କୁ ଡିଜି ନିଯୁକ୍ତି ସଂକ୍ରାନ୍ତ ପ୍ରସ୍ତାବ ଦେଇଥିଲେ । ଏଥିପାଇଁ ବରିଷ୍ଠ ଅଧିକାରୀଙ୍କ ନାମ ତାଲିକା କେନ୍ଦ୍ରକୁ ପଠାଯାଇଥିଲା । ତେବେ ୟୁପିଏସସି ବୈଠକ ବସି ନଥିବାରୁ ୧୯୯୦ ବ୍ୟାଚ୍ ଆଇପିଏସ୍ ଅରୁଣ ଷଡ଼ଙ୍ଗୀଙ୍କୁ ତତ୍କାଳୀନ ରାଜ୍ୟ ସରକାର କାର୍ଯ୍ୟକାରୀ ଡିଜି ଭାବେ ନିଯୁକ୍ତି ଦେଇଥିଲେ ।
ଗତ ୭ ମାସ ହେଲା ଅରୁଣ ଷଡ଼ଙ୍ଗୀଙ୍କ ନେତୃତ୍ୱରେ ରାଜ୍ୟ ପୁଲିସ ଅନେକ ସଫଳତା ହାସଲ କରିଛି । ନକ୍ସଲ ଦମନ ସାଙ୍ଗକୁ ରାଜ୍ୟରେ ଆଇନ ଶୃଙ୍ଖଳା ପରିସ୍ଥିତିକୁ ସେ ଭଲ ଭାବେ ସମ୍ଭାଳିଛନ୍ତି । ରାଜ୍ୟରେ ସାଧାରଣ ନିର୍ବାଚନ ଶୃଙ୍ଖଳାର ସହ ଶେଷ ହୋଇଛି । ପୁରୀ ରଥଯାତ୍ରା ମଧ୍ୟ ଶାନ୍ତିଶୃଙ୍ଖଳାର ସହ ଶେଷ ହୋଇଛି । ଏହାସତ୍ତ୍ୱେ ନୂଆ ସରକାର ଶ୍ରୀ ଷଡ଼ଙ୍ଗୀଙ୍କୁ ଅପସାରଣ କରିବାକୁ ଯାଉଥିବା ସ୍ପଷ୍ଟ ହୋଇଛି ।
ସୂଚନା ଅନୁଯାୟୀ, ୱାଇ.ବି.ଖୁରାନିଆଙ୍କୁ ନଜରରେ ରଖି ରାଜ୍ୟ ସରକାର ପ୍ରକ୍ରିୟା ଆଗକୁ ବଢ଼ାଇଛନ୍ତି । ବାୟୋଡାଟା ମଗାଯାଇଥିବା ଅନ୍ୟ ଦୁଇ ବରିଷ୍ଠ ଆଇପିଏସ୍ ଅରୁଣ ରାୟ ଏବଂ ଏସ.ଏମ.ନରବଣେ ବର୍ତ୍ତମାନ ଭଲ ଜାଗାରେ ନାହାନ୍ତି । ଶ୍ରୀ ରାୟଙ୍କୁ ପ୍ରିଣ୍ଟିଂ ନିର୍ଦ୍ଦେଶକ ଭାବେ କଟକରେ ଅବସ୍ଥାପିତ କରାଯାଇଥବା ବେଳେ ଶ୍ରୀ ନରବାଣେଙ୍କୁ ଗୃହ ବିଭାଗର ଓଏଏସଡି ଭାବେ ବସାଯାଇଛି ।
ୱାଇ.ବି.ଖୁରାନିଆଙ୍କ କଥା କିନ୍ତୁ ଭିନ୍ନ । ବିଏସଏଫ ସ୍ୱତନ୍ତ୍ର ଡିଜି ଥିବା ଖୁରାନିଆଙ୍କୁ କେନ୍ଦ୍ର ସରକାର ଦୁଇଦିନ ତଳେ ଓଡ଼ିଶା ଫେରାଇ ଦେଇଛନ୍ତି । ତାଙ୍କ ସହ ବିଏସଏଫ ଡିଜି ନୀତିନ ଅଗ୍ରୱାଲଙ୍କୁ ବି ତାଙ୍କର ମୂଳ କ୍ୟାଡର କେରଳକୁ ଫେରାଇ ଦିଆଯାଇଛି । ଜମ୍ମୁ କଶ୍ମୀରରେ ବାରମ୍ବାର ଆତଙ୍କୀ ହମଲା ପାଇଁ ବିଏସଏଫର ଏହି ଦୁଇ ସର୍ବୋଚ୍ଚ ଅଧିକାରୀଙ୍କୁ କେନ୍ଦ୍ର ସରକାର ସେମାନଙ୍କ ମୂଳ କ୍ୟାଡର୍ କୁ ଫେରାଇ ଦେଲେ ବୋଲି ଜାତୀୟ ଗଣମାଧ୍ୟମରେ ଚର୍ଚ୍ଚା ହୋଇଥିଲା । ଏହାକୁ କେନ୍ଦ୍ର ସରକାରଙ୍କ ଏକ କାର୍ଯ୍ୟାନୁଷ୍ଠାନ ବୋଲି କୁହାଗଲା । ମାତ୍ର ଏହା ଯେ ଭୁଲ୍ ତାହା ରାଜ୍ୟ ସରକାରଙ୍କ ପଦକ୍ଷେପରୁ ଜଣାପଡୁଛି ।
ତେବେ ଯାହା ହେଉ, ସ୍ଥାୟୀ ଡିଜିପି ନିଯୁକ୍ତି ପରେ ନୂଆ ବିଜେପି ସରକାରଙ୍କ “ଓଡ଼ିଆ ଅସ୍ମିତା’ କେଉଁ ରୂପରେ ଆତ୍ମପ୍ରକାଶ ପାଇବ ତାହା ଦେଖିବାର କଥା ।
